Koya Bible
ଯାତ୍ରା 3
ଇଶ୍ୱର୍ ମୋଶାଙ୍କ୍ କାର୍ଙ୍ଗତଣ୍ଡ୍
ଆ ସମୟତେ ମୋଶାଲ୍ ତାମ୍ ମାମାନ୍ ଯିଥ୍ରୋ ପେଦେର୍ତେ ମିଦୀୟନିୟ ଯାଜକତେ ମେଣ୍ଢା ମେଇସ ମାତ୍ତଣ୍ଡ୍; ଅଣ୍ଡ୍ ଦିନେ ଅଣ୍ଡ୍ ସିମ୍ସାମ୍ ମାନ୍ଦାନ୍ ପେର୍କେତ୍ ପାକେ ମେଣ୍ଢା ମାନ୍ଦେ ଅସ୍ ହୋରେବ୍ ପେଦେର୍ତେ ପରମେଶ୍ୱର୍ତେ ମେଟେତାଗ୍ ଆଞ୍ଜ୍ ହେୱୁତଣ୍ଡ୍ । ଆଗେକ୍ବା ଅଣ୍ଡ୍ ପଦ୍ଲେତାଗ୍ କିସ୍ତଡ୍ ସଦାପ୍ରବୁନ୍ ଦୂତ ଅଙ୍କ୍ ଦର୍ଶନ୍ ଇତ୍ତେ; ଆଦିଙ୍କ୍ ଅଣ୍ଡ୍ ଉଡ଼୍ତଣ୍ଡ୍, ମେଣ୍ଡେ ଉଡ଼େ, କିସ୍ତଡ଼୍ ନିଡ଼୍ତୁତେ, ଆଗେକ୍ବା ପଦ୍ଲେ କାର୍ୱ । ଆସୁଟ୍ ମୋଶାଲ୍ କେତ୍ତଣ୍ଡ୍, ନାନ୍ ୱେରଡ଼୍ ଗାରେ ଆଞ୍ଜ୍ ବାକ୍ୱା ପାଡ଼ିୟ୍ ବିଷୟ ଉଡ଼ିତାନ୍, ପଦ୍ଲେ ବାତ୍ତିଙ୍କ୍ କାର୍ୱ । ମାତର୍ ସଦାପ୍ରବୁ ବେସୁଟ୍ ଉଡ଼ୁତ୍ଣ୍ଡ୍, ଯେ ଅଣ୍ଡ୍ ଉଡ଼ୱାନାକେ ଅଣ୍ଡ୍ ପାକେଙ୍କ୍ ଆଞ୍ଜମିନ୍ଦେଣ୍ଡ୍, ଆସୁଟ୍ ପରମେଶ୍ୱର ପଦ୍ଲେ ତାଗାଙ୍କ୍ ଅଙ୍କ୍ କାର୍ଙ୍ଗି କେତ୍ତେ, “ହୋ ମୋଶା ହୋ ମୋଶା ।” ଆସୁଟ୍ ଅଣ୍ଡ୍ କେତ୍ତଣ୍ଡ୍, “ଇକେ ଉଡ଼ା, ନାନ୍ ଇଗେ ମିନ୍ଦେନ୍ ।” ଆସୁଟ୍ ଅଣ୍ଡ୍ କେତ୍ତଣ୍ଡ୍, ନିମେ ଇଦ୍ ପଡ଼ିୟେତାଗ୍ ୱାଡ଼୍ମା, ନିମେ ନି ଡ଼େକାନ୍ ଏର୍ପୁକ୍ କୁସ୍କ୍ପେ; ବାତେଙ୍କ୍ଇତ୍କେ ନିମେ ବେନ୍ ପଡ଼ିୟେତାଗ୍ ନିସ୍ ମିନ୍ଦେନି, ଆଦ୍ ପବିତ୍ର ପଡ଼ିୟେ । ଅଣ୍ଡ୍ ମେଣ୍ଡେ କେତ୍ତଣ୍ଡ୍ ନାନେ ମିଇ ଆନିଦାଦିଡ଼୍ ପରମେଶ୍ୱର ଇତ୍କେ ଅବ୍ରାହାମ୍ତେ ପରମେଶ୍ୱର ନୁ ଇସ୍ହାକ୍ତେ ପରମେଶ୍ୱର ନୁ ଯାକୁବତେ ପରମେଶ୍ୱର । ଆସୁଟ୍ ମୋଶାଲ୍ ନିଜର ମକମ୍ ମଦଲ୍ ମାଡ଼୍ତଣ୍ଡ୍ ବାତେଙ୍କ୍ଇତ୍କେ ଅଣ୍ଡ୍ ପରମେଶ୍ୱର୍ତାକ୍ ଉଡ଼ାନଙ୍କ୍ ୱେର୍ତଣ୍ଡ୍ । ତାନ୍ପେର୍କେ ସଦାପ୍ରବୁ କେତ୍ତଣ୍ଡ୍, ନାନେ ମିସର୍ ଦେଶତାଗ୍ ମାନ୍ଦାନ୍ ନିଜର୍ ନାରୁଡ଼୍ ତିପାଲ୍ ନିତାଲ୍ ଉଡ଼ୁତାନ୍ ନୁ ପାଡ଼୍ୟିମାଡ଼ାନଡ଼୍ କାରଣତେ ଆସମାନ୍ଦାନ୍ କେୟାନାଦ୍ କେଞ୍ଜୁତିଡ଼୍; ମାମେ ଅଡ଼୍ ତିପାଲ୍ ପୁତ୍ତମ୍ । ଆଦିଙ୍କ୍ ମିସ୍ରିୟ ନାରୁଡ଼୍ କାଇ ତାଗାଙ୍କ୍ ଅଡ଼୍କିଙ୍କ୍ ଉଦ୍ଦାର୍ ମାଡ଼ାନଙ୍କ୍, ମେଣ୍ଡେ, ଆ ଦେଶ୍ତାଗାଙ୍କ୍ ଲେକେତ୍ ନୁ ସାୟେ ଅଣ୍ଡୟ୍ ଦେଶ ଇତ୍କେ, କିଣାନୀୟ, ହିତ୍ତୀୟ, ଇମୋରିୟ, ପରିଷୀୟ ହିବ୍ଦୀୟ ନୁ ଯିବୂଷୀୟନଡ଼୍ ପଡ଼ିୟେତାଗ୍ ମାନ୍ତଡ଼୍, ଆଦ୍ ପାଲ୍ ନୁ ଉରୁୱେ ପେୟିତାନ୍ ଦେଶତାଗ୍ ଅଡ଼୍କିଙ୍କ୍ ଅଦାନଙ୍କ୍ ଡ଼ିଗି ୱାତ୍ତମ୍ । ଆସୁଙ୍କ୍ ଉଡ଼େ, ଇସ୍ରାଏଲତେ ପିଲାକିନ୍ କେୟାନାଦ୍ ନା କେୟୁଦାଗ୍ ୱାତ୍ତେ; ମେଣ୍ଡେ ମିସ୍ରିୟ ନାରୁଡ଼୍ ଅଡ଼୍ ପର କାରାପ୍ ବ୍ୟବହାର ମାଡ଼୍ତଡ଼୍ ଆଦ୍ ମାମେ ଉଡ଼୍ତମ୍ । ଆଦିଙ୍କ୍ ଇଞ୍ଜେ ୱାଡ଼ା, ମାମେ ନିକିଙ୍କି ଫାରୋନ୍ ଗାରେ ରତିତମ୍ ନିମେ ମିସରତାଗାଙ୍କ୍ ମା ନାରୁଡ଼୍ ଇସ୍ରାଏଲତେ ମାର୍କିଡ଼୍ ପେସ୍ପି ତାତିତିନ୍ । ଆସୁଟ୍ ମୋଶାଲ୍ ପରମେଶ୍ୱର୍ଦିଙ୍କ୍ କେତ୍ତଣ୍ଡ୍ ନାନ୍ ବେନ୍ ଯେ ଫାରୋନ୍ ଗାରେ ଆଞ୍ଜ ମିସର୍ ଦେଶତେ ଇସ୍ରାଏଲତେ ମାର୍କିଡ଼୍ ପେସ୍ପି ତାତିତାନ୍ ? ଆସୁଟ୍ ଅଣ୍ଡ୍ତ କେତ୍ତଣ୍ଡ୍ ନାନ୍ ନିତଡ଼୍ ମାନ୍ତାନ୍ ମେଣ୍ଡେ ନାନେ ଯେ ନିକିଙ୍କି ରଃତାନ୍ ଆଦିଙ୍କ୍ ଅଣ୍ଡୟ୍ ଚିହ୍ନେ ପୁନ୍ତି । ନିମେ ମିସରତେ ନାରୁକିଙ୍କି ପେସ୍ପିତାତେ ପେର୍କେ ମିଡ଼୍ ହି ମେଟେତେ ପରମେଶ୍ୱର୍ଦିଙ୍କ୍ ସେବା ମାଡ଼ିତିଡ଼୍ । ଅନନ୍ତର ମୋଶାଲ୍ ପରମେଶ୍ୱର୍ଦିଙ୍କ୍ କେତ୍ତଣ୍ଡ୍ ଉଡ଼ାଟ୍ ନାନ୍ ବେସୁଟ୍ ଇସ୍ରାଏଲତେ ମାର୍କିଡ଼୍ ଗାରେ ଆଞ୍ଜ୍ ଅଡ଼୍କିଙ୍କି କେତିତାନ୍ ବେନ୍ ମିଇ ଆନିଦାଦିଡ଼୍ ପରମେଶ୍ୱର ନାକିଙ୍କି ମିଇ ଗାରେ ରଃତଣ୍ଡ୍ । ମେଣ୍ଡେ ଅଡ଼୍ ପାସ୍ରିଞ୍ଚିକେ ଅନ୍ ପେଦେର୍ ବାତେ ? ଆସୁଟ୍ ନାନ୍ ବାତେ ଉତ୍ତର ଇଦ୍ତାନ୍ ? ଆସୁଟ୍ ପରମେଶ୍ୱର ମୋଶାଙ୍କ୍ କେତ୍ତଣ୍ଡ୍ ମାମ୍ ବେନ୍ ମିନ୍ଦେମ୍ ଅଡ଼େ ମିନ୍ଦେମ୍, ମେଣ୍ଡେ ଅଣ୍ଡେତ କେତ୍ତଣ୍ଡ୍ ନିମେ ଇସ୍ରାଏଲତେ ମାର୍କିଡ଼୍କ୍ କେତିତିନ୍, ସ୍ୱୟମ୍ୱୁ ମାମେ ମିନ୍ଦେମ୍' ମିଇ ଗାରେ ନାକିଙ୍କ୍ ରହିସ୍ମିନ୍ଦେଣ୍ଡ୍ । ପରମେଶ୍ୱର ମୋଶାଙ୍କ୍ ମେଣ୍ଡେ କେତ୍ତଣ୍ଡ୍ ନିମେ ଇସ୍ରାଏଲତେ ମାର୍କିଡ଼୍କ୍ ଇଦ୍ ଗଟ୍ କେତିଡ଼୍ ମିଇ ଆନିଦାଦିଡ଼୍ତେ ପରମେଶ୍ୱର ଅର୍ତାତ୍ ଅବ୍ରାହାମ୍ ତେ ପରମେଶ୍ୱର ନୁ ଇସ୍ହାକ୍ତେ ପରମେଶ୍ୱର ନୁ ଯାକୁବ୍ତେ ପରମେଶ୍ୱର। ବେନ୍ ସଦାପ୍ରବୁ ସ୍ୱୟମ୍ଭୁବ ଅଣ୍ଡ୍ ମିଇ ଗାରେ ନାକିଙ୍କ୍ ରସ୍ ମିନ୍ଦେଣ୍ଡ୍ ମାନାଦ୍ ଇଦ୍ ପେଦେର୍ ସାରେ ଦିନାତାଦ୍ ମେଣ୍ଡେ ଆନି ଦାଦିଡ଼ାଗାଙ୍କ୍ ଏର୍ରକେ ମାଡ଼ାନାଦ୍। ମିଡ଼୍ ଆଞ୍ଜ୍ ଇସ୍ରାଏଲ୍ ପିଲୁଡ଼୍ତଡ଼୍ତେ ବେଡ଼ିୟ୍ ନାରୁଡ଼୍ ଅଣ୍ଡୟ୍ତାଗ୍ ମାଡ଼ି ଇଦ୍ ଗଟ୍ କେଲ୍ମୁଟୁ ମିଇ ମୁନେତ୍ ଆନିଦାଦିଡ଼୍ତେ ପରମେଶ୍ୱର ଇତ୍କେ ଅବ୍ରାହାମ୍ ନୁ ଇସ୍ହାକ୍ ନୁ ଯାକୁବତେ ପରମେଶ୍ୱର ସଦାପ୍ରବୁ ନିକିଙ୍କି ଦର୍ଶନ ହିସ୍ କେସ୍ ମିନ୍ଦେଣ୍ଡ୍ । ମାମ୍ ମିଇକିଙ୍କ୍ ନୁ ମିସର୍ତାଗ୍ ମିଇପର ବାତ୍ ବାତ୍ ମାଡ଼ମିନ୍ଦେଡ଼୍ ଅଣ୍ଡ୍ ସାରେ କାବୁର୍ ନେତୁତଣ୍ଡ୍ । ମେଣ୍ଡେ ମାମ୍ ମିକିଙ୍କ୍ ମିସରତେ କଷ୍ଟତାଗାଙ୍କ୍ ଉଦ୍ଦାର୍ ମାଡ଼ି କିଣାନୀୟଡ଼୍ ନୁ ହିତ୍ତୀୟଡ଼୍ ନୁ ଇମୋରିୟଡ଼୍ ନୁ ପରିଷୀୟନଡ଼୍ ନୁ ହିବ୍ଦୀୟନଡ଼୍ ନୁ ଯିବୂଷୀୟଡ଼୍ ପାଲ୍ ଉରୁୱେ ପେୟିତାନ୍ ଦେଶ ଅଦ୍ତମ୍ ଇଞ୍ଜ୍ କେସ୍ମିନ୍ଦେମ୍ ।
ଆଗେ ଅଡ଼୍ ନି ଗଟ୍ କେଞ୍ଜିତଡ଼୍ ଆସୁଟ୍ ନିମେ ନୁ ଇସ୍ରାଏଲତେ ପିଲୁଡ଼୍ ବେଡ଼ିୟ୍ ନାରୁଡ଼୍ ମିସରତେ ରାଜାନ୍ ଗାରେ ଆଞ୍ଜ୍ ହି ଗଟ୍ କେତିତି ଏବ୍ରିୟ ନାରୁଡ଼୍ତେ ପରମେଶ୍ୱର ସଦାପ୍ରବୁ ମାତଡ଼୍ କାଇଲି ମିନ୍ଦେଣ୍ଡ୍ । ଆଦି ମାଇଦିଙ୍କ୍ ବିନୟ ମାଡ଼ୁତମ୍ ମା ପରମେଶ୍ୱର ସଦାପ୍ରବୁନ୍ ଉଦ୍ଦେଶ୍ୟତେ ବଲିଦାନ୍ ମାଇଦିଙ୍କ୍ ଇଞ୍ଜ ମିକିଙ୍କ୍ ମୁଣ୍ଡ୍ଦିନା ଉସ୍କବୁମ୍ଦାଗ୍ ଆର୍ ତାକାନ୍ ମାଇଦିଙ୍କ୍ ଅନୁମତି ଇମ୍ । ମାତର୍ ମାମ୍ ପୁତ୍ତମ୍ ମିସରତେ ରାଜାଲ୍ ମିକିଙ୍କ୍ ଆଦାନଙ୍କ୍ ଅନୁମତି ଇୱଣ୍ଡ୍। ପରାକ୍ରନ୍ତ କାଇ ପ୍ରକାଶିତ ଆତ୍କେ ମିକା ଆୟ । ଆସୁଟ୍ ମାମ୍ ନିଜର କାଇ ଆସ୍ ଦେଶ୍ତାଗ୍ ସାରେ ବାକ୍ୱା ପାଡ଼ିୟି ମାଡ଼୍ନାଟି ଆଗାଙ୍କ୍ ମିସରତିଙ୍କ୍ ରେଃମ୍ ଆସୁଙ୍ଗ୍ ଅଣ୍ଡ୍ ମିକିଙ୍କ୍ ଆଦାନଙ୍କ୍ ଇଦ୍ତଣ୍ଡ୍ ।
ଆସୁଟ୍ ମାନାଡ଼୍ ମିସ୍ରିୟ ନାରୁଡ଼୍କ୍ କାଇଲି କାଡ଼୍ ହି ନାରୁଡ଼୍କ୍ ଅନୁଗ୍ରହ ମାଡ଼ିକାଡ଼୍ ଆସୁଟ୍ ମିଇଡ଼୍ ଆଦାନ୍ ସମୟତେ ଆସାମ୍ କାଇଦେ ଆନ୍ମାଟ୍ । ମାତର୍ ସାରେ ନାଟା ନିଜର ଲତ୍ତେ ସପେତ୍ ନାଟାନାଗାଙ୍କ୍ ନୁ ନିଜର ଲତ୍ତାଗ୍ ମାନ୍ଦାନ୍ ନାଟାନ୍ ଗାରେକନ୍ ରୁପା ନେଡ଼େକ୍ ନୁ ସୁନା ନେଡ଼େକ୍ ନୁ ସିଲେ ତାଲ୍କି ଅଦ୍ତିଡ଼୍; ମେଣ୍ଡେ, ଆୱୁ ମିଡ଼୍ ନିଜର ମାର୍କ୍ ମାୟାସ୍କିଙ୍କ୍ କେର୍ପିତିଡ଼୍ ଇଦିନ୍ ଲେକେ ମି ମିସ୍ରିୟ ନାରୁଡ଼୍ତେ ସାରେ ସାମାନ୍ ଅଦ୍ତିଡ଼୍ ।
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.