Koya Bible
ଯାତ୍ରା 1
ମିସରତାଗ୍ ଇସ୍ରାଏଲ୍ନକ୍ ତିପାଲ୍
ଇସ୍ରାଏଲ୍ତେ ବେନ୍ ମାର୍କ୍ ସାରେତଡ଼୍ ନିଜର ନିଜର୍ ତଡ଼୍ଦେନଡ଼କ୍ ପହିସ୍ ଯାକୁବ୍ତଡ଼୍ ମିସର୍ ଦେଶ୍ତାଗ୍ ୱାତ୍ତଡ଼୍ ଅଡ଼୍, ପେଦେର୍; ରୁବେନ୍, ଶିମିୟନ୍, ଲେବି, ନୁ ଯିହୁଦାଲ୍; ଇଷାଖର୍, ସବୂଲୂନ୍ ନୁ ବିନ୍ୟାମିନ୍; ଦାନ ନୁ ନପ୍ତାଲି; ଗାଦ୍ ନୁ ଆଶେର । ଆସମୟ୍ତେ ସାରତଡ଼୍ ଯାକୁବ୍ତାଗ୍ ଜନ୍ମ ଆତେ ପିଲୁଡ଼୍ ସତୁରି ଜାନ୍ ମାତ୍ତଡ଼୍; ମାତ୍ର ଯୋଷେପ୍ ମୁନେଙ୍କ୍ ମିସର୍ତାଗ୍ ମାତ୍ତଣ୍ଡ୍ । ଯୋଷେପ୍ ନୁ ତାମ୍ ଦାଦାଲଡ଼୍ ନୁ ଆ ପିଲୁଡ଼୍ତେ ସାରେ ନାରୁଡ଼୍ ଡଲ୍ତଡ଼୍ । ମେଣ୍ଡେ ଇସ୍ରାଏଲ୍ ପିଲୁଡ଼୍ ନାର୍ଗେ ଗୋଷ୍ଟି ଆସ ନାର୍ଗେ ଆତ୍ତଡ଼୍, ମେଣ୍ଡେ ଅଡ଼୍କିଙ୍କ୍ ତଡ଼୍ ଦେଶ୍ ନିଣ୍ଡି ଆତ୍ତେ । ଆସୁଙ୍କ୍ ଯେ ଯୋଷେପ୍ତିଙ୍କ୍ ପୁନ୍ୱେ ମାତ୍ତଡ଼୍, ଇଦ୍ଲେକାମ୍ ଅର୍ତୁଣ୍ଡ୍ ରାଜାଲ୍ ମିସର୍ ଦେଶ୍ତାଗ୍ ଆତ୍ତଣ୍ଡ୍ । ଅଣ୍ଡ୍ ନିଜ ନାରୁଡ଼୍କିଙ୍କ୍ କେତ୍ତଣ୍ଡ୍, “ଉଡ଼ାଟ୍, ଇସ୍ରାଏଲ୍ ପିଲାନ୍ ପିଲୁଡ଼୍, ବପୁ ନୁ ସଂକ୍ୟାତେ ମାନାଗାଙ୍କ୍ ଅଦିକ୍ ନାର୍ଗେ । ଅଡ଼୍ ବେଲାନ୍ ମେଣ୍ଡେ ଯୁଦ୍ଧ ଗଟେମ୍, ଆତ୍କେ ମାନ୍ ଶତ୍ରୁଡ଼୍ପାକେ ଆସ୍ ମାନ୍ତଡ଼୍ ଯୁଦ୍ଦ୍ ମାଡ଼କ୍ ନୁ ଇ ଦେଶ୍ତାଗାଙ୍କ୍ ପେଇସ୍ ଆନକ୍, ଆଦିନ୍ ମାଇଦିଙ୍କ୍ ୱାଡ଼ାଟ୍, ମାନାଡ଼୍ ଅଡ଼୍ତଡ଼୍ ସାବ୍ଦାନ୍ ଆସ ବ୍ୟବହାର ମାଡ଼ିକାଡ଼୍ ।” ଅଡ଼୍ ବଜ୍ କାଞ୍ଜାନାଗାଙ୍କ୍ ଅଡ଼୍କିଙ୍କ୍ କଷ୍ଟ ଇଦାନ୍ ମାଇଦିଙ୍କ୍ ଅଡ଼୍ ପର୍ କାମ୍ଶାସନ୍ ମାଡ଼ାନକିଙ୍କ୍ ଏଞ୍ଚତଣ୍ଡ୍, ମେଣ୍ଡେ ଅଡ଼୍ତଡ଼୍ ଫାରୋ ରାଜାନ୍ ମାଇଦିଙ୍କ୍ ମାନ୍ଦାନ୍ ଗୁଡ଼ୁସେତ୍ ନଗର, ଇତ୍କେ, ପିତୋମ୍ ନୁ ରାମିଷେଷ୍ ତିଆର୍ ମାଡ଼୍ତଡ଼୍ । ମାତର୍ ଅଡ଼୍ ଅଡ଼୍କିଙ୍କ୍ ବେସର୍ ତିପାଲ୍ କଷ୍ଟ ଇତଡ଼୍, ଅଡ଼୍ ଆସର୍ ଅଦିକ୍ ସାୟେ ଆତ୍ତଡ଼୍, ମେଣ୍ଡେ ଅଡ଼୍ ଆସର୍ ଏକାମ୍ ଆତଡ଼୍ । ଆଦିଙ୍କ୍ ଇସ୍ରାଏଲତେ ପିଲାକିନ୍ ମାଇଦିଙ୍କ୍ ଅଡ଼୍ ନାର୍ଗେ ଇକେଆକେ ଆତ୍ତଡ଼୍ । ଆସୁଙ୍କ୍ ମିସ୍ରିୟ ନାରୁଡ଼୍ ଅଦିକ୍ ଇସ୍ରାଏଲତେ ପିଲାକିଙ୍କ୍ ଦାସ ପାଡ଼୍ୟି ମାଡ଼ାନଙ୍କ୍ କେତ୍ତଡ଼୍ । ମେଣ୍ଡେ ବୁର୍ଦେ ନୁ ଇଟା ନୁ ୱାୟାନ୍ ସାରେ କଷ୍ଟ ପାଡ଼ିୟ୍ ଦାସ ପାଡ଼ିୟ୍ ଅଡ଼୍ ଜିଉନୁତିଙ୍କ୍ କିଚ୍କିଚା ମାଡ଼ାନଙ୍କ୍ ପସ୍ପତଡ଼୍ । ଅଡ଼୍ ସାରେ ଦାସ ପାଡ଼ିୟ୍ ମାଡ଼ାନଙ୍କ୍ କେତ୍ତଡ଼୍; ଆୱୁ ସାରେ ଅଦିକ୍ ମାଡ଼ାନଙ୍କ୍ କେତ୍ତଡ଼୍ । ଆସୁଙ୍କ୍ ମିସ୍ରିୟ ରାଜାଲ୍, ଶିଫ୍ରା ନୁ ପୂୟା ପେର୍ଦେତେ ଇର୍ୱୁଡ଼୍ ଏବ୍ରିୟା ୟାୟଙ୍କ୍ ଇଦ୍ ଗଟ୍ କେତ୍ତଡ଼୍, ବେନ୍ ସମୟତେ ମିଡ଼୍ ଇସ୍ରାଏଲ୍ ନାଟାକିଙ୍କ୍ ୟାୟ ପାଡ଼ିୟି ମାଡ଼ିତିଡ଼୍ ନୁ ଆୱିଙ୍କ୍ ଜନ୍ମମାଡ଼ାନାଦ୍ ଉଡ଼ିତିଡ଼୍; ଆ ସମୟତେ ଯଦି ମାର୍ ପୁଟିତଣ୍ଡ୍, ଆସୁଟ୍ ଅକିଙ୍କ୍ ଆୱୁକିଦ୍ତିଡ଼୍; ମେଣ୍ଡେ ଯଦି ମାୟାଡ଼୍ ପୁଟିତେ ଆସୁଟ୍ ତାକିଙ୍କ୍ ଜିୱେ ନେଃତିଡ଼୍। ମାତର୍ ଆ ୟାୟକି ପରମେଶ୍ୱର୍ଦିଙ୍କ୍ ୱେର୍ତାଙ୍କ୍ ମିସ୍ରିୟ ରାଜାନ୍ ଗଟ୍ ଲେକାମ୍ କାମ୍ ମାଡ଼କଟ୍ ମାର୍ ମାୟାସ୍କିଙ୍କ୍ ଜିଉନେଃତା । ଆଦିଙ୍କ୍ ମିସରତେ ରାଜାଲ୍ ୟାୟକିଙ୍କ୍ କାର୍ଙ୍ଗି କେତ୍ତଣ୍ଡ୍, ମିଡ଼୍ ଇଦ୍ଲେକାତ୍ ପାଡ଼ିୟ୍ ବାତେଙ୍କ୍ ମାଡ଼ୁତିଡ଼୍ ? ମାର୍କକିଡ଼୍କିଙ୍କ୍ ବାତାଙ୍କ୍ ଜିଉ ନେଃତୁତିଡ଼୍ ? ଆସୁଟ୍ ୟାୟକି ଫାରୋଙ୍କ୍ କେତ୍ତା, ଏବ୍ରିୟା ନାଟାକି ମିସ୍ରିୟା ନାଟାକି ଲେକାମ୍ ଆୟ୍; ଆୱୁ ବପୁତାୱ୍, ଆୱିକିନ୍ ଗାରେ ୟାୟ୍ ୱାଦାନ୍ ମୁନେ ଆୱୁ ଜନ୍ମ ମାଡ଼ିତା । ମେଣ୍ଡେ ପରମେଶ୍ୱର ଆ ୟାୟକିଙ୍କ୍ ସାୟେ ମାଡ଼୍ତଣ୍ଡ୍, ଆସୁଙ୍କ୍ ନାରୁଡ଼୍ ନାର୍ଗେ ଆତ୍ତଡ଼୍ ମେଣ୍ଡେ ନାର୍ଗେ ଢ଼ାଟୁଙ୍କ୍ ଆତ୍ତଡ଼୍ । ଆ ୟାୟକି ପରମେଶ୍ୱରଦିଙ୍କ୍ ୱେର୍ତାଙ୍କ୍ ଅଣ୍ଡ୍ ଆୱିଙ୍କ୍ ପିଲୁଡ଼୍ତିଙ୍କ୍ ନାର୍ଗେ ମାଡ଼୍ତଣ୍ଡ୍ । ତାନ୍ପେର୍କେ ଫାରୋ ରାଜା ତାନ୍ ସାରେ ଦାସନଡ଼୍କି ଇଦି ଗଟ୍ କେତ୍ତଣ୍ଡ୍, ଏବ୍ରିୟନଡ଼୍ ପୁଃନେ ଜନ୍ମଆତ୍ତେ ସାରେ ମାର୍କିଡ଼୍ ନୀଲ ବେଡ଼େମ୍ତାଗ୍ ହେସ୍ସିମୁଟ୍, ମାତର୍ ସାରେ ମାୟାସ୍କିଙ୍କ୍ ଜିୱେନେଃମୁଟ୍ ।
Koya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.