Konda Porja Bible
ନିହିମିୟା 8:10
Verse 10 is marked below, with the whole chapter around it. Read from the start
ଏଜ୍ରାଦି ନିୟମ୍ ପଡ଼ାନିକା
ମାରି, ୱିଜୁ ଲୋକୁ ଉଡ୍ରେ ମନ୍ତାନ୍ ଏରୁ ସେର୍ଲା ଆଗ୍ଡ଼ିରି ଡେଣାଦୁ ଉଣ୍ତାତାର୍; ମାରି, ପ୍ରବୁ ଇସ୍ରାଏଲତିଙ୍ଗ୍ ମୋସାଦି ଏମେ ନିୟମ୍ ବଇ ୱେର୍ତା ମାର୍ହାନ୍, ଆକା ତାନି ଉଣ୍ତିଙ୍ଗ୍ ୱାର୍ ଏଜ୍ରା ଅଜାକିନିୱାନିଙ୍ଗ୍ ଇର୍ହାର୍ । ଆବେଟ୍ ସାତ୍ ଗୋଟା ଲେଜୁଦି ପାର୍ତୁମ୍ ନାଣ୍ତିଙ୍ଗ୍, ଏଜ୍ରା ଜାଜକ ମେମାର୍ଏନ୍ ନି ଆଇମା ୱିଜେରେ ଏସ ଲୋକ୍ ୱେନ୍ଞ୍ଜି ବୁଜାଦେଙ୍ଗ୍ ଆଟ୍ନାର୍, ୱାନ୍ ୱିଜୁ କୁଟୁମ୍ ଆଗ୍ଡ଼ି ଆୟା ନିୟମ୍ ବଇ ତାତାର୍ । ଆବେଟ୍ ୱାନ୍ ଏରୁ ସେର୍ଲା ଦର୍ଦି ଆଗ୍ଡ଼ିରି ଡେଣାଦୁ, ମେମାର୍ଏନ୍ ନି ଆଇମା ୱିଜେରେ ଏସ ଲୋକ୍ ବୁଜାଦେଙ୍ଗ୍ ଆଟ୍ନାର୍, ୱାନ୍ ୱିଜେରି ଆଗ୍ଡ଼ି ସାଲ୍ଦିରାନ୍ ମାନ୍ଦ୍ଲାମ୍ ୱେଡ଼ା ସାନ୍ଧି ଆୟା ବଇଦାନ୍ ପଡ଼ାତାର୍; ମାରି, ୱିଜେରି ଲୋକା ଗିତଣିଙ୍ଗ୍ ଆୟା ନିୟମ୍ ବଇ ଉଣ୍ତିଙ୍ଗ୍ ୱେନ୍ଞ୍ଜି ମାର୍ହାର୍ ।
ମାରି, ଏଜ୍ରା ଅଜାକିନିକାନ୍ ଆୟା ପାଣି ଉଣ୍ତିଙ୍ଗ୍ ତିଆର୍ ଆତି ମାରାନ୍ ପାଟା ବାଡି ମୁସ୍କୁ ନିର୍ହାନ୍; ମାରି, ଉଣି ତରିନ୍ ୱାନି ଡାଗ୍ରୁ ମତ୍ତତିୟ, ଶେମା, ଅନାୟ, ଊରିୟ, ହିଲ୍କିୟ ନି ମାସେୟ ନିରାର୍; ମାରି, ୱାନି ଡେବିରି ତରିନ୍ ପଦାୟ, ମିସାୟେଲ, ମଲ୍କିୟ, ହଶୁମ, ହସ୍ବଦ୍ଦାନା, ଜିକରିୟ ନି ମଶୁଲ୍ଲମ୍ ନିରାର୍ ।
ଇୟାୱେନେକା ଏଜ୍ରା ୱିଜେରି ଲୋକା ଆଗ୍ଡ଼ି ଆୟା ବଇ କୁତ୍ତାନ୍; ଇରିଙ୍ଗ୍ ୱାନ୍ ୱିଜେରି ଲୋକା ମୁସ୍କୁ ନିର୍ଆ ମାର୍ହାନ୍; ମାରି ୱାନ୍ ବଇ କୁତ୍ନାନ୍, ୱିଜୁ ଲୋକୁ ନିର୍ହାର୍ । ଆବେଟ୍ ଏଜ୍ରା ପେରି ମାପୁରୁ ପ୍ରବୁଦିଙ୍ଗ୍ ଦନ୍ୟବାଦ୍ କିତାନ୍ ।
ମାରି, ୱିଜୁ ଲୋକୁ ନିଜେ ନିଜେଦି କିକୁ ପେର୍ଜି “ଆମେନ୍, ଆମେନ୍” ଇଜି ଇର୍ହାର୍; ମାରି, ୱାର୍ ନିଜେ ନିଜେଦି ତାଲେକ୍ ପାଡ଼ାକ୍ସି ପ୍ରବୁଙ୍ଗ୍ଁ ବୁମିଦୁ ମାଡ଼ିସ୍ କିତାର୍ ।
ମାରିବା, ଜେସୁୟ ନି ବାନି ନି ଶେରେବିୟ, ଯାମିନି, ଅକ୍କୁବ, ଶବ୍ବଥୟ, ହୋଦିୟ, ମାସେୟ, କଲିଟ, ଅସରିୟ, ଯୋସାବଦ୍, ହାନନ୍, ପଲାୟ ନି ଲେବିୟର୍ ଲୋକାଙ୍ଗ୍ ନିୟମ୍ ବୁଜା କିତା ସିତାର୍; ମାରି, ଲୋକୁ ନିଜେ ନିଜେଦି ବାଡିଦୁ ନିର୍ଆ ତେବାତାର୍ । ମାରି, ୱାର୍ ନେଗେନ୍ତାନ୍ ମାପୁରୁଦି ନିୟମ୍ଦି ବଇଦାନ୍ ପଡ଼ାତାର୍ ମାରି ୱାର୍ ଆବେଣି ଅର୍ତ ବୁଜାକିତା ସିତାର୍, ଆବେଟ୍ ଲୋକୁ ପଡ଼ାନିକା ବୁଜାଦେଙ୍ଗ୍ ଆଟ୍ତାର୍ ।
ମାରି, ସାସନ୍କିନିକାନ୍ ନିହିମିୟା ନି ଅଜାକିନିକାର୍ ନି ଜାଜକ ଏଜ୍ରା ନି ଲୋକା ଅଜାକିନିକାର୍ ଲେବିୟର୍ ୱିଜୁ ଲୋକାଙ୍ଗ୍ ଇର୍ହାର୍, “ନେରୁ ପ୍ରବୁ ମି ମାପୁରୁଦି ଉଦେସ୍ତାନ୍ ପବିତ୍ର ଆନାତ୍; ଦୁଃକ୍ କିମାଟ୍ କି ଆଡ଼ାବାମାଟ୍ ।” ଇରିଙ୍ଗ୍ ବଇଦି ବାକ୍ୟ ୱେନ୍ଞ୍ଜି, ୱିଜୁ ଲୋକୁ ଆଡ଼ାବାତାର୍ । ମାରି, ନିହିମିୟା ୱାରିଙ୍ଗ୍ ଇର୍ହାନ୍, “ନିଜେ ନିଜେଦି ସାରିଦୁ ସାନ୍ଡ୍ରୁ, ନେଗି କାଦି ତିନ୍ଡ୍ରୁ ମାରି ସାୱି ଜିନିସ୍ ଉଣ୍ତୁ ମାରି ଆମାୱାନି ଉଣ୍ତିଙ୍ଗ୍ ଇନିକା ତିଆର୍ ଆଏତ୍, ୱାନି ଲାକ୍ତୁ ଇନି ଜିନିସ୍ ପୋକତୁ; ଇରିଙ୍ଗ୍ ନେରୁଦି ନାଣ୍ତିଙ୍ଗ୍ ମା ପ୍ରବୁଦି ଉଦେସ୍ତାନ୍ ପବିତ୍ର ଆନାତ୍, ମିରୁ ଦୁଃକ୍ କିମାଟ୍; ଆଦେଙ୍ଗ୍ ପ୍ରବୁ ବିସୟ୍ତି ୱେଡ଼ିକା ମି ସାକ୍ତି ଆନାତ୍ ।”
ଇୟାୱାଜା ଲେବିୟର୍ ୱିଜୁ ଲୋକାଙ୍ଗ୍ ସୁପ୍ କିଜି ଇର୍ହାର୍, “ଆଲେଦୁ, ନେରୁ ପବିତ୍ର ଦିନ୍ ! ମିରୁ ଦୁଃକ୍ ଆମାଟ୍ ।” ଇୟାୱେନେକା ଲୋକୁ ନିଜେଦିୱାରି ଲାକ୍ତୁ ୱେର୍ତିମାନି ବାକ୍ୟ ୱିଜୁ ବୁଜାତାର୍ଆକା ୱାର୍ ୱିଜେରେ ଉଣ୍ତେଙ୍ଗ୍ ମାରି ଇନି ଜିନିସ୍ ପୋକ୍ତେଙ୍ଗ୍ ମାରି ନାଣ୍ତ ୱେଡ଼ିକା କିଦେଙ୍ଗ୍ ନିଜେ ନିଜେଦି ସାରିଦୁ ବୁଲାତାର୍ ।
ଆକୁଗୁଡ଼ାଦି ପଣ୍ତୟ୍
ମାରି, ମାର୍ନାଣ୍ତିଙ୍ଗ୍ ୱିଜେରି ଲୋକା ବୁବାରି କୁଟୁମ୍ତି ପେରିକାର୍, ଜାଜକର୍ ନି ଲେବିୟର୍ ବଇଦି ବାକ୍ୟ ୱାର୍ଗିଜିସାନି ଉଣ୍ତିଙ୍ଗ୍ ଅଜାକିନି ଏଜ୍ରା ଲାକ୍ତୁ ଉଣ୍ତାତାର୍ । ୱାର୍ ମୋସାଦି ମାଣାନ୍ ସିତିମାନି ପ୍ରବୁଦି ଇୟା ମାଟା ନିୟମ୍ ବଇଦୁ ରାସାତିକା ସୁଡ଼ୁତାର୍ ଜେ, ସାତ୍ ଗୋଟା ଲେଜୁଦି ପଣ୍ତୟ୍ ବେଡ଼ାଦୁ ଇସ୍ରାଏଲତି ଲୋକୁ ଆକୁଗୁଡ଼ାଦୁ ଏଣ୍ତେସ୍ ବାସା କିନାର୍; ମାରି, ୱାର୍ ନିଜେଦିୱାରି ୱିଜୁ ଗାଡ଼୍କାଙ୍ଗ୍ ମାରି ଜିରୁସାଲମତୁ ଇୟା ମାଟା ୱେର୍ନାର୍, “ମିରୁ ରାସାତିମାନି ଇସାବ୍ତାନ୍ ଆକୁଗୁଡ଼ା ତିଆର୍ କିନି ଉଣ୍ତିଙ୍ଗ୍ ଗରନ୍ତୁ ସୋଲ୍ସି ଜିତ କମା ନି ବନ୍ତି ଜିତ କମା ନି ବେତଲା କମା ନି କାଜିରି କମା ନି ନାଣ୍ତ ଆକୁମାନି ମାରାନ୍ତି କମା ତାଗାଟ୍ ।”
ଆବେଟ୍ ଲୋକୁ ଆତେରେ ସୋଲ୍ସି ଆୟାୱିଜୁ ତାସି ନିଜେଦି ଉଣ୍ତିଙ୍ଗ୍ ଆକୁଗୁଡ଼ା ତିଆର୍ କିତାର୍, ୱିଜେରେ ନିଜେ ନିଜେଦି ଇଲୁଦି ରେକାମ୍ ମୁସ୍କୁ ନି ଦୁୱାର୍ତୁ ନି ମାପୁରୁଦି ଇଲୁଦି ୱିଜୁ ଦୁୱାର୍ଆଙ୍ଗ୍ ନି ଏରୁ ସେର୍ଲାଦି ଡେଣାଦୁ ନି ଇପ୍ରୟିମ ସେର୍ଲାଦି ଡେଣାଦୁ ତିଆର୍ କିତାର୍ । ମାରି, ବାବିଲତାନ୍ ଡ଼େସି ୱାତିମାନି ଲୋକା ୱିଜୁ କୁଟୁମ୍ ଆକୁଗୁଡ଼ା ତିଆର୍ କିଜି ଆୟା ଲୋଇ ତେବାତାର୍; ନୁନଦି ମାରିନ୍ ଜେସୁୟଦି ବେଡ଼ାଦାନ୍ ଆୟା ଦିନ୍ ସାନ୍ଧି ଇସ୍ରାଏଲତି ଲୋକୁ ଆୟାୱାଜା ୱେଡ଼ିକା କିଏର୍ ମାର୍ହାର୍ । ଆଦେଙ୍ଗ୍ ନାଣ୍ତ ପେରି ୱେଡ଼ିକା ଆତାତ୍ । ମାରିବା, ଏଜ୍ରା ପାର୍ତୁମ୍ ଦିନ୍ତାନ୍ ସାରାସାରି ଦିନ୍ ସାନ୍ଧି ୱିଜୁଦିନ୍ ମାପୁରୁଦି ନିୟମ୍ଦି ବଇଦାନ୍ ପଡ଼ାତାନ୍ । ମାରି, ଲୋକୁ ସାତ୍ ଦିନ୍ ସାନ୍ଧି ପଣ୍ତୟ୍ କିତାର୍; ମାରି, ନିୟମ୍ ଇସାବ୍ତାନ୍ ଆଟ୍ ଦିନ୍ତି ନାଣ୍ତିଙ୍ଗ୍ ପେରି ସବା ଆତାତ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.