Koya Bible
ଯାତ୍ରା 38
ହୋମ୍ ବେଦିତେ ତିଆର୍
(ଯାତ୍ରା ୨୭:୧-୮)
ତାନ୍ପେର୍କେ ଆ ଶିଟିମ୍ ୱେର୍ ଏଇଙ୍ଗ୍ କାଇ ଲାଟି ନୁ ଏଇଙ୍ଗ୍ କାଇ ଓସାର୍ ନୁ ମୁଣ୍ଡୁ କାଇ ଡ଼େଙ୍ଗ୍ ଅଣ୍ଡୟ୍ ନାଲୁ ମୁଲା ଦୁପାମ୍ ବେଦି ତିଆର୍ ମାଡ଼୍ତଡ଼୍। ମେଣ୍ଡେ ଆଗେତ୍ ନାଲୁ ମୁଲା ପର ନେତ୍ ତିଆର୍ ମାଡ଼୍ ପିତ୍ତଲ୍ତେ ମାଡ଼୍ପ୍ତଡ଼୍; ଆ କକ୍ସାରେ ଆଗେତ୍ ଦୁଡ଼ାତାୱୁ ଆତ୍ତେ। ମେଣ୍ଡେ ଆ ବେଦିତ୍ ସାରେ ସାମାନ୍, ଇତ୍କେ, ନିର୍ ଟେଣ୍ଡାନାଦ୍, କିସ୍ ଡ଼େୱାନାଦ୍, କୁଣ୍ଡ୍, ତ୍ରିଶୁଲ୍, ତାଡ଼୍ମିନ୍ ନିର୍, ଇ ସାରେ ସାମାନ୍ ପିତ୍ତଲ୍ତେ ତିଆର୍ ମାଡ଼୍ତଡ଼୍। ଇ ବେଦିତେ ଦୁଡ଼୍ ମଦଲ୍କନ୍ ପର ୱେୟିନା ପିତ୍ତଲ୍ତେ ତିଆର୍ ଆତ୍ତେ ଜାଲି ଇକ୍ଲଲେମ୍ ମାଡ଼୍ତଡ଼୍। ମେଣ୍ଡେ ସାଙ୍ଗିତେ ଲତ୍ତେ ମାଇଦିଙ୍କ୍ ଆ ପିତ୍ତଲ୍ ଇକ୍ଲେମ୍ତେ ନାଲୁ ମୁଲା ନାଲୁ ଇକ୍ଲେମ୍ ତଃତଡ଼୍। ମେଣ୍ଡେ, ଆ ଶିଟିମ୍ ୱେର୍କ୍ତେ ଆ ଟେଙ୍ଗା ତିଆର୍ ମାଡ଼ି ପିତ୍ତଲ୍ତେ ମାଡ଼୍ପ୍ତଡ଼୍। ବେଦି ତିଆର୍ତେ ଆ ପାକେ ପର୍ତେ ଆ ଟେଙ୍ଗା ଇକ୍ଲେମ୍ ନେଃତ୍ତଡ଼୍; ମେଣ୍ଡେ ବାତେ ଇଲ୍ୱାଦ୍ ନେସ୍ ବାଲାତେ ବେଦି ତିଆର୍ ମାଡ଼୍ତଡ଼୍।
ପିତ୍ତଲ୍ ନର୍ଦାନ୍ କୁଣ୍ଡ୍ ତିଆର୍
ମେଣ୍ଡେ, ବେନ୍ ନାଟା କାଇଲାନ୍ ଗୁଡ଼ୁସେତାଗ୍ ଦ୍ୱାର୍ ସମିପତେ ସେବା ମାଡ଼୍ତା, ଆ ସେବାମାଡ଼ାନାୱୁ ନାଟାକି ପିତ୍ତଲ୍ତେ ତିଆର୍ ଆତେ ଦର୍ପଣ ତଡ଼୍ ଆୱୁ ନର୍ଦାନ୍ ଗାମ୍ଲେ ନୁ ଆଗେତ୍ କୁଦାନାଦ୍ ତିଆର୍ ମାଡ଼୍ତା।
ତମ୍ୱୁ ଦୁୱାଡ଼୍ତେ ତିଆର୍
(ଯାତ୍ରା ୨୭:୯-୧୯)
ଅଡ଼୍ ଆ ଦୁୱାଡ଼୍ ତିଆର୍ ମାଡ଼୍ତଡ଼୍; ଦକ୍ଷିଣ ପାକେତ୍ ଦୁୱାଡ଼୍ତେ ଦକ୍ଷିଣ୍ ପାକେ ବଲା ପାଣ୍ଡ୍ରି ପାଲ୍ସେଲାଦ୍ ନୁଲ୍ ଏକଶତ କାଇତଡ଼୍ ତିଆର୍ ଆତ୍ତେ ପରଦା ମାଡ଼୍ତଡ଼୍। ଆଗେତ୍ କୋଡ଼ିଏ ଗୁଞ୍ଜେ ନୁ କୋଡ଼ିଏ ଦରା ପିତ୍ତଲ୍ତାୱୁ, ମେଣ୍ଡେ ଆ ଗୁଞ୍ଜେନେ ଆଙ୍କଡ଼ା ନୁ ବନ୍ଦନି ଦୁଡ଼୍ଲେକାତ୍ ରୁପାତାୱୁ ମାତ୍ତା। ଉତ୍ତର ଦିଗ୍ତେ ପରଦା ଏକଶତ୍ କାଇ, ମେଣ୍ଡେ ଆଗେତ୍ କୋଡ଼ିଏ ଗୁଞ୍ଜେ ନୁ କୋଡ଼ିଏ ଟେଙ୍ଗା ପିତ୍ତଲ୍ତେ ନୁ ଗୁଞ୍ଜେ ଆଙ୍କଡ଼ା ନୁ ବନ୍ଦନି ଦୁଡ଼୍ଲେକାତାଦ୍ ରୁପାତାୱୁ ମାତ୍ତା। ପଡ଼ଦ୍ ଆଦାନ୍ ପାକେ ପରଦା ପଚାଶ କାଇ ମାତ୍ତେ, ଆଗେତ୍ ଦଶ ଗୁଞ୍ଜେ ନୁ ଦଶ ଟେଙ୍ଗା, ମେଣ୍ଡେ ଗୁଞ୍ଜେନେ ଆଙ୍କଡ଼ା ନୁ ଦୁଡ଼୍ଲେକାତ୍ ରୁପାତାୱୁ ମାତ୍ତା। ପଡ଼ଦ୍ ପେଇତାନ୍ ପାକେତ୍ ମୁନେତ୍ ପାକେତ୍ ମାଇଦିଙ୍କ୍ ପଚାଶ କାଇ ମାତ୍ତେ। ଦୁୱାର୍ତେ ଅଣ୍ଡୟ୍ ପାକେତ୍ ମାଇଦିଙ୍କ୍ ପନ୍ଦର କାଇ ପରଦା ନୁ ଆଗେତ୍ ମୁଣ୍ଡୁ ଗୁଞ୍ଜେ ନୁ ମୁଣ୍ଡୁ ଟେଙ୍ଗା ମାତ୍ତା; ଆଲେନେ ମେଣ୍ଡେ ପାକେତ୍ ମାଇଦିଙ୍କ୍ ବା ମାତ୍ତା। ମୁନେ ଦୁୱାର୍ତେ ଗାରେ ମେଣ୍ଡେ ରେଣ୍ଡେ ପନ୍ଦର କାଇ ପରଦା ନୁ ଆଗେତ୍ ମୁଣ୍ଡୁ ଗୁଞ୍ଜେ ନୁ ମୁଣ୍ଡ୍ ଟେଙ୍ଗା ମାତ୍ତା। ମୁନେତ୍ ସାରେ ପାକା ସାରେ ପରଦା ବଲା ପାଣ୍ଡ୍ରି ପାଲ୍ସେ ନୁଲ୍ ତିଆର୍ ଆସ୍ ମାତ୍ତା । ମେଣ୍ଡେ ଗୁଞ୍ଜେନେ ଟେଙ୍ଗାସାରେ ପିତ୍ତଲ୍ତାୱୁ ମାତ୍ତା; ଆଙ୍କଡ଼ା ନୁ ନନ୍ଦନୀ ରୁପାତାୱୁ; ଆସୁଙ୍କ୍ ମଣ୍ଡଲି ରୂପାତେ ତିଆର୍; ମେଣ୍ଡେ ରୁପା ବନ୍ଦନୀତେ ଗଡ଼େତେ ସାରେ ଗୁଞ୍ଜେ କାଇଲି ମାତ୍ତା । ମେଣ୍ଡେ, ମୁନେତ୍ ଦୁୱାର୍ତେ ମୁସାନ୍ ଚିଲେ ନିଲରଙ୍ଗ୍, ଉମେ, ଏର୍ରେ ରଙ୍ଗ୍ ନୁ ବଲା ପାଣ୍ଡ୍ରି ପାଲ୍ସେ ନୁଲ୍ ଶିଳ୍ପ ପାଡ଼୍ୟି ଇନା ନୁ ମୁନେତ୍ ପରଦା ଇନା ଆଦ୍ ତେର୍ୱଲେକେ କୋଡ଼ିଏ କାଇ ନୁ ଓସାର୍ତେ ଏଇଙ୍ଗ୍ କାଇ ଡ଼େଙ୍ଗ୍ ମାତ୍ତେ। ମେଣ୍ଡେ ଆଗେତ୍ ପିତ୍ତଲ୍ତେ ନାଲୁ ଗୁଞ୍ଜେ ନୁ ନାଲୁ ଟେଙ୍ଗା ନୁ ରୂପାତେ ଆଙ୍କଡ଼ା ନୁ ଆଗେତ୍ ମୁଣ୍ଡାଲି ରୂପାତେ ମଣ୍ଡିତେ ନୁ ବନ୍ଦନୀ ରୁପାତାୱୁ ମାତ୍ତା । ମେଣ୍ଡେ ଗୁଡ଼ୁସେ ମୁନେତେ ନାଲୁପାକାନେ କୟେସାରେ ପିତ୍ତଲ୍ତାୱୁ ମାତ୍ତା ।
ତମ୍ୱୁ ମାଇଦିଙ୍କ୍ ବେବାର୍ ମାଡ଼ାନ୍ ସାମାନ୍
ଲେବିୟ ନାରୁଡ଼୍ ପାଡ଼୍ୟିଦେ ମାଇଦିଙ୍କ୍ ହାରୋଣ ଯାଜକତେ ମାର୍ ଈଥାମରତେ ତଡ଼୍ ମୋଶାନ୍ ଆଜ୍ଞାଲେକାମ୍ ମାନ୍ଦାନ୍ ଲତ୍ତେ, ଇତ୍କେ, ସାକ୍ଷ୍ୟ ଇନା ତମ୍ୱୁ ଲେକାନାଦ୍ ସାମାନ୍ ସାରେ ଇଞ୍ଜେ ଲେକାଙ୍କ୍ ମାଡ଼୍ତଡ଼୍। ସଦାପ୍ରବୁ ମୋଶାଙ୍କ୍ ତଡ଼୍ ବେନ୍ ଆଦେଶ୍ ଇସ୍ମାତ୍ତଣ୍ଡ୍, ଆ ଲେକାମ୍ ଯିହୁଦା ପିଲୁଡ଼୍ ଜନ୍ମ ଉଡ଼ିତେ ନାତି ହୂରତେ ମାର୍ ବତ୍ସଲେଲ୍ ଆ ସାରେ ତିଆର୍ ମାଡ଼ମାତ୍ତଡ଼୍। ମେଣ୍ଡେ ନିଲ ନୁ ଉମେ, ଏର୍ରେ ରଙ୍ଗ୍ ନୁ ବଲା ପାଣ୍ଡ୍ରି ପାଲ୍ସେ ନୁଲ୍ ଶିଲ୍ପ ପାଡ଼୍ୟି ନୁ କୋଦକ ନୁ ବୁଦ୍ଦ୍ ମାନ୍ଦାନ୍ ନୁଲ୍ ତିଆର ଦାନ ପିଲୁଡ଼୍ ଜନ୍ମ ଅହିଷାମକଙ୍କ୍ତେ ମାର୍ ଅହଲିୟାବ ସାଙ୍ଗ ମାତ୍ତଣ୍ଡ୍। ପବିତ୍ର ପଡ଼ିୟେ ତିଆର୍ ଆଦାନାଦ୍ ସାରେ ପାଡ଼୍ୟି ଇ ସାରେ ସୁନା ଟୁଣ୍ଡିମାତ୍ତା, ଇତ୍କେ, ନୈବେଦ୍ୟତେ; ସାରେ ସୁନା ପବିତ୍ର ପଡ଼୍ୟେତ୍ କେଜି ଇସାପ୍ତେ ଅନିଶ୍ ତାଲନ୍ତ ସାତ୍ଶହ ତିରିଶ କେଜି ମାତ୍ତା। ମେଣ୍ଡେ ମଣ୍ଡଲିତେ ଲେକ୍ତେ ନାରୁଡ଼୍ତେ ରୁପା ପବିତ୍ର ପଡ଼୍ୟେ ବଡ଼୍ତେ ଏକଶହ ଏକ ହଜାର୍ ସାତଶହ ପଞ୍ଚୁସ୍ତୁରି ବଡ଼୍ ମାତ୍ତେ। ସାରେ ଲେକେତ୍ ନାରୁଡ଼୍ ମାଇଦିଙ୍କ୍, ଇତ୍କେ, ବେନଡ଼୍ ବିଂଶତି ଏଣ୍ଡକିନ୍ ବୟସ୍ତେ ଅବା ଆଗାକନ୍ ଅଦିକ୍ ବୟସ୍ତେ ମାତ୍ତଡ଼୍, ଆ ଆରୁ ଲକ୍ଷ ମୁଣ୍ଡୁ ହଜାର୍ ପାଞ୍ଚଶହ ପଚାଶ ନାରୁଡ଼୍ଆଗାଙ୍କ୍ ସାରେ ତଡ଼୍ ମାଇଦିଙ୍କ୍ ଅଣ୍ଡୟ୍ ଅଣ୍ଡୟ୍ ଦୁଡ଼୍ ବଡ଼୍, ଇତ୍କେ, ପବିତ୍ର ପଡ଼ିୟେତ୍ ବଡ଼୍ ଲେକାମ୍ ଦୁଡ଼୍ ଦୁଡ଼୍ ବଡ଼୍ ଇଦାନ୍ମାଇଦିଙ୍କ୍ ଆସ୍ମାତ୍ତେ। ଆଦିଙ୍କ୍ ଆ ଏକଶହ ରୂପାତେ ପବିତ୍ର ପଡ଼ିୟେତ୍ ନୁ ଲିକ୍ତେ ଚିଲେତ୍ ଟେଙ୍ଗା ସତ୍ତଡ଼୍;ଏକଶହ ଟେଙ୍ଗାନ୍ ଅଣ୍ଡୟ୍ ଅଣ୍ଡୟ୍ ଟେଙ୍ଗାତ୍ ମାଇଦିଙ୍କ୍ ଅଣ୍ଡୟ୍ ଅଣ୍ଡୟ୍ କର୍ଚ ଆତ୍ତା। ମେଣ୍ଡେ ଆ ଅଣ୍ଡୟ୍ ହଜାର୍ ସାତଶହ ପଞ୍ଚୁସ୍ତୁରି ବଡ଼୍ ରୂପାତେ ଆ ଗୁଞ୍ଜେତେ ମାଇଦିଙ୍କ୍ ଆଙ୍କଡ଼ା ତିଆର୍ ମାଡ଼୍ତଡ଼୍ ନୁ ଆଗେତ୍ ନେତିନାଗ୍ ମାନ୍ଦାନାଦ୍ ନୁ ବନ୍ଦନିତାଗ୍ କାଲ୍ପ୍ତଡ଼୍। ମେଣ୍ଡେ ନୈବେଦ୍ୟ ପିତ୍ତଲ୍ କାଲ୍ପି ସତୁରି ବଡ଼୍ ରେଣ୍ଡେ ହଜାର୍ ଚାରିଶହ ବଡ଼୍ ମାତ୍ତା। ଆଦିଙ୍କ୍ ଆ ତଡ଼୍ ଆର୍ରଦେ କାଇଲାନ୍ ଗୁଡ଼ୁସେତାଗ୍ ଆର୍ରଦେ ଟେଙ୍ଗା ନୁ ପିତ୍ତଲ୍ତେ ବେଦି ନୁ ଆଗେତ୍ ପିତ୍ତଲ୍ତେ ଜାଞ୍ଜିରି ନୁ ବେଦିତେ ସାରେ ସାମାନ୍, ମେଣ୍ଡେ ମୁନେତ୍ ସାରେ ପାକେ ଟେଙ୍ଗା ନୁ ମୁନେତ୍ ଦୁୱାର୍ତେ ଟେଙ୍ଗା ନୁ ଲତ୍ତେ ସାରେ କୟେ ନୁ ମୁନେତ୍ ସାରେ ପାକେ କେୟ୍ ସାରେ ତିଆର୍ ମାଡ଼୍ତଡ଼୍।
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.