ପୁନାଦ୍ ଆର୍ର୍
ଏଫିସିୟ 5
ୱେସିନ୍ ଜିୱୁଣ୍ଡ୍
ମିଡ଼୍ ଇଶ୍ୱର୍ତେ ପ୍ରିୟ ମାର୍କିନଡ଼ି, ଆଦିଙ୍କ୍ ଅନ୍ ଲେକାମ୍ ଆଦାନଙ୍କ୍ ଚାଏମ୍ ଆୟ୍ମୁଟ୍ । କ୍ରିଷ୍ଟ ବେଲା ମାନାଙ୍କ୍ ପ୍ରେମ ମାଡ଼୍ତଣ୍ଡ୍ ନୁ ଇଶ୍ୱର୍ତେ ସାୟେତ୍ ସେଙ୍ଗେ ନିଜେତ୍ ଜିୱୁଣ୍ଡ୍ତିଙ୍କ୍ ମାନ୍ ମାୟ୍ଦିଙ୍କ୍ ସାୟେ ଗାବ୍ତାୱୁ ପୁଜାସାମାନ୍ ନୁ ବଲି ଉତ୍ସର୍ଗ ମାଡ଼୍ତଣ୍ଡ୍, ମିଇ ଜିୱୁଣ୍ଡ୍ ମିକା ଆଦେଲେକାମ୍ ଚାଲେମ୍ ଆୟି । ଇଶ୍ୱର୍ତେ ନାରୁଡ଼୍ ଆତ୍ତାଙ୍କ୍ ମିୟାଗ୍ ବେବିଚାର୍, କାରାପ୍, ଅଶୁଚିତା ନୁ ଲାଲସା ମାନ୍ମାକି । ମିୟାଗ୍ କାରାପ୍ ଗଟି, କାରାପ୍ ୱେଷଡ଼୍ ନୁ ମିଚ୍ ଗଟି କେତାନାଦ୍ ଟିକ୍ ଆୟ୍ୟ । ବାତେଙ୍କ୍ଇତ୍କେ ମିଡ଼୍ ଗଟି ତିର୍ୟାନାଗ୍ ଇଶ୍ୱର୍ତିଙ୍କ୍ ଦନ୍ୟବାଦ୍ ଇସମାନୁଟ୍ । ଇଦ୍ ନିଜାମ୍ ଇଞ୍ଜ ପୁନୁଟ୍, ବେନ୍ ଅଶୁଚି ନାରୁଡ଼୍ ନିତାଲ୍, ଶିଷ୍ଟାଚାର୍ ଇଲ୍ୱେ ନାରୁଣ୍ଡ୍ ନୁ ଲବି ନାରୁଣ୍ଡ୍ ଗାଟି ଲବି ପୁତ୍ଲାମ୍ ପୁଜା ରକମ୍ ଅଣ୍ଡ୍ ବେସୁଟ୍ବା କ୍ରିଷ୍ଟ ନୁ ଇଶ୍ୱର୍ତେ ରାଜ୍ୟତାଗ୍ ଆଦେ ପାର୍ୱଣ୍ଡ୍ । ମୁଲ୍ୟ ଇଲ୍ୱେ ଗଟି କେସ୍ ମିକିଂଙ୍କ୍ ବେନ ତିପାଲ୍ ମାଡ଼୍ମାକିଡ଼୍ । ଇୱୁ ସାର୍ରେ କାରାପ୍ ପାଡ଼୍ୟି ବେନଡ଼୍ ଇଶ୍ୱର୍ତେ ଗଟ୍ ମାନେମ୍ ଆୟ୍ୟଡ଼୍ ଅଡ଼୍ ମାୟ୍ଦିଙ୍କ୍ ଅନ୍ କପାମ୍ ପେୟ୍ତିତ୍ । ଇସତ୍ ନାରୁଡ଼୍ ତଡ଼୍ ବାତ୍ବା ସମ୍ପର୍କ ନେଃଏମାଟ୍ । ମିଡ଼୍ ନିଜେ ଅନ୍ଦିନେ ଇକାଡ଼୍ତାଗ୍ ମାତ୍ତିଡ଼୍, ଇତ୍କେ ମିଡ଼୍ ଇଞ୍ଜେ ପ୍ରବୁନ୍ ନାରୁଡ଼୍ ଆସ୍ମାନାଙ୍କ୍ ମିଡ଼୍ ୱେସ୍ତାଗ୍ ମିନ୍ଦେଡ଼ି । ଆଦିଙ୍କ୍ ମିଡ଼୍ ୱେସ୍ତେ ପିଲାନ୍ ଲେକାମ୍ ବ୍ୟବହାର୍ ମାଡ଼ାଟ୍ । ବାତେଙ୍କ୍ଇତ୍କେ ୱେସ୍ ସାର୍ରେ ପ୍ରକାର୍ ସାୟେତ୍ ଗୁନାମ୍, ଦାର୍ମାମ୍ ନୁ ସତ୍ ପେସ୍ପିତ୍ । ପ୍ରବୁ ସନ୍ତୋଷ୍ ଆଦ୍ଦାନ୍ ମାୟ୍ଦିଙ୍କ୍ ଶିକ୍ଷା ନାଡ଼୍ସାଟ୍ । ନାରୁଡ଼୍ ଇକାଡ଼୍ତାଗେ ବେନ୍ ସାର୍ରେ କାରାପ୍ ପାଡ଼୍ୟି ମାଡ଼ୁତଡ଼୍, ଅଡ଼୍ସାଙ୍ଗ୍ ତଡ଼୍ ଆୟ୍ମାଟ୍ । ଅଡ଼୍ ପାଡ଼୍ୟି ସାର୍ରେ ପେସ୍ପି ତଅସିମୁଟ୍ । ବାସ୍ତବିକ୍, ଅଡ଼୍ ମିଞ୍ଜ୍ସ୍ପି ବାତ୍ ସାର୍ରେ ମାଡ଼ିତଡ଼୍, ଆଦ୍ ବିଷୟ୍ କେତାନାଦ୍ ସିଗୁଲ୍ମାଲାମ୍ । ବେସୁଟ୍ ସାର୍ରେ ବିଷୟ୍ ୱେସିନାଗ୍ ତଅନ୍ଦିତା ଆସୁଟେ ଆୱୁ ସାର୍ରେ ନିଜାମ୍ତାୱୁ ପେୟ୍ତିତା । ବାତେଙ୍କ୍ଇତ୍କେ ୱେସ୍ ସାର୍ରେ ବିଷୟ୍ ପେସ୍ପିତା । ଆଦିନ୍ ମାୟ୍ଦିଙ୍କ୍ ଇଲା ଲେକ୍ତାଦ୍ ମିନ୍ଦେ, “ହୋ ଉଞ୍ଜ୍ତେନଡ଼ି, ତିଆର୍ତେ ଆୟ୍ମୁଟ୍ ନୁ ଡଲ୍ତେନଡ଼ାଗାଙ୍କ୍ ତେଏଦାଟ୍ ! କ୍ରିଷ୍ଟନ୍ ୱେସ୍ତାଗ୍ ପେୟ୍ମୁଟ୍ ।” ଆଦିଙ୍କ୍ ମିଡ଼୍ ବେଲା ବେବ୍ୟହାର୍ ମାଡ଼ିତିଡ଼୍, ଆଦ୍ ବିଷୟ୍ତେ ସାବ୍ଦାନ୍ ଆୟ୍ମୁଟ୍ । ମୁର୍କ ଇନା ଆୟ୍ୟକଟ ଜ୍ଞାନି ଇନା ଆୟ୍ମୁଟ୍ । 1ସାର୍ରେ ସୁଯୋଗ୍ତାଗାଙ୍କ୍ ସାୟେ ବ୍ୟବହାର୍ ମାଡ଼ାଟ୍, ବାତେଙ୍କ୍ ଇତ୍କେ କାରାପ୍ ଦିନାମ୍ ଏୱୁତେ । ମୁର୍କ ନାରୁଡ଼୍ ଇନା ଆୟ୍ୟକଟ, ଇତ୍କେ ପ୍ରବୁନ୍ ଗଟି ବୁଜେମ୍ ଆଦାଙ୍କ୍ ଆଲ୍ସି ମାଡ଼ାଟ୍ । କାଲ୍ ଉନ୍ଦାନାଗ୍ ଆନ୍ମାଟ୍, ଆଦ୍ ମିକିଂଙ୍କ୍ ସର୍ବନାସ୍ ମାଡ଼ିତ୍, ବାତେଙ୍କ୍ଇତ୍କେ ପବିତ୍ର ଆତ୍ମା ତଡ଼୍ ପୁରା ଆୟ୍ମୁଟ୍ । 2ପାଟ୍, ଆରାଦନା ନୁ ବକ୍ତିତଡ଼୍ ପାଟ୍ ପାରାଟ୍ ନୁ ନିଜେ ନିଜର୍ଲପେ ସାର୍ଦେ ଆୟ୍ମୁଟ୍ । ହୃଦୟ୍ତେ ଲପେଙ୍କ୍ ପ୍ରବୁନ୍ ପେଦେର୍ତେ ପାଟ୍ ପାରାଟ୍ । ସାର୍ରେୱେଲେ ସାର୍ରେ ବିଷୟ୍ ପ୍ରବୁ ଜିସୁ କ୍ରିଷ୍ଟନ୍ ପେଦେର୍ତେ ନୁ ବାବାଲ୍ ଇଶ୍ୱର୍ତିଙ୍କ୍ ଦନ୍ୟବାଦ୍ ଇମୁଟ୍ ।
ନାଟା ନୁ ମାନେୟ୍
କ୍ରିଷ୍ଟନ୍ ପର୍ର ନିୟାଦ୍ ବକ୍ତି ମାନ୍ନାଙ୍କ୍ ମିଡ଼୍ ମିମିଲପେ କାୟ୍ଲି ମାନୁଟ୍ । 3ଆ ନାଟାନଡ଼ି ! ମିଡ଼୍ ବେଲା ପ୍ରବୁନାଗ୍ ମିନ୍ଦେଡ଼ି ଆଲେନେ ନିଜର୍ନିଜର୍ ମୁଦ୍ପାଲଡ଼୍ ତଡ଼୍ ମାନୁଟ୍ । ମଣ୍ଡଲିତେ ପର୍ର କ୍ରିଷ୍ଟନାଦ୍ ଅଦିକାର୍ ବେଲା ମିନ୍ଦେ ଆଲେନେ ନାଟାଡ଼୍ତେ ପର୍ର ମାନେୟ୍ତେ ଅଦିକାର୍ ମିନ୍ଦେ; ମେଣ୍ଡେ କ୍ରିଷ୍ଟ କେ ତାମ୍ ମେନ୍ଦୁଲ୍ ଇନା ମଣ୍ଡଲିତେ ତ୍ରାଣକର୍ତ୍ତାଲ୍ । ମଣ୍ଡଲିତାଗ୍ ବେଲା କ୍ରିଷ୍ଟନ୍ ଅଦିକାର୍ ମିନ୍ଦେ, ନାଟାକି ବେଲା ନିଜର୍ନିଜର୍ ମୁଦ୍ପାଲଡ଼୍ ଗାର୍ରେ ସାରେୱେଲେ ମାନି । 4
ମୁଦ୍ପାଲଡ଼ି, କ୍ରିଷ୍ଟ ବେଲା ମଣ୍ଡଲିତିଙ୍କ୍ ପ୍ରେମ ମାଡ଼ି, ତାନ୍ ଜିୱୁଣ୍ଡ୍ ଇତ୍ତନ୍, ମିଡ଼୍ ଟିକ୍ ଆଲେନେ ନିଜର୍ନିଜର୍ ମୁତେକିଙ୍କ୍ ପ୍ରେମ ମାଡ଼ାଟ୍ । କ୍ରିଷ୍ଟ ମଣ୍ଡଲିତିଙ୍କ୍ ଏର୍ ତଡ଼୍ ପରିଷ୍କାର୍ ମାଡ଼ି ଇଶ୍ୱର୍ତେ ଗଟ୍ ମାଇଦିଙ୍କ୍ ଉତ୍ସର୍ଗ ମାଡ଼୍ତଣ୍ଡ୍, ମେଣ୍ଡେ ଆଦ୍ ପବିତ୍ର, ନିର୍ଦୋଷ୍, ନିଷ୍କଳଙ୍କ୍ ନୁ ସାର୍ରେ ସାୟେ ସୁନ୍ଦର୍ ମାଡ଼ି ନିଜେ ନେଃଏତଣ୍ଡ୍ । ମାନେୟ୍ନଡ଼ି ନିଜେତ୍ ମେନ୍ଦୁଲ୍ ଇଞ୍ଜ ଆଲ୍ସି ନିଜେତ୍ ନାଟାକିଙ୍କ୍ ପ୍ରେମ ମାଡ଼ାନାଦ୍ ସାୟେ । ବେନ ନିଜେତ୍ ନାଟାକିଙ୍କ୍ ପ୍ରେମ ମାଡ଼ିତନ୍, ଅଣ୍ଡ୍ ନିଜେତିଙ୍କ୍ ପ୍ରେମ ମାଡ଼ୁତଣ୍ଡ୍ । ବେନ ବେସୁଟ୍ ନିଜେତ୍ ମେନ୍ଦୁଲ୍ତିଙ୍କ୍ ପାସ୍କଣ୍ଡ୍ । ମେଣ୍ଡେ ମେନ୍ଦୁଲ୍ତିଙ୍କ୍ ତିନ୍ଦାନ୍ ଉନ୍ଦାନ୍ ମାଡ଼ିତନ୍ ନୁ ଜତନ୍ ଆଦ୍ତନ୍ ଆଲେନେ କ୍ରିଷ୍ଟ ମଣ୍ଡଲିତେ ଜତନ୍ ଆଦ୍ତନ୍, ବାତେଙ୍କ୍ଇତ୍କେ ମାନାଡ଼୍ ଅନ୍ ମେନ୍ଦୁଲ୍ତେ ଡେକା କାୟ୍କ୍ । ଦର୍ମଶାସ୍ତ୍ରତାଗ୍ କେତ୍ତେ ଲେକାମ୍, “ଇଦିନ୍ ମାଇଦିଙ୍କ୍ ମାନେୟ୍ତେ ୟାୟବାବାଙ୍କ୍ ୱିଡ଼୍ସି ନିଜେତ୍ ମୁତେନ୍ ତଡ଼୍ ମାନ୍ତଣ୍ଡ୍ ଅଡ଼୍ ଇର୍ୱୁଡ଼୍ କାୟ୍ଲି ୱେରଡ଼୍ ଆଦ୍ତଡ଼୍ ।” ଶାସ୍ତ୍ରତାଗ୍ ଇଦ୍ ବିଷୟ୍ତେ ପେସ୍ପିମିନ୍ଦେ, ଇଦ୍ କ୍ରିଷ୍ଟ ନୁ ମଣ୍ଡଲି ସେଙ୍ଗେ ସାୟେ ଇଞ୍ଜ ନାନ୍ ବୁଜେମ୍ ଆଦୁତାନ୍ । ଇତ୍କେ ଇଦ୍ ମିଇ ସେଙ୍ଗେବା ସାୟେ । ସାର୍ରେ ମୁଦ୍ପାଲଡ଼୍ ମୁତେଙ୍କ୍ ଜିୱେଇସ୍ ପ୍ରେମ ମାଡ଼ାଟ୍ ନୁ ସାର୍ରେ ମୁତ୍ତେ ନିଜେତ୍ ମୁଦ୍ପାଲଡ଼୍କିଙ୍କ୍ ସମ୍ମାନ୍ ଇୱି ।
Source notes (4)
- Cross-reference କଲସୀୟ ୪:୫.
- Cross-reference କଲସୀୟ 3:୧୬,୧୭.
- Cross-reference କଲସୀୟ 3:୧୮; ୧ ପିତର୍ 3:୧.
- Cross-reference କଲସୀୟ 3:୧୯; ୧ ପିତର୍ 3:୭.
ପୁନାଦ୍ ଆର୍ର୍. Copyright © 2020 The Word for the World International and Koya Translation Samithi, Malkangiri, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.