Konda Porja Bible
ନିହିମିୟା 10
ଟାପ୍ ଡାକ୍ତି ନିୟମ୍ଦି ସାକି
ଟାପ୍ ଡାକ୍ତିମାନିୱାରି ଦର୍କୁ ଇୟାକେଙ୍ଗ୍, ହକଲିୟଦି ମାରିନ୍ ନିହିମିୟା ସାସନ୍ କିନିକାନ୍ ମାରି ସିଦିକିୟ; ସରାୟ, ଅସରିୟ, ଜିରିମିୟ; ପଶ୍ହୁର, ଅମରିୟ, ମଲ୍କିୟ; ହଟୁଶ୍, ଶବନିୟ, ମଲ୍ଲୁକ; ହାରିମ, ମରେମୋତ୍, ଓବଦିୟ; ଦାନିୟେଲ, ଗିନ୍ନତନ, ବାରୁକ୍; ମଶୁଲ୍ଲମ୍, ଅବିୟ, ମିୟାମିନ୍ । ମାସିୟ, ବିଲ୍ଗୟ, ଶମୟିୟ; ଇୟାକାର୍ ଜାଜକ ମାର୍ହାର୍ । ମାରି, ଲେବିୟର୍, ଅସନିୟଦି ମାରିନ୍ ଜେସୁୟ; ହେନାଦଦ୍ଦି ମାରିନ୍କା ଲୋଇରାନ୍ ବିନ୍ନୁୟି ମାରି କଦ୍ମିୟେଲ । ମାରି, ୱାରି ତଡ଼ାନ୍କୁ, ଶବନିୟ, ହୋଦିୟ, କଲିଟ, ପଲାୟ, ହାନନ୍; ମିକା, ରହୋବ, ହଶବିୟ; ସକ୍କୁର, ଶେରେବିୟ, ଶବନିୟ; ହୋଦିୟ, ବାନି, ବନିନୁ । ଲୋକାରି ପେରିକାର୍ ପରିୟୋଶ, ପହତ୍ ମୋୟାବ, ଏଲମ୍; ସତ୍ତୁ, ବାନି; ବୁନ୍ନି, ଅସ୍ଗଦ, ବେବୟ; ଅଦୋନିୟ, ବିଗ୍ବୟ, ଆଦିନ, ଆଟେର, ହିଜକିୟ, ଅସ୍ସୁର, ହୋଦିୟ, ହଶୁମ, ବେତ୍ସୟ, ହାରିପ, ଅନାଥୋତ୍, ନୋବୟ, ମଗ୍ପିୟସ୍, ମଶୁଲ୍ଲମ୍, ହେସିର; ମଶେସବେଲ୍, ସାଦୋକ, ଜଦ୍ଦୁୟ, ପ୍ଲଟିୟ, ହାନନ୍, ଅନାୟ, ହୋସେୟ, ହନାନିୟ, ହଶୁବ୍, ହଲୋହେଶ, ପିଲହ, ଶୋବେକ, ରହୁମ୍, ହଶବ୍ନା, ମାସେୟ, ମାରି, ଅହିୟ, ହାନନ୍, ଅନାନ୍; ମଲ୍ଲୁକ, ହାରିମ, ବାନା ।
ରାଜିମାନାଦି ଦାଇତ୍
ମାରି, ଲୋକାରି ତେବାତିମାନି, ଜାଜକର୍, ଲେବିୟର୍, ସେର୍ଲାକାପ୍କିନିକାର୍, ପାଟାପାର୍ନିକାର୍, ମନ୍ଦିର୍ ସେବାକିନିକାର୍ ମାରି ଆୟାୱିଜୁ ଲୋକୁ ଆଇଆଇ ଦେସ୍ତି କୁଟୁମ୍ଦିମାଣାନ୍ ନିଜେଦିୱାରିଙ୍ଗ୍ ୱେର୍ଏ କିଜି ମାପୁରୁଦି ନିୟମ୍ଦି ତରିନ୍ ଆତାମାର୍ହା, ୱାର୍, ୱାରି ଆଡ଼ିସିକ୍, ୱାରି ମାରିନ୍କୁ ନି ୱାରି ଗାଡ଼ିସିକ୍, ୱିଜେରେ ଜ୍ଞାନ୍ମାନ୍ ନି ବୁଦିଦି ଲୋକ୍; ୱାର୍ ନିଜେଦିୱାରି ତଡ଼ାନ୍କୁ, ନିଜେଦିୱାରି ସନ୍ମାନ୍ ପୋଇନିୱାରି ଉଣ୍ତିଙ୍ଗ୍ ଆସା ଆଜି ମାପୁରୁଦି ଦାସ୍ ମୋସାଦି ମାଣାନ୍ ସିଜି ମାପୁରୁଦି ନିୟମ୍ ଇସାବ୍ତାନ୍ ବୁଲାନି ଉଣ୍ତିଙ୍ଗ୍ ମାରି ମା ପ୍ରବୁଦି ୱିଜୁ ମାଟା ନି ସାସନ୍ ନି ବିଦି ମନ୍ଦିୟାନ୍ତାନ୍ ମାନାନି ଉଣ୍ତିଙ୍ଗ୍ ପାର୍ମାଣ୍ ନି ମାଟା ସିତାର୍;
ମାରିବା ଇର୍ହାନ୍, “ମାପୁ ଆଇ ଦେସ୍ତି ଲୋକାଙ୍ଗ୍ ନିଜେଦି ଗାଡ଼ିସିକାଙ୍ଗ୍ ସିଏପ୍, ମାରିବା ନିଜେଦି ମାରିନ୍କା ଉଣ୍ତିଙ୍ଗ୍ ୱାରି ଗାଡ଼ିସିକାଙ୍ଗ୍ ତାତେଙ୍ଗ୍ କେଏପ୍”
ମାରି, ଦେସ୍ତି ଲୋକୁ ରମ୍ନିନାଣ୍ତିଙ୍ଗ୍ ଇନି ଜିନିସ୍ ନି ଉଣିକାଦି ପର୍ଦେଙ୍ଗ୍ ତାତାର୍, ମାପୁ ରମ୍ନିନାଣ୍ତିଙ୍ଗ୍ କି ଆଇ ଇନି ପବିତ୍ର ଦିନ୍ତୁ ୱାରିମାଣାନ୍ ଆକା କଡ଼ଏପ୍; ମାରି, ୱିଜୁ ସାତ୍ ବାର୍ସେକ୍ତୁ ଚାସ୍ ପାଣି କିଏପ୍ ୱିଜୁ ରକମ୍ତି ୱାଡି ଲସ୍ନିକା ଡ଼ିସ୍ନା ସିନାପ୍ ।
ମାରିବା, ମାପୁ ନିଜେଦିୱାରି ମାପୁରୁଦି ସେବାପାଣି ଉଣ୍ତିଙ୍ଗ୍,
ମାପୁରୁଦିଙ୍ଗ୍ ସିତିମାନି ରୁଟିଦି ମାରି ଦିନ୍କେରି ତିନି-ପୁଜାଦି ନି ଦିନ୍କେରି ହମ୍ ଆଡ଼ିକ୍ନିକା, ରମ୍ନିଦିନ୍ତି, ଆମାସ୍ତି ତିଆର୍ଆତି ପଣ୍ତ୍ୟତି ନି ପବିତ୍ର ଜିନିସ୍ତି ମାରି ଇସ୍ରାଏଲତି ପୁରାଆତି ପାପ୍କେମାଦି ନି ମା ମାପୁରୁଦି ଇଲୁଦି ୱିଜୁ ପାଣି ଉଣ୍ତିଙ୍ଗ୍ ୱିଜୁ ବାର୍ସେକ୍ ଉନ୍ଡ୍ରି ଉନ୍ଡ୍ରି ଶେକଲଦି ତିନିବାଗ୍ ଦାନ୍ କିନି ବଜୁ ନିଜେଦିୱାରି ମୁସ୍କୁ ଅନି ନିୟମ୍ କିତାପ୍ ।
ମାରି, ନିୟମ୍ଦି ରାସ୍ତି ଇସାବ୍ତାନ୍ ପ୍ରବୁ ମା ମାପୁରୁଦି ବେଦି ମୁସ୍କୁ ସିସୁ କାସିସ୍କିନି ଉଣ୍ତିଙ୍ଗ୍ ମା ପୁର୍ବେଦିଡକ୍ରାଦାଦାରି କୁଟୁମ୍ ଇସାବ୍ତାନ୍ ବାର୍ସେକ୍ତିଙ୍ଗ୍ ବାର୍ସେକ୍ ସାମାନ୍ ବେଡ଼ାଦୁ ମା ମାପୁରୁଦି ଇଲୁଦିଙ୍ଗ୍ ୱେର୍କୁ ତାନି ଉଣ୍ତିଙ୍ଗ୍ ମାପୁ, ମାରି ଜାଜକର୍, ଲେବିୟର୍ ନି ଲୋକୁ ୱେର୍କୁ ଦାନ୍ ବିସୟ୍ତାନ୍ କୁଡ଼ୁକୁଡ଼ି ପକ୍ତାପ୍ ।
ମାରିବା, ମା ବୁମିଦୁ ଆଗ୍ଡ଼ିଆତି ପାସି ନି ୱିଜୁରକମ୍ତି ମାରାନ୍ତୁ ଆସ୍ତି ପଲ୍ ବାର୍ସେକ୍ତିଙ୍ଗ୍ ବାର୍ସେକ୍ ପ୍ରବୁଦି ପାର୍ତନା ଇଲୁଦୁ ତାନି ଉଣ୍ତିଙ୍ଗ୍,
ମାରିବା ନିୟମ୍ଦି ରାସ୍ତି ଇସାବ୍ତାନ୍ ମା ମାରିନ୍କାଙ୍ଗ୍ ମାରି ଜାତୁଦି ଆଗ୍ଡ଼ି ଜନମ୍ ଆତିକା ମାରି ମା କଡିଙ୍ଗ୍ ମାନ୍ଧା ନି ମେଣ୍ତେଙ୍ଗ୍ ମାନ୍ଧାଦି ଆଗ୍ଡ଼ି ଜନମ୍ଆତିୱାନିକାଙ୍ଗ୍ ମା ମାପୁରୁଦି ପାର୍ତନା ଇଲୁଦୁ, ମା ମାପୁରୁଦି ଇଲୁଦୁ ସେବାକିନିୱାରି ଜାଜକରି ଲାକ୍ତୁ ତାନି ଉଣ୍ତିଙ୍ଗ୍,
ମାରି, ମା ପିଡ଼ିସ୍ତି ଜନା ଗୁଣ୍ତାଦି ଏକ୍ବାଗ୍ ନି ମା ସିତିମାନି ଦାନ୍ ମାରି ୱିଜୁରକମ୍ତି ମାରାକାଣି ପଲ୍, ଅଙ୍ଗୁର୍ରସ୍ ନି ନିୟୁ ଜାଜକରି ଲାକ୍ତୁ ମା ମାପୁରୁଦି ପାର୍ତନା ଇଲୁଦି ବାକ୍ରାଦୁ ତାନି ଉଣ୍ତିଙ୍ଗ୍, ମାରି ବୁମିଦୁ ପାଣ୍ତିତି ଜିନିସ୍ତି ଦାସ୍ବାଗ୍ ଲେବିୟରି ଲାକ୍ତୁ ତାନି ଉଣ୍ତିଙ୍ଗ୍ ତିର୍ କିତାପ୍; ଇରିଙ୍ଗ୍ ଆୟା ଲେବିୟର୍ ମା ୱିଜୁ ଚାସ୍ପାଣିକିନି ନାର୍କାଙ୍ଗ୍ ଦାସ୍ବାଗ୍ତାନ୍ ଉନ୍ଡ୍ରେ ବାଗ୍ ଲସ୍ନାର୍ । ମାତର୍ ଲେବିୟର୍ ଦାସ୍ବାଗ୍ତାନ୍ ଉନ୍ଡ୍ରେ ବାଗ୍ ଲସ୍ନି ବେଡ଼ାଦୁ ହାରୋଣଦି ମାରିନ୍ ଜାଜକ ଲେବିୟରି ୱାଲେ ତେବାନାନ୍; ମାରି, ଲେବିୟର୍ ମାପୁରୁଦି ଇଲୁଦି କାଦି ଇଡ୍ନି ବାକ୍ରାଦୁ ଦାସ୍ବାଗ୍ତାନ୍ ଉନ୍ଡ୍ରି ବାଗ୍ ତାନାର୍ । ଇରିଙ୍ଗ୍ ପବିତ୍ର ବାଡିଦି ଡୁବାଇଙ୍ଗୁଁ ୱିଜୁ ମାରି ସାଲାକିନି ଜାଜକର୍, ମାରି ସେର୍ଲାକାପ୍କିନିକାର୍ ନି ପାଟାପାର୍ନିକାର୍ ଆମାୱିଜୁ ବାକ୍ରାଦୁ ତେବାନାର୍, ଆବେନୁ ଇସ୍ରାଏଲ ଲୋକୁ ନି ଲେବିୟ ଲୋକୁ ପାସିଦି, ଅଙ୍ଗୁର୍ରସ୍ ନି ନିୟୁ ଇନାମ୍ ତାନାର୍; ମାରି, ମାପୁ ନିଜେଦିୱାରି ମାପୁରୁଦି ଇଲୁ ଡ଼ିସ୍ଏପ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.