Koya Bible
ଯାତ୍ରା 13
ପ୍ରତମ୍ ଜନ୍ମତେ ଉତ୍ସର୍ଗ
ତାନ୍ପେର୍କେ ସଦାପ୍ରବୁ ମୋଶାଙ୍କ୍ କେତ୍ତଣ୍ଡ୍, “ଇସ୍ରାଏଲତେ ପିଲାକିନାଗାଙ୍କ୍ ନାରୁଣ୍ଡ୍ ଆୟିଣ୍ଡ୍ କି ପଶୁ ଆୟି, ଆ ପ୍ରତମ୍ ଜନ୍ମ ସାରେତଡ଼୍କ୍ ମାମ୍ କେତ୍ତେ ଲେକାମ୍ ତିଆର୍ ମାଡ଼ାଟ୍; ଆଦ୍ ମାୟାଦ୍ ଆଦ୍ତେ।”
ତାଡ଼ିତ୍ ଶୂନ୍ୟ ରୋଟି ପାଣ୍ଡୁମ୍
ମୋଶାଲ୍ ନାରୁଡ଼୍ କେତ୍ତଣ୍ଡ୍, ଇଦ୍ନାଣ୍ଡ୍ ଏର୍କେମାଡ଼ି ନେମୁଟ୍, ବେଲାକି ଆଦ୍ନାଣ୍ଡ୍ ମିଡ଼୍ ଦାସନ୍ ଲତ୍ତେ ଲେକ୍ ମିସର୍କନ ପେର୍କେ, ମେଣ୍ଡେ ସଦାପ୍ରବୁନ୍ କାଇ ବପୁତେ ଆଗାକଞ୍ଚ୍ ମିକିଙ୍କ୍ ପେସ୍ପି ତାତ୍ତଣ୍ଡ୍; ଇଗେ ତାଡ଼ି କାଇଲ୍ତେ ରୋଟି ତିନ୍ଦାଙ୍କ୍ ଆୟ। ମିଡ଼୍ ଆବିବ୍ ପେଦେର୍ତେ ପ୍ରତୁମ୍ ନେଲ୍ଞ୍ଜ୍ତେ ଇଦ୍ନାଣ୍ଡ୍ ପେଇତ୍ତଡ଼୍। ମେଣ୍ଡେ କିଣାନୀୟ, ହିତ୍ତୀୟ ନୁ ଇମୋରିୟ, ହିବ୍ଦୀୟ ନୁ ଯିବୂଷୀୟ ନାରୁଡ଼୍ତେ ବେନ୍ ଦେଶ ମିକିଙ୍କ୍ ଇଦାଙ୍କ୍ ସଦାପ୍ରବୁ ମି ଆନିଦାଦିଡ଼୍ଡ଼ାଗାଙ୍କ୍ ପ୍ରମାଣ ମାଡ଼ିମାତ୍ତଣ୍ଡ୍, ଆ ପାଲ୍ ନୁ ଊରୁୱେ ପେୟିତାନ୍ ଦେଶ୍ତିଙ୍କ୍ ବେସୁଙ୍କ୍ ଅଣ୍ଡ୍ ମିକିଙ୍କ୍ ତାତିତଣ୍ଡ୍, ଆ ସମୟତେ ମିଡ଼୍ ଇ ନେଲ୍ଞ୍ଜ୍ତେ ଇ ସେବାତେ ପାଡ଼ିୟି ମାଡ଼ିତିଡ଼୍। ଅଣ୍ଡୟ୍ ଆଟ୍ ଆଇନା ତାଡ଼ି କାଇଲ୍ତେ ରୋଟି ତିନ୍ଦ୍ତିଡ଼୍ ନୁ ସାତ୍ଦିନ୍ ସଦାପ୍ରବୁନ୍ ପେଦେର୍ତେ ପାଣ୍ଡୁମ୍ ମାଡ଼ିତିଡ଼୍। ମେଣ୍ଡେ ଆ ଆଟ୍ହେୱୁନା ତାଡ଼ି କାଇଲ୍ତେ ରୋଟି ତିନ୍ଦାଙ୍କ୍ ଆଦ୍ତେ ନୁ ମିଇ ପାକେ ତାଡ଼ିତ୍ କାଇଲିତେ ରୋଟି ତନ୍ଦ, ମେଣ୍ଡେ ମିୟାଦ୍ ସାରେ ଦେଶ୍କିନାଗ୍ ତାଡ଼ି କାଇଲ୍ତେ ରୋଟି ତନ୍ଦଆଦ୍ତା। ମେଣ୍ଡେ ଆଦ୍ନାଣ୍ଡ୍ ମିଡ଼୍ ନିଜର ନିଜର ମାରିଙ୍କ୍ ପୁଞ୍ଚୁପିତିଡ଼୍, ମିସର୍ତାଗ୍ ମାନଡ଼୍ ପେୟିତାନ୍ୱେଲେ ସଦାପ୍ରବୁ ମାନ୍ ପର ବାତେ ବାତେ ପାଡ଼ିୟ୍ ମାଡ଼ିମାତ୍ତଣ୍ଡ୍, ଆୱୁସାରେ ଏତ୍ମାଡ଼ାନ୍ ମାଇଦିଙ୍କ୍ ଇଲା ଆଦୁତ୍। ମେଣ୍ଡେ ସଦାପ୍ରବୁ ନିୟମ୍ ବେଲା ମିଇ ପାୟୁର୍ତାଗ୍ ମାନ୍ତେ, ଆଦିନ୍ମାଇଦିଙ୍କ୍ ଇଦି ଚିହ୍ନେ ଲେକାମ୍ ମିଇ କାଇଦେ ନୁ ଏର୍କେମାଡ଼ାନ୍ ଉପାୟ୍ ଲେକାମ୍ ମିଇ କଣ୍ଡା ନାଡ଼େମେତ୍ତେ ପଡ଼ିୟେତାଗ୍ ମାନ୍ତେ; ବେଲାକି ସଦାପ୍ରବୁ ସାରେଦାମ୍ କାଇଦେ ମିସରତାଗାଙ୍କ୍ ମିକିଙ୍କ୍ ପେସ୍ପି ତାସ୍ମିନ୍ଦେଣ୍ଡ୍। ଇଦ୍ ସମୟ ଲେକାମ୍ ମିଡ଼୍ ସାରେ ବର୍ଷ ଇଦ୍ ନିୟମ୍ ପାଲନ୍ ମାଡ଼ିତିଡ଼୍।
ସଦାପ୍ରବୁ ମିଡ଼୍ ନୁ ମିଇ ଆନିଦାଦିଡ଼୍ତେ ପାକେ ବେନ୍ ପ୍ରମାଣ ମାଡ଼ିମିନ୍ଦେଣ୍ଡ୍, ଇଦ୍ଲେକାମ୍ ଅଣ୍ଡ୍ ବେସୁଙ୍କ୍ କିଣାନୀୟ ନାରୁଡ଼୍ ଦେଶତାଗ୍ ନେସ୍ ମିକିଙ୍କ୍ ଆଦ୍ ଇଦ୍ତଡ଼୍। ଆସୁଟ୍ ମିୟାଦ୍ ପ୍ରତମ୍ ଜନ୍ମ ସାରେ ଡଙ୍କେତ୍ କାୟା ନୁ ମି ପଶୁତାଗାଙ୍କ୍ ଜନ୍ମ ସାରେ ପ୍ରତମ୍ ଡଙ୍କେତ୍ ଆତ୍ତାଦ୍ ସଦାପ୍ରବୁନ୍ ଲେକାମ୍ ଲେକେତ୍ ମାଡ଼ିତଡ଼୍; ମାର୍ପିଲେ ପୁଟ୍କେ ସାରେ ସଦାପ୍ରବୁନାଦ୍ ଆଦ୍ତେ। ମେଣ୍ଡେ ମିଡ଼୍ ମେଣ୍ଢାପିଲା ଇସ୍ ସାରେ ପ୍ରତମ୍ ଜନ୍ମତେ ଗଦତିଙ୍କ୍ ମୁକ୍ତି ମାଡ଼ିତିଡ଼୍, ବେସୁଙ୍କ୍ ମୁକ୍ତି ମାଡ଼୍ୱିଡ଼୍, ଆସୁଟ୍ ଅନ୍ ଗୁଡ଼ୁଙ୍ଗେ ଉର୍ଗିତ୍; ମାତର୍ ମିଇ ମାର୍ରକିଡ଼ାଗାଙ୍କ୍ ନାରୁଡ଼୍ ପ୍ରତମ୍ ଜନ୍ମ ସାରେ ମୁକ୍ତି ମାଡ଼୍ନଙ୍କ୍ ଆଦ୍ତେ। ମେଣ୍ଡେ ବେନ୍ଆୟି ଦିନାତେ ମିଇ ମାର୍ ଯଦି ପଚ୍ରାମାଡ଼ିତଣ୍ଡ୍, ଇଦ୍ ବାତେ ? ଆସୁଙ୍କ୍ ମିଡ଼୍ କେତିତିଡ଼୍, ସଦାପ୍ରବୁ ବେସୁଙ୍କ୍ ମାନାଙ୍କ୍ ନିଜେତ୍ ବପୁ ଶକ୍ତିତଡ଼୍ ଦାସନ୍ ଲନ୍ ଲେକାମ୍ ମିସରତାଗାଙ୍କ୍ ପେସ୍ପ୍ତଡ଼୍, ଆସୁଙ୍କ୍ ଫାରୋ ମାକିଙ୍କ୍ ଆଦାନଙ୍କ୍ ୱିଡ଼୍ସିଦା ମାଇଦିଙ୍କ୍ ଢ଼ାଟୁଙ୍କ୍ ଆତ୍ତାଙ୍କ୍, ସଦାପ୍ରବୁ ମିସର୍ ଦେଶତେ ନାରୁଡ଼୍କିଙ୍କ୍ ନୁ ମୁନେତ୍ ସାରେ ପ୍ରତମ୍ ଜନ୍ମ ପିଲାକିଙ୍କ୍ ଆୱୁକି ମାତ୍ତଡ଼୍; ଆଦିଙ୍କ୍ ମାମ୍ମେ ପ୍ରତମ୍ ଜନ୍ମ ମାର୍ପିଲାଙ୍କ୍ ସଦାପ୍ରବୁନ୍ ଲେକାମ୍ ପୁଜେ ମାଡ଼ୁତମ୍; ମାତର୍ ମାୟାଦ୍ ପ୍ରତମ୍ ଜନ୍ମତେ ମାର୍ ସାରେତଡ଼୍କିଙ୍କ୍ ମୁକ୍ତି ମାଡ଼ିଣ୍ଡ୍। ଇଦି ଚିହ୍ନେ ଇସାପ୍ତେ ମିଇ କାଇଦେ ନୁ ସୁନ୍ଦର୍ ଇସାପ୍ତେ ମିଇ କଣ୍ଡେତେ ନାଡ଼୍ମେ ମାନ୍ତେ; ବେଲାକି ସଦାପ୍ରବୁନ୍ କାଇ ବପୁତେ ମାନାଙ୍କ୍ ମିସର୍କନ୍ ପେସ୍ପିତାତଣ୍ଡ୍।
ମୟଲ୍ତେ ଗୁଞ୍ଜେ ନୁ କିସ୍ତେ ଗୁଞ୍ଜେ
ତାନ୍ପେର୍କେ ଫାରୋ ନାରୁଡ଼୍କିଙ୍କ୍ ୱିସ୍ ୱାନାକେ, ପଲେଷ୍ଟିୟ ନାରୁଡ଼୍ତେ ଦେଶତେ ଆଦ୍ ଆର୍ଦେ ଏଉକେନେ ପରମେଶ୍ୱର ଆଦ୍ ଆର୍ର ଅଡ଼୍କିଙ୍କ୍ ଅୟଣ୍ଡ୍ତ ଆତ୍ତଣ୍ଡ୍; ବେଲା ପରମେଶ୍ୱର କେତ୍ତଣ୍ଡ୍, ଯୁଦ୍ଦ୍ ଉଡ଼୍କେ ପେର୍କେ ନାରୁଡ଼୍ ଏର୍କେ ମାଡ଼ି ମିସର୍ତା ମାଲ୍ସ୍ ଆଦ୍ ପାର୍ତଡ଼୍। ଆଦିନ୍ମାଇଦିଙ୍କ୍ ପରମେଶ୍ୱର ଅଡ଼୍କିଙ୍କ୍ ସୂଫ ସାଗର୍ତେ ବୂମ୍ଦାଗ୍ ୱାଙ୍କ୍କ ଆର୍ରଦାଲା ତାସ୍କ୍ତଣ୍ଡ୍ ନୁ ଇସ୍ରାଏଲତେ ନାରୁଡ଼୍ ତିଆର୍ ଆସ୍ ମିସର୍ତାଲା ଆତ୍ତଡ଼୍।
ମେଣ୍ଡେ ମୋଶାଲ୍ ଯୋଷେପ୍ତେ ବୁଲେ ତଡ଼େକ୍ ଅତ୍ତଣ୍ଡ୍, ବାତେଙ୍କଇତ୍କେ ଅଣ୍ଡ୍ ଇସ୍ରାଏଲ୍ତେ ନାରୁଡ଼୍ ନାର୍ଗେ ପ୍ରମାଣ ଇସ୍ କେତ୍ତଣ୍ଡ୍, ପରମେଶ୍ୱର୍ ନିଜାମ୍ ମିକିଙ୍କ୍ ଆସ୍ୱେଲେ କେତ୍ତଣ୍ଡ୍, ଆ ସମୟତେ ମିଡ଼୍ ନିଜର୍ ତଡ଼୍ ମା ବୁଲେ ଇଗାକଞ୍ଚ୍ ଅଦ୍ତିଡ଼୍।
ତାନ୍ପେର୍କେ ଅଡ଼୍ ସୁକ୍କୋତକଞ୍ଜ୍ ଆଞ୍ଜ୍ ବୁମ୍ଦେ ଆଞ୍ଚିନା ଦାରାତ୍ଗାରେ ଏତମତାଗ୍ ଗୁଡ଼ୁସେ ମାଡ଼୍ତଡ଼୍ । ଅଡ଼୍ବେଲାନ୍ ପାୟାଲ୍ ନୁ ନାର୍କା ଆଦ୍ପାର୍ତଡ଼୍, ଆଦିନ୍ମାଇଦିଙ୍କ୍ ସଦାପ୍ରବୁ ପାୟାଲ୍ତେ ଆର୍ ତଃତାନ୍ ମାଇଦିଙ୍କ୍ ମୟଲ୍ ଗୁଞ୍ଜେତେ ନୁ ନାର୍କା ୱେସ୍ ଇଦାନ୍ ମାଇଦିଙ୍କ୍ କିସ୍ଗୁଞ୍ଜେତାଗ୍ ମାଞ୍ଜ୍ ଅଡ଼୍ ମୁନେ ମୁନେ ଆତ୍ତଣ୍ଡ୍। ଅଣ୍ଡ୍ ନାରୁଡ଼୍ ମୁନେ ପାୟାଲ୍ତେ ମାବ୍ତେ ଗୁଞ୍ଜେ ନୁ ନାର୍କେତେ କିସ୍ଗୁଞ୍ଜେ ମେଣ୍ଡ୍ଡ଼ାଗ୍ ମାଡ଼ଣ୍ଡ୍ ।
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.