Konda Porja Bible
ନିହିମିୟା 7
ଗଡା ତିଆର୍ ଆତାତ୍, ନାନୁ ସେର୍ଲେଙ୍ଗ୍ ୱିଜୁ ବାସାକିତା, ମାରି ମନ୍ଦିର୍ କାପ୍କିନିକାର୍ ନି ପାର୍ନିକାର୍ ମାରି ଲେବିୟର୍ ମିସାତାର୍ । ଆବେଟ୍ ନାନୁ ନିଜେଦି ତଡ଼ାନ୍ ହନାନିଙ୍ଗ୍ ମାରି ପେରିମୁଣ୍ତାଦି ସାସନ୍କିନିକାନ୍ ହନାନିୟଦିଙ୍ଗ୍ ଜିରୁସାଲମ ମୁସ୍କୁ ମିସାକିତା; ଇରିଙ୍ଗ୍ ହନାନିୟ ବିସ୍ବାସ୍ତି ଲୋକ୍ ମାର୍ହାତ୍ ମାରି ୱାଦ୍ ନାଣ୍ତଲୋକା ବାଦ୍ଲୁ ମାପୁରୁଙ୍ଗୁଁ ତିଲାଜି ମାର୍ହାତ୍ । ମାରି, ନାନୁ ୱାରିଙ୍ଗ୍ ଇର୍ହା, “ୱେଡ଼ା ସୋଇ ସାନ୍ଧି ଜିରୁସାଲାମଦି ସେର୍ଲେଙ୍ଗ୍ ୱିଜୁ ରେଆମାକିଉ; ଲୋକୁ କାପ୍କିନିପାଣିଦୁ ନିନି ୱାଲେ ସେର୍ଲେଙ୍ଗ୍ ୱିଜୁ କେର୍ତୁ, ମାରି ମିରୁ ଆବେନୁ ଗାଡ଼ା କିଦୁ; ମାରି, ମିରୁ ଜିରୁସାଲମତୁ ବାସାକିନିୱାରିଙ୍ଗ୍ କାପ୍କିନିକାର୍ କିଜି ଆସ୍ କିଦୁ, ୱାର୍ ୱିଜେରେ ନିଜେ ନିଜେଦି ଏରିଆ ବାଡିଦୁ ନି ମାରି ୱିଜେରେ ନିଜେ ନିଜେଦି ଇଲୁ ଆଗ୍ଡ଼ି ତେବାପିର୍ ।”
ବାବିଲତାନ୍ ଡ଼େସିୱାତି ମାନି ଲୋକା ଦର୍କା ଦାଡ଼ି
(ଏଜ୍ରା ୨:୧-୭୦)
ଗାଡ଼୍ ଅସାର୍ ମାରି ପେରିକା ମାର୍ହାତ୍; ମାତର୍ ଆୟା ଲୋଇ ଉଣା ଲୋକୁ ମାର୍ହାର୍ ମାରି ଇଲୁକୁ ୱିଜୁ ତିଆର୍ ଆଉ ମାରେଏ । ଇୟାୱେନେକା କୁଟୁମ୍ ଇସାବ୍ତାନ୍ ଲେକିସ୍ କିଆନି ଉଣ୍ତିଙ୍ଗ୍ ନେତାରିଙ୍ଗ୍ ନି ପେରିୱାରିଙ୍ଗ୍ ନି ଲୋକାଙ୍ଗ୍ ଉଣ୍ତା କିଦେଙ୍ଗ୍ ନା ମାପୁରୁ ନା ମନ୍ତୁ ୱେର୍ତାନ୍ । ମାରି, ଏମେକାର୍ ଆଗ୍ଡ଼ି ୱାତା ମାର୍ହାର୍, ନାନୁ ୱାରି କୁଟୁମ୍ତି ବଇ ପୟ୍ତା, ଆବେନୁ ଇକା ରାସାତି ମାନିକା ସୁଡ଼ୁତା,
ଏମେକାର୍ ବାବିଲତୁ ସର୍ହାମାର୍ହାର୍, ୱାରି ଲୋଇରାନ୍ ଆଇଦେସ୍ତି ଇୟା ମାରିନ୍କୁ ୱିଜେରେ ଜିରୁସାଲମ ନି ଜିହୁଦାଦି ନିଜେ ନିଜେଦି ଗାଡ଼୍ଦୁ ଡ଼େସି ୱାତାର୍, ବାବିଲଦି ରାଜା ନବୂଖଦ୍ନିତ୍ସର ଇୟାୱାରିଙ୍ଗ୍ ଅତାମାର୍ହାନ୍; ଇୟାକାର୍ ଜିରୁବ୍ବାବିଲ୍, ଜେସୁୟ, ନିହିମିୟା, ଅସରିୟା, ରୟମା, ନହମାନି, ମର୍ଦ୍ଦକୟ, ବିଲ୍ଶନ୍, ମିସ୍ପର, ବିଗ୍ବୟ, ନହୁମ, ବାନା ୱାଲେ ଡ଼େସି ୱାତାର୍ । ଇସ୍ରାଏଲ କୁଟୁମ୍ତି ମେମାର୍ଙ୍ଗାଁ ଇସାବ୍ ଇକା, ପରିୟୋଶଦି ମାରିନ୍କୁ ଦୁଇ ଆଜାର୍ ସୋଏ ସତୁରି ରିଏର୍ । ଶପଟିୟଦି ମାରିନ୍କୁ ତିନିସ ସତୁରି ରିଏର୍ । ଆରହଦି ମାରିନ୍କୁ ସଅସ ପଚାସ୍ ରିଏର୍ । ଜେସୁୟ ନି ଯୋୟାବଦି ମାରିନ୍କା ଲୋଇରାନ୍ ପହତ୍ ମୋୟାବଦି ମାରିନ୍କୁ ଦୁଇ ଆଜାର୍ ଆଟ୍ସ ଅଟ୍ର ଲୋକୁ । ଏଲମ୍ଦି ମାରିନ୍କୁ ଏକ୍ ଆଜାର୍ ଦୁଇସ ପଚାସ୍ ନାଲ୍ଏର୍ । ସତ୍ତୁଦି ମାରିନ୍କୁ ଆଟ୍ସ ସାଲିସ୍ ପାସ୍ ଲୋକ୍ । ସକ୍କୟଦି ମାରିନ୍କୁ ସାତ୍ସ ସାଟେ ଲୋକ୍ । ବିନ୍ନୁୟିଦି ମାରିନ୍କୁ ସଅସ ସାଲିସ୍ ଆଟ୍ ଲୋକ୍ । ବେବୟଦି ମାରିନ୍କୁ ସଅସ କଡ଼େ ଆଟ୍ ଲୋକ୍ । ଅସ୍ଗଦଦି ମାରିନ୍କୁ ଦୁଇ ଆଜାର୍ ତିନିସ କଡ଼େ ରିଏର୍ ଲୋକ୍ । ଅଦୋନିକାମଦି ମାରିନ୍କୁ ସଅସ ସାଟେ ସାତ୍ ଲୋକ୍ । ବିଗ୍ବୟଦି ମାରିନ୍କୁ ଦୁଇ ଆଜାର୍ ସାଟେ ସାତ୍ ଲୋକ୍ । ଆଦିନଦି ମାରିନ୍କୁ ସଅସ ପଚାସ୍ ପାସ୍ ଲୋକ୍ । ହିଜକିୟଦି କୁଟୁମ୍ଦାନ୍ ଜନମ୍ ଆତି ଆଟେରଦି ମାରିନ୍କୁ ନବେ ଆଟ୍ ଲୋକ୍ । ହଶୁମଦି ମାରିନ୍କୁ ତିନିସ କଡ଼େ ଆଟ୍ ଲୋକ୍ । ବେତ୍ସୟଦି ମାରିନ୍କୁ ତିନିସ କଡ଼େ ନାଲ୍ଏର୍ । ହାରିପଦି ମାରିନ୍କୁ ସୋଏ ବାର ଲୋକ୍ । ଗିବିୟୋନ୍ଦି ମାରିନ୍କୁ ନବେ ପାସ୍ ଲୋକ୍ । ବେତଲିହିମ୍ ମାରି ନଟୋଫାଦି ଲୋକୁ ସୋଏ ଅସେ ଆଟ୍ ଲୋକ୍ । ଅନାଥୋତ୍ଦି ଲୋକୁ ସୋଏ କଡ଼େ ଆଟ୍ ଲୋକ୍ । ବେଥ୍ ଅସ୍ମାବତ୍ଦି ଲୋକୁ ସାଲିସ୍ ରିଏର୍ । କିରିୟତ୍ ଜିୟାରିମ୍ଦି, କପିରାଦି ମାରି ବେରୋତଦି ଲୋକୁ ସାତ୍ସ ସାଲିସ୍ ତିନି ଲୋକ୍ । ରାମା ନି ଗେବାଦି ଲୋକୁ ସଅସ କଡ଼େ ଅରେନ୍ ଲୋକ୍ । ମିକ୍ମସଦି ଲୋକୁ ସୋଏ ବାଇସି ଲୋକ୍ । ବେତେଲ୍ ନି ଅୟଦି ଲୋକୁ ସୋଏ ତେଇଶି ଲୋକ୍ । ଆଇ ନବୋଦି ଲୋକୁ ପଚାସ୍ ରିଏର୍ । ଆଇ ଏଲମ୍ଦି ମାରିନ୍କୁ ଏକ୍ ଆଜାର୍ ଦୁଇସ ପଚାସ୍ ନାଲ୍ଏର୍ । ହାରିମଦି ମାରିନ୍କୁ ତିନିସ କଡ଼େ ଲୋକ୍ । ଜିରିହୋଦି ମାରିନ୍କୁ ତିନିସ ସାଲିସ୍ ପାସ୍ ଲୋକ୍ । ଲୋଦ୍, ହାଦିଦ୍ ନି ଓନୋଦି ମାରିନ୍କୁ ସାତ୍ସ କଡ଼େ ଅରେନ୍ ଲୋକ୍ । ସନାୟାଦି ମାରିନ୍କୁ ତିନି ଆଜାର୍ ନୋଅସ ତିରିସ୍ ଲୋକ୍ । ଜାଜକରି ଇସାବ୍; ଜେସୁୟ କୁଟୁମ୍ ଯିଦୟିୟଦି ମାରିନ୍କୁ ନୋଅସ ସତୁରି ମୁଏର୍ । ଇମ୍ମେରଦି ମାରିନ୍କୁ ଏକ୍ ଆଜାର୍ ପଚାସ୍ ଦୁଇ ଲୋକ୍ । ପଶ୍ହୁରଦି ମାରିନ୍କୁ ଏକ୍ ଆଜାର୍ ଦୁଇସ ସାଲିସ୍ ସାତ୍ ଲୋକ୍ । ହାରିମଦି ମାରିନ୍କୁ ଏକ୍ ଆଜାର୍ ସତର୍ ଲୋକ୍ । ଲେବିୟରି ଇସାବ୍; ହେଦବାଦି ମାରିନ୍, ଜେସୁୟଦି ମାରିନ୍, କଦ୍ମିୟେଲଦି ମାରିନ୍କୁ ସତୁରି ନାଲ୍ଏର୍ । ପାଟାପାର୍ନିୱାରି ଇସାବ୍; ଆସପଦି ମାରିନ୍କୁ ସୋଏ ସାଲିସ୍ ଆଟ୍ ଲୋକ୍ । ସେର୍ଲାକାପ୍କିନିୱାରି ଇସାବ୍; ଶଲ୍ଲୁମ୍ଦି ମାରିନ୍, ଆଟେରଦି ମାରିନ୍, ଟଲ୍ମୋନଦି ମାରିନ୍, ଅକ୍କୁବଦି ମାରିନ୍, ହଟିଟାଦି ମାରିନ୍, ଶୋବୟଦି ମାରିନ୍କୁ ସୋଏ ତିରିସ୍ ଆଟ୍ ଲୋକ୍ । ସେବାକିନିୱାରି ଇସାବ୍; ସିହଦି ମାରିନ୍କୁ, ହସୁପାଦି ମାରିନ୍କୁ, ଟବ୍ବାୟୋତଦି ମାରିନ୍କୁ; କେରୋସଦି ମାରିନ୍କୁ, ସିୟଦି ମାରିନ୍କୁ, ପାଦୋନଦି ମାରିନ୍କୁ; ଲବାନାଦି ମାରିନ୍କୁ, ହଗାବଦି ମାରିନ୍କୁ, ଶଲ୍ମୟଦି ମାରିନ୍କୁ; ହାନନ୍ଦି ମାରିନ୍କୁ, ଗିଦ୍ଦେଲଦି ମାରିନ୍କୁ, ଗହରଦି ମାରିନ୍; ରାୟାଦି ମାରିନ୍କୁ, ରତ୍ସିନଦି ମାରିନ୍କୁ, ନକୋଦଦି ମାରିନ୍କୁ; ଗସମଦି ମାରିନ୍କୁ, ଉସଦି ମାରିନ୍କୁ, ପାସେହଦି ମାରିନ୍କୁ; ବେସୟଦି ମାରିନ୍କୁ, ମିୟୁନିମଦି ମାରିନ୍କୁ, ନଫିସିମଦି ମାରିନ୍କୁ; ବକ୍ବୁକଦି ମାରିନ୍କୁ, ହକୁଫାଦି ମାରିନ୍କୁ, ହର୍ହୁରଦି ମାରିନ୍କୁ; ବସ୍ଲୁତଦି ମାରିନ୍କୁ, ମହିଦାଦି ମାରିନ୍କୁ, ହର୍ଶାଦି ମାରିନ୍କୁ; ବର୍କୋସଦି ମାରିନ୍କୁ, ସିସରାଦି ମାରିନ୍କୁ, ତେମହଦି ମାରିନ୍କୁ; ନତ୍ସିହଦି ମାରିନ୍କୁ, ହଟିଫାଦି ମାରିନ୍କୁ । ଶଲୋମନଦି ଦାସରି ମାରିନ୍କା ଇସାବ୍; ସୋଟୟଦି ମାରିନ୍କୁ, ସୋଫେରତଦି ମାରିନ୍କୁ, ପରିଦାଦି ମାରିନ୍କୁ; ଯାଳାଦି ମାରିନ୍କୁ, ଦର୍କୋଣଦି ମାରିନ୍କୁ, ଗିଦ୍ଦେଲଦି ମାରିନ୍କୁ; ଶପଟିୟଦି ମାରିନ୍କୁ, ହଟିଲଦି ମାରିନ୍କୁ, ପୋକେରତ୍ ହତ୍ସବାୟିମଦି ମାରିନ୍କୁ, ଆମୋନ୍ଦି ମାରିନ୍କୁ ।
ୱିଜୁ ସେବାକିନିୱାରି ନି ଶଲୋମନଦି ଦାସରି ମାରିନ୍କା ଇସାବ୍ ତିନିସ ନବେ ଦୁଇ ଲୋକ୍ ।
ମାରି, ତେଲ୍ ମେଲହ, ତେଲ୍ ହର୍ଶା, କଋବ୍, ଅଦନ୍ ନି ଇମ୍ମେର, ଇୟା ୱିଜୁ ବାଡିଦାନ୍ ଲୋକୁ ୱାତିଙ୍ଗ୍; ମାତର୍ ୱାର୍ ଇସ୍ରାଏଲିୟ ଲୋକୁ ଇଜି ନିଜେ ନିଜେଦି ବୁବାରି କୁଟୁମ୍ ନି କୁଡ଼ାଦି ପାର୍ମାଣ୍ ତର୍ତେଙ୍ଗ୍ ଆଟ୍ଏତାନ୍; ଆୟା ଲୋକୁ ଇକାର୍, ଦଲୟିୟଦି ମାରିନ୍, ଟୋବିୟଦି ମାରିନ୍, ନକୋଦଦି ମାରିନ୍କୁ ସଅସ ସାଲିସ୍ ଦୁଇ ଲୋକ୍ ।
ଜାଜକରି ଲୋଇରାନ୍ ହବାୟଦି ମାରିନ୍କୁ, ହକ୍କୋସ୍ଦି ମାରିନ୍କୁ, ବର୍ସିଲ୍ଲୟଦି ମାରିନ୍କୁ, ଇୟା ବର୍ସିଲ୍ଲୟ ଗିଲିୟଦିୟ ବର୍ସିଲ୍ଲୟଦି ଅରେତ୍ ଗାଡ଼ିସିଙ୍ଗ୍ ପେଡ଼ି ଆତିମାନିଙ୍ଗ୍ ତାନି ଦରୁ ଇସାବ୍ତାନ୍ ୱେଙ୍ଗିଁତା ମାର୍ହାତ୍ । ଇୟାକାର୍ କୁଟୁମ୍ ଇସାବ୍ତାନ୍ ଲେକିସ୍କିତି ଲୋକା ଲୋଇ ନିଜେଦିୱାରି କୁଟୁମ୍ ସିଟି ପୟ୍ତାର୍, ମାତର୍ ପୟ୍ଏତାର୍; ଇୟାଉଣ୍ତିଙ୍ଗ୍ ୱାର୍ ଅଶୁଚି ଇଜି ଲେକିସ୍ କିଆୟ୍ ଆଜି ଜାଜକ ପଦ୍ତାନ୍ ପେରାତାର୍ । ମାରି, ସାସନ୍କିନିକାନ୍ ୱାରିଙ୍ଗ୍ ଇର୍ହାନ୍ ଜେ, ଋରିମ୍1 ନି ତୁମ୍ମୀମ୍ଦାରି ଜାଜକ ସୋଇ ସାନ୍ଧି ମିରୁ ଜାଜକ ବାଗ୍ତି ପବିତ୍ର କାଦି ଉଣୁଇଦେର୍ । ମାରି, ୱିଜୁ କୁଟୁମ୍ ସାଲିସ୍ ଦୁଇ ଆଜାର୍ ତିନିସ ସାଟେ ଲୋକ୍ । ଇକା ଡ଼ିସ୍ତିଙ୍ଗ୍ ୱାରି ସାକର୍ ସାକ୍ରାଣି ସାତ୍ ଆଜାର୍ ତିନିସ ତିରିସ୍ ସାତ୍ ଲୋକ୍ ମାର୍ହାର୍; ମାରିବା, ୱାରି ଦୁଇସ ସାଲିସ୍ ପାସ୍ ଲୋକ୍ ପାଟାପାରିନିକାର୍ ନି ପାର୍ନିକେଙ୍ଗ୍ ମାର୍ହେ । ୱାରି ସାତ୍ସ ତିରିସ୍ ସୋଅ ଗଡ଼େଙ୍ଗ୍; ଦୁଇସ ସାଲିସ୍ ପାସ୍ ଗୋଟା ତାଡ଼ି ଗଡ଼େଙ୍ଗ୍; ସାରସ ତିରିସ୍ ପାସ୍ ଗୋଟା ଉଟ୍କୁ; ସଅ ଆଜାର୍ ସାତ୍ସ କଡ଼େ ଗୋଟା ଗଦଙ୍ଗ୍ ମାରେଏ । ମାରି, ବୁବାରି କୁଟୁମ୍ତାନ୍ ପେରିୱାରି ଲୋଇରାନ୍ ଏନ୍ ଏନ୍ ଆୟା ପାଣି ଉଣ୍ତିଙ୍ଗ୍ ଦାନ୍ କିତାର୍ । ସାସନ୍କିନିୱାନି ଇଲୁଦୁ ଡାରିକ୍2 ଦରୁଦି ଏକ୍ ଆଜାର୍ ବାଙ୍ଗାରାମ୍ତି ଅଦୁଲି, ପଚାସ୍ ଗୋଟା କୁଣ୍ତ୍, ପାସ୍ସୋ ତିରିସ୍ ଗୋଟା ଜାଜକର୍ ଆରାନି ଆଙ୍ଗିଁଇ ସିତାନ୍ । ମାରି, ବୁବାରି କୁଟୁମ୍ତାନ୍ ଏସ ପେରି ଲୋକୁ ନିଜେଦି ଇଲୁଦାନ୍ ଡାରିକ୍ ଦରୁଦି କଡ଼େ ଆଜାର୍ ବାଙ୍ଗାରାମ୍ତି ଅଦୁଲି ମାରି ଦୁଇ ଆଜାର୍ ଦୁଇସ ଟନ୍ ୱେଣ୍ତି3 ପାଣି ଉଣ୍ତିଙ୍ଗ୍ ସିତାନ୍ । ଆଇ ଲୋକୁ ୱିଜେରେ ଡାରିକ୍ ଦରୁଦି କଡ଼େ ଆଜାର୍ ବାଙ୍ଗାରାମ୍ତି ଅଦୁଲି ନି ଦୁଇ ଆଜାର୍ ଟନ୍ ୱେଣ୍ତି ମାରି ସାଟେ ସାତ୍ ଗୋଟା ଜାଜକର୍ ଆରାନି ଆଙ୍ଗିଁଇ ସିତାର୍ ।
ଇୟାୱେନେକା ଜାଜକର୍, ଲେବିୟରି, ସେର୍ଲାକାପ୍କିନିକାର୍, ମାରି ପାଟାପାର୍ନିକାର୍, ମାରି ଏସ ଲୋକ୍ ମାରି ମନ୍ଦିର୍ତୁ ସେବାକିନିକାର୍ ମାରି ୱିଜୁ ଇସ୍ରାଏଲ ନିଜେ ନିଜେଦି ଗାଡ଼୍ତୁ ବାସା କିତାର୍ । ମାରି ସାତ୍ ଗୋଟା ଲେଜୁଦି ବେଡ଼ାଦୁ ଇସ୍ରାଏଲତି ମାରିନ୍କୁ ନିଜେଦି ଗାଡ଼୍ତୁ ମାର୍ହାର୍ ।
Source notes (3)
- Footnote ଋରିମ୍ ମାପୁରୁଦି ବଦା ନେସ୍ନି ଜାଜକର୍ ବ୍ୟବହାର୍ କିଜିମାନି ଉନ୍ଡ୍ରି ପବିତ୍ର ଜିନିସ୍
- Footnote ପୁରା ୮.୫ କେଜି
- Footnote ପୁରା ୧,୨୦୦ କେଜି
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.