ପୁନାଦ୍ ଆର୍ର୍
ପ୍ରକାଶିତ୍ ବାକ୍ୟ 5
ବଇ ନୁ ମେକାଗଲାଲ୍
ସିଂହାସନ୍ତାଗ୍ ମାନ୍ଦାନ୍ ନାରୁଣ୍ଡ୍ତେ ତିନ୍ଦେ କାୟ୍ଦାଗ୍ ନାନେ ୱେରଡ଼୍ ବଇ ଉଡ଼୍ତାନ୍; ତାନ୍ ରେଣ୍ଡ୍ ପାକା ଲେକା ଆଶ୍ମାତ୍ତେ ନୁ ସାତ୍ଟାନ୍ ସିଲ୍ତଡ଼୍ ଆଦ୍ ଲେକା ଆସ୍ମାତ୍ତେ । ମେଣ୍ଡେ ନାନେ ଉଡ଼୍ତାନ୍, ୱେରଣ୍ଡ୍ ମହାପରାକ୍ରାନ୍ତ ସ୍ୱର୍ଗଦୂତ ଗାଟି ଲେଙ୍ଗ୍ତେ କେସ ମାନ୍ନୁଣ୍ଡ୍, “ସିଲ୍କିଙ୍କ୍ ଉୱୁସ୍ ଇଦ୍ ବଇତିଙ୍କ୍ ଟେଣ୍ଡାନଙ୍କ୍ ବେନ ଯୋଗ୍ୟ ନାରୁଣ୍ଡ୍ ମାତ୍କେ, ପେଇସ୍ ୱାଡ଼ିଣ୍ଡ୍ ।” ଇତ୍କେ ଆଦ୍ ବଇତିଙ୍କ୍ ଟେଣ୍ଡି ଆଗେ ବାତ୍ ଲେକାମିନ୍ଦେ, କାର୍ତାନଙ୍କ୍ ସ୍ୱର୍ଗତାଗ୍, ପୃତିବିତାଗ୍ ବା ପାତାଲ୍ତାଗ୍ ବେନ ପେୟଣ୍ଡ୍ । ବଇ ଟେଣ୍ଡି ଆଗେ ବାତ୍ତେ ଲେକାମିନ୍ଦେ, କାର୍ତାନ୍ ସେଙ୍ଗେ ବେନ ୱେରଣ୍ଡ୍ମିକା ଯୋଗ୍ୟ ନାରୁଣ୍ଡ୍ ଦର୍କ୍ୱାଙ୍କ୍, ନାନେ ଦୁଃକାମ୍ ଆସ୍ କେୟାନଙ୍କ୍ ପସ୍ପ୍ତାନ୍ । ତାନ୍ପେର୍କେ ବୟସ୍ତେ ନେତାଲଡ଼୍ ଲୋପେଙ୍କ୍ ୱେରଣ୍ଡ୍ ନାକ୍ ବୁଲ୍ସ୍ପି କେତ୍ତନ୍, “କେୟ୍ମା, ଉଡ଼େ ! ଦାଉଦ୍ତେ ବେଡ଼୍ୟେ ପରିବାର୍ତାଗାଙ୍କ୍, ଯିହୁଦା ଗୋଷ୍ଟୀତଣ୍ଡ୍ ଗଣ୍ଡ୍ରାସ୍ ଦାଗାଙ୍କ୍ ଜିଡ଼ି ୱାସ୍ମିନ୍ତେନ୍; ଅଣ୍ଡ୍ ଇଦ୍ ସାତ୍ଟାନ୍ ଯାକ ସିଲ୍ ଉୱୁସ୍ ବଇ ଟେଣ୍ଡାନଙ୍କ୍ ପାର୍ତନ୍ ।”
ତାନ୍ପେର୍କେ ସିଂହାସନ୍ତେ ନାଡ଼୍ମେ ମୁନେଙ୍କ୍ତାୱୁ ନାଲୁଟାନ୍ ପଶୁ ନୁ ବୟସ୍ତେ ନେତାଲଡ଼୍ଆଗାଙ୍କ୍ ୱେରଣ୍ଡ୍ ମେଣ୍ଡେ ନିସ୍ ମାନ୍ଦାନାଦ୍ ଉଡ଼୍ତାନ୍ । ମେଣ୍ଡେ ଡଲ୍ତେ ଲେକାମ୍ ଏର୍କେ ଆୟ୍ନୁଡ଼୍ । ଆଦିନାୱୁ ସାତ୍ଟାନ୍ କଅକ୍ ନୁ ସାତ୍ଟାନ୍ କଣ୍ଡା ମାତ୍ତା । ଆୱୁ କଣ୍ଡା ପୁରା ପୃତିବିତାଗ୍ ରହସ୍ ମାନ୍ଦାନ୍ ଇଶ୍ୱର୍ତେ ସାତ୍ଟାନ୍ ଆତ୍ମା ମେଣ୍ଡେ ସିଂହାସନ୍ ତାଗ୍ ମାନ୍ଦାନଣ୍ଡ୍ ଗାରେ ଆଞ୍ଜ୍ ତାନ୍ ତିନ୍ଦେ କାଇଦାଗାଙ୍କ୍ ବଇ ଆତ୍ତେ । ଅଣ୍ଡ୍ ଆଦ୍ ମାଡ଼ାନ୍ ପେର୍କେ ନାଲୁଲାକା ପଶୁ ନୁ ଚବିଶ୍ ଜାନ୍ ବୟସ୍ତେ ନେତାଲଡ଼୍ ମେକାଗଲାନ୍ ମୁନେ ପ୍ରଣାମ୍ ମାଡ଼୍ତଡ଼୍ । ସାରେତଡ଼୍ କାଇକିନାଗ୍ ୱେର ବିଣା ନୁ ଇଶ୍ୱର୍ତେ ବକ୍ତନଡ଼୍ ପ୍ରାର୍ତନା ଲେକାମ୍ ଦୁପତାଗ୍ ନିଣ୍ଡୁ ୱେରଡ଼୍ ସୁବର୍ଣ୍ଣ ପାତ୍ର ମାତ୍ତେ । ଅଡ଼୍ ୱେରଡ଼୍ ପୁନେ ପାଟେ ପାର ମାତ୍ତଡ଼୍, “ବଇ ଆସ୍ ମିକା ଆଦ୍ ମାଆର୍ ଟେଣ୍ଡାନଙ୍କ୍ ନିମେ କେ ଯୋଗ୍ୟ, ବାତେଙ୍କ୍ଇତ୍କେ ନିମେ ଆୱୁକି ଆସ୍ମାତ୍ତିନ୍ ନୁ ନିୟାଦ୍ ତଡ଼୍, ସାରେତେ ନାର୍, ବାଷାବାଦିଡ଼୍, ରାଷ୍ଟ ନୁ ଜାତିନାଗାଙ୍କ୍ ଇଶ୍ୱର୍ତେ ସେଙ୍ଗେ ନାରୁଡ଼୍କିଙ୍କ୍ ମୁକ୍ତି ଆସ୍ ମିନ୍ଦେନି । 1ମେଣ୍ଢା ଇଶ୍ୱର୍ତେ ସେବା ମାଡ଼ାନ୍ ସେଙ୍ଗେ ଅଡ଼୍କିଂଙ୍କ୍ ୱେରଡ଼୍ ଯାଜକ୍ ନାର୍ଦାଗ୍ ପରିଣତ୍ ମାଡ଼ିମିନ୍ଦେନି ଅଡ଼୍ ପୃତିବିତେ ପରୁ ରାଜତ୍ୱ ମାଡ଼ିତଡ଼୍ ।”
ନାନେ ମେଣ୍ଡେ ମାଲ୍ସ୍ ଉଡ଼୍ତାନ୍, ନାର୍ଗେ ହଜାର୍ ନୁ ନାର୍ଗେ ଲକ୍ଷ ସ୍ୱର୍ଗଦୂତ ସିଂହାସନ୍ତାଗ୍, ନାଲୁଲାକା ପଶୁ ନୁ ବୟସ୍ତେ ନେତାଲଡ଼୍ ତିଡ଼୍ପାକା ନିସ୍ମିନ୍ତେ । ଅଡ଼୍ ଗାଟି ଲେଙ୍ଗ୍ଦେ ପାଟ୍ ମାନ୍ନୁଡ଼୍, “ଆୱୁକି ମାନ୍ଦାନ୍ ଆ ମେଣ୍ଢା କ୍ଷମତା, ଏଶ୍ଚର୍ଯ୍ୟ, ଜ୍ଞାନ୍ ନୁ ଶକ୍ତି ସମ୍ଭ୍ରମ, ଗଉରବ୍ ନୁ ପ୍ରଶଂସାତେ ବାଜନ୍ !” ଆସୁଙ୍ଗ୍ ସ୍ୱର୍ଗ, ପୃତିବି, ପାତାଲ ନୁ ସମୁଦ୍ରତେ ସାରେ ପଶୁ ନୁ ବିଶ୍ୱତେ ସାରେ ପ୍ରାଣିଙ୍କ୍ ପାଟେ ପାରାନାଦ୍ ନାନେ କେଞ୍ଜ୍ତାନ୍ । ଅଡ଼୍ ପାରମାତ୍ତଡ଼୍, “ସିଂହାସନ୍ତାଗ୍ ପରୁ ମାନ୍ଦାନ୍ ନାରିନ୍ ନୁ ତାନ୍ ମେଣ୍ଢାତ୍ ପ୍ରସଂଶା ମାଡ଼ାଟ୍ । ତାମ୍ ସମ୍ମାନ୍, ଗଉରବ୍ ନୁ ସାତ୍ୱାମ୍ ସାରେ ଦିନା ମାନ୍ତେ !” ନାଲୁଲାକା ଜିୱାକ୍ ଅଣ୍ଡୟ୍ତଡ଼୍ କେସମାନ୍ନୁ, “ଆମେନ୍” ନେତାଲଡ଼୍ ପ୍ରଣିପାତ ମାଡ଼ଡ଼୍ ତାମାଦ୍ ଆରାଦାନା ମାଡ଼୍ତଡ଼୍ ।
Source notes (1)
- Cross-reference ପ୍ରକାଶିତ୍ ବାକ୍ୟ ୧:୬.
ପୁନାଦ୍ ଆର୍ର୍. Copyright © 2020 The Word for the World International and Koya Translation Samithi, Malkangiri, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.