Skip to content
BibleKenya

Konda Porja Bible

ହିତୋପଦେଶ 14

ବୁଦିଦି ଆଇମା ନିଜେଦି ଇଲୁ ତିଆର୍‌ କିନାତ୍‌;

ମାତର୍‌ ବୁଦିସିଲି ଆଇମା ନିଜେଦି କିୟୁଦାନ୍‌ ଆକା ରୁକ୍‌ନା ପକ୍‌ନାତ୍‌ ।

ଆମାକାନ୍‌ ନିଜେଦି ସାନ୍ତିଦାନ୍‌ ସାଲାନାନ୍‌, ୱାନ୍‌ ପ୍ରବୁଙ୍ଗ୍‌ ତିଲାନାନ୍‌;

ମାତର୍‌ ତାଗ୍‌ଇ ସାରିଦୁ ସନିକାନ୍‌ ୱାନିଙ୍ଗ୍‌ କାଡ଼୍‌ନାନ୍‌ ।

ବୁଦିସିଲି ଲୋକ୍‌ତି ୱେୟୁଦୁ ଆକାର୍‌ତି ନାଣ୍ତ ମାଟେଙ୍ଗ୍‌ ତେବାନେ;

ମାତର୍‌ ବୁଦିଦି ଲୋକା ୱେୟୁ ୱାରିଙ୍ଗ୍‌ ରକିୟା କିନାତ୍‌ ।

ଏମେମାନୁ କଡିଙ୍ଗ୍‌ ସିଲୁ; ଆବେନୁ ପାସି ସିଲେତ୍‌;

ମାରି, କଡିଦି ବପୁଦାନ୍‌ ନାଣ୍ଡ ପାସି ଉଣ୍ଡାନାତ୍‌ ।

ବିସ୍‌ବାସ୍‌ତିକାନ୍‌ ମିସ୍‌ ସାକି ଇନ୍‌ଏନ୍‌;

ମାତର୍‌ ସତ୍‌ସିଲି ସାକି ସିନିକାନ୍‌ ମିସ୍‌ ଇନାନ୍‌ ।

ନିନ୍ଦାକିନିକାନ୍‌ ବୁଦି ରେବାତିଙ୍ଗା ପୟ୍‌ଏନ୍‌;

ମାତର୍‌ ବୁଦିଦି ଲୋକ୍‌ତି ଉଣ୍ତିଙ୍ଗ୍‌ ଗ୍ୟାନ୍‌ ପୟ୍‌ନାନ୍‌ ।

ବୁଦିସିଲି ଲୋକ୍‌ତି ଲାକ୍‌ତୁ ସର୍ରିଙ୍ଗା,

ନିନୁ ୱାନି ୱେୟୁଦାନ୍‌ ବୁଦିମାନି ମାଟା ୱେନ୍‌ଇ ।

ସାଲାକି ଲୋକୁ ବୁଦିଦାନ୍‌ ନିଜେଦି ସାରି ବିସାର୍‌ କିନାନ୍‌;

ମାତର୍‌ ବୁଦିସିଲିକାନ୍‌ ବୁଦିସିଲି ଉଣ୍ତିଙ୍ଗ୍‌ ବାଣ୍ତିସ୍‌ କିନାନ୍‌ ।

ବୁଦିସିଲି ଲୋକୁ ଦସ୍‌ତିଙ୍ଗ୍‌ କାତା ଇଜି ଅଡ଼୍‌ବିନାର୍‌;

ମାତର୍‌ ସାନ୍ତି ଲୋକା ବାନୁ ଦୟା ତେବାନାତ୍‌ ।

ମନ୍‌ ନିଜେଦି ଦୁଃକ୍‌ ନେସ୍‌ନାତ୍‌;

ମାରି, ନେସ୍‌ଇ ଲୋକୁ ୱାନି ୱେଡ଼ିକାଦୁ ମିସାଏନ୍‌ ।

ତାଗ୍‌ଇ ଲୋକା ଇଲୁ ନାସ୍ଟୁ ଆନାତ୍‌;

ମାତର୍‌ ସାନ୍ତି ଲୋକା ଗୁଡ଼ା ନାସ୍ଟୁ ଆଏତ୍‌ ।

ଲୋକ୍‌ତି କାଣ୍‌ଗାଦୁ ଆମା ଆମା ସାରି ନେଗିକା ତର୍‌ନାତ୍‌;

ମାତର୍‌ ୱାନି ସାରାସାରି ସାନି ସାରି ତେବାନାତ୍‌ ।

ସିକ୍‌ନି ବେଡ଼ାଦୁ ବା ମନ୍‌ଦୁକ୍‌ ଆନାତ୍‌;

ମାରି, ୱେଡ଼ିକାଦି ସାରାସାରି ଦୁଃକ୍‌ ୱାନାତ୍‌ ।

ମନ୍‌ତୁ ତାଗ୍‌ଇସାରିସନିକାନ୍‌ ନିଜେଦି ବୁଦିଦି ମାଟାଦୁ ପୁରା ଆନାତ୍‌;

ମାରି, ନେଗି ଲୋକୁ ନିଜେଦି ମାଣାନ୍‌ ସାନ୍ତି ଆନାନ୍‌ ।

ବୁଦିସିଲି ଲୋକୁ ୱିଜୁ ମାଟାଦିଙ୍ଗ୍‌ ମାନାନାନ୍‌;

ମାତର୍‌ ସାଲାକିଦି ଲୋକୁ ନିଜେଦି ୱିଜୁ ବୁଲାନିକା ନେଗେଣ୍ଡ୍‌ କିଜି ବୁଜାନାନ୍‌ ।

ବୁଦିଦିକାନ୍‌ ତିଲାନାନ୍‌ ମାରି ସେଇଦାନିଙ୍ଗ୍‌ ଡ଼ିସ୍‌ନା ସିନାନ୍‌;

ମାତର୍‌ ବୁଦିସିଲି ଲୋକ୍‌ ନିଜେଦିଙ୍ଗ୍‌ ଗର୍ବକିଜି ସାସ୍‌ସିଲିକାନ୍‌ ଆନାନ୍‌ ।

ଆମାକାନ୍‌ ଦାପ୍‌ରେ ରିସା ଆନାନ୍‌, ୱାନ୍‌ ବୁଦି ସିଲି ପାଣି କିନାନ୍‌;

ମାରି, ସେଇକା ଅଡ଼୍‌ବିନି ବୁଦିସିଲି ଲୋକ୍‌ କାଡ଼୍‌ନି ଲୋକୁ ଆନାନ୍‌ ।

ଜାଗାର୍‌ତା ମାନ୍‌ଇ ଲୋକୁ ବୁଦିସିଲି ଅଦିକାର୍‌ ପୋଇନାର୍‌;

ମାତର୍‌ ସାଲାକି ଲୋକୁ ବୁଦିଦି ମୁକୁଟ୍‌ ଆରାନାର୍‌ ।

ସେଇ ଲୋକୁ ନେଗି ଲୋକା ଆଗ୍‌ଡ଼ି ୱାନାର୍‌

ମାରି ତାଗ୍‌ଇକାର୍‌ ଦାର୍ମୁଦି ଲୋକା ସେର୍‌ଲାଦୁ ମାଡ଼ିସ୍‌ କିନାର୍‌ ।

ସିଲିସାତିକାର୍‌ ନିଜେଦି ଲୋକାଦି ବାନୁ କାଡ଼ାଇ ଆନାର୍‌;

ମାତର୍‌ ମାଜନ୍‌ ଲୋକା ନାଣ୍ଡ ସଙ୍ଗ୍‌କୁ ତେବାନାର୍‌ ।

ଆମା ଲୋକ୍‌ ନିଜେଦି ପାଡ଼ାକାଦି ଲୋକାଙ୍ଗ୍‌ କାଡ଼୍‌ନାନ୍‌, ୱାନ୍‌ ପାପ୍‌ କିନାନ୍‌;

ମାତର୍‌ ଆମା ଲୋକୁ ସିଲିସାତି ଲୋକ୍‌ତିଙ୍ଗ୍‌ ଦୟା କିନାନ୍‌, ୱାନ୍‌ ଦନ୍ୟ ।

ସେଇକା ସି‍ନ୍ତା କିନି ଲୋକୁ ଇନିକା ବାୟା ଆଏର୍‌ ?

ମାତର୍‌ ନେଗିକା ସିନ୍ତା କିନି ଲୋକା ଉଣ୍ତିଙ୍ଗ୍‌ ଦୟା ମାରି ସତ୍‌ ୱାନାତ୍‌ ।

ୱିଜୁ ରକମ୍‌ତି କାସ୍ଟୁ ପାଣିଦୁ ପଲ୍‌ ମାନାତ୍‌;

ମାରି, ପାଣି କିଏଣ୍ତା ୱାର୍ହି ମାଟେଙ୍ଗ୍‌ ୱାର୍‌ଗିତିଙ୍ଗ୍‌ କାକୁର୍ତି ୱାନାତ୍‌ ।

ଗ୍ୟାନ୍‌ରି ମୁକୁଟ୍‌ ୱାରି ଦନ୍‌;

ମାରି, ବୁଦିସିଲି ଲୋକା ଉଣ୍ତିଙ୍ଗ୍‌ ଆବ୍‌କା ବୁଦିସିଲିକା ମାନାତ୍‌ ।

ସତ୍‌ ସାକି ସିନିକାନ୍‌ ଆଇ ଲୋକା ଜିବନ୍‌ ରକିୟା କିନାନ୍‌;

ମାତର୍‌ ମିସ୍‌ ସାକି ସିନିକାନ୍‌ ବାଣ୍ତିସ୍‌ କିନାନ୍‌ ।

ପ୍ରବୁଙ୍ଗ୍‌ ତିଲାନିକା ଡାଟ୍‌ତି ବିସ୍‌ବାସ୍‌ ତାନାତ୍‌;

ମାରି, ୱାନି ମାରିନ୍‌କୁ ରମ୍‌ନି ବାଡି ପୟ୍‌ନାର୍‌ ।

ଆମାକା ଲୋକ୍‌ତିଙ୍ଗ୍‌ ସାନି ଉରିଦାନ୍‌ ଡ଼େପ୍‌ନି ଉଣ୍ତିଙ୍ଗ୍‌

ପ୍ରବୁଦି ବିସୟ୍‌ ତିଲାନି ଜିବନ୍‌ତି ଜଲାଏରୁ ୱାଜା ।

ନାଣ୍ତ ଲୋକୁ ଆତିଙ୍ଗାଁ ଅରେନ୍‌ ରାଜା ସନ୍‌ମାନ୍‌ ପୟ୍‌ନାନ୍‌;

ମାତର୍‌ ଲୋକୁ ଉଣା ଆତିଙ୍ଗାଁ ରାଜା ନାସ୍ଟୁ ଆନାସନାନ୍‌ ।

ଆମାକାନ୍‌ ରିସା ଆଦେଙ୍ଗ୍‌ ସୁସ୍ତି, ୱାନ୍‌ ପେରି ବୁଦିଦିକାନ୍‌;

ମାରି, ଦାପ୍ରେ ରିସାଆନିକାନ୍‌ ବୁଦିସିଲିକାନ୍‌ ।

ସାନ୍ତିଦାନ୍‌ ମାନି ମନ୍‌ ମେନ୍ଦଲତିଙ୍ଗ୍‌ ଜିବନ୍‌ ସିନାତ୍‌;

ମାରି, ରିସା ପେଡ଼େନ୍‌ତିଙ୍ଗ୍‌ ନାସ୍ଟୁ କିନାତ୍‌ ।

ଆମା ଲୋକ୍‌ ସିଲିସାତି ଲୋକା ଉଣ୍ତିଙ୍ଗ୍‌ କାସ୍ଟୁ ସିନାନ୍‌, ୱାନ୍‌ ୱାନି ମାପୁରୁଙ୍ଗୁଁ ନିନ୍ଦା କିନାନ୍‌;

ମାରି, ଆମାକାନ୍‌ ସିଲିସାତି ଲୋକାଙ୍ଗ୍‌ ଦୟା କିନାନ୍‌, ୱାନ୍‌ ୱାନିଙ୍ଗ୍‌ ଲାଡ୍‌ କିନାନ୍‌ ।

ସେଇ ଲୋକ୍‌ ନିଜେଦି ତାଗ୍‌ଇ ପାଣିଦୁ ନାସ୍ଟୁ ଆନାନ୍‌,

ମାତର୍‌ ସାନି ବେଡ଼ାଦୁ ଦାର୍ମୁ ଲୋକା ତେବାନିବାଡି ମାନାତ୍‌ ।

ଗ୍ୟାନ୍‌ ବୁଦିଦି ଲୋକା ଜିବନ୍‌ତୁ ତେବାନାତ୍‌;

ମାରି, ବୁଦିସିଲି ଲୋକା ମନ୍‌ତି ଅଡ଼୍‌ବିନିକା ଜଣାପଡ଼ାନାତ୍‌ ।

ଦାର୍ମୁ ଉଣ୍ତ୍ରି ଦେସ୍‌ତିଙ୍ଗ୍‌ ପିରିସ୍‌ କିନାତ୍‌;

ମାତର୍‌ ପାପ୍‌ ନର୍‌ ଦେସ୍‌ତିଙ୍ଗ୍‌ ଦୁଃକ୍‌ ତାନାତ୍‌ ।

ବୁଦିଦି ସାକର୍‌ତିଙ୍ଗ୍‌ ରାଜା ଦୟା କିନାନ୍‌;

ମାରି, ଆମାକାନ୍‌ ସେମାର୍‌ ତାନାନ୍‌, ୱାନି ଉଣ୍ତିଙ୍ଗ୍‌ ୱାନ୍‌ ରିସା ଆନାନ୍‌ ।

Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.