Konda Porja Bible
ହିତୋପଦେଶ 29
ଆମା ଲୋକ୍ ରିଜାମୁଜା ନେଗି ଉଣ୍ତିଙ୍ଗ୍ ଲାଗାନି ମାଟେଙ୍ଗ୍ ୱେର୍ହିଙ୍ଗ୍ ବା ୱାନ୍ ମନ୍ ଡାଟ୍ କିନାନ୍, ୱାନ୍ ନେଗେନ୍ ଆନି ବାଦ୍ଲୁ ଦାପ୍ରେ ନାସ୍ଟୁ ଆନାନ୍ ।
ଦାର୍ମୁଦି ଲୋକୁ ନାଣ୍ତ ଆତିଙ୍ଗାଁ, ଲୋକୁ ୱେଡ଼ିକା କିନାର୍; ମାତର ସେଇ ଲୋକୁ ସାସନ୍ ପାଣି ପଇତିଙ୍ଗା, ଲୋକୁ ଦୁକ୍ତୁ ଆଡ଼୍ବାନାର୍ ।
ଆମା ଲୋକ୍ ବୁଦିଦିଙ୍ଗ୍ ଜିବନ୍ନୋନାନ୍, ୱାନ୍ ନିଜେଦି ବୁବାଦିଙ୍ଗ୍ ୱେଡ଼ିକା କିନାନ୍; ମାତର ଆମାକାନ୍ ଦାରିପାଣିକିନିୱାରି ୱାଲେ ମିସାନାନ୍, ୱାନ୍ ନିଜେଦି ଦନ୍ ଇପ୍ନାନ୍ ।
ରାଜା ନେଗିବିସାର୍ତାନ୍ ଦେସ୍ ସୁସ୍ତି କିନାନ୍; ମାତର୍ ଆମାକାନ୍ ନାଣ୍ଡ ଦନ୍ ଆସା କିନାନ୍, ୱାନ୍ ଆକା ନାସ୍ଟୁକିନା ପକ୍ନାନ୍ ।
ଆମା ଲୋକ୍ ନିଜେଦି ଲୋକା ଉଣ୍ତିଙ୍ଗ୍ ସାୱି ମାଟେଙ୍ଗ୍ ୱାର୍ଗିନାନ୍, ୱାନ୍ ୱାନି ପାଦ୍ ଉଣ୍ତିଙ୍ଗ୍ ଜାଡ଼ି ଅଡ୍ନାନ୍ ।
ସେଇ ଲୋକ୍ତି ପାପ୍ତୁ ଉରି ତେବାନାତ୍; ମାତର୍ ଦାର୍ମୁଦି ଲୋକୁ ପାଟା ମାରି ୱେଡ଼ିକା କିନାନ୍ ।
ଦାର୍ମୁଦି ଲୋକ୍ ସିଲିସାତି ଲୋକା ମାଟାଦି ବିସୟ୍ଦାନ୍ ନେସ୍ନାନ୍; ମାତର୍ ଆକା ନେସ୍ନି ଉଣ୍ତିଙ୍ଗ୍ ସେଇ ଲୋକ୍ତି ବୁଦି ସିଲେତ୍ ।
ନିନ୍ଦାକିନି ଲୋକୁ ଗାଡ଼୍ତି ଲୋକାଙ୍ଗ୍ ଏଗ୍ରିସ୍ କିନାର୍; ମାତର୍ ଗ୍ୟାନ୍ଦି ଲୋକୁ ରିସାଦି ଲୋକାଙ୍ଗ୍ ସିତିଡ଼ି କିନାର୍ ।
ବୁଦିସିଲି ଲୋକ୍ତି ୱାଲେ ବୁଦିମାନି ଲୋକ୍ତି ଜାଟିଜଗ୍ଡ଼ା ଆତିଙ୍ଗାଁ, ୱାନ୍ ରିସାଆତିଙ୍ଗା ଗି ସିକ୍ତିଙ୍ଗା, ଇନି ସାନ୍ତି ସିଲେତ୍ ।
ଲୋକାଙ୍ଗ୍ ଡାକ୍ନି ଲୋକୁ ଦାର୍ମୁ ଲୋକ୍ତିଙ୍ଗ୍ କାଡ଼୍ନାର୍; ମାରି, ୱାର୍ ସାନ୍ତି ଲୋକ୍ତି ଜିବନ୍ ସାପିସ୍ କିଦେଙ୍ଗ୍ ରେବାନାର୍ ।
ବୁଦିସିଲି ଲୋକ୍ ନିଜେଦି ୱିଜୁ ରିସା ୱେକ୍ନାନ୍; ମାତର୍ ବୁଦିଦିକାନ୍ ଆକା ସାସ୍ କିଜି ସୁସ୍ତି କିନାନ୍ ।
ସାସନ୍ କିନିକାନ୍ ଏସେଙ୍ଗ୍ ମିସ୍ ମାଟାଦୁ ଗିତଣି ୱେନାନ୍, ଆର୍ତିଙ୍ଗ୍ ୱାନି ସେବାକିନିକାର୍ ୱିଜୁ ସେଇକାର୍ ଆନାର୍ ।
କାକୁର୍ତି ଲୋକ୍ ମାରି ତାଗ୍ଇ ଲୋକ୍ ଉଣ୍ଡ୍ରେବାନୁ ମିସାନାର୍, ପ୍ରବୁ ରୁଣ୍ଡି ଲୋକା କାଣୁକୁ ଜାୟ୍ କିନାନ୍ ।
ଆମା ରାଜା ବିସ୍ବାସ୍ତାନ୍ ସିଲିସାତି ଲୋକାଦି ବିସାର୍ କିନାନ୍, ୱାନି ରାଜାଗାଦି ୱିଜୁଦିନ୍ ତିର୍ତାନ୍ ତେବାନାତ୍ ।
ବାଡିଗା ମାରି ନେଗି ଉଣ୍ତିଙ୍ଗ୍ ଲାଗାନିକା ବୁଦି ସିନାତ୍; ମାତର୍ କଡ଼ଦିଙ୍ଗ୍ ୱାନି ବଦାଦାନ୍ ଡ଼ିସ୍ତିଙ୍ଗା, ୱାନ୍ ୱାନି ୟାୟେଙ୍ଗ୍ ସେମାର୍ ସିନାନ୍ ।
ସେଇ ଲୋକୁ ନାଣ୍ତ ଆତିଙ୍ଗାଁ, ପାପ୍ ନାଣ୍ତ ଆନାତ୍; ମାତର୍ ଦାର୍ମୁଦିକାର୍ ୱାରି ସାନିକା ସୁଡ଼ୁନାର୍ ।
ନିଜେଦି ମାରିନ୍ତିଙ୍ଗ୍ ସାସ୍ତି ସିତିଙ୍ଗା, ୱାନ୍ ନିଙ୍ଗିଁ ସାନ୍ତି ସିନାନ୍; ମାରି, ୱାନ୍ ନି ଜିବନ୍ତିଙ୍ଗ୍ ସୁକ୍ ସିନାନ୍ ।
ଏମେମାନୁ ମାପୁରୁଦି ବଲୁ ସିଲେତ୍, ଆବେନ୍ ଲୋକୁ ନାସ୍ଟୁ ଆନାର୍; ମାତର୍ ଆମା ଲୋକ୍ ନିୟମ୍ ମାନାନାନ୍, ୱାନ୍ ଦନ୍ୟ ।
ଉଣ୍ତ୍ରିମାଟାଦାନ୍ ଦାସ୍ ସୁଦ୍ରେ ଆଏନ୍; ଏନ୍ଦାଇର୍ରିଙ୍ଗ୍ ୱାନ୍ ବୁଜାତିଙ୍ଗ୍ ବା ମନ୍ ସିଏନ୍ ।
ନିନୁ ଇନିକା ମାଟାଦାନ୍ ଦାନ୍ଦା ଆନି ଲୋକ୍ତିଙ୍ଗ୍ ସୁଡ଼ୁଜିନି ? ତାନି ବାଦ୍ଲୁ ନିର୍ବୁଦି ବିସୟ୍ଦାନ୍ ନାଣ୍ଡ୍ ଆସା ମାନାତ୍ ।
ଆମାକାନ୍ କଡ଼ୱାଲେରାନ୍ ନିଜେଦି ଦାସ୍ତିଙ୍ଗ୍ ଲାଡ୍କିଜି ପସା କିନାନ୍, ସାରାସାରି ଆୟା ଦାସ୍ ୱାନି ମାରିନ୍ ଆଜି ସନାନ୍ ।
ନାଣ୍ତ ରିସାଦି ଲୋକ୍ ଜାଟିଜଗଡ଼ା ନିକ୍ନାନ୍ ମାରି ନାଣ୍ତ ତାଗ୍ଇପାଣି କିନାନ୍ ।
ଲୋକ୍ତି ଆକାର୍ ୱାନିଙ୍ଗ୍ ଆଡ୍ଗି କିନାତ୍; ମାତର୍ ଆମାୱାନି ଜିବନ୍ ନେଗିକା, ୱାନ୍ ସନ୍ମାନ୍ ପୋଇନାନ୍ ।
ଏନ୍ ଡଙ୍ଗାଁ ଲୋକ୍ତି ୱାଲେ ମିସାନାନ୍ ୱାନ୍ ନିଜେଦି ଜିବନ୍ତିଙ୍ଗ୍ କାଡ଼୍ନାନ୍, ୱାନ୍ ପାର୍ମାଣ୍ କିନି ମାଟା ୱେନାନ୍, ମାତର୍ ଇନିକା ୱିକ୍ଏନ୍ ।
ଲୋକ୍ତି ତିଏଲ୍ ଉରିଦି ୱାଜା; ମାତର୍ ପ୍ରବୁଦି ଲାକ୍ତୁ ଆମାକାନ୍ ଆସା ଇଡ୍ନାନ୍, ୱାନ୍ ନେଗେଣ୍ଡ୍ ତେବାନାନ୍ ।
ନାଣ୍ଡ ଲୋକୁ ସାସନ୍କିନିୱାନି ଦୟା ଆସା କିନାର୍; ମାତର୍ ଲୋକ୍ତି ବିସାର୍ ପ୍ରବୁଦିମାଣାନ୍ ୱାନାତ୍ ।
ଦାର୍ମୁ ଲୋକ୍ ଅଦାର୍ମୁ ଲୋକାଙ୍ଗ୍ କାଡ଼୍ନାନ୍, ମାରି ଅଦାର୍ମୁ ଲୋକ୍ ନେଗି ସାରିଦୁ ବୁଲାନି ଲୋକ୍ତିଙ୍ଗ୍ କାଡ଼୍ନାନ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.