ପୁନାଦ୍ ଆର୍ର୍
ମାର୍କ 3
କଲିକାଇ ସାୟେଆତ୍ତେ
(ମାତିଉ ୧୨:୯-୧୪; ଲୁକ ୬:୬-୧୧)
ଜିସୁ ପ୍ରାର୍ତନା ଲୋନ୍ ମାଲ୍ସ୍ ଆତ୍ତନ୍ । ଆଗେ ୱେରଣ୍ଡ୍ ନାରୁଡ଼୍ ମାତ୍ତନ୍ । ଅନାଦ୍ କାଇ ୱାସି ମାତ୍ତେ । ଜିସୁ ବିଶ୍ରାମ୍ ଦିନେତେ ଆ ନାରୁଙ୍କ୍ ସୁସ୍ଥ ମାଡ଼ିତ୍ତନ୍ କି ଇଲ୍ଲେ, ଇଦ୍ ବିଷୟ୍ତେ ଅନାଦ୍ ଦଷ୍ ପଇସ୍ କାରାପ୍ ଗଟି ତତାନ୍ସେଙ୍ଗେ ବେସ୍ତୁଡ଼୍ ନାରୁଡ଼୍ ଅନ୍ପରୁ ଲେକେତ୍ କଣ୍ଡେ ୱାଟ୍ତଡ଼୍ । ଜିସୁ ଆ ନାରୁଙ୍କ୍ କେତ୍ତନ୍, “ନା ମୁନେ ତେଦିୱାଡ଼ା ।” ଅଣ୍ଡ୍ ନାରୁଡ଼୍କିଂଙ୍କ୍ ପଚାର୍ମାଡ଼୍ତନ୍, “ବିଶ୍ରାମ୍ଦିନେତେ ବାଆତେ ମାଡ଼ାନାଦ୍ ଟିକ୍ ନିୟମ୍ ? ବେନ୍ ଦିନ୍ ୱେରନାଦ୍ ଲେକେତ୍ ମାଡ଼ିକାଡ଼୍ ନା କାରାପ୍ ମାଡ଼ିକା ? ୱେରନାଦ୍ ତ ଜିୱୁନ୍ତିଙ୍କ୍ ରକ୍ଷା ମାଡ଼ାନାଦ୍ ନା ବିନାସ ମାଡ଼ାନାଦ୍ ? ବାତେଙ୍କ୍ ଇତ୍କେ ଅଡ଼୍ କଟମାତ୍ତଡ଼୍ ।”
ଜିସୁ ଅଡ଼୍ପାକେଙ୍କ୍ କପାମ୍ ଆସ୍ ଉଡ଼୍ତନ୍ ନୁ ଅଡ଼ାଦ୍ ତିପାଲ୍ ହୃଦୟତିଙ୍କ୍ ଉଡ଼ି ଦୁଃକାମ୍ ଆତ୍ତନ୍ । ତାନ୍ପେର୍କେ ଆ ନାରୁଙ୍କ୍ କେତ୍ତନ୍, “କାଇ ଆମ୍ ।” ଅଣ୍ଡ୍ କାଇ ଆତାନ୍ ୱେଲେ ସୁସ୍ଥ ଆତ୍ତେ । ଆସୁଙ୍କ୍ ଫାରଶୀଡ଼୍ ପ୍ରାର୍ତନା ଲୋତ୍ତାଗାଙ୍କ୍ ପେଇସ୍ ଆଞ୍ଜ୍ ଜିସୁଙ୍କ୍ ଆୱୁକାନ୍ ସେଙ୍ଗେ “ହେରଦୀନ୍” ମାନ୍ଦେତ୍ ନାରୁଡ଼୍ତଡ଼୍ ତିର୍ୟ୍ତନ୍ ।
ଇଲ୍କେ ଗୁଇନ୍ଦେ ଆଞ୍ଚିନା ନାରୁଡ଼୍ ମାନ୍ଦେ
ଜିସୁ ନୁ ତାନ୍ ଶିଷ୍ୟନଡ଼୍ ଗାଲିଲୀ ଇଲ୍କେତ୍ ଆଞ୍ଚିନାଗ୍ ଆଦ୍ତଡ଼୍ ନୁ ନାରୁଡ଼୍ ନାର୍ଗେମାନ୍ଦେ ଅନ୍ପେର୍କେ ତାକ୍ତଡ଼୍ ମେଣ୍ଡେ, ଯିହୂଦା ପ୍ରଦେଶ୍ ।
ଅଡ଼୍ ଗାଲିଲୀ, ଯିହୁଦା, ଯିରୁଶାଲେମ୍, ଏଦୋମ, ଯର୍ଦ୍ଦନ ବେଡ଼୍ମ୍ତେ ମୁନେମାନ୍ଦାନ୍ ସହର୍ ନୁ ସୋର୍ ନୁ ସିଦୋନ୍ ସହର୍ତେ ଗାର୍ରେମାନ୍ଦାନ୍ ନାର୍ଦାଗାଙ୍କ୍ ୱାସ୍ ମାତ୍ତଡ଼୍ । 1ଆଗେ ଇସର୍ ନାରୁଡ଼୍ଗହଲି ଆଦ୍ତଡ଼୍ ଯେ, ମାନ୍ଦେତାଗାଙ୍କ୍ ରକ୍ଷା ଆଦାନ୍ ସେଙ୍ଗେ ଜିସୁ ୱେରଡ଼୍ ଓଡେ ଯୋଗାଡ଼୍ ମାଡ଼ାନଙ୍କ୍ ଶିଷ୍ୟନଡ଼୍କ୍ କେତ୍ତନ୍ । ଅଣ୍ଡ୍ ନାର୍ଗେ ନାରୁଡ଼୍କିଂଙ୍କ୍ ସୁସ୍ଥ ମାଡ଼୍ତଣ୍ଡ୍ । ନପିନ୍ନେ ମାନ୍ଦାନ୍ ନାରୁଡ଼୍ ଅଙ୍କ୍ ଇଟାନ୍ ସେଙ୍ଗେ ମୁନେ ଆଞ୍ଜମାତ୍ତଡ଼୍ । ମେଣ୍ଡେ ବୁତ୍ପଇତେ ନାରୁଡ଼୍ ଅଂକିଙ୍କ୍ ଉଡ଼ାନ୍ ସାଙ୍ଗେ ସାଙ୍ଗେ ଅନ୍ମୁନେ ନେଲ୍ରାଲି ଗାଟିଲେଙ୍କ୍ଦେ କେସମାତ୍ତଡ଼୍ “ନିମେକେ ଇଶ୍ୱର୍ତେ ମାର୍ ।”
ଅଣ୍ଡ୍ ବେନ, ଇଦ୍ଗଟ୍ ବେନଙ୍କ୍ ବା କେଲ୍ମାଟ୍ ଇଞ୍ଜ ଜିସୁ ବୁତ୍କିଂଙ୍କ୍ ଦମକ୍ ଇସ୍ କେସମାତ୍ତନ୍ ।
ଜିସୁନ୍ ବାରଜାନ୍ ଶିଷ୍ୟଡ଼୍କ୍ ହେଞ୍ଜ୍ତନ୍
(ମାତିଉ ୧୦:୧-୪; ଲୁକ ୬:୧୨-୧୬)
ତାନ୍ପେର୍କେ ଜିସୁ ମେଟେତ୍ପରୁ ଆଞ୍ଜ୍ ବେନଡ଼୍କ୍ ଇଚ୍ଛା ମାଡ଼ୁତଣ୍ଡ୍, ଅଡ଼୍କିଂଙ୍କ୍ ଗାର୍ରେ କାର୍ଙ୍କ୍ତନ୍ । ଅଣ୍ଡ୍ ବାରଜାନ୍ତିଙ୍କ୍ ହେଞ୍ଚିମିକା ପ୍ରେରିତ୍ ଶିଷ୍ୟଡ଼୍ ପେଦେର୍ ଇତ୍ତନ୍ । ଅଡ଼୍କିଂଙ୍କ୍ ଅଣ୍ଡ୍ କେତ୍ତାନ୍, “ନା ତୋଡ଼୍ ମାନ୍ଦାନଙ୍କ୍ ନାନ୍ନେ ମିକିଂଙ୍କ୍ ହେଞ୍ଚି ମିନ୍ଦେନ୍ ନୁ ପ୍ରଚାର୍ ମାଡ଼ାନ୍ ସେଙ୍ଗେ ନାନ୍ନେ ମିକିଂଙ୍କ୍ ରତିତାନ୍ । ମିଡ଼୍ ବୁତ୍ୱିର୍ସ୍ପାନଙ୍କ୍ ଆନ୍ତେ ଅଦିକାର୍ ପାହେମ୍ ଆଦ୍ତିଡ଼୍ ।”
ଅଡ଼୍ ବାରଜାନ୍ତିଙ୍କ୍ ହେଞ୍ଚ୍ତନ୍ ଶିମୋନ୍ ଜିସୁ ଅଂକିଙ୍କ୍ ପିତର୍ ଇଞ୍ଜ ପେଦେର୍ ଇତ୍ତନ୍; ଜେବଦୀଙ୍କ୍ ଇର୍ୱୁଡ଼୍ ମାର୍କ୍ ଯାକୁବ୍ ନୁ ତାନ୍ ତାମୁଣ୍ଡ୍ ଯୋହନ୍ ଜିସୁ ଅଡ଼୍କିଂଙ୍କ୍ ବିନେରିଗୋଷ ଇତ୍କେ “ମାବ୍ତାଗାଙ୍କ୍ ୱାତ୍ତେ ମାର୍କ୍,” ପେଦେର୍ ଇତ୍ତନ୍ । ଆନ୍ଦ୍ରିୟ, ଫିଲିପ୍, ବର୍ତଲମି, ମାତିଉ, ତୋମା, ଆଲ୍ଫିନ୍ ଇର୍ୱୁଡ଼୍ ମାର୍କ୍ ଯାକୁବ୍ ନୁ ତଦ୍ଦିୟ, ଦେଶ୍ତିଙ୍କ୍ ପ୍ରେମ୍ ମାଡ଼ାନ୍ ଶିମୋନ୍ ନୁ ଇଷକାରିୟତେ ଯିହୁଦାଲ୍ ପେର୍କେ ଯେ ଜିସୁନ୍ ତଡ଼୍ ବିଶ୍ୱାସଗାତକତା ମାଡ଼୍ତଣ୍ଡ୍ ।
ଜିସୁ ନୁ ବାଆଲ୍ଜିବୁଲ୍
(ମାତିଉ ୧୨:୨୨-୩୨; ଲୁକ ୧୧:୧୪-୨୩; ୧୨:୧୦)
ତାନ୍ପେର୍କେ ଜିସୁ ବେସୁଙ୍କ୍ ଲୋନ୍ ମାଲ୍ତନ୍, ଆଗେମିକା ଇସର୍ ନାରୁଡ଼୍ ଗୁଡ଼୍ତଡ଼୍ ଯେ ଜିସୁ ନୁ ତାନ୍ଶିଷ୍ୟନଡ଼୍ ତିନ୍ଦାଙ୍କ୍ମିକା ପାର୍ୱଡ଼୍ । ଜିସୁ ବାୟ୍ ଆତ୍ତନ୍ ଇଞ୍ଜ ନାରୁଡ଼୍ କେତାନାଦ୍ କେଞ୍ଜି, ଜିସୁନ୍ ଆତ୍ମୀୟନଡ଼୍ ଅଙ୍କ୍ପଇସ୍ ଆଦାନଙ୍କ୍ ୱାତ୍ତଡ଼୍ । 2
ଯିରୁଶାଲେମ୍ ତାଗାଙ୍କ୍ ୱାସ୍ମାନ୍ଦାନ୍ ବେସ୍ତୁଡ଼୍ ଦର୍ମଗୁରୁଡ଼୍ କେତ୍ତଡ଼୍, “ବାଆଲ୍ଜିବୁଲ୍ ଅଂକିଙ୍କ୍ ଅଦିକାର୍ ମାଡ଼୍ତେ । ମେଣ୍ଡେ ବୁତ୍କିନ୍ ଅଦିପତି ବୁତ୍କ୍ ୱିର୍ସ୍ପାନଙ୍କ୍ ଅଂକିଙ୍କ୍ ଶକ୍ତି ଇତ୍ତେ ।”
ଜିସୁ ଅଡ଼୍କିଂଙ୍କ୍ କାର୍ଙ୍ଗି ୱେଷଡ଼୍ଲେକାମ୍ ବୁଜାମାଡ଼ି କେତ୍ତାନ୍, “ଶୟ୍ତାନ୍ ବେଲାନ୍ ଶୟ୍ତାନ୍ତିଙ୍କ୍ ତୋଲାନଙ୍କ୍ ପାର୍ତେ ? ରାଜ୍ୟତେ ନାରୁଡ଼୍ ଯଦି ମାନ୍ଦା ମାନ୍ଦାଆସ୍ ନିଜେତ୍ ବିରୁଦ୍ଦ୍ତେ ଯୁଦ୍ ମାଡ଼ିତଡ଼୍, ଆଦ୍ ରାଜ୍ୟ ଦୁଡ଼ା ଦୁଡ଼ା ଆଦ୍ତେ । ୱେରଡ଼୍ ପରିବାର୍ତେ ନାରୁଡ଼୍ ଯଦି ବେନ୍ବେନ୍ ମାନ୍ଦେତାଗାଙ୍କ୍ ୱିରିମିକା ନିଜେ ନିଜେ ବିରୁଦ୍ଦ୍ ମାଡ଼ିତଡ଼୍, ଆଦ୍ ପରିବାର୍ ଉର୍ଙ୍ଗି ଆଦ୍ତେ । ଆଲେକେ ଯଦି ଶୟତାନ୍ତେ ରାଜ୍ୟ ୱେରେ ଆଦ୍ତେ, ଆଲେକେ ଆଦ୍ ରାଜ୍ୟ ମାନ୍ଦେପାର୍ୱ, ଦୁଡ଼ା ଦୁଡ଼ା ଆସ୍ ଦ୍ୱଂସ ଆଦ୍ତେ ।”
ଶକ୍ତିନାରୁନ୍ ଲୋନ୍ ବେନଆୟି ନେଙ୍କି ମୁନେ ଅଂକିଙ୍କ୍ ତୱେମାତ୍କେ, ଅନାଦ୍ ଜିନିଷ୍ ଡ଼ଙ୍ଗି ଅଦେ ପାରେୱଡ଼୍ ।
“ନାନ୍ନେ ମିକିଂଙ୍କ୍ ନିଜାମ୍ତେ କେତୁତାନ୍ ଯେ, ସାରେ ପାପ୍ ନୁ ଇଶ୍ୱର୍ ଲିନ୍ଦ୍ ସେଙ୍ଗେ ନାରୁଡ଼୍କିଂଙ୍କ୍ କ୍ଷମା ଇଦ୍ପାର୍ତନ୍ । 3ବାତେଙ୍କ୍ ଇତ୍କେ ବେନାୟି ପବିତ୍ରଆତ୍ମାତିଙ୍କ୍ ଲିନ୍ଦ୍ ମାଡ଼୍କେ, ଅନାଦ୍ ବେସୁଙ୍କ୍ବା କ୍ଷମାଇଲେ । ବାତେଙ୍କ୍ଇତ୍କେ ଅନାଦ୍ ପାପ୍ ସାରେ ଦିନାମ୍ ମାନ୍ତେ । ଜିସୁଙ୍କୁ ବୁତ୍ପଇତେ ଇଞ୍ଜ ବେସ୍କ୍ତୁଡ଼୍ କେଲ୍ନାଙ୍କ୍ ଜିସୁ ଇଦ୍ଗଟ୍ କେତ୍ତନ୍ ।”
ଜିସୁନ୍ ୟାୟ୍ ନୁ ଦାଦାଲଡ଼୍
(ମାତିଉ ୧୨:୪୬-୫୦; ଲୁକ ୮:୧୯-୨୧)
ଆସୁଙ୍କ୍ ଜିସୁନ୍ ୟାୟ୍ ନୁ ଦାଦାଲଡ଼୍ ୱାସ୍ ୱେଉତ୍ତଡ଼୍ । ଅଡ଼୍ ବାଇଦେ ନିସ୍ ଜିସୁଙ୍କ୍କାର୍ଗି ତାତାନ୍ସେଙ୍ଗେ କବର୍ ରତ୍ତଡ଼୍ । ଜିସୁଙ୍କ୍ ନାର୍ଗେ ନାରୁଡ଼୍ ତିଡ଼ିଇ କୁଦିମାତ୍ତଡ଼୍ । ଅଡ଼୍ ଅଙ୍କ୍ କେତ୍ତଡ଼୍, “ନି ୟାୟ୍ ନୁ ଦାଦାଲଡ଼୍ ନୁ ଏଲାସ୍କ୍ ନିୟ୍ ସେଙ୍ଗେ ବାଇଦେ କେପ୍ତଡ଼୍ ।” 4
ଜିସୁ ଉତ୍ତର୍ ଇତ୍ତନ୍, “ବେନ ନା ୟାୟ୍, ବେନ୍ ନା ଦାଦାଲଡ଼୍ ବେନ ନା ହେଲାଡ଼୍ ?” ତାନ୍ ସାରେପାକ୍ କୁଦିମାନ୍ଦାନ୍ ନାରୁଡ଼୍କିଂଙ୍କ୍ ଉଡ଼ି ଅଣ୍ଡ୍ କେତ୍ତାନ୍, “ଉଡ଼େ ଇଡ଼୍ ନା ୟାୟ୍, ନୁ ଇଡ଼୍ ନା ଦାଦାଲଡ଼୍ ! ବେନଆଇ ଇଶ୍ୱର୍ତେ ଇଚ୍ଛା ପାଲନ୍ ମାଡ଼ିତଡ଼୍, ଅନ୍ ନା ଦାଦାଲ୍, ଏଲାସ୍କ୍ ନୁ ୟାୟ୍ ।”
Source notes (4)
- Cross-reference ମାର୍କ ୪:୧; ଲୁକ ୫:୧-3.
- Cross-reference ମାତିଉ ୯:3୪; ୧୦:୨୫.
- Cross-reference ଲୁକ ୧୨:୧୦.
- Footnote ଦାଦଲଡ଼୍ ନୁ ହେଲାଡ଼୍କିଙ୍କ୍ ପାସ୍କି କେତ୍ତନ୍
ପୁନାଦ୍ ଆର୍ର୍. Copyright © 2020 The Word for the World International and Koya Translation Samithi, Malkangiri, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.