BIBLE MUTAL
Psalm 121
[Soko On in Utyak]
LEUM GOD El Lango Lasr
Nga fah ngetak nu fineol uh,
Kasru luk ac fah tuku ya me?
Kasru luk tuku sin LEUM GOD me,
Su orala kusrao ac faclu.
El ac fah tia lela niom in mukuikui;
El su liyekomyang fah tia motulla.
Liye, El su liyaung Israel
Fah tiana motul ku folosuwosla.
LEUM GOD El mwet liyaung lom;
LEUM GOD El mwe lul lom lac poum layot.
Faht uh ac fah tia unikom ke len,
Ku malem ke fong.
LEUM GOD El ac fah liyekomyang liki ma koluk nukewa,
El ac fah liyaung moul lom.
LEUM GOD El ac fah liyaung illa lom ac ilyak lom,
Ingela ac nu tok ma pahtpat.
BIBLE MUTAL. Public domain. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · SourceEdition imported 2026-10-25.