Psalm 4

[Psalm lal David]

Sie Pre In Suk Kasru Ke Eku

1O God, su loangeyu,

Topukyu ke nga pre.

Ke nga muta in ongoiya, kom kasreyu.

Pakomutuk, ac lohng pre luk.

2Putaka kowos ac akkolukye inek?

Putaka kowos ac lungse ma lusrongten

Ac suk ma kikiap?

3Esam lah LEUM GOD El sulela mwet suwoswos tuh elos in ma lal,

Ac El lohngyu ke nga pang nu sel.

4Kowos in rarrar ke sangeng, ac tia sifil oru ma koluk;

Nunku akloalya ke ma se inge

Ke kowos oan in misla fin mwe oan kiowos.1

5Kisakin mwe kisa fal nu sin LEUM GOD,

Ac filiya lulalfongi lowos in El.

6Oasr mwet puspis su pre ac fahk,

“O LEUM GOD, saok kom in sifilpa akinsewowoye kut,

Ac ngetnget kulang lom in srekuti!”

7Tusruktu, engan su kom ase nu sik

Yohk liki na engankinyen mut lalos

Ke wheat ac wain.

8Ke nga ona, nga motulla in misla;

Mweyen kom mukena, LEUM GOD, ku in karinginyu wo. s