Konda Porja Bible
ନିହିମିୟା 11
ଜିରୁସାଲମତୁ ନେତାର୍
ମାରି, ଲୋକା ଅଦିପତିର୍ ଜିରୁସାଲମତୁ ବାସା କିତାର୍; ବା ତେବାତି ଲୋକୁ ପବିତ୍ର ଗାଡ଼୍ ଜିରୁସାଲମତୁ ବାସା କିନି ଉଣ୍ତିଙ୍ଗ୍ ଦାସ୍ ଲୋକା ଲୋଇରାନ୍ ଅରେନ୍ ୱାନିଙ୍ଗ୍ ଆୟା ବାଡିଦୁ ତାନି ଉଣ୍ତିଙ୍ଗ୍ ମାରି ଆଇ ନୋ ଲୋକାଙ୍ଗ୍ ଆଇଆଇ ଗାଡ଼୍କାଙ୍ଗ୍ ବାସା କିନି ଉଣ୍ତିଙ୍ଗ୍ କୁଡ଼ୁକୁଡ଼ି କିତାର୍ । ମାରି, ଏମେକାର୍ ଜିରୁସାଲମତୁ ବାସା କିଦେଙ୍ଗ୍ ନିଜେଦି ବଦାଦାନ୍ ନିଜେଦିୱାରିଙ୍ଗ୍ ସପ୍ରେ କିତାର୍, ଲୋକୁ ୱାରି ଦନ୍ୟବାଦ୍ କିତାର୍ । ଦେସ୍ତୁ ଇୟା ପେରିଲୋକାଙ୍ଗ୍ ଜିରୁସାଲମତୁ ବାସା କିତାର୍; ମାତର୍ ଜିହୁଦାଦି ଆଇଆଇ ଗାଡ଼୍କାଙ୍ଗ୍ ଲୋକୁ, ଇସ୍ରାଏଲ, ଜାଜକର୍ ନି ଲେବିୟର୍ ନି ନଥିନିୟର୍ ନି ଶଲୋମନଦି ଦାସ୍କା ମାରିନ୍କୁ ୱିଜେରେ ନିଜେ ନିଜେଦି ଅଦିକାର୍ତାନ୍ ନିଜେ ନିଜେଦି ଗାଡ଼୍ତୁ ବାସା କିତାର୍ । ମାରି, ଜିହୁଦାଦି ମାରିନ୍କା ମାଣାନ୍ ନି ବିନ୍ୟାମିନ୍ଦି ମାରିନ୍କା ମାଣାନ୍ ଏସ ଲୋକ୍ ଜିରୁସାଲମତୁ ବାସା କିତାର୍ । ଜିହୁଦାଦି ମାରିନ୍କା ଲୋଇରାନ୍ ଉସିୟଦି ମାରିନ୍ ଅତାୟ, ଆୟା ଉସିୟ ଜିକରିୟଦି ମାରିନ୍, ଜିକରିୟ ଅମରିୟଦି ମାରିନ୍, ଅମରିୟ ଶପଟିୟଦି ମାରିନ୍, ଶପଟିୟ ମହଲଲେଲଦି ମାରିନ୍, ମହଲଲେଲ ପେରସ ମାରିନ୍କା ଲୋଇରାନ୍ ଅରେନ୍; ମାରି, ବାରୁକ୍ଦି ମାରିନ୍ ମାସେୟ, ଆୟା ବାରୁକ୍ କଲ୍ହୋସିଦି ମାରିନ୍, କଲ୍ହୋସି ହସାୟଦି ମାରିନ୍, ହସାୟ ଅଦାୟାଦି ମାରିନ୍, ଅଦାୟା ଯୋୟାରିବ୍ଦି ମାରିନ୍, ଯୋୟାରିବ୍ ଜିକରିୟଦି ମାରିନ୍, ଜିକରିୟ ଶିଲୋନିଦି ମାରିନ୍ ।
ପେରସଦି ମାରିନ୍କୁ ୱିଜେରେ ସାରିସ ସାଟେ ଆଟ୍ ଲୋକ୍ ମେମାର୍ଙ୍ଗୁଁ ଜିରୁସାଲମତୁ ବାସା କିତାର୍ ।
ବିନ୍ୟାମିନ୍ତି କୁଟୁମ୍
ବିନ୍ୟାମିନ୍ଦି ମାରିନ୍କୁ, ମଶୁଲ୍ଲମ୍ଦି ମାରିନ୍ ସଲ୍ଲୁ, ଆୟା ମଶୁଲ୍ଲମ୍ ଯୋୟେଦ୍ଦି ମାରିନ୍, ଯୋୟେଦ୍ ପଦାୟଦି ମାରିନ୍, ପଦାୟ କୋଲାୟାଦି ମାରିନ୍, କୋଲାୟା ମାସେୟଦି ମାରିନ୍, ମାସେୟ ଇତିୟେଲଦି ମାରିନ୍, ଇତିୟେଲ ଯିଶାୟାହଦି ମାରିନ୍ । ମାରି, ଆକା ଡ଼ିସ୍ତିଙ୍ଗ୍ ଗବ୍ବୟ, ସଲ୍ଲୟ ୱିଜେରେ ନୋଅସ୍ କଡ଼େ ଆଟ୍ ଲୋକ୍ । ମାରି, ସିଖ୍ରଦି ମାରିନ୍ ଯୋୟେଲ ୱାରି ପେରିକାନ୍ ମାର୍ହାନ୍ ମାରି ହସନୁୟେଦି ମାରିନ୍ ଜିହୁଦା ଗାଡ଼୍ତି ମାରିଅରେନ୍ ପେରିକାନ୍ ମାର୍ହାନ୍ ।
ଜାଜକରି କୁଟୁମ୍
ଜାଜକରି ମାଣାନ୍, ଯୋୟାରିବ୍ଦି ମାରିନ୍ ଯିଦୟିୟ, ଯାଖିନ୍, ହିଲ୍କିୟଦି ମାରିନ୍ ସରାୟ, ଆୟା ହିଲ୍କିୟ ମଶୁଲ୍ଲମଦି ମାରିନ୍, ମଶୁଲ୍ଲମ୍ ସାଦୋକଦି ମାରିନ୍, ସାଦୋକ ମରାୟୋତଦି ମାରିନ୍, ମରାୟୋତ୍ ଅହିଟୁବଦି ମାରିନ୍ ଅହିଟୁବ ମାପୁରୁଦି ଇଲୁଦି ନେତା ମାର୍ହାନ୍ । ଇଲୁଦୁ ପାଣିକିନି ୱାରି ତଡ଼ାନ୍କୁ ଆଟ୍ସ କଡ଼େ ରିଏର୍ ଲୋକ୍ ମାର୍ହାନ୍; ମାରି, ଯିରୋହମ୍ଦି ମାରିନ୍ ଅଦାୟା, ଆୟା ଯିରୋହମ୍ ପଲଲିୟଦି ମାରିନ୍, ପଲଲିୟ ଅମ୍ସିଦି ମାରିନ୍, ଅମ୍ସି ଜିକରିୟଦି ମାରିନ୍, ଜିକରିୟ ପଶ୍ହୁରଦି ମାରିନ୍, ପଶ୍ହୁର ମଲ୍କିୟଦି ମାରିନ୍, ମାରି, ଅଦାୟାଦି ତଡ଼ାନ୍କୁ ଦୁଇସ ସାଲିସ୍ ରିଏର୍ ଡକ୍ରାଦାଦାରି କୁଟୁମ୍ତୁ ପେରିକାନ୍ ମାର୍ହାନ୍; ଅସରେଲ୍ଦି ମାରିନ୍ ଅମସୟ, ଆୟା ଅସରେଲ୍ ଅହସୟଦି ମାରିନ୍, ଅହସୟ ମଶିଲ୍ଲେମୋତ୍ଦି ମାରିନ୍, ମଶିଲ୍ଲେମୋତ୍ ଇମ୍ମେରଦି ମାରିନ୍, ମାରି, ୱାରି ତଡ଼ାନ୍କୁ ସହେ କଡ଼େ ଆଟ୍ ଲୋକ୍ ପେରିଡାଟ୍ତି ମେମାରି ମାର୍ହାନ୍ ମାରି ହଗ୍ଦୋଲିମ୍ଦି ମାରିନ୍ ସବ୍ଦିୟେଲ ୱାରି ନେତା ମାର୍ହାନ୍ ।
ଲେବିୟରି କୁଟୁମ୍
ଲେବିୟରି ମାଣାନ୍, ହଶୁବ୍ଦି ମାରିନ୍ ସମୟିୟ, ଆୟା ହଶୁବ୍ ଅସ୍ରିକାମଦି ମାରିନ୍, ଅସ୍ରିକାମ ହଶବିୟଦି ମାରିନ୍, ହଶବିୟ ବୁନ୍ନିଦି ମାରିନ୍; ମାରିବା, ଲେବିୟ ପେରିୱାରି ମାଣାନ୍ ଶବ୍ବଥୟ ନି ଯୋସାବଦ୍ ମାପୁରୁଦି ଇଲୁଦୁ ଆତ୍ରେରି ପାଣିଦି ନେତା ମାର୍ହାନ୍; ମାରି, ଆସପଦି କୁଟୁମ୍ତୁ ଜନମ୍ଆତି ସବ୍ଦିଦି ନାତି ମିକାଦି ମାରିନ୍ ମତ୍ତନିୟ ପାର୍ତନା କିନିମାନୁ ଦନ୍ୟବାଦ୍ ଆରାମ୍ କିଦେଙ୍ଗ୍ ପେରିକାନ୍ ମାର୍ହାନ୍ ମାରି ୱାନି ତଡ଼ାନ୍କା ଲୋଇରାନ୍ ବକ୍ବୁକିୟ ମାରିଅରେନ୍ ମାର୍ହାନ୍; ମାରି, ଯିଦୁଥୁନ କୁଟୁମ୍ତୁ ଜନମ୍ଆତି ଗାଲଲ୍ଦି ନାତି ଶମ୍ମୁୟଦି ମାରିନ୍ ଅବ୍ଦ ।
ପବିତ୍ର ଗାଡ଼୍ତି ଲେବିୟର୍ ୱିଜେରେ ଦୁଇସ ଅସେ ନାଲ୍ଏର୍ ଲୋକ୍ ମାର୍ହାର୍ ।
ମନ୍ଦିର୍ତୁ କାପ୍କିନିକାର୍
ମାରିବା, ମନ୍ଦିର୍ତୁ କାପ୍କିନିକାର୍ ଅକ୍କୁବ, ଟଲ୍ମୋନ ମାରି ଗାଡ଼୍ତି ଗେଟ୍ ଆଗ୍ଡ଼ି କାପ୍କିନିପାଣିକିନିକାର୍ ୱାରି ତଡ଼ାନ୍କୁ ସହେ ସତୁରି ରିଏର୍ ମାର୍ହାର୍ ।
ମାରି, ଇସ୍ରାଏଲଦି, ଜାଜକରି, ଲେବିୟରି ତେବାତି ଲୋକୁ ଜିହୁଦାଦି ୱିଜୁ ଗାଡ଼୍କାଙ୍ଗ୍ ୱିଜେରେ ନିଜେ ନିଜେଦି ଜାଗାଦୁ ତେବାତାର୍ । ମାପୁରୁଦି ପାର୍ତନା ଇଲୁଦୁ ସେବା କିଜିମାନି ଲୋକୁ ଜିରୁସାଲାମ୍ତି ଓପଲଦୁ ବାସା କିତାର୍; ମାରି, ସିହ ନି ଗିଷ୍ପ ସେବାକିନିୱାରି ପେରିକାନ୍ ମାର୍ହାନ୍ ।
ଆସପ କୁଟୁମ୍ତି ପାଟାପାର୍ନିୱାରି ଲୋଇରାନ୍ ମିକାଦି ଡକ୍ରା ନାତି, ମତ୍ତନିୟଦି ନାତି, ହଶବିୟଦି ନାତି, ବାନିଦି ମାରିନ୍ ଉସି ଜିରୁସାଲମତୁ ଲେବିୟରି ପେରିକାନ୍ ମାର୍ହାନ୍, ୱାନ୍ ବା ମାପୁରୁଦି ପାର୍ତନା ଇଲୁ ପାଣିଦୁ ଜାତୁନ୍ ଅତାନ୍ । ଇରିଙ୍ଗ୍ ୱାରି ବିସୟ୍ତାନ୍ ରାଜାଦି ମାଟା ମାର୍ହାତ୍ ମାରି ଦିନାମିଦି ଦର୍କାର୍ ଇସାବ୍ତାନ୍ ପାଟାପାର୍ନିୱାରିଙ୍ଗ୍ ଉନ୍ଡ୍ରି ବାଗ୍ ସିଆୟ୍ଆତାତ୍ ।
ମାରି, ଜିହୁଦାଦି ମାରିନ୍ ସେରହଦି କୁଟୁମ୍ତୁ ଜନମ୍ଆତି ମଶେସବେଲ୍ଦି ମାରିନ୍ ପଥାହିୟ ଲୋକା ୱିଜୁ ପାଣି ବିସୟ୍ତାନ୍ ରାଜାଦି ଲାକ୍ତୁ ମାର୍ହାତ୍ ।
ଆଇ ନାର୍କୁ ନି ଗାଡ଼୍କାଙ୍ଗ୍ମାନିକାର୍
ମାରି, ଜିହୁଦାଦି ମାରିନ୍କା ଲୋଇରାନ୍ ଏସ ଆଇଆଇ ନାର୍କୁ ନି ଆବେଣି କିଡ଼ିଇଦୁ, ମାରି, କିରିୟତ ଅର୍ବ ମାରି ଆବେଣି ଇସ୍ରି ଗାଡ଼୍ତୁ, ଦିବୋନ୍ ନି ଆବେଣି ଇସ୍ରି ନାର୍ତୁ, ଯିକବ୍ସେଲ୍ ନି ଆବେଣି ନାଟ; ମାରି ଜେସୁୟଦୁ, ମୋଲାଦାଦୁ ମାରି ବେଥ୍ ପେଲଟଦୁ; ମାରି ହତ୍ସର-ଶୁୟାଲ୍ଦୁ, ବେର୍ସେବା ନି ଆବେଣି ଇସ୍ରି ନାର୍ତୁ; ମାରି ସିକ୍ଲଗ୍ଦୁ, ମକୋନା ନି ଆବେଣି ଇସ୍ରି ନାର୍ତୁ; ମାରି ଐନ୍ ରିମ୍ମୋଣଦୁ, ସରାୟଦୁ ନି ଜର୍ମୁତଦୁ; ସାନୋହ, ଅଦୁଲ୍ଲମ ନି ଆବେଣି ନାଟ, ଲାଖିଶ୍ ନି ଆବେଣି କିଡ଼ିଇଦୁ, ଅସେକା ନି ଆବେଣି ଇସ୍ରି ନାର୍ତୁ ବାସା କିତାର୍ । ଇୟାୱାଜା ୱାର୍ ବେର୍ସେବାଦାନ୍ ହିନ୍ନୋମ ବାଟା ସାନ୍ଧି ଗୁଡ଼େଙ୍ଗ୍ କିତାର୍ । ବିନ୍ୟାମିନ୍ ମାରିନ୍କୁ ବା ଗେବାଦାନ୍ ଆଗ୍ଡ଼ି, ମିକ୍ମସ ନି ଅୟାଦୁ, ବେତେଲ୍ ନି ଆବେଣି ଇସ୍ରି ନାର୍ତୁ; ଅନାଥୋତ୍, ନୋବ ନି ଅନନିୟାଦୁ; ହାସୋର, ରାମା, ଗିତୟିମଦୁ; ହାଦିଦ୍, ସବୋୟିମ, ନବଲ୍ଲାଟଦୁ; ଲୋଦ୍ ନି ଓନୋ, କାଲୁ ନି ମାରାକ୍ ପାଣିକିନିକାର୍ ବାଟାଦୁ ବାସା କିତାର୍ । ମାରି, ଜିହୁଦା ମିସାବିଡ଼ାନି ଆଇଆଇ ପାଲି ଇସାବ୍ତାନ୍ ଏସ ଲେବିୟ ଲୋକ୍ ବିନ୍ୟାମିନ୍ ୱାଲେ ମିସାତାର୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.