BIBLE MUTAL
Psalm 3
[Psalm lal David, ke el Kaingkunul Absalom, Wen natul]
Sie Pre In Suk Kasru Ke Lotutang
O LEUM GOD, puslana mwet lokoalok luk,
Pusenina mwet tuyak lainyu!
Elos kaskas keik ac fahk,
“God El ac tia kasrel.”
Tusruktu, O LEUM GOD, kom mwe loang luk liki ongoiya in pacl e nukewa.
Kom ase nu sik kutangla,
Ac akpulaikyeyu.
Nga pang nu sin LEUM GOD tuh elan kasreyu,
Ac El topukyu liki eol mutal1 sel.
Nga ona ac motulla,
Ac LEUM GOD El karinginyu nwe ke nga ngutalik.
Nga tia sangeng sin tausin mwet lokoalok
Su rauniyula yen nukewa.
Fahsru, LEUM GOD! Moliyula, God luk!
Kom kai mwet lokoalok luk nukewa
Ac akmunasyalos, na wangin ku lalos in aklokoalokyeyu.
Kutangla tuku sin LEUM GOD—
Lela tuh Elan akinsewowoye mwet lal.
Source notes (1)
- Footnote eol mutal: liye Psa 2:6
BIBLE MUTAL. Public domain. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · SourceEdition imported 2026-10-25.