Konda Porja Bible
ଜିସାଇୟ 15
ମୋୟାବ ଉଣ୍ତିଙ୍ଗ୍ ବାବବାଣି
ମୋୟାବ ଉଣ୍ତିଙ୍ଗ୍ ବବିସତ ମାଟା । ମୋୟବଦି ଆର୍ ଗାଡ଼୍ ଉନ୍ଡ୍ରେ ନାଡ଼ା ନାସ୍ଟୁ ମାରି ଧ୍ୱଂସ ଆତାତ୍; ଉନ୍ଡ୍ରେ ନାଡ଼ାଦୁ ମୋୟାବଦି କିର୍ ଗାଡ଼୍ ନାସ୍ଟୁ ମାରି ଧ୍ୱଂସ ଆତାତ୍ । ୱାନ୍ ଆଡ଼୍ବାନି ଉଣ୍ତିଙ୍ଗ୍ ବୈଥତ୍ଦିଙ୍ଗ୍ ମାରି ଦିବୋନ୍ଦିଙ୍ଗ୍, ଉଚାବାଡିଦୁ ସର୍ହାମାନାତ୍; ନବୋ ମାରି ମେଦବାଦି ବିସୟ୍ଦାନ୍ ମୋୟାବ ଆଡ଼୍ବାଜିନାତ୍; ଆୟା ୱିଜେରି ତାଲେକ୍ ଟାଙ୍ଗୁରୁ ଆତାମାନାର୍, ୱିଜେରି ମେସାମ୍କୁଦାଢ଼ି କୟତାମାନାର୍ । ୱାରି ୱିଜୁ ପେରିଜାରିଦୁ ଲୋକୁ ବାସ୍ତାଆଙ୍ଗିଙ୍ଗ୍ ଆରାଜିନାର୍; ନିଜେ ନିଜେଦି ଇଡ୍ରଣି ସାତ୍ ମୁସୁକୁ ମାରି ଡେଣାଦି ବାଡିଆ ୱିଜୁ ଲୋକୁ ନାଣ୍ଡ୍ ଆଡ଼୍ବାଜି ଆଉଲିଆଜିନାର୍ । ହିସ୍ବୋନ ମାରି ଇଲିୟାଲି ଆଡ଼୍ବାଜିନାର୍; ୱାରି ଆଡ଼୍ବାନିକା ଯହସ୍ ସାନ୍ଦି ଆଉଲି ସୋଲ୍ସିନାତ୍; ଇୟାଉଣ୍ଡିଙ୍ଗ୍ ମୋୟାବଦି ତିଆର୍ଆତି ଲୋକୁ ଆଡ଼୍ବାଜିନାର୍; ୱାନି ଜିବନ୍ ୱାନି ଲୋଇ ଆବେନୁ କମ୍ପେ ଆଜିନାତ୍ । ମା ଜିବନ୍ ମୋୟାବଦି ଉଣ୍ତିଙ୍ଗ୍ ଆଡ଼୍ବାଜିନାତ୍; ୱାନି ତିଲାଜି ସନିକାର୍ ସୋୟର ସାନ୍ଦି ଇଗ୍ଲତ୍ ସଲିସିୟାଦୁ ଉର୍କୁସି ସୋଲ୍ସିନାର୍; ଇର୍ରିଙ୍ଗ୍ ୱାର୍ ଆଡ଼୍ବାଜି ଆଡ଼୍ବାଜି ଲୁହିତ ଗାଟି ମୁସୁକୁ ସଲ୍ସିନାର୍; ହୋରୋନୟିମ ସାରିଦୁ ସାତି ଉଣ୍ତିଙ୍ଗ୍ ୱାର୍ ଆଡ଼୍ବାଜିନାର୍ । ଇରିଙ୍ଗ୍ ନିମ୍ରିମଦି ଏରୁ ୱିଜୁ ନିକ୍ନେ ସନେ, ଲାଟା ୱାର୍ତା ସନାତ୍, ପାସି ଲାଟା ସିଲେଣ୍ଡା ଆନାତ୍, ପାସିକା ଇନିକା ବା ସିଲେତ୍ । ଇୟାଉଣ୍ଡିଙ୍ଗ୍ ୱାର୍ ନିଜେ ପୋଇତି ଦନ୍ ମାରି ଇଟ୍ତି ଜିନିସ୍ ୱିଜୁ ବାଇଶି ଦରୁ ମାରାନ୍ତି ଗାଡାପାଡ଼ି ମାନି ଏରୁ ଡାଗୁରୁ ଅନାର୍ । ଇରିଙ୍ଗ୍ ମୋୟାବଦି ସାରିବେଡ଼େତି ସାନ୍ଦିଦୁ ଆଡ଼୍ବାନି ଆଉଲି ୱେନାଇ ଆଜିନାତ୍; ଆବେଣି ଆଡ଼୍ବାନିକା ଇଗ୍ଲୟିମ୍ ସାନ୍ଦି ମାରି ଆବେଣି ଆଡ଼୍ବାନିକା ବେରେଲିମ୍ ସାନ୍ଦି ଆଉଲି ସଲ୍ସିନାତ୍ । ଇରିଙ୍ଗ୍ ଦିମୋନଦି ଏରୁ ୱିଜୁ ନେତେର୍ ଆତାମାନାତ୍; ମାରି, ମାପ୍ ଦିମୋନଦି ମୁସୁକୁ ମାରି ଦୁଃକ୍ ମାରି ମୋୟାବଦି ଉରୁକ୍ନି ଲୋକା ମୁସୁକୁ ମାରି ଦେସ୍ତି ଲୋଇ ବାକି ତେବାତିମାନି ଲୋକା ମୁସୁକୁ ଉନ୍ଡ୍ରି ନରେସ୍ ପୋକ୍ନାପ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.