Koya Bible
ଯାତ୍ରା 35
ରୋମାନ୍ ଦିନାତେ ନିୟମ୍ ପାଲନ୍
ଆସୁଟ୍ ମୋଶାଲ୍ ଇସ୍ରାଏଲତେ ମାର୍କିଡ଼୍ ସାରେ ମଣ୍ଡଲି ଅଣ୍ଡୟ୍ତାଗ୍ ମାଡ଼୍କିତଣ୍ଡ୍, ସଦାପ୍ରବୁ ମିକିଙ୍କ୍ ଇ ସାରେ ବାକ୍ୟ ପାଲନ ମାଡ଼ାନ୍ ମାଇଦିଙ୍କ୍ ଆଦେଶ୍ ଇସ୍ମିନ୍ଦେଣ୍ଡ୍। ଆରୁଦିନା ପାଡ଼ିୟ୍ମାଡ଼ାଙ୍କ୍ ଆଦ୍ତେ; ମାତ୍ର ସାତ୍ଦିନ୍ତେ ମି ଗାରେ ପବିତ୍ର ଦିନ୍ ଆଦ୍ତେ; ଆଦ୍ ସଦାପ୍ରବୁନ୍ ମାଇଦିଙ୍କ୍ ବାଡ଼୍ୟେ ରମାନ୍ ଦିନାମ୍ ଆଦ୍ତେ, ବେନ୍ ଆଦ୍ନଣ୍ଡ୍ ପାଡ଼ିୟ୍ ମାଡ଼୍ତଣ୍ଡ, ଅନ୍ ଡଲାନ୍ଦଣ୍ଡ୍ ଆଦ୍ତେ। ମିଡ଼୍ ରମାନ୍ ଦିନାମ୍ତେ ନିଜର୍ ବେନ୍ ଲତ୍ତାଗ କିସ୍ ମାସମାଟ୍।
ଲତ୍ତେ ଗୁଡ଼ୁସେତ୍ ମାଇଦିଙ୍କ୍ ଉପହାର୍
(ଯାତ୍ରା ୨୫:୧-୯)
ମେଣ୍ଡେ, ମୋଶାଲ୍ ଇସ୍ରାଏଲ୍ତେ ମାର୍କିଡ଼୍ ସାରେ ମଣ୍ଡଲି ମେଣ୍ଡେ କେତ୍ତଣ୍ଡ, ସଦାପ୍ରବୁ ଇ ଆଦେଶ୍ ଇତ୍ତଣ୍ଡ୍। ମିଡ଼୍ ସଦାପ୍ରବୁନ୍ ମାଇଦିଙ୍କ୍ ମିଇ ନିଜେତାଗାଙ୍କ୍ ପୁରସ୍କାର୍ ଗୁଡ଼୍ପାଟ୍; ବେନ୍ ଆୟି ଡ଼େଙ୍ଗ୍ ପଡ଼ିୟେତାଗ୍ ମାନ୍ଦାନଣ୍ଡ୍, ଅଣ୍ଡ ସଦାପ୍ରବୁନ୍ ମାଇଦିଙ୍କ୍ ସୁନା, ରୂପା ନୁ ପିତ୍ତଲ୍, ମେଣ୍ଡେ ନିଲ ନୁ ଉମେ ରଙ୍ଗ୍ ନୁ ସିନ୍ଦୁର୍ ରଙ୍ଗ୍, ପାଣ୍ଡ୍ରିଲାଦ୍ ନୁ ପାଲ୍ସେ ନୁଲ୍ ନୁ ମେଣ୍ଢା କେଲ୍କ୍, ମେଣ୍ଡେ ନେତୁର୍ ରଙ୍ଗଦେ ମେଣ୍ଢା କେଲ୍କ୍ ନୁ ପିଲେ ତଲ୍କେ ନୁ ଶିଟିମ୍ ୱେର୍କ୍, ମେଣ୍ଡେ ସାଲ୍ତେ ନିୟ୍ ନୁ ଅବିଷେକ୍ତେ ନିୟ୍ ନୁ ଗାବ୍ମାନ୍ଦାନ୍ ଦୁପାମ୍ ଗାବ୍ମାନ୍ଦାନ୍ ଜିନିଷ୍, ମେଣ୍ଡେ ଏଫୋଦ ନୁ ବୁକୁପଟାତେ ମାଇଦିଙ୍କ୍ ଇରା ମଣି ସାରେଲେକାତ୍ ଜିକ୍ମିକ୍ କାଲ୍, ଇ ସାରେ ସଦାପ୍ରବୁନ୍ ଉପହାର୍ ତାତ୍ତିଡ଼୍।
କାଇଲାନ୍ ଗୁଡ଼୍ସେତେ ଜିନିଷ୍
ମେଣ୍ଡେ ମିଇୟାଗକନ୍ ସାରେ ଜ୍ଞାନ୍ ମାନ୍ଦାନ୍ ନାରୁଡ଼୍ ୱାସ୍ ସଦାପ୍ରବୁନ୍ ପାକେ ସାରେ ଜିନିଷ୍ ତିଆର୍ ମାଡ଼ିଡ଼୍, ଇତ୍କେ, ମାନ୍ଦାନାଦ୍, ଆଗେତ୍ ଗୁଡ଼ୁସା, ୱେସ୍ରାମ୍, ଆଙ୍କଡ଼ା, ବାଲା, ଦ୍ୱାୱାର୍, ଗୁଞ୍ଜେ ନୁ ଚୁଙ୍ଗି, ମେଣ୍ଡେ ସିନ୍ଦୁକ୍ ନୁ ଆଗେତ୍ ଟେଙ୍ଗା ପାପନର୍ଦାନାଦ୍, ମୁସାନ୍ ଲେକେତେ ଚିଲେ, ମେଣ୍ଡେ ଟେବୁଲ୍ ସାମ୍ଡ଼େ ନୁ ଆଗେତ୍ ଟେଙ୍ଗା ନୁ ଜିନିଷ୍ ସାରେ ନୁ ତଃନ୍ଦାନ୍ ରୋଟି, ମେଣ୍ଡେ ୱେସ୍ତେ ମାଇଦିଙ୍କ୍ ୱେସ୍ମାଡ଼୍, ଆଗେତ୍ ଜିନିଷ୍, ୱେସ୍ ନୁ ସାଲ୍ତେ ନିୟ୍, ମେଣ୍ଡେ ଦୁପାମ୍ ୱାଟାନାଦ୍, ଆଗେତ୍ ଟେଙ୍ଗା, ଅବିଷେକ୍ତେ ନିୟ୍,ଗାବ୍ ମାନ୍ଦାନ୍ ଦୁପାମ୍, ଲନ୍ ନେଙ୍ଗାନ୍ ଦୁୱାର୍ ମୁସାନ୍ ଚିଲେ, ମେଣ୍ଡେ ଦୁପାମ୍ ବେଦି ନୁ ଆଗେତ୍ ପିତ୍ତଲ୍ ଇକ୍ଲେମ୍, ଟେଙ୍ଗା, ଗିନେସାରେ, ନର୍ତେ ଗିନେ ନୁ ଆଗେ ମାନ୍ଦାନାୱୁ, ମେଣ୍ଡେ ବାୟିଦେତ୍ ପର୍ଦା ନୁ ଆଗେତ୍ ଗୁଞ୍ଜେ ନୁ ଦୁୱାର୍ ବନ୍ଦ୍ ଦର୍ରେ ନୁ ଆର୍ଦେ ଦୁୱାର୍ ମୁସାନ୍ ଚିଲେ, ମେଣ୍ଡେ ଲତ୍ତେ କୟେ ନୁ ବାୟିଦେତ୍ କୟେ ନୁ ରେଣ୍ଡିନ୍ ନଡ଼୍, ମେଣ୍ଡେ ପବିତ୍ର ପଡ଼ିୟେତେ ସେବା ମାଡ଼ାନ୍ ମାଇଦିଙ୍କ୍ କେର୍ଦାନ୍ ଚିଲେ, ଇତ୍କେ, ହାରୋଣ ଯାଜକତେ ମାଇଦିଙ୍କ୍ ପବିତ୍ର ଚିଲେ ନୁ ଯାଜକ୍ ପାଡ଼ିୟ୍ଦେ ମାଇଦିଙ୍କ୍ ଅନ୍ ମାର୍କିଡ଼୍ ଚିଲେ ଇ ସାରେ ତିଆର୍ ମାଡ଼୍ତିଡ଼୍।
ଇସ୍ରାଏଲତେ ନାରୁଡ଼୍କିଙ୍କ୍ ଇଦାନ୍ ଦାନ୍
ଲପେକନ୍ ଇସ୍ରାଏଲ୍ତେ ମାର୍କିଡ଼୍ ସାରେ ମଣ୍ଡଲି ମୋଶାନ୍ ମୁନେକନ୍ ଆତ୍ତଣ୍ଡ୍। ମେଣ୍ଡେ ବେନନ୍ ମନ୍ ବେନଙ୍କ୍ ଇଚ୍ଛାମାଡ଼ିତେ ନୁ ବେନ୍ ଆତ୍ମା ବେନଙ୍କ୍ ଇଚ୍ଛା ମାଡ଼୍ତେ, ଅଡ଼୍ କାଇଲାନ୍ ଗୁଡ଼ୁସେତାଗ୍ ତିଆର୍ ମାଡ଼ାନ୍ ମାଇଦିଙ୍କ୍ ନୁ ଚିଲେତ୍ ବିଷୟତେ ସାରେ ପାଡ଼୍ୟି ନୁ ପବିତ୍ର ଚିଲେତ୍ ମାଇଦିଙ୍କ୍ ସଦାପ୍ରବୁନ୍ ପୁରସ୍କାର୍ ତାତ୍ତଡ଼୍। ମେଣ୍ଡେ ମାନେୟ୍ ନୁ ନାଟା ବେସ୍କ୍ ନାରୁଡ଼୍ ଲେକେତ୍ ମନ୍ ମାତ୍ତଡ଼୍, ଅଡ଼୍ ସାରେତଡ଼୍ ୱାସ୍ ନେଡ଼େମ୍, ମୁଦା, ଢ଼ଣ୍ଡି, ନେଡ଼େମ୍ ଲେକେତ୍ ସୁନାତ୍ ନେଡ଼େକ୍ ସାରେ ତାସ୍;ସାରେ ତଡ଼୍ ସଦାପ୍ରବୁନ୍ ମାଇଦିଙ୍କ୍ ସୁନାତେ ଉପହାର୍ ନୈବେଦ୍ୟତେ ପାଲନ୍ ମାଡ଼୍ତଡ଼୍। ମେଣ୍ଡେ ବେନଡ଼୍ ଗାରେ ନିଲ, ଉମେ, ଏର୍ ରଙ୍ଗ୍, ପାଣ୍ଡ୍ରି ନୁଲ୍ ନୁ ମେକେ କେଲ୍କ୍, ନେତୁର୍ତେ ମେଣ୍ଢା ତଲ୍କେ, ପିଲେତେ ତଲ୍କେ ମାତ୍ତେ, ଅଡ଼୍ ସାରେତଡ଼୍ ଆଦ୍ ତାତ୍ତଡ଼୍। ମେଣ୍ଡେ ବେନ ରୁପା କି ପିତ୍ତଲ୍ତେ ଉପହାର୍ ଇତ୍ତଣ୍ଡ୍, ଅଣ୍ଡ୍ ସଦାପ୍ରବୁନ୍ ପୁରସ୍କାର୍ ତାତ୍ତଣ୍ଡ୍; ମେଣ୍ଡେ ବେନ୍ ଗାରେ ସେବା ପାଡ଼୍ୟିଦେ ମାଇଦିଙ୍କ୍ ଶିଟିମ୍ ୱେର୍କ୍ ମାତ୍ତେ ଅଣ୍ଡ୍ ଆଦ୍ ତାତ୍ତଣ୍ଡ୍। ସାରେ ବୁଦ୍ତେ ନାଟାକି ନିଜର ନିଜର କାଇଦେ ନୁଲ୍ କୟ୍ସ୍ ନିଲ ଉମେ,ଏର୍ରେ ରଙ୍ଗ୍ ନୁ ପାଣ୍ଡ୍ରି ଚିଲେତ୍ ନୁଲ୍ ତାତ୍ତଡ଼୍। ମେଣ୍ଡେ ବେନ୍ ନାଟାନ୍ ମନ୍ ଜ୍ଞାନତେ ସାରେ ମାତ୍ତେ, ଆୱୁସାରେ ମେକେ କେଲ୍କିନେ ନୁଲ୍ କୟ୍ତା। ମେଣ୍ଡେ ବାଡ଼ିୟଡ଼୍ ଏଫୋଦ ନୁ ବୁକୁପଟା ମାଇଦିଙ୍କ୍ ଗଡ଼୍କିନ୍ କାଦି ଜିଗ୍ଜାଗ୍ କାଲ୍କିନ୍ ମଣି ଡ଼ାବ୍କ୍, ମେଣ୍ଡେ ସାଲ୍ତେ ନୁ ଅବିଷେକ୍ତେ ନିୟ୍ ନୁ ସାୟେ ଗାବ୍ ମାନ୍ଦାନ୍ ମାଇଦିଙ୍କ୍ ଗାବ୍ମାନ୍ଦାନ୍ ଜିନିଷ୍ ନୁ ନିୟ୍ ତାତ୍ତଡ଼୍। ଇସ୍ରାଏଲତେ ମାର୍କିଡ଼୍ ନିଜର ଇଚ୍ଛାତେ ସଦାପ୍ରବୁନ୍ ମାଇଦିଙ୍କ୍ ଉପକାର୍ ତାତ୍ତଡ଼୍; ସଦାପ୍ରବୁ ମୋଶାଙ୍କ୍ ଇସ୍ ବେନ୍ ବେନ୍ ମାଡ଼ାଙ୍କ୍ ଗଟ୍ ଇସ୍ମାତ୍ତଣ୍ଡ, ଆଗେତ୍ ବାତେ ଲେକେତ୍ ପାଡ଼ିୟ୍ ମାଡ଼ାନ୍ ମାଇଦିଙ୍କ୍ ବେନ୍ ବେନ୍ ମାନେୟ୍ ନୁ ନାଟାନ୍ ମାନ୍ନ୍ଦାଗ୍ ଆୱିଙ୍କ୍ ଇଚ୍ଛା ମାଡ଼୍ତଣ୍ଡ୍, ଅଡ଼୍ ସାରେ ପୁରସ୍କାର୍ ତାତ୍ତଡ଼୍।
କାଇଲାନ୍ ଗୁଡ଼ୁସେ ତିଆର୍
(ଯାତ୍ରା ୩୧:୧-୧୧)
ତାନ୍ପେର୍କେ ମୋଶାଲ୍ ଇସ୍ରାଏଲ୍ତେ ମାର୍କିଡ଼୍କିଙ୍କ୍ ମେଣ୍ଡେ କେତ୍ତଣ୍ଡ, ଉଡ଼୍ଟା, ସଦାପ୍ରବୁ ଯିହୁଦା ପିଲୁଡ଼୍ ହୂରତେ ନାତି ଉରିରନ୍ତେ ମାର୍ରିଙ୍କ୍ ବତ୍ସଲେଲ୍ଙ୍କ୍ ପେଦେର୍ ପହିସ୍ କାର୍ଙ୍ଗ୍ତଣ୍ଡ୍। ମେଣ୍ଡେ ଅକିଙ୍କି ଆତ୍ମା ଜ୍ଞାନ,ବୁଦ୍ଦ୍, ଯାଦୁବିଦ୍ୟା ନୁ ପାଡ଼୍ୟିଦେ ପରମେଶ୍ୱରଦେ ଆତ୍ମାତେ ପୂରାମାଡ଼୍ତଣ୍ଡ୍ ଶିଳ୍ପ ପାଡ଼୍ୟି ନୁ ସୁନା, ରୁପା ନୁ ପିତ୍ତଲ୍ ଡ଼େୱୁତେ ନୁ ଜିଗ୍ଜାଗ୍ ମଣି କିନ୍ ସୁନା କହିଦାନଡ଼୍ ନୁ ୱେରେ ୱେରେ ଲେକେତ୍ ଶିଳ୍ପ ପାଡ଼୍ୟିଦେ ମାଇଦିଙ୍କ୍ କୟେତେ ଡ଼େୱାନାଦ୍, ଇସାରେ ଶିଳ୍ପ ପାଡ଼୍ୟି ମାଡ଼ାନ୍ ମାଇଦିଙ୍କ୍ ଅଡ଼୍କିଙ୍କ୍ ତିଆର ମାଡ଼୍ତଣ୍ଡ। ମେଣ୍ଡେ ଶିକ୍ଷା ଇଦାନ୍ ମାଇଦିଙ୍କ୍ ଅନ୍ ନୁ ଦାନ ପିଲୁଡ଼୍ ଅହିଷାମକରତେ ମାର୍ ଅହଲିୟାବରତେ ମାନ୍ଦାଗ୍ ବୁଦ୍ଦ୍ ଇତ୍ତଣ୍ଡ୍। ମେଣ୍ଡେ ଡ଼େୱାନ୍ ନୁ ଶିଲ୍ପ ପାଡ଼୍ୟି ମାଡ଼ାନ୍ ମାଇଦିଙ୍କ୍, ମେଣ୍ଡେ ନିଲ, ଉମେ ନୁ ଏର୍ରେ ରଙ୍ଗ୍, ପାଣ୍ଡ୍ରିଲାଦ୍ ପାଲ୍ସେ ନୁଲ୍ଦେ ସାୟେ ପାଡ଼୍ୟି, ନୁଲ୍ ପାଡ଼୍ୟି ମାଡ଼ାନ୍ ମାଇଦିଙ୍କ୍, ଇତ୍କେ, ସାରେୱେଲେତ୍ ଶିଳ୍ପ ପାଡ଼୍ୟି ନୁ ଶିଳ୍ପ ପାଡ଼୍ୟି ମାଡ଼ାନ୍ ମାଇଦିଙ୍କ୍ ଅଡ଼୍ ମାନ୍ଦେ ଜ୍ଞାନ୍ ନାର୍ଗେ ମାଡ଼୍ତଣ୍ଡ୍।
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.