ପୁନାଦ୍ ଆର୍ର୍
୧ କରନ୍ତିୟ 5
ମଣ୍ଡଲିକଞ୍ଚ୍ ଦୁରାମ୍ ଆତା ଦାଦାଲରକ୍ ୱିଡ଼୍ସାନାଦ୍
ନିଜାମେ କେଞ୍ଜମିନ୍ଦେମ୍ ଯେ, ମିଇ ଲପେ ବ୍ୟବିଚାର୍ ମିନ୍ଦେ, ଇଦ୍ଲେକାତ୍ ବ୍ୟବିଚାର୍, ବାତାକି ୱେର୍ ଜାତିନଡ଼୍ ଲୋପେ ବା ତଅନ୍ଦ, ଇଦ୍ଲେକେମ୍ କି ୱେରନ୍ ତାମ୍ ବାବାନ୍ ପାୟେତ୍ ମୁତେଙ୍କ୍ ନେଃଏସ୍ ମିନ୍ନ୍ଦେନ୍ । ମେଣ୍ଡେ, ବେନ ଇଦ୍ ପାଡିୟ୍ ମାଡ଼ମିନ୍ଦେନ୍, ଅଣ୍ଡ୍ ବେଲାକି ମିଇ ଲୋପେଙ୍କ୍ ନୁଞ୍ଚ୍ ଦୁରାମ୍ ମାଡ଼୍ତର୍, ଇଦିନ୍ ମାଇଦିଙ୍କ୍ ଆଲ୍ସକଟ୍ ଅୟ୍ୱେ ବେଲାନ୍ କି ଗର୍ବ ମାଡ଼ମିନ୍ଦେଡ଼ି ? ବାତେଙ୍କ୍ ଇତ୍କେ ନାନେ ମେନ୍ଦୁଲ୍ତେ କାଇଲକେ ବା ଆତ୍ମାତେ କାଇଲି ମାଞ୍ଜ୍, ବେନଣ୍ଡ୍ ଇଦିନ୍ ଲେକାମ୍ ପାଡିୟ୍ ମାଡ଼ିମିନ୍ଦେନ୍, କାଇଲି ମାନ୍ଦାନ୍ ଲେକେମ୍ ନାନ୍ ଅନାଦ୍ ବିଚାର୍ କିସ୍ ତେର୍ସ୍ପି ମିନ୍ଦେନ୍, ମିଡ଼୍ ନୁ ନାୟାଦ୍ ଆତ୍ମା ମାନାଦ୍ ପ୍ରବୁ ଜିସୁନ୍ ପେଦେର୍ତେ ଅଣ୍ଡୟାଗେ ଆଦାନ୍ ୱେଲେ, ଶକ୍ତିତଡ଼୍ ଇଦ୍ ସ୍ଥିର୍ ମାଡ଼ମିନ୍ଦେନ୍ ଯେ, ଇଦ୍ ଲେକେତ୍ ନାରୁଙ୍କ୍ ମେନ୍ଦୁଲ୍ତାଦ୍ ନାଷ୍ଟାମ୍ତ ମାଇଦିଙ୍କ୍ ଶୟ୍ତାନ୍ତେ କାଇଦେ ୱିସଡ୍ସିନାଦ୍ ମିନ୍ଦେ, ବେଲାକି ପ୍ରବୁ ଜିସୁନ୍ ଦିନାମ୍ତେ ଅନାଦ୍ ଆତ୍ମା ଗେଲ୍ସେ ପାର୍ଦିତ୍ । 1
ମିୟାଦ୍ ଇଦ୍ଲେକେତ୍ ଗର୍ବ ମାଡ଼ାନାଦ୍ ସାୟେ ଇଲ୍ଲେ । ମିଡ଼୍ କି ପୁନିର୍ ଯେ ସୁଡୁଟ୍ ଇଞ୍ଜ କମିର୍ ସାର୍ରେ ମଇଦା ପିଣ୍ଡୁଲାତିଙ୍କ୍ କମିରମୟ ମାଡ଼ିତା ? ମିଡ଼୍ ତ କମିର ଇଲ୍ୱା ନାରୁଡ଼୍, ବେଲାକି ମିଡ଼୍ ପୁନାଦ୍ ପେଣ୍ଡୁଲ୍ ଆଦ୍ଦେ ପାର୍ଦାତିଡ଼୍, ଆଦିଙ୍କ୍ ମାଇଦିଙ୍କ୍ ପାନ୍ତାଦ୍ କମିର ବାଇଦେ ପେସ୍ପିମୁଟ୍, ବାତାଙ୍କ୍ ଇତ୍କେ ମାୟାଦ୍ ନିସ୍ତାର୍ ପାଣ୍ଡୁମ୍ତାଦ୍ ତିଆର୍ ତେର୍ତେ । ମାନ୍ ସେଙ୍ଗେ କ୍ରିଷ୍ଟ, ମେଣ୍ଢା ପିଲା ଲେକାମ୍ ବଲିକୃତ ଆତ୍ତଣ୍ଡ୍ । ଅତଏବ ୱାରାଟ୍, ମାନାଲ୍ ପାନ୍ତାଦ୍ କମିର ବା କାରାପ୍ ନୁ ପିନ୍ଦ୍ୱାଦ୍ ପାଡିୟ୍ ଲେକେତ୍ କମିରତେ ପାଣ୍ଡୁମ୍ କିୱାକଟେ ସରଲତା ନୁ ନିଜାମ୍ ଲେକେତ୍ କମିର ଇଲ୍ୱା ରୂଟିତେ ପାଣ୍ଡୁମ୍ ମାଡ଼ିକାଲ୍ ।
ବ୍ୟବିଚାରି ତଡ଼୍ କାଇଲ୍ମାଟ୍ ଇଞ୍ଜ ନାନ୍ ମିକିଙ୍କ୍ ନା ଚିଟି ଲେକି ମାତ୍ତାନ୍ । ଇ ବୁମ୍ତର୍ ବ୍ୟବିଚାରି କି ଦନ୍ଲୋଭିଡ଼୍ କି ଡଙ୍ଗାଲଡ଼୍ ନୁ ପୁତ୍ଲାମ୍ ପୁଜା ମାଡ଼ାନର୍ ତଡ଼୍ ଇଚୁର୍ ବା କାଇଲ୍ମାଟ୍ । ଆଲେଆତ୍କେ, ମିକିଂଙ୍କ୍ ଜଗତ୍ତାଗାଙ୍କ୍ ଅଣ୍ଡୟ୍ଦାମ୍ ପେୟିସ୍ ଆଦେୱେୟ୍ତିତ୍ । ବାତେଙ୍କ୍ ଇତ୍କେ ନାୟାଦ୍ ଲେକାନାଦ୍ ନୁ ଆଲ୍ସାନାଦ୍ ଇଲା ମାତ୍ତେ ଯେ, ଯଦି ବେନଆଇ ନାରୁଣ୍ଡ୍ ତାମୁଣ୍ଡ୍ ଇଞ୍ଜ୍ ପୁଞ୍ଜ୍ ବ୍ୟବିଚାର୍ କି ସାୱ୍କାର୍ ଆଦାନଙ୍କ୍ କି ମାତ୍ୱାରିଡ଼୍ କି ପୁତ୍ଲାମ୍ ପୂଜା ମାଡ଼ାନର୍ କି ପେର୍ଲାନର୍ ମାତ୍ୱାରି କି ଅର୍ତୁନାଦ୍ ଜିନିଷ୍ ଡଙ୍ଗାଲ୍ ମାଡ଼ାନଣ୍ଡ୍ ଆତଣ୍ଡ୍ ଇତ୍କେ ଇସତ୍ ନାରୁଡ଼୍ ତଡ଼୍ କାଇଲ୍ମାଟ୍, ବେଲା ଅଣ୍ଡ୍ ତଡ଼୍ ଦଡା ବା ତିନ୍ମାଟ୍ ।
ବାୟ୍ଦେତ୍ ନାରୁଡ଼ାଦ୍ ବିଚାର୍ ମାଡ଼ାନ୍ ମାୟ୍ଦିଙ୍କ୍ ନାନ୍ ବେନ ? ଇତ୍କେ ମାନ୍ ମଣ୍ଡଲିତେ ଲୋପେ ମାନ୍ଦାନ୍ ନାରୁଡ଼୍କିଂଙ୍କ୍ ବିଚାର୍ ମାଡ଼ାନାଦ୍ ଦାୟିତ୍ ବାତ୍ ମାନାଦ୍ ଇଲ୍ଲେ ? ଇଶ୍ୱର୍ ଅଡ଼ାଦ୍ ବିଚାର୍ ମାଡ଼ିତନ୍, ଦର୍ମଶାସ୍ତ୍ରତାଗ୍ ଲେକ୍ତାଦ୍ ମିନ୍ଦା କାରାପ୍ ନାରୁଡ଼୍କିଂଙ୍କ୍ ପେସ୍ପିମୁଟ୍ ।
Source notes (1)
- Cross-reference ଗାଲାତୀୟ ୫:୯.
ପୁନାଦ୍ ଆର୍ର୍. Copyright © 2020 The Word for the World International and Koya Translation Samithi, Malkangiri, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.