Konda Porja Bible
ଏଜ୍ରା 6
ଦାରିୟାବସଦି ଆଦେସ୍
ନାସ୍ତିୱାଲେ ଦାରିୟାବସ ରାଜା ଆଦେସ୍ ସିତାନ୍ । ମାରି ବାବିଲତି ଏମେ ବଇଙ୍ଗ୍ ଇଡ୍ନି ଇଲୁଦୁ ରାସାତି ଇସାବ୍ତାନ୍ ଦନ୍ ଇଡାତାମାର୍ହାତ୍, ଆବେ ଆକା ପୟ୍ତାର୍ । ମାରି, ମାଦିୟ ଦେସ୍ତି ଅକ୍ଷ୍ମତା ଦର୍ତି ରାଜା ଇଲୁଦୁ ଉନ୍ଡ୍ରି ତର୍ତି ବଇ ପୟ୍ତାର୍, ଆୟା ଲୋଇ ଏତ୍କିନି ଇୟାୱାଜା ରାସାତା ମାର୍ହାତ୍ ।
କରସ୍ ରାଜାଦି ସାସନ୍ତି ପାର୍ତୁମ୍ ବାର୍ସେକ୍ କରସ୍ ରାଜା ଜିରୁସାଲମତୁ ମାପୁରୁଦି ପାର୍ତନା ଇଲୁ ବିସୟ୍ତାନ୍ ଇୟା ମାଟା ଇର୍ହାନ୍, “ଲୋକା ପୁଜାସିନି ବାଡି ଆୟା ଇଲୁ ତିଆର୍ ଆପିତ୍ ମାରି ଆବେଣି କୁନାଦିକାଲୁ ଡାଟ୍ତାନ୍ ତିଆର୍ ଆପିତ୍; ଆବେଣି ଉଚା ସାଟେ ଗୋଟା ମୁରେଙ୍ଗ୍ ମାରି ଆବେଣି ଅସାର୍ ସାଟେ ଗୋଟା ମୁରେଙ୍ଗ୍ ଆପିତ୍; ଆକା ମୁନ୍ଡ୍ରି ଦାଡ଼ି ପେରି ପେରି କାଲ୍କାଣ୍କୁ ନି ଉନ୍ଡ୍ରି ଦାଡ଼ି ପୁନି ମାରାନ୍ ପାଟିଆଦାନ୍ ଗୁତ୍ତୁ; ମାରି, ରାଜା ଇଲୁଦାନ୍ ଆବେଣି କାର୍ସୁ ସିପିର୍; ମାରିବା, ମାପୁରୁଦି ପାର୍ତନା ଇଲୁଦି ଏମେ ୱିଜୁ ବାଙ୍ଗାଁରାଓ ନି ୱେଣ୍ତିଦି ଡୁବାଇ ନବୂଖଦ୍ନିତ୍ସର ଜିରୁସାଲମତି ଇଲୁଦାନ୍ ଅସି ବାବିଲତୁ ତାତାମାର୍ହାନ୍, ଆକାୱିଜୁ ଡ଼େସି ସିପିର୍, ମାରି ୱିଜୁ ଡୁବାଇଙ୍ଗୁଁ ମାରିଡ଼େସି ଜିରୁସାଲମତି ପାର୍ତନା ଇଲୁଦୁ ନିଜେ ନିଜେ ବାଡିଦୁ ତାପିର୍, ମାରି ମିରୁ ମାପୁରୁଦି ଇଲୁଦୁ ଆୟାୱିଜୁ ଇଡ୍ଦୁ ।”
“ଇୟାଉଣ୍ତିଙ୍ଗ୍ ଏ ତତ୍ତନୟ, ପରାତ୍ ଗାଡା ଆୟାପାଡ଼ାକାଦି ଦେସ୍କାଣି ପେରିକାନ୍, ଏ ଶଥର-ବୋସଣୟ, ମିରୁ ନି ମି ତଡ଼୍କୁ ଗାଡା ଆୟାପାଡ଼ାକାଦି ଅପର୍ସଖୀୟର୍, ଆବେଣାନ୍ ଆକ ତେବାଦୁ; ମାପୁରୁଦି ଇୟା ଇଲୁଦି ପାଣିଦୁ କିୟୁ କିମାଟ୍; ଜିହୁଦିୟରି ପେରିକାନ୍ ନି ଜିହୁଦିୟରି ନେତାର୍ ମାପୁରୁଦି ଇୟା ପାର୍ତନା ଇଲୁ ଇୟାବାଡିଦୁ ତିଆର୍ କିପିର୍ । ମାରିବା, ମାପୁରୁଦି ଇୟା ଇଲୁ ତିଆର୍ କିନି ଉଣ୍ତିଙ୍ଗ୍ ମି ଇୟା ଜିହୁଦିୟ ନେତାରି ଉଣ୍ତିଙ୍ଗ୍ ଏମେକା କିନି ପାଣି, ଆକା ମାପୁ ମାଟା ସିତାମାନାପ୍; ୱାରି ବାଦା ଏଣ୍ତେସ୍ ସୋଏତ୍, ଇୟାଉଣ୍ତିଙ୍ଗ୍ ଆୟା ଲୋକାଙ୍ଗ୍ ରାଜା ଦନ୍ତାନ୍, ମାରି, ଗାଡା ଆୟାପାଡ଼ାକାଦି ରାଜା ସିସୁଟୁଦାନ୍ ନାଣ୍ତ ଜାତୁନ୍ତାନ୍ କାର୍ସୁ ସିପିର୍ । ମାରି, ମୁସ୍କୁପୁର୍ତି ମାପୁରୁଦି ସିସୁଦୁ ହମ୍ ଆଡ଼ିକ୍ନି ଉଣ୍ତିଙ୍ଗ୍ ଜିରୁସାଲମତି ଜାଜକରି ମାଟା ଇସାବ୍ତାନ୍ ବାଲ୍ସ୍ତି କଡି ନି ମେଣ୍ତା ନି ମେଣ୍ତାପିଲା, ଗଦ୍ମୁ, ସରୁ, ଅଙ୍ଗୁର୍ରସ ମାରି ନିୟୁ, ଏମେ ଏମେକା ୱାରି ଦର୍କାର୍, ଆକାୱିଜୁ ଦିନ୍ତିଙ୍ଗ୍ ଦିନ୍ ବାଦାଏଣ୍ଗା ୱାରିଙ୍ଗ୍ ସିଆୟ୍ଆପିତ୍; ଆବେନୁ ୱାର୍ ମୁସ୍କୁପୁର୍ତି ମାପୁରୁଦି ଉଦେସ୍ତାନ୍ ନେଗି ବାସ୍ନା ପୁଜା ସିନାର୍, ମାରି ରାଜାଦି ନି ୱାନି ମାରିନ୍କା ଜିବନ୍ ଉଣ୍ତିଙ୍ଗ୍ ପାର୍ତନା କିନାର୍ ।” “ମାରିବା ନାନ୍ ୱେର୍ସିନା ଜେ, ଏନ୍ଆପିନ୍ ଇୟା ମାଟା ମାନାଏନ୍, ୱାନି ଇଲୁଦାନ୍ ଉନ୍ଡ୍ରି ପାଟିଆ ସପାୟ୍ଆଜି ଆୟା ପାଟିଆଦୁ ୱାନ୍ ତରାୟ୍ ଆଜି ଡ଼ଆପିନ୍; ମାରି, ଆୟା ଉଣ୍ତିଙ୍ଗ୍ ୱାନି ଇଲୁ ଗାତାମ୍ଗୁଟା କିଆୟ୍ଆପିତ୍ । ମାରି, ଆମା ଆମା ରାଜା ନି କୁଟୁମ୍ତିକାର୍ ମାପୁରୁଦି ଜିରୁସାଲମ୍ତି ଇୟା ପାର୍ତନା ଇଲୁ ଦଂସ କିନି ଉପାୟ୍ତାନ୍ ରାସାତି ମାଟା ମାନାଏନ୍, ଆୟା ୱିଜେରିଙ୍ଗ୍ ଜିରୁସାଲମତୁ ନିଜେ ଦରୁ ତିଆର୍କିନି ମାପୁରୁ ୱେର୍ଏ କିପିନ୍ । ନାନ୍ ଦାରିୟାବସ ଇୟା ମାଟା ୱେର୍ତାମାନା; ଇକା ନାଣ୍ତ ଜାତୁନ୍ତାନ୍ କିଆୟ୍ଆପିତ୍ ।”
ପାର୍ତନା ଇଲୁଦିଙ୍ଗ୍ ସର୍ପେକିନିକା
ଆବେଟ୍ ଦାରିୟାବସ ରାଜା ଇୟା ମାଟା ପୋକତିଙ୍ଗ୍ ଗାଡା ଆୟାପାଡ଼ାକାଦି ଦେସ୍ତି ପେରିକାନ୍ ତତ୍ତନୟ ନି ଶଥର-ବୋସଣୟ ମାରି ୱାରି ସାଙ୍ଗର୍ ନାଣ୍ତ ଜାତୁନ୍ତାନ୍ ଆୟା ଇସାବ୍ତାନ୍ ପାଣି କିତାର୍ । ଇବେନୁ ହାଗୟ ବବିସ୍ୟତ୍ବକ୍ତାଦି ନି ଇଦ୍ଦୋର ମାରିନ୍ ଜିକରିୟଦି ବବିସ୍ୟତ୍ବାକ୍ୟ ଇସାବ୍ତାନ୍ ଜିହୁଦିୟ ନେତାର୍ ପାର୍ତନା ଇଲୁଦିଙ୍ଗ୍ ତିଆର୍ କିତାର୍ ମାରି କିତିପାଣି ଆତାର୍ । ମାରି, ୱାର୍ ଇସ୍ରାଏଲତି ମାପୁରୁଦି ମାଟା ଇସାବ୍ତାନ୍ ମାରି ପାରସ୍ୟ ରାଜା କରସ୍ ନି ଦାରିୟାବସ ନି ଅର୍ତ୍ତକ୍ଷସ୍ତଦି ମାଟା ଇସାବ୍ତାନ୍ ତିଆର୍ କିଜି ୱିସ୍ତାର୍ । ଦାରିୟାବସ ରାଜାଦି ସାସନ୍ତି ସୋଅ ବାର୍ସେକ୍ତୁ ଅଦର1 ଦରୁଦି ଲେଜୁଦି ମୁନ୍ଡ୍ରି ଦିନ୍ତୁ ଇୟା ଇଲୁ ୱିଜିତାତ୍ ।
ଇୟାୱେନ୍କା ଇସ୍ରାଏଲତି ଲୋକୁ, ଜାଜକର୍ ନି ଲେବିୟର୍ ମାରି ଜଇଲ୍ତୁ ତେବାତିମାନି ମାରିନ୍କୁ ୱେଡ଼ିକାଦାନ୍ ମାପୁରୁଦି ଇୟା ଇଲୁଦୁ ପାର୍ତୁମ୍ ବାସାନି ପଣ୍ତୟ୍ କିତାର୍ । ମାରି, ମାପୁରୁଦି ଇୟା ପାର୍ତନା ଇଲୁଦି ପାର୍ତୁମ୍ ବାସାନି ବେଡ଼ାଦୁ ୱାର୍ ସହେ ଗୋଟା କଡିଙ୍ଗ୍, ଦୁଇସୋ ଗୋଟା ମେଣ୍ତେଙ୍ଗ୍, ସାରିସ ଗୋଟା ମେଣ୍ତାପିଲେକ୍ ସିତାର୍; ମାରି, ୱିଜୁ ଇସ୍ରାଏଲତି ପାପ୍କେମାଦି ପୁଜା ଉଣ୍ତିଙ୍ଗ୍ ଇସ୍ରାଏଲିୟ କୁଟୁମ୍ତି ଇସାବ୍ତାନ୍ ବାର ଗୋଟା ଗରିଏଙ୍ଗ୍ ସିତାର୍ । ମାରି, ୱାର୍ ମୋସା - ବଇଦି ରାସ୍ତିମାନି ଇସାବ୍ତାନ୍ ଜିରୁସାଲମତୁ ମାପୁରୁଦି ସେବାଦୁ ଜାଜକରିଙ୍ଗ୍ ୱାରି ବାଗ୍ ଇସାବ୍ତାନ୍ ମାରି ଲେବିୟରିଙ୍ଗ୍ ୱାରି ପାଲି ଇସାବ୍ତାନ୍ ଆସ୍ କିତାର୍ ।
ଡ଼ିସାୟ୍ଆନି ପଣ୍ତୟ୍ କିତାର୍
ଇୟାୱେନ୍କା ପାର୍ତୁମ୍ ଲେଜୁଦି ସଉଦ ଦିନ୍ତୁ ଜଇଲ୍ତୁମାନି ମାରିନ୍କୁ ଡ଼ିସାୟ୍ଆନି ପଣ୍ତୟ୍ କିତାର୍ । ଇରିଙ୍ଗ୍ ଜାଜକର୍ ନି ଲେବିୟର୍ ଉଡ୍ରେମାନୁ ନିଜେଦିଙ୍ଗିଁ ସୁଚି କିତାର୍; ଆୟାୱିଜେରେ ସୁଚି ଆତାମାର୍ହାର୍; ଆଦେଙ୍ଗ୍ ୱାରୁ ଜଇଲ୍ତୁମାନି ୱିଜେରି ମାରିନ୍କା ଉଣ୍ତିଙ୍ଗ୍, ନିଜେ ଜାଜକ - ତଡ଼ାନ୍କା ଉଣ୍ତିଙ୍ଗ୍ ନି ନିଜେଦିୱାରି ଉଣ୍ତିଙ୍ଗ୍ ଡ଼ିସାୟ୍ଆନି ପଣ୍ତୟ୍ତି ପୁଜା କିତାର୍ । ମାରି ବାବିଲ ଦେସ୍ତୁ ଜଇଲ୍ତୁ ମାର୍ହି ଡ଼େସି ୱାତି ଇସ୍ରାଏଲ ଲୋକୁ ମାରି ଏମେକାର୍ ୱାରି ତରିନ୍ ଆଜି ଇସ୍ରାଏଲତି ମାପୁରୁ ପ୍ରବୁଦିଙ୍ଗ୍ ସୁଡ଼ୁନି ଉଣ୍ତିଙ୍ଗ୍ ଦେସ୍ତି ଲୋକୁ ଆଇ ଦେସ୍ତିୱାରି ତାଗ୍ଇ ପାଣିଦାନ୍ ନିଜେଦିଙ୍ଗ୍ ୱେର୍ଏ କିତାମାର୍ହାର୍, ଆୟା ୱିଜେରେ ଉଟାର୍ । ମାରି, ସାତ୍ ଦିନ୍ ସାନ୍ଧି ସୟ୍ଇ ରୁଟିଦି ପଣ୍ତୟ୍ କିତାର୍; ଇରିଙ୍ଗ୍ ପ୍ରବୁ ୱାରିଙ୍ଗ୍ ୱେଡ଼ିକା କିତାମାର୍ହାନ୍ ମାରି ଇସ୍ରାଏଲତି ମାପୁରୁ, ମାପୁରୁଦି ପାର୍ତନା ଇଲୁ ପାଣିଦୁ ୱାରି କିୟୁ ଡାଟ୍ କିନି ଉଣ୍ତିଙ୍ଗ୍ ୱାରି ଉଣ୍ତିଙ୍ଗ୍ ଅସୁରିୟ ରାଜାଦି ୱିଜୁଜିନିସ୍ ଡ଼େସିସିତା ମାର୍ହାର୍ ।
Source notes (1)
- Footnote ଅଦର ମାଗ୍ ନି ପଗୁଣ ଲେଜୁଦିଙ୍ଗ୍ ଅଦର ଇନାର୍
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.