Konda Porja Bible
ଜିସାଇୟ 1
ଆମସଦି ମାରିନ୍ ଜିସାଇୟଦି ସୁଡ଼ୁନିକା, ୱାନ୍ ଯିହୁଦାଦି ରାଜାର୍ ଉସିୟ, ଯୋଥମ୍, ଆହସ୍ ମାରି ହିଜକିୟଦି ଶାସନ ବେଡ଼ାଦୁ ଜିହୁଦା ମାରି ଜିରୁସାଲମ ବିସୟ୍ତାନ୍ ଇୟା ଦର୍ସନ ପୋଇତାର୍ ।
ମାପୁରୁ ନିଜେଦି ଲୋକାଙ୍ଗ୍ ଲାଗାନିକା
ଏ ବାଦଡ଼, ୱେନ୍ଆ, ଏ ଦୁନିଆ, ୱେନ୍ଆ, ଇର୍ରିଙ୍ଗ୍ ପ୍ରବୁ ଇର୍ହାମାନାନ୍; “ମାପ୍ କୋଡ଼ର୍ ଆଇଲିକା ଜାତୁନ୍ ମାରି ପସା କିଜିନାପ୍, ମାତର୍ ୱାର୍ ମାଙ୍ଗିଁ ବିରୁଦ୍ କିଜିନାର୍ ।” କଡି ନିଜେଦି ମାଲିକ୍ଦିଙ୍ଗ୍ ନେସ୍ନାତ୍ ମାରି ଗଦ ନିଜେଦି ମାଲିକ୍ଦି ଟଙ୍ଗାଁଦିଙ୍ଗ୍ ନେସ୍ନାତ୍; ମାତର୍ ଇସ୍ରାଏଲତି ଲୋକୁ ନେସେଏର୍, ମା ଲୋକୁ ବୁଜାଦେଙ୍ଗ୍ ଆଟ୍ଏର୍ ।
ଏ ପାପ୍ଦି କୁଟୁମ୍, ଅଦାର୍ମୁଦୁ ବଜୁପିଣ୍ତିତି ଲୋକୁ, ତାଗ୍ଇପାଣିକିନିଲୋକା କୁଟୁମ୍, ତାଗ୍ଇପାଣିଦୁ ମାରିନ୍କୁ ! ୱାର୍ ମାପୁରୁଦିଙ୍ଗ୍ ଡ଼ିସ୍ତା ମାନାର୍, ୱାର୍ ଇସ୍ରାଏଲଦି ଦାର୍ମୁଦିଙ୍ଗ୍ ଡ଼ିସ୍ତା ମାନାର୍, ୱାର୍ ମୋକମ୍ ଡ଼େପ୍ସି ୱେନ୍କା ସର୍ହା ମାନାର୍ । ମିର୍ ନାଣ୍ଡ ନାଣ୍ଡ ବିରୁଦ୍ କିନି ଉଣ୍ତିଙ୍ଗ୍ ଏନ୍ଦା ମାରି ଡାକାଇ ଆନିଦେର୍ ? ତାଲା ୱିଜୁ ଗାଉ ମାରି ୱିଜୁ ଜିବନ୍ ନବ୍ ଆତାମାନାତ୍ । ପାଦାମ୍ତି ଆଡ୍ଗିରାନ୍ ତାଲା ସାନ୍ଦି ଇନିକାବା ନେଗେଣ୍ଡ୍ ସିଲେତ୍; କେବଲ ସିନା, ବାନେଙ୍ଗ୍ ମାରି ପୁଜ୍ ଗାଉ; ଆୟାୱିଜୁ ଟିପା ମାରି ତରାଇ ଆଏତ୍, ମାରିବା ନିୟୁଦାନ୍ ନରମ୍ କିଆଇ ଆଏତ୍ ।
ମି ଦେସ୍ ଦଂସଆତି ବାଡି; ମି ଗାଡ଼୍କୁ ୱିଜୁ ସିସୁଦୁ କାଡିତା ମାନାତ୍; ମି ବୁମି ଆଇଦେସ୍ତିକାର୍ ମି ଆଗ୍ଡ଼ି ଡ଼ିବିସ୍କିନା ଅନାର୍, ଆକା ଆଇଦେସ୍ତି ଲୋକା ମାଣାନ୍ ନାସ୍ଟୁ ଆନି ୱାଜା ଦଂସବାଡି ଆତାମାନାତ୍ । ମାରି, ସିୟନତି ରିପା ଅଙ୍ଗୁର୍ କିଡ଼ିଇଦି ଗୁଡ଼ା, ଡ଼ିକା କିଡ଼ିଇଦୁ ବାସା, ସାରିବେଡ଼ି ବନ୍ଦକିତି ଗାଡ଼୍ଦି ୱାଜା ଆତାମାନାତ୍ । ପେରିସାକ୍ତି ପ୍ରବୁ ମା ଉଣ୍ତିଙ୍ଗ୍ ଅଡ଼ପ୍ ଲୋକୁ ଏଜିସ୍ କିଜି ଇଡ୍ଏଣ୍ଡା ମାରାନ୍, ମାପୁ ସଦୋମଦି ୱାଜା ଆତାଟ୍ମାନ୍ଧି ମାରି, ମାପୁ ହମରାଦି ୱାଜା ଆତାଟ୍ମାନ୍ଧି ।
ଏ ସଦୋମଦି ସାସନ୍ କିନି ଲୋକୁ, ମାପୁରୁଦି ମାଟା ୱେଣ୍ଡ୍ରୁ, ଏ ହମରାଦି ଲୋକୁ, ମିର୍ ମା ମାପୁରୁଦି ବ୍ୟବସ୍ଥାଦୁ ୱେଣ୍ଡ୍ରୁ । ପ୍ରବୁ ଇଜିନାନ୍, “ମା ଉଣ୍ତିଙ୍ଗ୍ ମି ନାଣ୍ଡ୍ ବଲିଦାନ୍ଦି ୱାଜା ଇନିକା ?” ମାପ୍ ମେଣ୍ଡେଙ୍ଗାଣି ହୋମବଳିଦୁ ମାରି ବାଲ୍ସ୍ତି କୋଡିଙ୍ଗାଣି କଣ୍ୱେସ୍ତୁ ବର୍ତି ଆତାମାନାତ୍; ମାରି, କଡି ବା ମେଣ୍ଡା ଗି ଗରିଏଙ୍ଗାଣି ନେତେର୍ ଦାନ୍ ମା ୱେଡ଼ିକା ସିଲେତ୍ । ମିର୍ ମା ଆଗ୍ଡ଼ି ୱାନି ବେଡ଼ାଦୁ ମା ଦୁୱାର୍ ୱିଜୁ ପାଦାମ୍ ଆଡ୍ଗି ମାଟ୍ନି ଉଣ୍ତିଙ୍ଗ୍ ଏନ୍ ମି ମାଣାନ୍ ବଦା କିଜିନାନ୍ ? ଆରେଏଦି ଦାନା ମାରି ତାମାଟ୍; ଦୁପ୍ଣି ଆଡ଼୍କିନିକା ମା କାଡ଼୍ନିକା; ମି ଆମାସ୍ ମାରି ରମ୍ନିଦିନ୍, ସବାଦି ୱେର୍ନିକା ଇୟା ଅଦାର୍ମୁ ମାରି ପେରିସବା ମାପ୍ ସାସ୍ କିଦେଙ୍ଗ୍ ଆଟ୍ଏପ୍ । ମା ଜିବନ୍ ମି ଆମାସ୍ ମାରି କିନି ପଣ୍ତ୍ୟ ୱିଜୁ କାଡ଼ାନାପ୍; ଆୟାୱିଜୁ ମା ଉଣ୍ତିଙ୍ଗ୍ ସେଇକା; ମାପ୍ ଆୟା ୱିଜୁଦିଙ୍ଗ୍ ପିଣ୍ଡିଦେଙ୍ଗ୍ ୱାନ୍ଦିତା ମାନାପ୍ ।
ମାରି, ମିର୍ ନିଜେଦି କିକୁ ପେର୍ତି ୱାଲେ ମାପ୍ ମି ମାଣାନ୍ ନିଜେଦି କାଣୁକୁ ମୁକୁନାପ୍; ମାରି, ମିର୍ ନାଣ୍ଡ୍ ପାର୍ତନା କିନି ୱାଲେ ମାପ୍ ୱେନ୍ଏପ୍ । ମି କିକୁ ନେତେର୍ଦାନ୍ ପୁରାବର୍ତି ଆତାମାନାତ୍ । ମିର୍ ନିଜେଦିଙ୍ଗ୍ ନର୍ବାଦୁ, ନିଜେଦିଙ୍ଗ୍ ନେଗେନ୍ କିଦୁ; ମା ଆଗ୍ଡ଼ିରାନ୍ ନିଜେଦି କିନିପାଣିଦାନ୍ ତାଗ୍ଇବାଣାକୁ ଆକ ଆଦୁ; ପାପ୍ କିଦେଙ୍ଗ୍ ଡ଼ିସ୍ସ୍ତୁ; ନେଗି ପାଣି କିଦେଙ୍ଗ୍ ଅଜାଦୁ; ନ୍ୟାୟ୍ବିସାର୍ ସେସ୍ଟା କିଦୁ, ସିଲିସାତି ଲୋକାଙ୍ଗ୍ ସାହାଜ୍ୟ କିଦୁ, ବୁବାୟାୟା ସିଲି ଲୋକାଙ୍ଗ୍ ନେଗେଣ୍ଡ୍ତାନ୍ ବିସାର୍ କିଦୁ, ରାଣ୍ଡି ଲୋକା ତରିଟାନ୍ ସାକା ତେବାଦୁ ।
ପ୍ରବୁ ଇଜିନାନ୍, ରାଦୁ, ମାଡ୍ ୱାର୍ଗିଜି ସାନାଟ୍; ମି ପାପ୍ ୱିଜୁ ସିନ୍ଦୁରୁରଙ୍ଗ୍ ୱାଜା ଆତିଙ୍ଗ୍ ବା ମାସୁ ୱାଜା ଅଡ଼ିନିକା ଆନାତ୍; ଆୟାୱିଜୁ ଏରାଙ୍ଗା ୱାଜା ରଙ୍ଗ୍ ଆତିଙ୍ଗାନେ ମେଣ୍ଡା ବୁର୍ବୁସା ୱାଜା ଆନାତ୍ । ଜଦି ମିର୍ ରାଜିଆନିଦେର୍ ମାରି ମାଟା ମାନାନିଦେର୍, ଆଦେଙ୍ଗ୍ ଦେସ୍ତି ନେଗି ପଲ୍ ପୋଇନିଦେର୍ । ମାତର୍ ଜଦି ମିର୍ ମାନାଇଦେର୍ ମାରି ବିରୁଦ୍ ଆନିଦେର୍, ଆର୍ତିଙ୍ଗ୍ କାଣ୍ତାଦାନ୍ କାତ୍ନାର୍; ଇରିଙ୍ଗ୍ ପ୍ରବୁଦି ବଲୁ ଇକା ଇର୍ହାମାନାନ୍ ।
ପାପ୍ତୁ ମାନି ଗାଡ଼୍
ସାନ୍ତିଦି ଗାଡ଼୍ ଏଣ୍ଡେସ୍ୱାଜା ଦାରି ଆତା ମାନାତ୍ ! ଆୟା ନିୟାୟ୍ବିସାର୍ଦାନ୍ ବର୍ତି ମାର୍ହାତ୍ । ଦାର୍ମୁ ଆବେନୁ ବାସା କିତାତ୍, ମାତର୍ ଇଲେଇ ଲୋକାଙ୍ଗ୍ କାତ୍ନିକାର୍ ମାନାର୍ । ମି ୱେଣ୍ତି କିଟିମ୍ ଆତାମାନାତ୍, ମି ଅଙ୍ଗୁର୍ ରସ୍ ଏରୁ ମିସାତେମାନେ । ମି ଅଦିପତିର୍ ବିରୁଦ୍ କିନିକାର୍ ମାରି ଡଙ୍ଗାର୍ଙ୍ଗା ସଙ୍ଗ୍; ୱିଜେରେ ଲାସ୍ଦିଙ୍ଗ୍ ଜିବନ୍ନୋନାର୍ ବାଦା ଇସାବ୍ଦାନ୍ ୱେନ୍କା ଆନାର୍; ୱାର୍ ବୁବାୟାୟା ସିଲିଲୋକାଙ୍ଗ୍ ବିସାର୍ କିଏର୍, ମାରିବା ରାଣ୍ଡି ଲୋକା ମାଟା ୱାରି ଲାକ୍ତୁ ରେଏତ୍ ।
ଇୟାଉଣ୍ଡିଙ୍ଗ୍ ପ୍ରବୁ, ପେରିସାକ୍ତି ପ୍ରବୁ, ଇସ୍ରାଏଲଦି ସାକ୍ତି ସିନିକାନ୍ ଇନାନ୍, ୱେଣ୍ଡ୍ରୁ, ମାପ୍ ନିଜେଦି ସାତ୍ରୁରି ବିସୟ୍ତାନ୍ ସାନ୍ତି ପଇନାଟ୍ ମାରି ମାଡ୍ ନିଜେଦି ସାତ୍ରୁରି ମାଣାନ୍ ଇସାବ୍ ଅନାପ୍; ମାରି, ନାନୁ ମି ତରିନ୍ ନିଜେଦି କିୟୁ ଡ଼େପ୍ସି ମି କିଟିମ୍ ୱିଜୁ ପୁରା ୱାଜା ନର୍ନାପ୍ ମାରି ମି ମାଇଲା ୱିଜୁ କୁତୁନା ଅନାନ୍; ମାରି, ମାପ୍ ପୁର୍ବେ କାଡ଼ା ୱାଜା ମି ବିସାର୍ କିନି ପେରିଲୋକାଙ୍ଗ୍ ମାରି ଆଗ୍ଡ଼ିରି ବେଡ଼ା ୱାଜା ମି ମନ୍ତ୍ରିରିଙ୍ଗ୍ ପୁନା କିନିକା; ତାନିୱେନ୍କା ମିର୍ ଦାର୍ମୁଦି, ସାନ୍ତି ଗାଡ଼୍ ଇଜି ୱେଙ୍ଗିଁନାତ୍ ।
ସିୟୋନ ନିୟାୟ୍ବିସାର୍ଦାନ୍ ମାରି ୱାନି ଡ଼େସି ୱାନି ଲୋକୁ ଦାର୍ମୁଦାନ୍ ରକିୟା ପୋଇନାର୍ । ମାତର୍ ଅଦାର୍ମୁଦିକାର୍ ମାରି ପାପି ଲୋକୁ ଅର୍ସେ ନାସ୍ଟୁ ଆନାର୍ ମାରି ଆମାକାର୍ ପ୍ରବୁଙ୍ଗୁଁ ଡ଼ିସ୍ନାର୍, ୱାର୍ ସାନାର୍ ।
ଇରିଙ୍ଗ୍ ୱାର୍ ମି ଉର୍ତି ଅଲନ୍ ମାରାନୁ ବିସୟ୍ତାନ୍ ସେମାର୍ ଆନାର୍, ମାରି, ମିର୍ ନିଜେଦି ବାସେକିତି ଡଡିଦି ୱିଜୁ ବିସୟ୍ଦାନ୍ ନିସାର୍ ଆନିଦେର୍ । ଏନ୍ଦାଇରିଙ୍ଗ୍ ମିର୍ ୱାର୍ତି ଆକୁ ଅଲନ୍1 ମାରାନ୍ ମାରି ଏରୁସିଲି ଡଡି ୱାଜା ଆନିଦେର୍ । ମାରି, ସାକ୍ତିଦି ଲୋକୁ ୱାର୍ତି ନାଡ଼ା ୱାଜା ମାରି ୱାନି ପାଣି ସିସୁଡ଼ିବୁଦି ୱାଜା ଆନାତ୍; ଆୟା ରୁଣ୍ଡି ଅର୍ସେ କାସ୍ନେ ମାରି ଏନ୍ ଆକା ନାପ୍ଏନ୍ ।
Source notes (1)
- Footnote ଇସ୍ରାଏଲ ଦେସ୍ତି ମାରିଉଣ୍ଡ୍ରି ବାଗ୍ତୁ ଇୟା ଅଲନ୍ ମାରାନ୍ ମାନାତ୍,
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.