Konda Porja Bible
ହିତୋପଦେଶ 18
ଆମାକାନ୍ ନିଜେଦିଙ୍ଗ୍ ଆଇ ଲୋକ୍ତି ମାଣାନ୍ ୱେରେଏ କିନାନ୍, ୱାନ୍ ନିଜେଦି ନେଗି ଉଣ୍ତିଙ୍ଗ୍ କିନାନ୍ ମାରି ୱିଜୁ ରକମ୍ତି ନେଗି ଗ୍ୟାନ୍ଦି ବିରୁଦ୍ତାନ୍ ଜାଟି କିନାନ୍ ।
ନିର୍ବୁଦି ଲୋକ୍ ବୁଦିଦାନ୍ ୱେଡ଼ିକା ପୋଇଏନ୍, ଆବ୍କା ନିଜେଦି ମନ୍ତି ମାଟା ୱେର୍ତେଙ୍ଗ୍ ୱେଡ଼ିକା ପୋଇନାନ୍ ।
ତାଗ୍ଇକା ୱାତିଙ୍ଗାଁ ମାନାଇକା ୱାନାତ୍, ମାରି, ନିନ୍ଦାଦି ୱାଲେ ସେମାର୍ ୱାନାତ୍ ।
ଲୋକ୍ତି ୱେୟୁଦି ମାଟା ନିର୍ଇଗୁମି ଏରୁ ୱାଜା, ମାରି, ଗ୍ୟାନ୍ଦି ବାଡି ଉସାଏରୁ ୱାଜା ।
ତାଗ୍ଇୱାନି ଉଣ୍ତିଙ୍ଗ୍ ମକମ୍ ସୁଡ଼ୁଜି ବିସାର୍ କିନିକା ନେଗେଣ୍ତ୍ ସିଲେ ମାରି ଦାର୍ମୁଦିୱାନି ଉଣ୍ତିଙ୍ଗ୍ ଅନ୍ୟାୟ୍ କିନିକା ଟିକ୍ ସିଲେ ।
ନିର୍ବୁଦି ଲୋକ୍ତି ୱେୟୁ ଜାଟିଜଗ୍ଡ଼ା କିଦେଙ୍ଗ୍ ତାନାତ୍, ମାରି, ୱାନି ୱେୟୁ ଦେବା ତିଣ୍ଡ୍ରେଙ୍ଗ୍ କୁକୁନାତ୍ ।
ମୁର୍କୁ ଲୋକ୍ତି ୱେୟୁ ୱାନି ସାନି ମାଟା, ମାରି, ୱାନି ୱେୟୁ ନିଜେଦି ଜିବନ୍ତି ଉରି ୱାଜା ।
ଜାରିଦିଙ୍ଗ୍ ଜାରି ୱେର୍ନି ଲୋକ୍ତି ମାଟା ସାୱି ୱାଜା, ଆକା ପଟାଦି ଲୋଇ ସନାତ୍ ।
ନିଜେଦି ପାଣିଦୁ ଆମାକାନ୍ ଗାଡ଼ିଆ ଆନାନ୍, ୱାନ୍ ନାସ୍ଟୁକିନିୱାନି ତଡ଼ାନ୍ ।
ପ୍ରବୁଦି ଦରୁ ଡାଟ୍ତି ନିର୍ଇ ମେଡ଼୍; ଦାର୍ମୁଦି ଲୋକ୍ ଆବେନୁ ସଲ୍ସି ରକିୟା ପୟ୍ନାନ୍ ।
ମାଜନ୍ ଲୋକା ଦନ୍ ଆଜିନାତ୍ ୱାନି ଡାଟ୍ତି ଗାଡ଼୍, ମାରି ୱାନି ସିନ୍ତାଦୁ ଉଣ୍ତ୍ରି ନିର୍ଇ କାତିଦି ୱାଜା ।
ନାସ୍ଟୁ ଆନି ଆଗ୍ଡ଼ି ଲୋକ୍ତି ମନ୍ ଆକାର୍ ଆନାତ୍, ମାରି, ସନ୍ମାନ୍ତି ଆଗ୍ଡ଼ି ସାନ୍ତି ୱାନାତ୍ ।
ଆମାକାନ୍ ୱେନି ଆଗ୍ଡ଼ିନେ ଡ଼େସି ମାଟା ଇନାନ୍, ଆକା ୱାନି ଉଣ୍ତିଙ୍ଗ୍ ବୁଦିସିଲିକା ମାରି ସେମାର୍ ମାଟା ।
ଲୋକ୍ତି ଆତ୍ମା ୱାନି ନପିଦିଙ୍ଗ୍ ସାସ୍ କିନାତ୍; ମାତର୍ ଦୁକ୍ତି ଆତ୍ମାଦିଙ୍ଗ୍ ଏନ୍ ସାସ୍ କିଦେଙ୍ଗ୍ ଆଟ୍ନାନ୍ ?
ବୁଦିମାନି ଲୋକ୍ତି ମନ୍ ଗ୍ୟାନ୍ ପୟ୍ନାତ୍; ମାରି, ଗ୍ୟାନ୍ଦିକାନ୍ ବୁଦି ରେବାନାନ୍ ।
ଲୋକ୍ତି ଦାନ୍ ୱାନି ଉଣ୍ତିଙ୍ଗ୍ ସାରି ନେଗେନ୍ କିନାନ୍, ମାରି, ପେରି ଲୋକା ଆଗ୍ଡ଼ି ୱାନିଙ୍ଗ୍ ତାନାନ୍ ।
ଆମା ଲୋକ୍ ପାର୍ତୁମ୍ ନିଜେଦି ଜାଟିଜଗ୍ଡ଼ା ୱେର୍ନାନ୍, ୱାନ୍ ଦାର୍ମୁ ତରାୟ୍ଆନାନ୍, ମାତର୍ ୱାନି ପାଡ଼ାକାଦି ଲୋକୁ ୱାଜି ୱାନିଙ୍ଗ୍ ପରିକା କିନାର୍ ।
କୁଡ଼ୁକୁଡ଼ି କିନି ମାଣାନ୍ ଜାଟିଜଗଡ଼ା ଆନିକା ବନ୍ଦ୍ ଆନାତ୍ ମାରି ସାକ୍ତିଦି ଲୋକାଙ୍ଗ୍ ୱେରେଏ କିନାତ୍ ।
ନି ପାଡ଼ାକାଦି ଲୋକାଙ୍ଗ୍ ସାକା କିଆ ୱାର୍ ନିଙ୍ଗିଁ ଉଣ୍ତ୍ରି ଗାଡ଼୍ତି ଗଡା ୱାଜା ରକିୟା କିନାର୍, ମାତର୍ ଜଦି ନିନୁ ୱାରି ୱାଲେ ଜାଟିଜଗ୍ଡ଼ା କିନି, ୱାର୍ ନି ଉଣ୍ତିଙ୍ଗ୍ ସେର୍ଲା ଗାଡ଼ା କେରପ୍ନାର୍ ।
ଲୋକ୍ତି ପଟା ୱାନି ୱେୟୁଦି ୱାର୍ଗିନି ପଲ୍ତାନ୍ ପୁରା ଆନାତ୍, ମାରି, ୱାନ୍ ନିଜେଦି ୱେୟୁଦାନ୍ ୱେର୍ସି ଉଣ୍ତାକିତି ମାଟାଦାନ୍ ପାଜ୍ନାନ୍ ।
ସାନିକା ମାରି ଜିନିକା ୱେତଲ୍ତି ଆଡ୍ଗି ମାନେ; ଆମାକାର୍ ଦାନିଙ୍ଗ୍ ନେଗେଣ୍ତତାନ୍ ନେସ୍ନାର୍, ୱାର୍ ଆୟାତାନି ଦଣ୍ତ୍ ପୟ୍ନାର୍ ।
ଆମା ଲୋକ୍ ଆଡ଼ି ପୟ୍ନାନ୍, ୱାନ୍ ନେଗି ଜିନିସ୍ ପୟ୍ନାନ୍ ମାରି ପ୍ରବୁଦି ମାଣାନ୍ ଦୟା ପୟ୍ନାନ୍ ।
ସିଲିସାତି ଲୋକ୍ ବାତିଙ୍ଗ୍ମାଲ୍ଜି ଇନାନ୍; ମାତର୍ ମାଜନ୍ ଲୋକ୍ ବାଦେଆନି ମାଟେଙ୍ଗ୍ ଇନାନ୍ ।
ଆମାକାନ୍ ନାଣ୍ଡ ଲୋକାଙ୍ଗ୍ ସଙ୍ଗ୍ କିନାନ୍, ୱାନ୍ ନିଜେଦି ନାସ୍ଟୁ ଉଣ୍ତିଙ୍ଗ୍ ଆକା କିନାନ୍; ମାତର୍ ଅରେନ୍ ଜିବନ୍ନୋନିକାନ୍ ମାନାନ୍, ଏନ୍ ତଡ଼ାନ୍ ବାଦ୍ଲୁ ନାଣ୍ଡ ପାଡ଼ାକାଦୁ ତେବାନାନ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.