Konda Porja Bible
ଜିସାଇୟ 35
ପବିତ୍ରଦି ସାରି
ବନୁ ମାରି ବାଟାବାଇଲୁ ମାରି ସିମ୍ରାବାଡି ୱେଡ଼ିକା ଆନେ; ମାରି, ବାଲିବାଟାବୁମି ୱେଡ଼ିକା ଆଜି ଗୋଲାପି ୱାଜା ପୁଙ୍ଗୁଁ ଆନାତ୍ । ଆକା ନାଣ୍ତ ପୁଙ୍ଗୁଁ ପୁନାତ୍, ମାରି ୱେଡ଼ିକା ମାରି ପାଟା ପାର୍ଜି ୱେଡ଼ିକା ଆନାତ୍; ଲିବାନୋନତି ଜାୟ୍, କର୍ମିଲ୍ ମାରି ସାରଣଦି ଜଜ୍ମାନ୍ ୱାନିଙ୍ଗ୍ ନର୍ନାତ୍; ୱାର୍ ସଦାପ୍ରବୁଦି ସାକ୍ତି ମାରି ମା ମାପୁରୁଦି ଗୌରବ୍ ସୁଡ଼ୁନାର୍ । ମିର୍ ସାକିସିଲି କିୟୁଦିଙ୍ଗ୍ ଡାଟ୍ କିଦୁ ମାରି ତିରିଗ୍ନି କାଲୁଦି ମେଣ୍ତାଦିଙ୍ଗ୍ ତିର୍ କିଦୁ । ତିଲାନି ଲୋକାଙ୍ଗ୍ ଇଣ୍ଡ୍ରୁ, ସାହାସ୍ ଆସ୍ତୁ, ତିଲାମାଟ୍; ସୁଡ଼ୁଦୁ, ମି ମାପୁରୁ ବାଦୁଲୁଦି ୱାଲେ, ମାପୁରୁଦି ବାଦୁଲୁଦି ୱାଲେ ୱାନାନ୍; ୱାନ୍ ୱାଜି ମିଙ୍ଗିଁ ରକିୟା କିନାନ୍ । ନାସ୍ତିୱାଲେ କାଣା ଲୋକା କାଣୁକୁ ରେଆଇ ଆନେ ମାରି ବୋଇରା ଲୋକା ଗିତଣିଙ୍ଗ୍ ୱେନାଇ ଆନେ । ନାସ୍ତିୱାଲେ ସଟା ଲୋକୁ ବନୁ ଗରିଆ ୱାଜା ଡାଟ୍ନାର୍ ମାରି ଗୁଲା ଲୋକାରି ୱେତଲ୍ ପାଟା ପାର୍ନାତ୍; ଇରିଙ୍ଗ୍ ବାଟାବାଇଲୁଦୁ ଏରୁ ମାରି ବାଲିବାଟା ବୁମିଦୁ ଗାଡା ସନାତ୍ । ମାରି, ବନୁଗରିଏଙ୍ଗା ଉଣିକା ଏରୁ କୁଣ୍ତି ଆନାତ୍ ମାରି ୱାର୍ତି ବୁମିଦୁ ଉସା ଏରୁ ସନେ; ଗଲୁଙ୍ଗାଁ ମାନ୍ଜିନି ବାଡିଦୁ, ୱାନିକା ଗୁରୁନି ବାଡିଦୁ ସାରା, ଲାଟା ମାରି ଡାଣ୍ତି ବନୁ ଆନାତ୍ । ମାରି, ଆବେନୁ ଉନ୍ଡ୍ରି ରାଜାଦି ସାରି ମାରି ପେରିଜାରି ଆନାତ୍, ଆକା ପବିତ୍ରଦି ସାରି ଇଜି ୱେଙ୍ଗ୍ନାତ୍; ଆକା କେବଲ ୱାନିକା ଉଣ୍ତିଙ୍ଗ୍ ଆନାତ୍, ମାତର୍ ଏମେବା ସେଇ ଲୋକୁ ଆୟା ମୁସୁକୁ ବୁଲାଏର୍; ବୁଲାନିକାର୍ ମାରି ବୁଦିସିଲିଲୋକୁ ବା ଆବେନୁ ବେମ୍ରି ଆଏର୍ । ଆବେନୁ ଏମେବା ପାର୍ଟାନରେସ୍ ତେବାଉ, ମାରିବା ଏମେବା ନାସ୍ଟୁ କିନି ଜାତୁଙ୍ଗ୍ ଆୟା ମୁସୁକୁ ସୋଲ୍ଉ, ୱାକ୍ ଆବେନୁ ତରାଇ ଆଉ; ମାତର୍ ମୁକୁଡ଼ାତି ଲୋକୁ ଆବେନୁ ବୁଲାନାର୍; ମାରି, ସଦାପ୍ରବୁଦି ରକିୟା ପୋଇତି ଲୋକୁ ଡ଼େସି ୱାନାର୍ ମାରି ପାଟା ପାର୍ବୁ ପାର୍ବୁ ସିୟୋନଦୁ ୱାନାର୍ ମାରି ସତ୍ଦି ୱେଡ଼ିକା ୱାରି ତାଲାଦୁ ଆରାନିକା ଆନାତ୍; ୱାର୍ ୱେଡ଼ିକା ମାରି ସାନ୍ତି ପୋଇନାର୍, ମାରି ଆଡ଼୍ବାନିକା ମାରି କାସ୍ଟୁ ଆକ ଆନାତ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.