Konda Porja Bible
ଜିସାଇୟ 32
ଅରେନ୍ ଦାର୍ମୁଦି ରାଜା
ସୁଡ଼ୁଦୁ, ଅରେନ୍ ରାଜା ଦାର୍ମୁ ଇସାବ୍ଦାନ୍ ସାସନ୍ କିନାନ୍ ମାରି ଅଦିପତିର୍ ନିୟାୟ୍ ଇସାବ୍ଦାନ୍ ସାସନ୍ କିନାର୍ । ମାରି, ୱିଜୁ ଲୋକୁ ଗାଲିଦିଙ୍ଗ୍ ରୋମ୍ନି ବାଡି ପୋଇନାର୍ ମାରି ପିରୁଦିଙ୍ଗ୍ ରୋମ୍ନି ବାଡି ପୋଇନାର୍, ୱାର୍ତି ବାଡିଦୁ ଏରୁ ମାନ୍ଜିନି ବାଡି, ସାନ୍ତିଦି ବୁମିଦୁ ପେରି ପିଡ଼ିପି କାଲୁଦି ନିଡ଼ା ୱାଜା ଆନାତ୍ । ମାରି, ସୁଡ଼ୁନି ଲୋକା କାଣୁକୁ ସାୟାଲ୍ ମାୟାଲା ଆଉ ମାରି ୱେନ୍ଜି ଲୋକା ଗିତଣିଙ୍ଗ୍ ଦିୟାନ୍ କିଦୁ । ମାରି, ବୁଦିସିଲି ଲୋକୁ ବୁଦି ପୋଇନାନ୍ ମାରି ତୋତ୍ଲା ଲୋକ୍ତି ୱେତଲ୍ ନେଗେନ୍ତାନ୍ ୱାର୍ଗିନାନ୍ । ବୁଦି ସିଲି ଲୋକୁ ପେରିକାନ୍ ଇଜି ମାରି ତାଗ୍ଇ ପାଣିକିନି ଲୋକୁ ଉଦାର୍ ଇଜି ମାରି ୱିଙ୍ଗିଁଏର୍ । ଇରିଙ୍ଗ୍ ସେଇପାଣି କିନି ଉଣ୍ତିଙ୍ଗ୍ ମାରି ସଦାପ୍ରବୁଦି ବିରୁଦ୍ତାନ୍ ବେମ୍ରିଦି ମାଟା ୱେର୍ନି ଉଣ୍ତିଙ୍ଗ୍, ବାଙ୍ଗାଦି ୱାନି ଜିବନ୍ତିଙ୍ଗ୍ ସାପିସ୍ନି ଉଣ୍ତିଙ୍ଗ୍ ମାରି ଏରିକି ଆତି ୱାନିଙ୍ଗ୍ ଏରୁ ସିଇ ଉଣ୍ତିଙ୍ଗ୍ ମୁର୍କୁ ଲୋକୁ ସେଇ ମାଟା ଇନାର୍ ମାରି ୱାନି ଜିବନ୍ ସେଇପାଣି କିନାତ୍ । ମାରିବା, ସେଇ ଲୋକା ଉପାୟ୍ ୱିଜୁ ତାଗ୍ଇକା; ୱାନ୍ ସାନ୍ତି ଲୋକାଙ୍ଗ୍, ଟିକ୍ ମାଟେଙ୍ଗ୍ ଇନି ୱାଲେ ସିଲିସାତି ଲୋକାଙ୍ଗ୍ ମିସ୍ ମାଟା ଦାନ୍ ସାପିସ୍ କିନି ଉଣ୍ତିଙ୍ଗ୍ ସେଇକା ଏତ୍ କିନାନ୍ । ମାତର୍ ବିସ୍ବାସ୍ତି ଲୋକ୍ ଉପାୟ୍ କିନାତ୍ ମାରି ୱାନ୍ ପେରି ଏତ୍କିନି ୱାଲେ ତିର୍ ତେବାନାନ୍ ।
ବିସାର୍ ମାରି ରକିୟା
ଏ ସୁକ୍ଦି ଆଇମେକ୍, ମିର୍ ନିଙ୍ଗ୍ଜି ନା ମାଟା ୱେଣ୍ଡ୍ରୁ, ଏ ସିନ୍ତା ସିଲି ଆଇଲିକ୍, ନା ବାକ୍ୟ ୱେଣ୍ଡ୍ରୁ । ଏ ସିନ୍ତା ସିଲି ଆଇଲିକ୍, ମିର୍ ଉନ୍ଡ୍ରେ ବାର୍ସେକ୍ ମୁସୁକୁ ଏସୋ ଦିନ୍ ତିଲାନିଦେର୍; ଇରିଙ୍ଗ୍ ଅଙ୍ଗୁର୍ପଲ୍ ଉଣା ଆନାତ୍, ପଲ୍ କୟ୍ନି ବେଡ଼ା ରେଏତ୍ । ଏ ସୁକ୍ଦି ଆଇମେକ୍, ମିରୁ ତିଲାଦୁ; ଏ ସିନ୍ତା ସିଲି ଆଇମେକ୍, ତିଲାଦୁ; ୱାତି କୁତ୍ସି ଡୁମୁଡା ଆଦୁ ମାରି ମି ଜୁକିଦୁ ବାସ୍ତାଦି ପାସିୟା ତରାଦୁ । ୱାର୍ ଉର୍ବର୍ ନେଗି ବୁମି ମାରି ପଲ୍ ଆସ୍ନି ଅଙ୍ଗୁର୍ ତିୱା ଉଣ୍ତିଙ୍ଗ୍ ବୋକାଦୁ କତାଇ ଆନାର୍ । ନା ଲୋକା ବୁମିଦୁ ସାମ୍କୁ ବୁଟେଙ୍ଗ୍ ମାରି କାଟାକଡ଼ି ମାରାକୁ ଆନେ; ହୁଁ, ୱେଡ଼ିକା ଗାଡ଼୍ତି ୱିଜୁଦିନ୍ତି ୱେଡ଼ିକା ଇଲୁ ଇକାନେ ଆନାତ୍ । ଇରିଙ୍ଗ୍ ରାଜାଗାଡ଼୍ ଡ଼ିସ୍ସାଇ ଆନାତ୍ ମାରି ଲୋକୁ ବର୍ତି ମାନି ଗାଡ଼୍ ସିମ୍ରା ଆନାତ୍; ଇସ୍ରି ଗରନୁ ମାରି କାପ୍କିନି ମେଡ଼୍ ଇଲୁ ୱିଜୁଦିନ୍ତି ସାରା ୱାଜା ଆନାତ୍, ବନୁଦି ଗଦଙ୍ଗା ୱେଡ଼ିକାଦି ବୁମି ମାରି ଜାତୁଙ୍ଗ୍ ମାନ୍ଦା ସାରାନି ବାଡି ଆନାତ୍;
ସାରାସାରି ୱେନ୍କା ମୁସ୍କୁପୁର୍ତାନ୍ ମା ମୁସୁକୁ ଆତ୍ମା ସିଆତିଙ୍ଗା ବାଟାବୁମି ଉର୍ବର୍ କିଡ଼ିଇ ଆନାତ୍ ମାରି ଉର୍ବର୍ କିଡ଼ିଇ ବନୁ ୱାଜା ଆନାତ୍ । ନାସ୍ତିୱାଲେ ବାଟା ବାଇଲୁଦୁ ନିୟାଇ ବିସାର୍ ବାସା କିନାତ୍ ମାରି ଆୟା ପାସି ଆନି କିଡ଼ିଇଦୁ ଦାର୍ମୁ ବାସା କିନାତ୍ । ମାରି, ଦାର୍ମୁଦି ପାଣି ସାନ୍ତିଦିକା ଆନାତ୍; ମାରି, ଦାର୍ମୁଦି ପଲ୍ତି ନେଗିକା ମାରି ତିଲାଇକା ଆନାତ୍ । ମାରି, ନା ଲୋକୁ ସାନ୍ତିଦି ବସ୍ତି ବାଡିଦୁ, ନେଗି ଇଣ୍ଡ୍ର ମାରି ତିର୍ତାନ୍ ରୋମ୍ନି ବାଡିଦୁ ବାସା କିନାର୍ । ମାତର୍ ବନୁତି ବାଡିଦୁ ଆନ୍ଡ୍ରାଗାଦି ପିରୁ ଆନାତ୍ ମାରି ଗାଡ଼୍ ୱିଜୁ ନାଷ୍ଟୁ ଆନାତ୍ । ନେଗି ବାଡିଦୁ ୱିତୁ ୱିତ୍ସିନିଦେର୍ ମାରି କଡି ଗଦଙ୍ଗା ଆତ୍ରେ ପୋକ୍ସିନିଦେର୍ ଜେ ମିରୁ, ମିରୁ ଦନ୍ୟ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.