Konda Porja Bible
ଜିସାଇୟ 37
ହିଜକିୟଙ୍ଗ୍ ଜିସାଇୟଦି ଅଜାକିନିକା
ତାନିୱେନେକା ହିଜକିୟ ରାଜା ଆକା ୱେନ୍ଜି, ନିଜେଦି ଆଙ୍ଗିଁ କିସ୍ସି ମାରି ବାସ୍ତା ଆରାଜି ସଦାପ୍ରବୁଦି ଇଲୁଦୁ ସର୍ହାନ୍ । ମାରି, ୱାନ୍ ରାଜାଇଣ୍ଡ୍ରଣି ଇଲିୟାକିମ୍ଦି, ସିବ୍ନ ରାସ୍ନିୱାନିଙ୍ଗ୍ ମାରି ଜାଜକରି ପେରି ପେରିଲୋକାଙ୍ଗ୍ ବାସ୍ତା ଆରିସ୍କିଜି ଆମସଦିଙ୍ଗ୍ ମାରିନ୍ ଜିସାଇୟ ବବିସତ୍ବକ୍ତାଦି ଲାକ୍ତୁ ପୋକ୍ତାନ୍ । ଆବେନୁ ୱାର୍ ୱାନିଙ୍ଗ୍ ଇର୍ହାର୍, “ହିଜକିୟ ଇୟାୱାଜା ଇର୍ହାମାନାନ୍, ନେରିଇ ନାଣ୍ତିଙ୍ଗ୍ କାସ୍ଟୁ, ନିନ୍ଦା ମାରି ସେମାର୍ତି ଦିନ୍; ଇରିଙ୍ଗ୍ କଡ଼ର୍ ଜନମ୍ ଆନିକା ମାନାତ୍, ମାତର୍ ଜନମ୍ କିଦେଙ୍ଗ୍ ବପୁ ସିଲେତ୍ । ଆନାତ୍ବା, ଜିବନ୍ତି ମାପୁରୁଦିଙ୍ଗ୍ ନିନ୍ଦା କିନି ଉଣ୍ତିଙ୍ଗ୍ ନିଜେଦି ମାପୁରୁ ଅସୁରିୟ ରାଜାଦି ମାଣାନ୍ ୱାତି ରବ୍ସାକିଦି ୱିଜୁ ମାଟା ସଦାପ୍ରବୁ ମି ମାପୁରୁ ୱେନାନ୍, ମାରି ସଦାପ୍ରବୁ ମି ମାପୁରୁ ଆମା ମାଟା ୱେର୍ହାମାନାନ୍, ଆୟା ଉଣ୍ତିଙ୍ଗ୍ କେମା କିନାନ୍; ଇୟାଉଣ୍ଡିଙ୍ଗ୍ ଆମା ଏଜିତା ମାନାର୍, ୱାରି ଉଣ୍ତିଙ୍ଗ୍ ମିର୍ ପାର୍ତନା କିଦୁ ।”
ଇୟାୱାଜା ହିଜକିୟ ରାଜାଦି ଦାସଙ୍ଗ୍ ଜିସାଇୟଦି ଲାକ୍ତୁ ୱାତାର୍ । ଆବେନୁ ଜିସାଇୟ ୱାରିଙ୍ଗ୍ ଇର୍ହାନ୍, “ମିର୍ ନିଜେଦି ସାଉକାର୍ତିଙ୍ଗ୍ ଇୟାୱାଜା ଇନିଦେର୍, ପ୍ରବୁ ଇଜିନାନ୍, ଅସୁରିୟ ରାଜାଦି ଦାସଙ୍ଗ୍ ମାଙ୍ଗିଁ ନିନ୍ଦା କିତିଙ୍ଗ୍ ଆମା ମାଟା ମିର୍ ୱେରିଇମାନିଦେର୍, ଆବେନୁ ତିଲାମାଟ୍ । ସୁଡ଼ୁଦୁ, ମାପ୍ ଆବେନୁ ଉନ୍ଡ୍ରି ଆତ୍ମା ସିନାପ୍, ମାରି ୱାଦ୍ ଏମେବା ଆଉଲି ୱେନ୍ଜି ନିଜେଦି ଦେସ୍ତୁ ଡ଼େସିସୋନାତ୍; ମାରି, ମାପ୍ ଦାନି ନିଜେ ଦେସ୍ତୁ କାଣ୍ତାଦାନ୍ ୱାନିଙ୍ଗ୍ କାତ୍ନାନ୍ ।”
ଅସୁରିୟରି ଆଦ୍ରିସ୍ କିନିକା
(୨ ରାଜା ୧୯:୮-୧୯)
ଇୟାୱେନ୍କା ଅସୁରିୟ ରାଜା ଲାକିସ୍ଦାନ୍ ପୋକ୍ତା ମାନାନ୍ ଇଜି ରବ୍ସାକି ୱେନ୍ଜି ଡ଼େସି ସୋରାନ୍ ମାରି ୱାନିଙ୍ଗ୍ ଲିବ୍ନା ବିରୁଦ୍ଧତାନ୍ ଜୁଦ୍ କିଜିମାରିକା ସୁଡ଼ୁତାନ୍ । ମାରି, ଅସୁରିୟ ରାଜା କୁସ ଦେସ୍ତି ତିର୍ହକ ରାଜା ବିସୟ୍ତାନ୍ ଇୟା ମାଟା ୱେରାନ୍ ଜେ, ୱାନ୍ ନି ବିରୁଦ୍ତାନ୍ ଜୁଦ୍ କିଦେଙ୍ଗ୍ ୱାତାମାନାନ୍; ଇକା ୱେନ୍ଜି ୱାନ୍ ହିଜକିୟ ଲାକ୍ତୁ କାବୁର୍ ସିନି ୱାରିଙ୍ଗ୍ ପୋକ୍ସି ଇର୍ହାନ୍ । “ମିର୍ ଜିହୁଦାଦି ରାଜା ହିଜକିୟଦିଙ୍ଗ୍ ଇୟା ମାଟା ଇନିଦେର୍, ଜିରୁସାଲମ ଅସୁରିୟ ରାଜାଦି କିୟୁଦୁ ସର୍ପେ ଆଏନ୍, ଇୟା ମାଟା ଇଜି ମି ବିସ୍ବାସ୍ତି ବୁମି ମାପୁରୁ ମିଙ୍ଗିଁ ବାଣ୍ଡିସ୍ କିମାକିନ୍ ।” ସୁଡ଼ୁଦୁ, ଅସୁରିୟ ରାଜାର୍ ପୁଣ୍ଡାଦିୱାଜା ନାସ୍ଟୁ କିନି ମାଣାନ୍ ୱିଜୁ ଦେସ୍ ଉଣ୍ତିଙ୍ଗ୍ ଆମାକା କିତାମାନାର୍, ଆକା ମିର୍ ୱେରିଇମାନିଦେର୍; ମାରି, ମିର୍ ଇନିକା ଉଦାର୍ ପୋଇନିଦେର୍ ? ନା ବୁବାଦିଲୋକୁ ଆମା ଗୋଶନ, ହାରଣ, ରେତ୍ସଫ ଦେସ୍ତିଲୋକାଙ୍ଗ୍ ମାରି ତଲସଦି ଲୋକୁ ଏଦନ ଲୋକାଙ୍ଗ୍ ନାସ୍ଟୁ କିତାର୍, ୱାରି ଦେୟାମ୍କୁ ଇନିକା ୱାରିଙ୍ଗ୍ ଉଦାର୍ କିତେ ? ହମାତଦି ରାଜା, ଅର୍ପଦଦି ରାଜା, ସପର୍ବୟିମ ଗାଡ଼୍ତି, ହେନାଦି ମାରି ଅବ୍ବାଦି ରାଜା ଏମେ ?
ହିଜକିୟଦି ପ୍ରାର୍ଥନା
ଆବେନୁ ହିଜକିୟ କାବୁର୍ ସିନି ୱାରି କିୟୁଦାନ୍ ସିଟି ଅସି ଆକା ପୋଡ଼ାତାନ୍; ମାରି, ହିଜକିୟ ସଦାପ୍ରବୁଦି ଇଣ୍ଡ୍ରୋ ସଲ୍ସି ସଦାପ୍ରବୁଦି ଆଗ୍ଡ଼ି ବଇ କୁତ୍ତାନ୍ । ମାରି, ହିଜକିୟ ସଦାପ୍ରବୁଦି ଲାକ୍ତୁ ପାର୍ତନା କିଜି ଇର୍ହାନ୍, “ଏ କିରୁବରି ମୁସୁକୁ ମାନି ପେରିସାକ୍ତିଦି ସଦାପ୍ରବୁ, ଇସ୍ରାଏଲଦି ମାପୁରୁ, ନିନ୍, ନେ ନିନ୍ ଦୁନିଆଦି ୱିଜୁ ରାଜିଦି ମାପୁରୁ; ନିନ୍ ମୁସ୍କୁପୁର୍ ମାରି ଦୁନିଆ ତିୟାର୍ କିତିମାନି । ଏ ସଦାପ୍ରବୁ, ନି ଗିତଣିଦାନ୍ ୱେନ୍ଆ; ଏ ସଦାପ୍ରବୁ, ନିନ୍ କାଣୁକୁ କୁତ୍ସି ସୁଡ଼ୁଆ; ମାରି, ଜିବନ୍ତି ମାପୁରୁଦିଙ୍ଗ୍ ନିନ୍ଦା କିନି ଉଣ୍ତିଙ୍ଗ୍ ସନ୍ହେରିବ ଆମାକା ଇଜି ପୋକ୍ତାମାନାନ୍, ୱାନି ଆୟାୱିଜୁ ମାଟା ୱେନ୍ଆ । ଏ ସଦାପ୍ରବୁ, ଅସୁରିୟ ରାଜାର୍ ୱିଜୁଦେସ୍ତି ଲୋକା, ୱାରି ଦେସ୍ତିଙ୍ଗ୍ ଚିନ୍ବିନ୍ କିତାମାନାର୍ ମାରି ୱାରି ଦେୟାମ୍କାଙ୍ଗ୍ ସିସୁଦୁ ପୋକ୍ତାନ୍, ଇକା ସତ୍; ଇର୍ରିଙ୍ଗ୍ ୱାକ୍ ଦେୟାମ୍କୁ ଆଉ, ଲୋକୁ କିୟୁଦାନ୍ କିନି ପାଣି, ୱେର୍ଗୁ ମାରି କାଲୁ ଇକା; ଇୟାଉଣ୍ଡିଙ୍ଗ୍ ୱାର୍ ୱାନିକାଙ୍ଗ୍ ନାସ୍ଟୁ କିତାନ୍ । ଇଲେଇ, ଏ ସଦାପ୍ରବୁ, ମା ମାପୁରୁ, ୱାନି କିୟୁଦାନ୍ ମାଙ୍ଗିଁ ଉଦାର୍ କିଆ, ଆବେ ନିନ୍, ନେ ନିନ୍ ଜେ ସଦାପ୍ରବୁ, ଇକା ଦୁନିଆଦି ୱିଜୁ ରାଜିଙ୍ଗ୍ ନେସ୍ନାର୍ ।”
ଜିସାଇୟତି ରାଜାଦିଙ୍ଗ୍ କାବୁର୍
ଇୟାୱେନ୍କା ଆମସଦି ମାରିନ୍ ଜିସାଇୟ ହିଜକିୟ ଲାକ୍ତୁ ୱେର୍ସି ପୋକ୍ତା, ସଦାପ୍ରବୁ ଇସ୍ରାଏଲଦି ମାପୁରୁ ଇୟା ମାଟା ଇଜିନାନ୍, ନିନୁ ଅସୁରଦି ରାଜା ସନ୍ହେରିବ ବିରୁଦ୍ତାନ୍ ମା ଲାକ୍ତୁ ପାର୍ତନା କିତାନ୍ ଆକା, ସଦାପ୍ରବୁ ୱାନି ବିସୟ୍ଦାନ୍ ଇୟା ମାଟା ଇର୍ହାମାନାନ୍; ସିୟୋନଦି ରିପା ଆଇଲି ମିଙ୍ଗିଁ କାଡ଼ିତା ମାନାତ୍ ମାରି ମିଙ୍ଗିଁ ନିରାସ୍ କିତାମାନାତ୍; ଜିରୁସାଲମଦି ରିପା ଆଇଲିକ୍ ମି ତରିନ୍ ତାଲା ଦୁକ୍ତାମାନାତ୍ । ମିର୍ ଏଙ୍ଗ୍ ସେମାର୍ ମାରି ନିନ୍ଦା କିତିମାନିଦେର୍ ? ମାରି ମିର୍ ଏ ବିରୁଦ୍ତାନ୍ ନିଜେଦି ମାଟା ନାଣ୍ଡ୍ ଇର୍ହିମାନିଦେର୍ ମାରି ନିଜେଦି କାଣୁକୁ ମୁସ୍କୁ ସୁଡ଼ୁଜିନିଦେର୍ ? ଇସ୍ରାଏଲତି ପବିତ୍ର ମାପୁରୁ ବିରୁଦ୍ତାନ୍ ଆକା । ନିନୁ ନିଜେଦି ଦାସ୍ରି ମାଣାନ୍ ମାପୁରୁଙ୍ଗୁଁ ଜାଟିଙ୍ଗ୍ ଆତିମାନି ମାରି ଇର୍ହିମାନି, ମାପ୍ ନିଜେଦି ପେରି ରତ୍ଦୁ ଗରକାଣି ମୁସୁକୁ ଲିବାନୋନଦି ମୁସୁକୁ ୱାତାମାନାପ୍; ମାରି, ମାପ୍ ଆବେଣି ନିରିଇ ଏରସ ମାରାକୁ ମାରି ଆବେଣି ନେଗି ଦେବଦାରୁ ମାରାକୁ ୱିଜୁ କାତ୍ନା ପୋକ୍ନାପ୍; ମାରି, ମାପ୍ ଆକଣି ଉଚା ବାଡିଦୁ ମାରି ମାପ୍ ପଲ୍ ଆସ୍ନି କିଡ଼ିଇନାନି ଗରନ୍ତୁ ସନାଟ୍ । ମାପ୍ କାର୍ଜି ଏରୁ ଉଟା ମାନାପ୍, ମାରି ମାପ୍ ନିଜେଦି ପାଦାମ୍ ଆଡ୍ଗି ମିସରଦି ଗାଡେଙ୍ଗ୍ ୱିଜୁ ୱାରିସ୍ କିନାପ୍ ।
ଏଣ୍ଡେସ୍ ମାପ୍ ପୁର୍ବେ କାଡ଼ାଦାନ୍ ଇକା ତିୟାର୍ କିତାମାନାପ୍ ମାରି ପୁର୍ବେକାଡ଼ାଦାନ୍ ଇକା ତିର୍ କିତାମାନାପ୍, ଇକା ଇନିକା ମିର୍ ୱେନ୍ଇଦେର୍ ? ମିର୍ ଜେ କାତି ପେର୍ତିମାନି ଗାଡ଼୍କୁ ଦ୍ୱଂସ କିଜି ଆୟା ୱିଜୁଦିଙ୍ଗ୍ କାସ୍ରା ଗାଦି କିନିଦେର୍, ଇକା ଇଲେଇ ମାପ୍ ପୁରା କିତାମାନାପ୍ । ଇୟାଉଣ୍ଡିଙ୍ଗ୍ ଆବେନୁ ବାସାକିନି ଲୋକୁ ଅଡ଼ପ୍ ସାକ୍ତି ଆତାର୍, ୱାର୍ ନିରାସ୍ ମାରି ତିଲାତାର୍; ୱାର୍ କିଡ଼ିଇଦି ଲାଟା ମାରି କାୟିତି ଲାଟା, ଇଲୁଦି ସାତ୍ ମୁସୁକୁରି ଲାଟା ମାରି ଆକା ନେଗି ପାସି କିଡ଼ିଇ ୱାଜା ଆତିଙ୍ଗ୍ ।
“ମାତର୍ ମି ବାସ୍ନିକା, ଆତ୍ରେ ସୋନିକା, ଲୋଇ ୱାନିକା ମାରି ମା ବିରୁଦ୍ତାନ୍ ରିସା କିନିକା ମାପ୍ ନେସ୍ନାପ୍ । ମିର୍ ମା ବିରୁଦ୍ତାନ୍ ରିସା ଆତିମାନିଦେର୍ ମାରି ମି ନିନ୍ଦା ମାଟା ମା ଗିତଣିଦୁ ୱାତା ମାନାତ୍, ଇୟାଉଣ୍ଡିଙ୍ଗ୍ ମାପ୍ ମି ମୁଜିଦୁ ନିଜେଦି ଆକଣି ମାରି ମି ୱେୟୁଦୁ ତର୍ନି ସାଜୁ, ମାରି ମିର୍ ଆମା ସାରି ୱାତିଦେର୍, ଆୟା ସାରିଦାନ୍ ମାପ୍ ମିଙ୍ଗିଁ ଡ଼େସି ପୋକ୍ନାପ୍ ।”
ଏ ହିଜକିୟ, ନି ଉଣ୍ତିଙ୍ଗ୍ ଇୟା ସିନା ଆନାତ୍; ମିର୍ ଇୟା ବାର୍ସେକ୍ତୁ ଆନି ପାସି ମାରି କାଡ଼େରିଙ୍ଗ୍ ଆବେଣାନ୍ ଆନି ନେରିତି ପାସି ଉଣିଦେର୍; ମାରି, ୱେଡ଼େରିଙ୍ଗ୍ ୱିତୁ ୱିତ୍ସି ପାସି କୋଇନିଦେର୍ ମାରି ଅଙ୍ଗୁର୍ କିଡ଼ିଇ କିଜି ଆବେଣି ପଲ୍ ତିନିଦେର୍ । ମାରି, ଜିହୁଦା କୁଟୁମ୍ଦି ରକିୟା ପୋଇଜି ଏଜିତି ଲୋକୁ ମାରି ଡ଼େସି ଆଡ୍ଗି ୱେଲେଙ୍ଗ୍ ସାର୍ନେ ମାରି ମୁସୁକୁ ପଲ୍ ଆସ୍ନାତ୍ । ଇରିଙ୍ଗ୍ ଜିରୁସାଲମଦାନ୍ ଉନ୍ଡ୍ରି ଏଜିତି ଲୋକୁ ମାରି ରକିୟା ପୋଇତି ଲୋକୁ ସିୟନ ଗରତାନ୍ ସୋନାର୍; ସଦାପ୍ରବୁଦି ଇଛା ଇକା ପୁରା କିନାତ୍ ।
ଇୟାଉଣ୍ଡିଙ୍ଗ୍ ସଦାପ୍ରବୁ ଅସୁରିୟ ରାଜା ବିସୟ୍ଦାନ୍ ଇୟା ମାଟା ଇନାନ୍, “ୱାନ୍ ଇୟା ଗାଡ଼୍ତୁ ରେଏନ୍, ମାରି ଆବେନୁ ଦନୁ ତିର୍ ଡାକ୍ମାଟ୍, ମାରି ଆୟା ଆଗ୍ଡ଼ି ମୁତା ଆସ୍ସି ରେଏନ୍, ମାରି ଆୟା ବିରୁଦ୍ତାନ୍ କଟି କେର୍ପ୍ସି ତୋର୍ମାଟ୍ । ସଦାପ୍ରବୁ ଇନାନ୍, ୱାନ୍ ଆମା ସାରି ୱାତାନ୍, ଆୟା ସାରି ଡ଼େସି ସୋନାନ୍ ମାରି ୱାନ୍ ଇୟା ଗାଡ଼୍ତୁ ୱାଦେଙ୍ଗ୍ ଆଟ୍ଏନ୍ । ଇରିଙ୍ଗ୍ ମାପ୍ ମା ଉଣ୍ତିଙ୍ଗ୍ ମାରି ମା ଦାସ୍ ଦାଉଦ ଉଣ୍ତିଙ୍ଗ୍ ଇୟା ଗାଡ଼୍ତିଙ୍ଗ୍ ରକିୟା କିନି ଉଣ୍ତିଙ୍ଗ୍ ସାକା ଆନାନ୍ ।”
ଇୟାୱେନ୍କା ସଦାପ୍ରବୁଦି ଦୁତ୍ ସୋସି ଅସୁରିୟରି ସାଉଡ଼ିଦୁ ଏକ୍ ଲକ୍ୟ ଅସେ ପାସ୍ ଆଜାର୍ ଲୋକାଙ୍ଗ୍ ଜୁଦ୍ କିତାର୍; ମାରି, ଲୋକୁ ସାଲ୍ଦିନେ ନିଙ୍ଗିତିଙ୍ଗ୍, ସୁଡ଼ୁଦୁ, ୱିଜେରେ ସାତି ମାଡ଼େଙ୍ଗ୍ । ଆବେନୁ ଅସୁରଦି ରାଜା ସନ୍ହେରିବ ବାଡି ଡ଼ିସ୍ସି ସର୍ହାନ୍ ମାରି ଡ଼େସି ସୋଲ୍ସି ନିନିବିଦୁ ବାସା କିତାନ୍ । ଇୟାୱେନ୍କା ୱାନ୍ ନିଜେଦି ନିଷ୍ରୋକ ଦର୍ତି ଦିୟାମ୍ତି ଇଣ୍ଡ୍ର ପୁଜା କିନି ବେଡ଼ାଦୁ ଅଦ୍ରମ୍ମେଲକ୍ ମାରି ସରେତ୍ସର ଦର୍ତି ୱାନି ରିଏର୍ ମାରିନ୍କୁ ୱାନିଙ୍ଗ୍ କାଣ୍ତାଦାନ୍ ସାୟାମାର୍ଗା କାତ୍ତାର୍ । ଆଦେଙ୍ଗ୍ ୱାର୍ ଆରାରାଟ୍ ଦେସ୍ତୁ ସର୍ହାର୍ । ମାରି, ୱାନି ମାରିନ୍ ଏସର୍ହଦ୍ଦନ୍ ୱାନି ପଦ୍ତୁ ରାଜି କିତାନ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.