Konda Porja Bible
ଜିସାଇୟ 21
ବାବିଲଦି ବୁଡାନିକା ସୁଡ଼ୁନିକା
ସାମ୍ଦୁର୍ ଆୟାପାଡ଼ିଦି ନାଣ୍ତବନୁ ବିସୟ୍ଦି ବାବବାଣି ମାଟା । ଆକା ଉଣେରି ତରିଟାନ୍ ନାଣ୍ଡ୍ ଦାପ୍ରେ ୱାଜିନି ଗାଲିପିରୁଦି ୱାଜା ବାଟାଦାନ୍, ଉନ୍ଡ୍ରି ଭୟ୍ଙ୍କାର୍ ଦେସ୍ତାନ୍ ୱାଜିନାତ୍ । ଉନ୍ଡ୍ରି ଦୁଃକ୍ତି ସୁଡ଼ୁନିକା ମା ଉଣ୍ତିଙ୍ଗ୍ ତରାତାମାନାତ୍; ବିସ୍ବାସ୍ ଆରାକିଜି ବିସ୍ବାସ୍ ଆରା କିଜିନା ମାରି ଡଙ୍ଗାକିନିକାନ୍ ଡଙ୍ଗାକିଜିନାର୍ । ଏ ଏଲମ୍, ମୁସୁକୁ ସାଙ୍ଗ୍ଆ; ଏ ମାଦିୟ, ବନ୍ଦ କିଆ; ନାନ୍ ଆବେଣି ଆଡ଼୍ବାନି ଆଉଲି ୱିଜୁ ସାନ୍ତି କିତାମାନା ।
ଇୟାଉଣ୍ଡିଙ୍ଗ୍ ନା ଜୁକିଦି ନପିଦାନ୍ ପୁରା ଆତାମାନାତ୍; କୋଡ଼ ପୋଇନି ନୋପିଦି ୱାଜା ନୋପି ନାଙ୍ଗିଁ କାସ୍ଟୁ ସିଜିନାତ୍; ନାନ୍ ଇୟାୱାଜା ଦାନ୍ଦା ଯେ, ନାନ୍ ୱେଣ୍ଡ୍ରେଙ୍ଗ୍ ଆଟ୍ଏଜିନା; ନାନ୍ ଇୟାୱାଜା କିଲିବିଲି ଯେ, ନାନ୍ ସୁଡ଼ୁଦେଙ୍ଗ୍ ଆଟ୍ଏଜିନା । ନା ଜିବନ୍ ତିରିଗ୍ଜିନାତ୍, ନାଣ୍ଡ୍ ନାଙ୍ଗି ତିଲିସ୍ କିଜିନାତ୍; ଆମା ମିଲିମିଲିକା ନାନ୍ ଇଛା କିତା, ଆକା ନା ଉଣ୍ତିଙ୍ଗ୍ ତିଲାନିମାଟା ଆଜିନାତ୍ ।
ୱାର୍ ମେଜ ରସ୍ସିନାର୍, ୱାର୍ କାପ୍କିନି କିନିକାର୍ ମିସାନାର୍; ୱାର୍ ତିନାର୍ ଉଣାର୍, ଏ ସନ୍ୟରି ନେତା, ନିଙ୍ଗ୍ଦୁ, ଆଡୁକା କିନି ମାନୁ ନିୟୁ ଉସ୍ତୁ ।
ଇର୍ରିଙ୍ଗ୍, ପ୍ରବୁ ନାଙ୍ଗି ଇୟା ମାଟା ଇର୍ହାମାନାନ୍, “ସାଙ୍ଗ୍ଆ, ଅରେନ୍ କାପ୍କିନି ୱାନିଙ୍ଗ୍ କିଦୁ; ୱାନ୍ ଆମାକା ସୁଡ଼ୁନାନ୍, ଆକା ଇନିନ୍; ମାରି, ୱାନ୍ ଏସ୍ତିୱାଲେ ଉନ୍ଡ୍ରି ମାନ୍ଦା ସନ୍ୟର୍, ରୁଣ୍ତି ରୁଣ୍ତି ମାନ୍ଦା ଗଡ଼େଙ୍ଗ୍, ଉନ୍ଡ୍ରି ମାନ୍ଦା ଗଦଙ୍ଗ୍ ମାରି ଉନ୍ଡ୍ରି ମାନ୍ଦା ଉଟ୍କୁ ସୁଡ଼ୁନାନ୍, ନାସ୍ତିୱାଲେ ୱାନ୍ ମୋନ୍ ଡ଼େପ୍ନି ଆଗ୍ଡ଼ି ନାଣ୍ଡ୍ ଦିୟାନ୍ଦାନ୍ ୱେନାନ୍ ।”
ଆବେନୁ ୱାନ୍ ପାର୍ଟାନରେସ୍ ୱାଜା ନାଣ୍ଡ୍ ଆଉଲି ଆଜି ଇର୍ହାନ୍, “ଏ ପ୍ରବୁ, ନାନ୍ ଦିନ୍ ୱେଡ଼େକା କାପ୍କିନିମାନୁ ଆଲ୍ଜି ନିଲ୍ନାମାନା ମାରି ଏସୋ ନାଡ଼ା ଆତାତ୍ ନାନ୍ ନିଜେଦି ବୁଲାନି ବାଡିଦୁ ତେବାତା ମାନା,”
ମାରି, ସୁଡ଼ୁଦୁ, ଇବେନୁ ଉନ୍ଡ୍ରି ମାନ୍ଦା ଲୋକୁ ରିଏର୍ ରିଏର୍ ଗଡ଼େଙ୍ଗ୍ ସାଲାକିନିକାର୍ ଆଜି ୱାଜିନାର୍ । ମାରିବା, ୱାନ୍ ଡ଼େସି ଇର୍ହାନ୍, “ବାବିଲ ଆର୍ତାତ୍; ଆର୍ତାତ୍ ମାରି ୱାନି ତିୟାର୍ କିତି ବମେଙ୍ଗ୍ ୱିଜୁ ରୁଙ୍ଗୁଜି ନାସ୍ଟୁ ଆତେ ।”
ଏ ନା ଇସ୍ରାଏଲତି ଲୋକୁ ମାରି ନାନୁ କାଡ଼ାତୁ ପାସି ଉଣ୍ତାକିତି ମାନି ଲୋକୁ ୱାଜା ଆତିମାନିଦେର୍, ନାନ୍ ଇସ୍ରାଏଲଦି ମାପୁରୁ ସଦାପ୍ରବୁଦି ମାଣାନ୍ ଆମାକା ୱେର୍ହାମାନା, ଆକା ମିଙ୍ଗିଁ ୱେର୍ତା ।
ଇଦମ ମାରି ଆରବ ବିସୟ୍ତାନ୍ ବାବବାଣି ମାଟା
ଇଦମ ବିସୟ୍ତାନ୍ ବାବବାଣି ମାଟା ଅରେନ୍ ସେୟିରଦାନ୍ ନାଙ୍ଗି କୁକ୍ସି ଇଜିନାନ୍, “କାପ୍କିନିକା, ଏସୋ ନାଡ଼ା ଆତାତ୍ ? କାପ୍କିନିକା, ଏସୋ ନାଡ଼ା ଆତାତ୍ ?”
କାପ୍କିନିକାନ୍ ଇର୍ହାନ୍, “ସାଲ୍ଦି ଆଜିନାତ୍ ମାରି ନାଡ଼ା ନେ ୱାଜିନାତ୍; ମିର୍ ଜଦି ୱେନ୍ବାନିଦେର୍, ୱେନ୍ବାଦୁ; ମିର୍ ଡ଼େସି, ରାଦୁ ।”
ଆରବ ବିସୟ୍ତାନ୍ ବାବବାଣି ମାଟା । ଏ ଦଦାନିୟ ଆକ ଆତି ମାନ୍ଦା, ମିର୍ ଆରବଦି ବନୁଦୁ ନାଡ଼ା ତେବାନିଦେର୍ । ଆମାକାନ୍ ଏର୍କି ଆତା ମାର୍ହାନ୍, ୱାର୍ ୱାନି ଡାଗୁରୁ ଏରୁ ତାତାର୍; ତେମା ଦେସ୍ତି ଲୋକୁ କାଦି ଅସି ଉରୁକ୍ନି ଲୋକା ୱାଲେ ବେଟ୍ଆତାର୍ । ଇରିଙ୍ଗ୍ ୱାର୍ କାଣ୍ତାଦାନ୍, ଦାରାଦି କାଣ୍ତାଦାନ୍, ରେଲ୍ତିମାର୍ହି ଧନୁଦାନ୍ ମାରି କାସ୍ଟୁଦି ଜୁଦ୍ତାନ୍ ଉରୁକ୍ତାର୍ ।
ଏଣ୍ତେସ୍ ସଦାପ୍ରବୁ ନାଙ୍ଗି ଇର୍ହାମାନାନ୍, “ବୁତିକିନିୱାରି ବାର୍ସୁଦି ଇସାବ୍ତାନ୍ ଉନ୍ଡ୍ରେ ବାର୍ସେକ୍ ଲୋଇ କେଦାରତି ୱିଜୁ ସାକ୍ତି ସିଲେଣ୍ତ୍ ଆନାତ୍; ମାରି, କେଦାରତି କୁଟୁମ୍ଦି ଲୋକା ଲୋଇ ଉଣା ଲୋକୁଦି ଦନୁ ଆସ୍ତିମାନିକାର୍ ମାନ୍ଜିନାର୍” ଇରିଙ୍ଗ୍ ସଦାପ୍ରବୁ ଇସ୍ରାଏଲଦି ମାପୁରୁ ଇକା ଇର୍ହାମାନାନ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.