Koya Bible
ଯାତ୍ରା 19
ସିନୟ୍ ମେଟାଗାରେ ଇସ୍ରାଏଲ୍
ମିସର୍ ଦେଶକନ୍ ଇସ୍ରାଏଲ୍ତେ ମାର୍କ ପେୟ୍ତାନ୍ ମୁଣ୍ଡ୍ ନେଲ୍ଞ୍ଜ୍ତେ ପ୍ରତମ୍ ଦିନ୍ତେ, ଅଡ଼୍ ସିନୟ୍ତେ ବୁମ୍ତାଗ୍ ଆଞ୍ଜ୍ ହେଉତଡ଼୍। ଅଡ଼୍ ରଫୀଦିମକନ୍ ଆଞ୍ଜ୍ ସିନୟ୍ ବୁମ୍ତାଗ୍ ହେୱ୍ନାକେ, ଆଦ୍ ବୁମ୍ତାଗ୍ ଗୁଡ଼ୁସେ ତିଆର୍ ମାଡ଼୍ତଡ଼୍; ଇସ୍ରାଏଲ୍ ଆ ପଡ଼ିୟେତାଗ୍ ମେଟେତ୍ ମୁନେ ଗୁଡ଼ୁସେ ତିଆର୍ ମାଡ଼୍ତଡ଼୍। ତାନ୍ପେର୍କେ ମୋଶାଲ୍ ପରମେଶ୍ୱରଦେ ଗାରେ ୱାସୱାନାକେ, ସଦାପ୍ରବୁ ମେଟେକଞ୍ଜ୍ କାର୍ଙ୍ଗି ଅଙ୍କି କେତ୍ତଣ୍ଡ୍, ନିମେ ଯାକୁବ୍ ପିଲୁଡ଼୍ତିଙ୍କ୍ ଇ ଗଟ୍ କେଲ୍ମ୍ ନୁ ଇସ୍ରାଏଲ୍ତେ ମାର୍କିଡ଼୍କ୍ ଇଦି କେଲ୍ମୁଟ୍। ମାମ୍ ମିସ୍ରିୟଡ଼୍ ପରୁ ବାତେ ମାଡ଼୍ତମ୍ ନୁ ମିକିଙ୍କ୍ ବେଲାନେ ଡାମର୍ ପିଟେତେ ଗାରେ କାଞ୍ଜି ନି ଗାରେ ତାତ୍ତମ୍, ଆଦ୍ ମିଡ଼୍ ଉଡ଼ିମିନ୍ଦେଡ଼ି। ଇଞ୍ଜେ ମିଡ଼୍ ବେସୁଙ୍କ୍ ମା ଗଟ୍ ମନ୍ ଇଦ୍ତିଡ଼୍ ନୁ ମା ନିୟମ୍ ପାଲନ ମାଡ଼ିତିଡ଼୍, ଆସୁଟ୍ ମିଡ଼୍ ସାରେ ନାରୁଡ଼୍ ଆଗାଙ୍କ୍ ମା ଅସ୍ରିସଞ୍ଚିତେ ଦନ୍ ଆଦ୍ତିଡ଼୍; ବାତେଙ୍କ୍ଇତ୍କେ ସାରେ ପୃତିବି ନାୱାଦ୍। ମେଣ୍ଡେ ମିଡ଼୍ ମା ମାଇଦିଙ୍କ୍ ଯାଜକିଡ଼୍ ଅଣ୍ଡୟ୍ ରାଜପିଲୁଡ଼୍ ନୁ ଅଣ୍ଡୟ୍ ପବିତ୍ର ଗୋଷ୍ଟି ଆଦ୍ତେ; ଇସାରେ ଗଟି ମିଡ଼୍ ଇସ୍ରାଏଲତେ ମାର୍କିଡ଼୍କ୍ କେଲ୍ମୁଟ୍। ଆସୁଟ୍ ମୋଶାଲ୍ ୱାସ୍ ନାରୁଡ଼୍ ବେଡ଼ିୟ୍ ନାରୁଡ଼୍କିଙ୍କ୍ କାର୍ଙ୍ଗି ସଦାପ୍ରବୁ ଆଦେଶ୍ ଇସ୍ମାନ୍ଦାନ୍ ଇସାରେ ଗଟି ଅଡ଼୍ ଇଚ୍ଛାତେ ମାଡ଼୍ତଡ଼୍। ଆସୁଟ୍ ଇସାରେ ନାରୁଡ଼୍ ଅଣ୍ଡୟ୍ଦାମ୍ କେତ୍ତଡ଼୍, ସଦାପ୍ରବୁ ବେନ୍ ଗଟି କେସ୍ମିନ୍ଦେଣ୍ଡ୍, ଆୱୁସାରେ ମାନାଡ଼୍ ମାଡ଼ିକାଡ଼୍। ଆସୱେଲେ ମୋଶାଲ୍ ସଦାପ୍ରବୁନ୍ ଗାରେ ନାରୁଡ଼୍ ଗଟି କେଞ୍ଜ୍ପୁତଣ୍ଡ୍।
ଆସୁଟ୍ ସଦାପ୍ରବୁ ମୋଶାଙ୍କ୍ କେତ୍ତଣ୍ଡ୍, “ଉଡ଼େ, ମାମ୍ ନିତଡ଼୍ ଗଟି କେତାନ୍ୱେଲେ ନାରୁଡ଼୍ବେଲା ଆଦ୍ କେଞ୍ଜପାର୍ତଡ଼୍, ମିଇୟାଗ୍ ସାରେଦାମ୍ ବିଶ୍ୱାସ୍ ମାଡ଼ିତମ୍, ଇଦିନ୍ମାଇଦିଙ୍କ୍ ମାମ୍ ପାଣ୍ଡ୍ରି ମୟଲ୍ତେ ମି ଗାରେ ୱାସମିନ୍ଦେମ୍।” ଆଦିନ୍ ମାଇଦିଙ୍କ୍ ମୋଶାଲ୍ ନାରୁଡ଼୍ ଗଟି ସଦାପ୍ରବୁଙ୍କ୍ କେଞ୍ଜ୍ସ୍ପତଣ୍ଡ୍। ଆସୁଟ୍ ସଦାପ୍ରବୁ ମୋଶାଙ୍କ୍ କେତ୍ତଣ୍ଡ୍, “ମି ନାରୁଡ଼୍ ଗାରେ ଆଞ୍ଜ୍ ନେଣ୍ଡ୍ ନୁ ନାଡ଼୍ ଅଡ଼୍କିଙ୍କ୍ ପବିତ୍ର ମାଡ଼ା, ମେଣ୍ଡେ ଅଡ଼୍ ନିଜର ନିଜର ଚିଲେ ନର୍ୱିଡ଼୍ ନୁ ମୁଣ୍ଡ୍ଦିନେତ୍ ପେର୍କେ ସାରେତଡ଼୍ ତିଆର୍ ଆୟିଡ଼୍; ବାତେଙ୍କ୍ଇତ୍କେ ମୁଣ୍ଡ୍ଦିନେତ୍ ପେର୍କେ ସଦାପ୍ରବୁ ସାରେ ନାରୁଡ଼୍ ମୁନେ ସିନୟ୍ ମେଟେତ୍ ପରକଞ୍ଜ୍ ଡିଗିୱାଦ୍ତଣ୍ଡ୍। ଆଦିଙ୍କ୍ ମିଡ଼୍ ନାରୁଡ଼୍ ସାର୍ପାକା ସିମା ତିଆର୍ ମାଡ଼ି ଇ ଗଟ୍ କେଲ୍ମୁଟ୍, ମିଡ଼୍ ମେଟେତ୍ ନୁ ଆଗେତ୍ ସିମା ଇଟାନ୍ ମାଇଦିଙ୍କ୍ ସାବଦାନ୍ ଆୟ୍ମୁଟ୍; ବେନକି ମେଟେତିଙ୍କ୍ ଇଟିତଣ୍ଡ୍, ଅଣ୍ଡ୍ ନିଜାମ୍ ଡଲିତଣ୍ଡ୍। ବେନନ୍ କାଇ ବେନଙ୍କ୍ ଇଟ୍ମାଟ୍, ମାତର୍ ଅଣ୍ଡ୍ ନିଜାମ୍ କାଲ୍କିନାଗ୍ ତାଲ୍ଗି ମଦଲ୍ ଆଦ୍ତଣ୍ଡ୍, ୱିଲ୍ କି କାଡ଼୍ତଡ଼୍ ଡଲିତଣ୍ଡ୍; ପଶୁ ଆଇକି ମନୁଷ୍ୟ ଆୟିଡ଼୍, ବେସୁଙ୍କ୍ବା ଗେଲ୍ସେ ପାର୍ୱଡ଼୍; ମୟିର୍ ଅଦିକ୍ଜେଲ୍ ନେକ୍କେ ଅଡ଼୍ ମେଟେତାଗ୍ ହେୱୁନା ତେଦିୱାଦ୍ତଡ଼୍।” ତାନ୍ପେର୍କେ ମୋଶାଲ୍ ମେଟେକନ୍ ଡିଗି ନାରୁଡ଼୍ ଗାରେ ୱାସ୍ ଅଡ଼୍କିଙ୍କ୍ ପବିତ୍ର ମାଡ଼୍ତଡ଼୍, ମେଣ୍ଡେ ଅଡ଼୍ ନିଜର୍ ନିଜର୍ ଚିଲେ ସାରେ ନର୍ତଡ଼୍। ଆସୁଟ୍ ଅଣ୍ଡ୍ ନାରୁଡ଼୍କିଙ୍କ୍ କେତ୍ତଣ୍ଡ୍, “ମିଡ଼୍ ତୃତିୟ ଦିନାତ୍ ମାଇଦିଙ୍କ୍ ତିଆର୍ ଆୟିମୁଟ୍; ନିଜର ନିଜର ମୁତେକିନ୍ଗାରେ ଉଞ୍ଜ୍ମାଟ୍।” ତାନ୍ପେର୍କେ ମୁଣ୍ଡ୍ଦିନ୍ ନାର୍କୁକ୍ ଆସୱାନାକେ, ମୟଲ୍ ନେକାନାଦ୍ ନୁ ମେର୍ସାନାଦ୍ ନୁ ମେଟେତ୍ ପର୍କନ୍ ନାର୍ଗେ ମୟଲ୍ ନୁ ଅଦିକ୍ ଲେଙ୍ଗ୍ଦେ ମୟିର୍ ଲେଙ୍ଗ୍ ଆଦାନଙ୍କ୍ ପସ୍ପ୍ତା; ଆସୁଟ୍ ସାମ୍ଡ଼େ ନିଡ଼୍କେତ୍ ଲେକାମ୍ ସାରେ ନାରୁଡ଼୍ ୱାଡ଼୍କିଆତ୍ତଡ଼୍। ଆଦିଙ୍କ୍ ପରମେଶ୍ୱର ତଡ଼୍ କାଇଲାନ୍ ମାଇଦିଙ୍କ୍ ମୋଶାଲ୍ ନାରୁଡ଼୍କିଙ୍କ୍ ଗୁଡ଼ୁସାତାଗାଙ୍କ୍ ପେସ୍ପି ତାତ୍ତଣ୍ଡ୍, ଆସୁଟ୍ ଅଡ଼୍ ମେଟେତ୍ ମଦଲ୍ ନିତ୍ତଡ଼୍। ଆସୁଟ୍ ସିନୟ୍ ମେଟେ ଉମେଲେକାମ୍ ମାତ୍ତେ, ବାତେଙ୍କ୍ଇତ୍କେ ସଦାପ୍ରବୁ କିସ୍ ଲେକାମ୍ ଆଦିନ୍ ପର ଡ଼ିଗ୍ତେ; ଆସୁଟ୍ ବାଟ୍ତେ ଉମେଇନା ଆଗାକନ୍ ଉମେତେଦ୍ତେ, ମେଣ୍ଡେ ସାରେ ମେଟେ ଅଦିକ୍ଉଙ୍ଗି ଆତ୍ତେ। ମେଣ୍ଡେ ତୁରିଲେଙ୍ଗ୍ ଅଦିକ୍ ପିନା ଡ଼େଙ୍ଗ୍ ଆୟେଡ଼୍, ମୋଶାଲ୍ ଗଟି କେତ୍ତଣ୍ଡ୍, “ଆସୁଟ୍ ପରମେଶ୍ୱର୍ ଅଣ୍ଡ୍ ଲେଙ୍ଗ୍ଦେ ଅଙ୍କ୍ ଉତ୍ତର୍ ଇତ୍ତଣ୍ଡ୍।” ତାନ୍ପେର୍କେ ସଦାପ୍ରବୁ ସିନୟ୍ ମେଟେ ପର, ଇତ୍କେ, ମେଟେତ୍ ନେତିନାଗ ଡିଗୱାନାକେ ମୋଶାଙ୍କ୍ ଆ ମେଟେତ୍ ଜୁଟିନାଗ୍ କାର୍ଙ୍ଗତଣ୍ଡ୍; ଆସୁଟ୍ ମୋଶାଲ୍ ପରୁ ତାର୍ତଣ୍ଡ୍। ଆସୁଟ୍ ସଦାପ୍ରବୁ ମୋଶାଙ୍କ୍ କେତ୍ତଣ୍ଡ୍, ନିମେ ଡ଼ିଗିଆଞ୍ଜ୍ ନାରୁଡ଼୍କିଙ୍କ୍ ଢ଼ାଟୁମ୍ ଆଦେଶ୍ ମାଡ଼ା, ଯଦି ସଦାପ୍ରବୁ ଉଡ଼ାନ୍ ମାଇଦିଙ୍କ୍ ସିମା ୱେଇକେ, ଅଡ଼୍ଆଗାଙ୍କ୍ ପିନା ନାରୁଡ଼୍ ଡଲିତଡ଼୍ ଆଦ୍ତଡ଼୍ । ମେଣ୍ଡେ ବେନ୍ ଯାଜକିଡ଼୍ ସଦାପ୍ରବୁନ୍ ଗାରେ ଆଇୟେଡ଼୍, ଅଡ଼େ ମିକିଙ୍କ୍ ପବିତ୍ର ମାଡ଼ିଣ୍ଡ୍, ଇଲୁକ୍ ଅଣ୍ଡ୍ ଅଡ଼୍କିଙ୍କ୍ ଦଣ୍ଡ ଇଦ୍ତଣ୍ଡ୍। ଆସୁଟ୍ ମୋଶାଲ୍ ସଦାପ୍ରବୁଙ୍କ୍ କେତ୍ତଣ୍ଡ୍, “ନାରୁଡ଼୍ ସିନୟ୍ ମେଟେତ୍ ପରୁ ୱାଦ୍ଦେ ପାର୍ୱଡ଼୍; ବାତେଙ୍କ୍ଇତ୍କେ ମିଡ଼୍ ଦୃଢ଼ ଆଦେଶ୍ଇସ୍ ମାକିଙ୍କ୍ କେସ୍ମିନ୍ଦେନି, ମେଟେତ୍ ସିମା ତିଆର୍ ମାଡ଼ାଟ୍ ନୁ ଆଦ୍ ପବିତ୍ର ମାଡ଼ାଟ୍।”
ଆସୁଟ୍ ସଦାପ୍ରବୁ ଅଡ଼୍କିଙ୍କ୍ କେତ୍ତଣ୍ଡ୍, ଆନୁଟ୍, ଡିଗାଟ୍; ମେଣ୍ଡେ ମିଡ଼୍ ହାରୋଣତିଙ୍କ୍ ସାଙ୍ଗେତେ ଆସ୍ ଡିଗିତିନ୍; ମାତର୍ ଯାଜକିଡ଼୍ ନୁ ନାରୁଡ଼୍ ପର ସଦାପ୍ରବୁ ବେଲା ଆକ୍ରମନ୍ ମାଡ଼୍ମାକିଣ୍ଡ୍, ଇଦିନ୍ମାଦିଙ୍କ୍ ଅଡ଼୍ ଅନ୍ ମୁନେ ୱାଦାନ୍ମାଇଦିଙ୍କ୍ ଅଡ଼୍କିଙ୍କ୍ ଦଣ୍ଡ ଇମା। ଆସୁଟ୍ ମୋଶାଲ୍ ନାରୁଡ଼୍ ଗାରେ ଡ଼ିଗିଆଞ୍ଜ୍ ଅଡ଼୍କିଙ୍କ୍ ଆ ଲେକାମ୍ ଆଦେଶ୍ ଇତ୍ତଣ୍ଡ୍।
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.