ପୁନାଦ୍ ଆର୍ର୍
ଯୋହନ୍ 16:33
Verse 33 is marked below, with the whole chapter around it. Read from the start
“ମିଡ଼୍ ବେଲା ବିଶ୍ୱାସ୍ ଆରା ମାଡ଼୍ୱିଡ଼୍ ଇଦିନ୍ ସେଙ୍ଗେ ନାନ୍ ମିକିଂଙ୍କ୍ ଇଦ୍ସାରେ ଗଟ୍ କେସ୍ମିନ୍ଦେନ୍ ।” ଅଡ଼୍ ମିକିଂଙ୍କ୍ ପ୍ରାର୍ତନା କନ୍ସ୍ ପେସ୍ପିତଡ଼୍, ଇଦ୍ ଲେକାମ୍ ଦିନାମ୍ ୱାଦୁତେ, ବେସୁଟ୍ ବେନ ମିକିଂଙ୍କ୍ ହାୱ୍କିତଣ୍ଡ୍, ଅଣ୍ଡ୍ ଇଶ୍ୱର୍ତେ ସେଙ୍ଗେ ବଲି ଇଦୁତାନ୍ ଇଞ୍ଜ ହେର୍କା ମାଡ଼ିତନ୍ । ନାରୁଡ଼୍ ଇୱୁସାରେ ମାଡ଼ିତଡ଼୍, ବାତେଙ୍କ୍ ଇତ୍କେ ଅଡ଼୍ ବାବାଙ୍କ୍ ନୁ ନାକିଂଙ୍କ୍ ପୁନଡ଼୍ । ମାତର୍ ଇଦ୍ସାରେ ଗଟେମ୍ଆଦାନ୍ ଦିନାମ୍ ୱାତ୍କେ, ନାନ୍ ବାତେଏ ମିକିଂଙ୍କ୍ କେସ୍ମାତ୍ତାନ୍, ଇଦ୍ ମିଡ଼୍ ହେର୍କା ମାଡ଼ାଟ୍, ଇଦିନ୍ ସେଙ୍ଗେ ନାନ୍ ଇଦ୍ସାରେ ଗଟ୍ ମିକିଂଙ୍କ୍ କେତ୍ତାନ୍ । ନାନ୍ ମିଇ ତଡ଼୍ ମାତ୍ତାଙ୍କ୍ ଆରାମ୍ କନ୍ସ୍ ଇଦ୍ସାରେ ଗଟ୍ ମିକିଂଙ୍କ୍ କେତ୍ତାନ୍ ।
ପବିତ୍ର ଆତ୍ମାତାଦ୍ ପାଡ଼୍ୟି
ବାତେଙ୍କ୍ ଇତ୍କେ ଇଞ୍ଜେ ନାନ୍ ନା ପ୍ରେରଣାକର୍ତ୍ତାନ୍ ଗାର୍ରେ ଆଦୁତାନ୍, ମେଣ୍ଡେ ମିଡ଼୍ ବେନ୍ ପଡ଼ିୟେତାଗ୍ ଅଦୁତି ଇଞ୍ଜ ମିଇ ଲୋପେକେ ବେନମିକା ପାଚ୍ରାମାଡ଼୍ୱିଡ଼୍ । ମାତର୍ ନାନ୍ ମିକିଂଙ୍କ୍ ଇଦ୍ସାରେ ଗଟ୍ କେତ୍ତାଙ୍କ୍ ମିଇ ହୃଦୟ୍ ଦୁଃକାମ୍ତେ ବର୍ତ୍ତି ଆଦ୍ତେ । ବାତେଙ୍କ୍ ଇତ୍କେ ନାନ୍ ମିକିଂଙ୍କ୍ ସତ୍ କେତୁତାନ୍, ନାନ୍ ଆତ୍କେନେ ମିୟାଦ୍ ଲେକେତ୍ ଆଦ୍ତେ, ବାତେଙ୍କ୍ ଇତ୍କେ ନାନ୍ ଆନୋକ୍ ଅଣ୍ଡ୍ ସାହାଜ୍ୟ ମାଡ଼ାନଣ୍ଡ୍ ନାରୁଡ଼୍ ମିଇ ଗାର୍ରେ ୱାଡ଼ଣ୍ଡ୍, ମାତର୍ ନାନ୍ ଆତ୍କେ ଅଙ୍କ୍ ମିଇ ଗାର୍ରେ ରହସିଦ୍ତାନ୍ । ଅଣ୍ଡ୍ ୱାସ୍ ପାପ୍, ଦାର୍ମିକତା ନୁ ନ୍ୟାୟ ବିଚାର୍ ବିଷୟ୍ତେ ଜଗତ୍ତିଙ୍କ୍ ସତ୍ ହିଦ୍ତଣ୍ଡ୍; ପାପ୍ ବିଷୟ୍ତେ-ବାତେଙ୍କ୍ ଇତ୍କେ ଅଡ଼୍ ନାକିଂଙ୍କ୍ ବିଶ୍ୱାସ୍ ମାଡ଼ଡ଼୍; ଦାର୍ମିକତା ବିଷୟ୍ତେ-ବାତେଙ୍କ୍ ଇତ୍କେ ନାନ୍ ବାବାନ୍ ଗାର୍ରେ ଆଦୁତାନ୍ ନୁ ମିଡ଼୍ ନାକିଂଙ୍କ୍ ମେଣ୍ଡେ ଉଡାଙ୍କ୍ ପାର୍ୱିଡ଼୍; ବିଚାର୍ ବିଷୟ୍ତେ-ଅଡ଼୍ ବୁଲ୍ ବାତେଙ୍କ୍ ଇତ୍କେ ଇଦ୍ ଜଗତ୍ତିଙ୍କ୍ ଶାସନ୍ ଅଦିପତି ଦସି ଆତ୍ତଣ୍ଡ୍ । ଇଗାଙ୍କ୍ ଇଶ୍ୱର୍ତେ ନ୍ୟାୟ ବିଚାର୍ ତିଆର୍ ଆତ୍ତେ ।
“ନାୱାଦ୍ ମିକିଂଙ୍କ୍ ମେଣ୍ଡେ ଗାଟି ଗଟି କେତ୍ତାନ୍ ମିନ୍ଦେ, ମାତର୍ ମିଡ଼୍ ଇଞ୍ଜେ ଆୱ୍ଚାରେ ସୟ୍ୟ ମାଡ଼ାଙ୍କ୍ ପାର୍ୱିଡ଼୍ । ବାତେଙ୍କ୍ ଇତ୍କେ ଅଣ୍ଡ୍, ଇତ୍କେ, ସତ୍ କେତାନାଦ୍ ଆତ୍ମା ୱାତ୍କେ, ଅଣ୍ଡ୍ ହାର୍ ତଅସ୍ ମିକିଂଙ୍କ୍ ସାରେ ସତ୍ ବିଷୟ୍ କେତିତଣ୍ଡ୍, ବାତେଙ୍କ୍ ଇତ୍କେ ଅଣ୍ଡ୍ ନିଜେତାଦ୍ ଗଟ୍ କେଲଣ୍ଡ୍, ଅଣ୍ଡ୍ ବାତେଏ କେଞ୍ଜିତଣ୍ଡ୍, ଆଦେ ଆ ମିକିଂଙ୍କ୍ କେତିତଣ୍ଡ୍, ମେଣ୍ଡେ ୱାଦାନ୍ ଦିନାକ୍ ବିଷୟତାଦ୍ ଗଟ୍ ମିକିଂଙ୍କ୍ କେତିତଣ୍ଡ୍ । ଅଣ୍ଡ୍ ନାକିଂଙ୍କ୍ ଗୌରବ୍ ମାଡ଼ିତନ୍, ବାତେଙ୍କ୍ ଇତ୍କେ ଅଣ୍ଡ୍ ନାୱାଦ୍ ବିଷୟ୍ ଆସ୍ ମିକିଂଙ୍କ୍ କେତିତଣ୍ଡ୍ । ବାତା ବାବାନାଦ୍, ଆୱୁସାରେ ନାୟାୱୁ; ଇଦିନ୍ ସେଙ୍ଗେ ନାନ୍ କେତ୍ତାନ୍, ଅଣ୍ଡ୍ ନାୱାଦ୍ ସାରେ ବିଷୟ୍ ଆସ୍ ମିକିଂଙ୍କ୍ କେତିତଣ୍ଡ୍ ।”
ଦୁଃକାମ୍ ନୁ ୱେଡ଼୍କା
“ସୁଦୁଟ୍ ଦିନାମ୍ ମିନ୍ଦେ, ମିଡ଼୍ ନାକିଂଙ୍କ୍ ମେଣ୍ଡେ ଉଡାଙ୍କ୍ ପାର୍ୱିଡ଼୍, ମେଣ୍ଡଅନ୍ଦାମ୍ ସୁଦୁଟ୍ ସମୟ୍ତେ ଲୋପେ ମିଡ଼୍ ନାକିଂଙ୍କ୍ ଉଡାଙ୍କ୍ ପାର୍ଦିତିଡ଼୍ ।”
ଆଗାଙ୍କ୍ ତାନ୍ ଶିଷ୍ୟଡ଼୍ ଲୋପେଙ୍କ୍ ବେସ୍କ୍ତୁଡ଼୍ କେତ୍ତଡ଼୍, ସୁଦୁଟ୍ ଦିନାମ୍ ମିନ୍ଦେ, ମିଡ଼୍ ନାକିଂଙ୍କ୍ ଉଡାଙ୍କ୍ ପାର୍ୱିଡ଼୍, ମେଣ୍ଡଅନ୍ଦାମ୍ ସୁଦୁଟ୍ ସମୟ୍ତେ ଲୋପେ ମିଡ଼୍ ନାକିଂଙ୍କ୍ ଉଡ଼ିତିଡ଼୍ ନୁ ନାନ୍ ବାବାନ୍ ଗାର୍ରେ ଆଦୁତାନ୍, ଇଦ୍ ବେନ୍ ଗଟି ଅଣ୍ଡ୍ ମାକିଂଙ୍କ୍ କେତୁତଣ୍ଡ୍, “ଇଦିନ୍ ଅର୍ତ ବାତେଏ ? ଅଡ଼୍ କେତ୍ତଡ଼୍, ଆଦ୍ ‘ସୁଦୁଟ୍ ସମୟ୍ତାଦ୍’ ଇତ୍କେ ବାତେଏ ? ଅଣ୍ଡ୍ ବାତେଏ କେତୁତଣ୍ଡ୍, ମାମ୍ମେ ବୁଜେମ୍ ଆଦାଙ୍କ୍ ପାର୍ୱମ୍ ।”
ଅଡ଼୍ ଅଂକିଙ୍କ୍ ପାଚ୍ରାମାଡ଼ାଙ୍କ୍ ଇଚ୍ଛା ମାଡ଼ୁତଡ଼୍ ଇଞ୍ଜ ପୁଞ୍ଜ୍ ଜିସୁ ଅଡ଼୍କିଂଙ୍କ୍ କେତ୍ତଣ୍ଡ୍, “ନାନ୍ କେତ୍ତାନ୍, ‘ସୁଦୁଟ୍ ଦିନାମ୍ ମିନ୍ଦେ, ମିଡ଼୍ ନାକିଂଙ୍କ୍ ଉଡାଙ୍କ୍ ପାର୍ୱିଡ଼୍, ମେଣ୍ଡଅନ୍ଦାମ୍ ସୁଦୁଟ୍ ସମୟ୍ତେ ଲୋପେ ମିଡ଼୍ ନାକିଂଙ୍କ୍ ଉଡ଼ିତିଡ଼୍,’ ନାନ୍ ଇଦ୍ ବେନ୍ ଗଟ୍ କେତ୍ତାନ୍, ଆଦ୍ ବିଷୟ୍ ଆସ୍ ମିଡ଼୍ ବାତେଏ ମିଲୋପେ କେତାକେତି ଆଦୁତିଡ଼୍ ? ସତ୍, ସତ୍ ନାନ୍ ମିକିଂଙ୍କ୍ କେତୁତାନ୍, ମିଡ଼୍ କେୟିତିଡ଼୍ ନୁ ଦୁଃକାମ୍ ଆଦ୍ତିଡ଼୍, ବାତେଙ୍କ୍ ଇତ୍କେ ଜଗତ୍ ୱେଡ଼୍କିତ୍; ମିଡ଼୍ ଦୁଃକାମ୍ ଆଦ୍ତିଡ଼୍, ବାତେଙ୍କ୍ ଇତ୍କେ ମିୱାଦ୍ ଦୁଃକାମ୍ ୱେଡ଼୍କେତେ ସାୟେ ଆଦ୍ତେ । ଜନମ୍ ମାଡ଼ାନ୍ ଦିନାମ୍ ୱାସ୍ ହେୱ୍କେ ନାଟାଙ୍କ୍ କଷ୍ଟ ଦର୍କିତ୍; ବାତେଙ୍କ୍ ଇତ୍କେ ଆଦ୍ ଜନମ୍ ମାଡ଼୍ତେ ପାୟେ ଜଗତ୍ତାଗ୍ ପୁନଣ୍ଡ୍ ନାରୁଡ଼୍ ଜନମ୍ ମାଡ଼୍ତେ, ଇଦ୍ ୱେଡ଼୍କାତ୍ ସେଙ୍ଗେ ମେଣ୍ଡେ କଷ୍ଟ ହେର୍କା ମାଡ଼ । ଆଦ୍ ଲେକାମ୍ ମିଡ଼୍ ଇଞ୍ଜେ କଷ୍ଟ ଆଦ୍ତିଡ଼୍, ବାତେଙ୍କ୍ ଇତ୍କେ ନାନ୍ ମେଣ୍ଡଅନ୍ଦାମ୍ ମିକିଂଙ୍କ୍ ତଅନ୍ଦିତାନ୍, ମେଣ୍ଡେ ମିଇ ହୃଦୟ୍ ୱେଡ଼୍କିତେ ନୁ ବେନ ମିୟାଗ୍ କନ୍ସ୍ ମିୟାଦ୍ ୱେଡ଼୍କା ଡଙ୍ଗି ଆୟଡ଼୍ ।”
“ଆଦ୍ ଦିନ୍ ୱାଦ୍ତେ ମିଡ଼୍ ନାକିଂଙ୍କ୍ ବାତେଏ ତାଲ୍କାଙ୍କ୍ ୱେୟ୍ । ସତ୍ ନାନ୍ ମିକିଂଙ୍କ୍ କେତୁତାନ୍, ଯଦି ମିଡ଼୍ ବାବାଙ୍କ୍ ବାତ୍ ତାଆଲ୍କିତିଡ଼୍, ଆସୁଟେ ନା ପେଦେର୍ ତେ ଅଣ୍ଡ୍ ମିକିଂଙ୍କ୍ ଆଦ୍ ହିଦ୍ତଣ୍ଡ୍ । ଇଞ୍ଜେକ୍ଆନା ମିଡ଼୍ ନା ପେଦେର୍ ତେ ବାତ୍ ତାଆଲ୍କ୍ୱିଡ଼୍; ତାଲ୍କାଟ୍, ମିଡ଼୍ ଆଦ୍ ଦର୍ସିକିତିଡ଼୍, ମେଣ୍ଡେ ମିୱାଦ୍ ୱେଡ଼୍କା ବର୍ତ୍ତି ଆଦ୍ତେ ।”
ଜଗତ୍ତିଙ୍କ୍ ଜିଡ଼୍ତଣ୍ଡ୍
“ନାନ୍ ମିକିଂଙ୍କ୍ ଆଲଙ୍କାରିକ ଶଦ୍ଦ ତଡ଼୍ ଇଦ୍ସାରେ ଗଟ୍ କେତ୍ତାନ୍; ଦିନାମ୍ ୱାଦୁତେ ନାନ୍ ମେଣ୍ଡେ ଚିନ୍ନେ ତଡ଼୍ କେଲନ୍, ବାତେଙ୍କ୍ ଇତ୍କେ ବାବାନ୍ ବିଷୟ୍ତେ ସାୟେ କେତିତାନ୍ । ଆଦ୍ ଦିନ୍ ମିଡ଼୍ ନା ପେଦେର୍ତେ ଅଂକିଙ୍କ୍ ତାଲ୍କିତିଡ଼୍; ନାନ୍ ମିୱାଦ୍ ବିଷୟ୍ତେ ବାବାଙ୍କ୍ ଅନୁରଦ୍ ମାଡ଼ିତାନ୍, ଇଦ୍ ନାନ୍ ମିକିଂଙ୍କ୍ କେଲନ୍; ବାବାଲ୍ ନିଜେ ମିକିଂଙ୍କ୍ ପ୍ରେମ ମାଡ଼ିତନ୍, ବାତେଙ୍କ୍ ଇତ୍କେ ମିଡ଼୍ ନାକିଂଙ୍କ୍ ପ୍ରେମ ମାଡ଼୍ତିଡ଼୍ ନୁ ନାନ୍ ଯେ ଇଶ୍ୱର୍ତାଗାଙ୍କ୍ ୱାସ୍ମିନ୍ଦେନ୍, ଆଦ୍ ମିଡ଼୍ ବିଶ୍ୱାସ୍ ମାଡ଼୍ତିଡ଼୍ । ସତ୍ ନାନ୍ ବାବାନାଗାଙ୍କ୍ ଜଗତ୍ତାଗ୍ ୱାସ୍ମିନ୍ଦେନ୍; ମେଣ୍ଡଅନ୍ଦାମ୍ ଜଗତ୍ତିଙ୍କ୍ ୱିଡ଼୍ସି ବାବାନ୍ ଗାର୍ରେ ଆଦୁତାନ୍ ।”
ଇଦ୍ ଗଟ୍ କେଞ୍ଜି ଶିଷ୍ୟଡ଼୍ କେତ୍ତଡ଼୍, “ଉଡ଼େ ଇଞ୍ଜେ ନିମ୍ ସାୟେ କେତୁତିନ୍ ନୁ ଆଲଙ୍କାରି ଶଦ୍ଦ ତଡ଼୍ ମେଣ୍ଡେ କେଲ୍ୱିନ୍ । ଇଞ୍ଜେ ନିମ୍ ଯେ ସାରେ ବିଷୟ୍ ପୁତ୍ତିନ୍, ମେଣ୍ଡେ ନିମ୍ ବେନଙ୍କ୍ ପ୍ରଶ୍ନ ମାଡ଼ାଙ୍କ୍ ଦର୍କାର୍ ଇଲେ, ଆଦ୍ ଇଞ୍ଜେ ମାମ୍ମେ ପୁତ୍ତମ୍; ଇଶ୍ୱର୍ତାଗାଙ୍କ୍ ୱାତ୍ତିନ୍ ଇଞ୍ଜ ମାମ୍ମେ ଇଦ୍ ମାମ୍ମେ ବିଶ୍ୱାସ୍ ମାଡ଼ୁତମ୍ ।”
ଜିସୁ ଅଡ଼୍କିଂଙ୍କ୍ ଉତ୍ତର୍ ହିତ୍ତଣ୍ଡ୍, “ମିଡ଼୍ ବାତ୍ ଇଞ୍ଜେ ବିଶ୍ୱାସ୍ ମାଡ଼ୁତିଡ଼୍ ? ଉଡ଼ାଟ୍, ଦିନାମ୍ ୱାଦୁତ୍, ହୋ ୱାତ୍ତା, ବେସୁଟ୍ ମିଡ଼୍ ୱେରେୱେରେ ଆସ୍ ନିଜେ ନିଜେତ୍ ଲୋନ୍ ଆଦ୍ତିଡ଼୍, ମେଣ୍ଡେ ନାକିଂଙ୍କ୍ ୱେରଙ୍କେ ୱିଡ଼୍ସି ଆଦ୍ତିଡ଼୍; ନାନ୍ ୱେରନ୍ ଆୟନ୍, ନା ତଡ଼୍ ବାବାଲ୍ ମିନ୍ଦେଣ୍ଡ୍ । ମିଡ଼୍ ବେଲା ନାୟାଗ୍ କାଇଲି ଶାନ୍ତି ଦର୍ସିକିତିଡ଼୍, ଇଦିନ୍ ସେଙ୍ଗେ ନାନ୍ ମିକିଂଙ୍କ୍ ଇଦ୍ସାରେ ବିଷୟ୍ କେତୁତାନ୍ । ଜଗତ୍ତାଗ୍ ମିଇ ସେଙ୍ଗେ କଷ୍ଟ ମିନ୍ଦେ, ବାତେଙ୍କ୍ ଇତ୍କେ ସାହାସ୍ ପୟିମୁଟ୍; ନାନ୍ ଜଗତ୍ତିଙ୍କ୍ ଜିଡ଼୍ତାନ୍ ।”
ପୁନାଦ୍ ଆର୍ର୍. Copyright © 2020 The Word for the World International and Koya Translation Samithi, Malkangiri, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.