ପୁନାଦ୍ ଆର୍ର୍
ଯୋହନ୍ 17
ଶିଷ୍ୟଡ଼୍ ସେଙ୍ଗେ ଜିସୁନ୍ ପ୍ରାର୍ତନା
ଜିସୁ ଇଦ୍ସାରେ ଗଟି କେସ୍ ତେର୍ତେପେୟ୍ ସ୍ୱର୍ଗତା ଉଡ଼ି କେତ୍ତଣ୍ଡ୍, “ବାବା, ଦିନାମ୍ ଆଦ୍ତେ; ନି ମାର୍ରିଙ୍କ୍ ମହିମାନିତ ମାଡ଼ା, ବେଲା ମାର୍ ନିୱାଦ୍ ମହିମା ମାଡ଼ିତନ୍, ନିମ୍ ଅଂକିଙ୍କ୍ ସାରେ ନାରୁଡ଼୍ ପର୍ର ଅଦିକାର୍ ହିତ୍ତି, ବେଦ୍ରକମ୍ ନିମ୍ ଅଂକିଙ୍କ୍ ବେନ୍ ନାରୁଡ଼୍କ୍ ହିତ୍ତିନ୍, ଅଡ଼୍କ୍ ସାରେଦିନାତ୍ ଜିୱୁଣ୍ଡ୍ ହିଦ୍ତଣ୍ଡ୍ । ନିମ୍ ୱେର୍ନି ସତ୍ ଇଶ୍ୱର୍, ନିକିଂଙ୍କ୍ ନୁ ନିମ୍ ରଅତେନଣ୍ଡ୍ ଜିସୁ କ୍ରିଷ୍ଟଙ୍କ୍ ପୁନ୍ଦାନାଦ୍ ଆଦୁତ୍ତେ ସାରେଦିନାତ୍ ଜିୱୁଣ୍ଡ୍ । ନିମ୍ ନାକିଂଙ୍କ୍ ବେନ୍ ପାଡ଼୍ୟି ମାଡ଼ାନଙ୍କ୍ ହିତ୍ତିନ୍, ଆଦ୍ ନାନ୍ ତେର୍ସ୍ପି ପୃତିବିତାଗ୍ ନିକିଂଙ୍କ୍ ମହିମାନିତ ମାଡ଼୍ତାନ୍ । ଇଞ୍ଜେ, ହୋ ବାବା, ଜଗତ୍ତାଦ୍ ତିଆର୍ ମୁନେଙ୍କ୍ ନି ତଡ଼୍ ନାୱାଦ୍ ବେନ୍ ମହିମା ମାତ୍ତା, ଇଞ୍ଜେ ନିମ୍ ନାକିଂଙ୍କ୍ ଆଦ୍ ମହିମା ହିମ୍ ।”
“ନିମ୍ ନାକିଂଙ୍କ୍ ଜଗତ୍ତାଗ୍ ବେନ୍ ନାରୁଡ଼୍କ୍ ଦାନ ମାଡ଼୍ତି, ନାନ୍ ଅଡ଼୍ ଗାର୍ରେ ନି ପେଦେର୍ ପ୍ରକାଶ୍ ମାଡ଼୍ତାନ୍; ଅଡ଼୍ ନି ମାନେଇ ନୁ ନିମ୍ ଅଡ଼୍କିଂଙ୍କ୍ ନାକିଂଙ୍କ୍ ଦାନ ମାଡ଼୍ତି, ମେଣ୍ଡେ ଅଡ଼୍ ନିୱାଦ୍ ବାକ୍ୟ ପାଲନ୍ ମାଡ଼୍ତଡ଼୍ । ନିମ୍ ବାତା ଦାନ ମାଡ଼୍ତି ଆୱୁସାରେ ନିୟାଗ୍ କନ୍ସ୍ ତିଆର୍ ଆଦ୍ତେ, ଇଦ୍ ଅଡ଼୍ ଇଞ୍ଜେ ବୁଜେମ୍ ଆଦ୍ତଡ଼୍; ବାତେଙ୍କ୍ ଇତ୍କେ ନିମ୍ ନାକିଂଙ୍କ୍ ବେନ୍ ସାରେ ବାକ୍ୟ ଦାନ ମାଡ଼୍ତି, ନାନ୍ ଅଡ଼୍କିଂଙ୍କ୍ ଆୱ୍ ସାରେ ଦାନ ମାଡ଼୍ତାନ୍, ମେଣ୍ଡେ ଅଡ଼୍ ଗ୍ରହନ୍ ମାଡ଼୍ତଡ଼୍, ମେଣ୍ଡେ ନାନ୍ ଯେ ନିୟାଗ୍ କନ୍ସ୍ ୱାସ୍ମିନ୍ଦେନ୍, ଆଦ୍ ସତ୍ ଇଞ୍ଜ ପୁଞ୍ଜ୍ ମିନ୍ଦେଡ଼୍ ନୁ ନିମ୍ ନାକିଂଙ୍କ୍ ରଅତି ଇଞ୍ଜ ବିଶ୍ୱାସ୍ ମାଡ଼୍ତଡ଼୍ ।”
“ନାନ୍ ଅଡ଼୍ ସେଙ୍ଗେ ପ୍ରାର୍ତନା ମାଡ଼ୁତାନ୍; ଜଗତ୍ ସେଙ୍ଗେ ପ୍ରାର୍ତନା ମାଡ଼ନ୍, ବାତେଙ୍କ୍ ଇତ୍କେ ନିମ୍ ନାକିଂଙ୍କ୍ ବେନ୍ ନାରୁଡ଼୍କ୍ ହିତ୍ତିନ୍, ଅଡ଼୍ ସେଙ୍ଗେ ପ୍ରାର୍ତନା ମାଡ଼ୁତାନ୍, ବାତେଙ୍କ୍ ଇତ୍କେ ଅଡ଼୍ ନି ମାନେଇ; ବାତା ନାୟାୱୁ, ଆୱୁସାରେ ନିୟାୱ୍, ମେଣ୍ଡେ ବାତା ନିୟାୱ୍, ଆୱୁସାରେ ନାୟାୱୁ; ମେଣ୍ଡେ ନାନ୍ ଅଡ଼୍ ତଡ଼୍ ମହିମାନିତ ଆସ୍ ମିନ୍ଦେନ୍ । ନାନ୍ ମେଣ୍ଡେ ଇଦ୍ ଜଗତ୍ତାଗ୍ ମାନନ୍, ବାତେଙ୍କ୍ ଇତ୍କେ ଇଡ଼୍ ଇଦ୍ ଜଗତ୍ତାଗ୍ ମାନ୍ତଡ଼୍; ମେଣ୍ଡେ ନାନ୍ ନି ଗାର୍ରେ ଆଦୁତାନ୍ । ପବିତ୍ର ବାବା, ନିମ୍ ନାକିଂଙ୍କ୍ ହିତ୍ତେ ପେଦେର୍ତେ ଶକ୍ତି ତଡ଼୍ ଅଡ଼୍କିଂଙ୍କ୍ ରକ୍ଷା ମାଡ଼ା ବେନ୍ ପେଦେର୍ ନାକିଂଙ୍କ୍ ହିତ୍ତି, ବେଦ୍ରକମ୍ ମାନାଡ଼୍ ଅଣ୍ଡୟାଗେ ଆଦ୍ତାଡ଼୍, ଅଡ଼୍ ଆଦେରକମ୍ ଅଣ୍ଡୟାଗେ ଆଦ୍ତଡ଼୍ ।” 1ଅଡ଼୍ ତଡ଼୍ ମାନ୍ଦାନ୍ ୱେଲେ ନାନ୍ ଅଡ଼୍କିଂଙ୍କ୍ ନିୱାଦ୍ ପେଦେର୍ତେ ଶକ୍ତିତଡ଼୍ ରକ୍ଷା ମାଡ଼ି ୱାସମିନ୍ଦେନ୍ ବେନ୍ ପେଦେର୍ ନିମ୍ ନାକିଂଙ୍କ୍ ହିତ୍ତି, ମେଣ୍ଡେ ନାନ୍ ଅଡ଼୍କିଂଙ୍କ୍ ସାବଦାନ୍ତେ ରକ୍ଷା ମାଡ଼ିମିନ୍ଦେଣ୍ଡ୍ ନୁ ଦର୍ମଶାସ୍ତ୍ରତାଦ୍ ବାକ୍ୟ ବେଲା ସାରେ ଆଦ୍ତେ, ଇଦିନ୍ ସେଙ୍ଗେ ଡଲାନ୍ ମାଆର୍ ୱିଡ଼୍ସି ମେଣ୍ଡେ ବେନମିକା ନର୍କତା ଆନ୍ନଡ଼୍ । ବାତେଙ୍କ୍ ଇତ୍କେ ନାନ୍ ଇଞ୍ଜେ ନି ଗାର୍ରେ ଆଦୁତାନ୍, ମେଣ୍ଡେ ଅଡ଼୍ ଲୋପେ ନାୱାଦ୍ ୱେଡ଼୍କା ବର୍ତ୍ତି ଆୟି, ଆଦିନ୍ ସେଙ୍ଗେ ଜଗତ୍ତାଗ୍ ମାନ୍ଦାନ୍ ୱେଲେ ନାନ୍ ଇୱୁସାରେ କେତୁତାନ୍ । ନାନ୍ ଅଡ଼୍କିଂଙ୍କ୍ ନିୟାୱୁ ବାକ୍ୟ କେଞ୍ଜ୍ପ୍ତାନ୍, ମେଣ୍ଡେ ଜଗତ୍ ଅଡ଼୍କିଂଙ୍କ୍ ପାସ୍କି ମିନ୍ଦେ, ବାତେଙ୍କ୍ ଇତ୍କେ ନାନ୍ ବେଦ୍ଲେକାମ୍ ଇଦ୍ ଜଗତ୍ତଣ୍ଡ୍ ଆୟନ୍, ଅଡ଼୍ ଆଦେରକମ୍ ଇଦ୍ ଜଗତ୍ତଡ଼୍ ଆୟ୍ୟଡ଼୍ । ନିମ୍ ଅଡ଼୍କିଂଙ୍କ୍ ଜଗତ୍ତାଗାଙ୍କ୍ ଆୟମ୍ ଇଞ୍ଜ ନାନ୍ ପ୍ରାର୍ତନା ମାଡ଼ନ୍, ବାତେଙ୍କ୍ ଇତ୍କେ ଅଡ଼୍କିଂଙ୍କ୍ ସୟ୍ତାନ୍ତାଗାଙ୍କ୍ ରକ୍ଷା ମାଡ଼େ ଇଞ୍ଜ ପ୍ରାର୍ତନା ମାଡ଼ୁତାନ୍ । ନାନ୍ ବେଲା ଜଗତ୍ତଣ୍ଡ୍ ଆୟନ୍, ଅଡ଼୍ ଆଦେପୁଟୁଙ୍କ୍ ଜଗତ୍ତଡ଼୍ ଆୟ୍ୟଡ଼୍ । ସତ୍ ତଡ଼୍ ଅଡ଼୍କିଂଙ୍କ୍ ପବିତ୍ର ମାଡ଼େ; ନିୱାଦ୍ ବାକ୍ୟ ଆ ସତ୍ । ନିମ୍ ନାକିଂଙ୍କ୍ ବେଲା ଜଗତ୍ତାଗ୍ ରହତ୍ତିନ୍, ନାନ୍ ମିକା ଅଡ଼୍କିଂଙ୍କ୍ ଆଦେପୁଟୁଙ୍କ୍ ଜଗତ୍ତାଗ୍ ରହତ୍ତାନ୍ । ଅଡ଼୍ ବେଲା ଆଦ୍ ସତ୍ ତଡ଼୍ ପବିତ୍ର ଆଦ୍ତଡ଼୍, ଇଦିନ୍ମାଇଦିଙ୍କ୍ ନାନ୍ ଅଡ଼୍ ସେଙ୍ଗେ ନିଜ୍ତିଙ୍କ୍ ପବିତ୍ର ମାଡ଼ୁତାନ୍ ।
“ନାନ୍ ମାତର୍ ଅଡ଼୍ ସେଙ୍ଗେ ପ୍ରାର୍ତନା ମାଡ଼ନ୍, ମାତର୍ ଇଡ଼ାଦ୍ ବାକ୍ୟ ତଡ଼୍ ବେନଡ଼୍ ନାୟାଗ୍ ବିଶ୍ୱାସ୍ ମାଡ଼ିତଡ଼୍, ଅଡ଼୍କିଂଙ୍କ୍ ମିକା ପ୍ରାର୍ତନା ମାଡ଼ୁତାନ୍, ବେଲା ଅଡ଼୍ ସାରେତଡ଼୍ ଅଣ୍ଡୟାଗେ ଆଦ୍ତଡ଼୍; ହଁ ବାବା ନିମ୍ ବେଲା ନାୟାଗେ ମିନ୍ଦେନି ନୁ ନାନ୍ ନିୟାଗ୍ ମିନ୍ଦେନ୍, ଅଡ଼୍ ମିକା ଆଲେକେ ମାୟାଗ୍ ମାନିଡ଼୍, ବେଦ୍ଲେକାମ୍ ନିମ୍ ନାକିଂଙ୍କ୍ ରହତ୍ତି ଇଞ୍ଜ ଜଗତ୍ ବିଶ୍ୱାସ୍ ମାଡ଼ିତ୍ । ମେଣ୍ଡେ ନିମ୍ ନାକିଂଙ୍କ୍ ବେନ୍ ମହିମା ହିତ୍ତିନ୍, ନାନ୍ ଅଡ଼୍କିଂଙ୍କ୍ ଆଦ୍ ହିତ୍ତାନ୍, ବେଲା ମାନାଡ଼୍ ଅଣ୍ଡୟାଗେ ଆଦ୍ତାଡ଼୍, ଅଡ଼୍ ଆଦେଲେକାମ୍ ଅଣ୍ଡୟାଗେ ଆଦ୍ତଡ଼୍ । ନାନ୍ ଅଡ଼ାଗ୍ ନୁ ନିମ୍ ନାୟାଗ୍ ବେଦ୍ଲେକାମ୍ ଅଡ଼୍ ପବିତ୍ର ଆସ୍ ଅଣ୍ଡୟାଗେ ଆଦ୍ତଡ଼୍, ଆଲେକେ ଜଗତ୍ ପୁନ୍ତେ ଯେ ନିମ୍ ନାକିଂଙ୍କ୍ ରଅତିନ୍, ମେଣ୍ଡେ ନାକିଂଙ୍କ୍ ବେନ୍ ଲେକାତ୍ ପ୍ରେମ ମାଡ଼୍ତି, ଅଡ଼୍କିଂଙ୍କ୍ ମିକା ଆଦେ ଲେକାତ୍ ପ୍ରେମ ମାଡ଼୍ତିନ୍ ।”
“ହଁ ବାବା ! ନିମ୍ ନାକିଂଙ୍କ୍ ବେନଡ଼କ୍ ହିତ୍ତିନ୍, ନାନ୍ ବେଗେ ମାନ୍ତାନ୍, ଅଡ଼୍ ଆନ୍ତେ ଆଦେପୁଟୁଙ୍କ୍ ଆଗେ ନା ତଡ଼୍ ମାନ୍ତଡ଼୍ ନୁ ଜଗତ୍ ତିଆର୍ ଆଦାନ୍ ମୁନେଙ୍କ୍ ନିମ୍ ନାକିଂଙ୍କ୍ ପ୍ରେମ ମାଡ଼ି ବେନ୍ ଗୌରବ୍ ହିତ୍ତିନ୍, ନାୱାଦ୍ ଆଦ୍ ଗୌରବ୍ ଅଡ଼୍ ବେଲା ଉଡ଼ିତଡ଼୍, ଇଦ୍ ନାୱାଦ୍ ଇଚ୍ଛା । ହୋ ଦାର୍ମିକ୍ ବାବା ! ଜଗତ୍ ନିକିଂଙ୍କ୍ ପୁନନ୍, ବାତେଙ୍କ୍ ଇତ୍କେ ନାନ୍ ନିକିଂଙ୍କ୍ ପୁତ୍ତାନ୍; ମେଣ୍ଡେ ନିମ୍ ଯେ ନାକିଂଙ୍କ୍ ରହତି, ଆଦ୍ ଇଡ଼୍ ପୁତ୍ତଡ଼୍; ମେଣ୍ଡେ, ନିମ୍ ନାକିଂଙ୍କ୍ ବେଦ୍ଲେକାମ୍ ପ୍ରେମ ମାଡ଼୍ତିନ୍, ଆଦ୍ ବେଲା ଅଡ଼ାଗ୍ ମାନ୍ତା ନୁ ନାନ୍ ଅଡ଼ାଗ୍ ମାନ୍ତାନ୍, ଇଦିନ୍ ସେଙ୍ଗେ ନାନ୍ ଅଡ଼୍କିଂଙ୍କ୍ ନି ପେଦେର୍ କେତ୍ତାନ୍ ନୁ କେତିତାନ୍ ।”
Source notes (1)
- Cross-reference ଯୋହନ୍ ୧3:୧୮.
ପୁନାଦ୍ ଆର୍ର୍. Copyright © 2020 The Word for the World International and Koya Translation Samithi, Malkangiri, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.