Konda Porja Bible
ଉପଦେସକ 4
ଦୁନିଆଦୁ ଅନ୍ୟାୟ୍
ତାନିୱେନେକା ନାନୁ ଡ଼େସିୱାଜି ୱେଡ଼ା ଆଡ୍ଗି କିତିମାନି ବାଦା ୱିଜୁ ସୁଡ଼ୁତା;
ମାରି ସୁଡ଼ୁଦୁ, ବାଦା ପଇତି ଲୋକୁ ଆଡ଼ାବାନାର୍,
ମାରି ୱାରିଙ୍ଗ୍ ସାନ୍ତି କିନିକାନ୍ ଏନ୍ ସିଲେନ୍;
ମାରି, ୱାରି ଡଙ୍ଗାଁକିନିୱାରି ତୋରନ୍ ସାକ୍ତି ମାନାତ୍,
ମାତର୍ କାସ୍ଟୁ ପଇତିମାନି ଲୋକାଙ୍ଗ୍ ସାନ୍ତି ସିନିକାନ୍ ଏନ୍ ସିଲେନ୍ ।
ଇୟାଉଣ୍ତିଙ୍ଗ୍ ନାନୁ ଇଲେଇ ଜିବନ୍ମାନି ଲୋକା ବାଦ୍ଲୁ ଇୟା ଆଗିଡ଼ିରାନ୍ ସାତି ୱାରିଙ୍ଗ୍ ନାଣ୍ତ ୱେଡ଼ିକା କିତା; ମାତର୍ ଏମେ ଲୋକ୍ ନେରୁ ସାନ୍ଦି ଜନମ୍ ଆଏର୍ ମାରି ୱେଡ଼ା ଆଡ୍ଗି କିତି ତାଗ୍ଇ ପାଣି ସୁଡ଼ୁଏନ୍, ୱାନିଙ୍ଗ୍ ନାନୁ ଆୟା ରିଏରି ବାଦ୍ଲୁ ନାଣ୍ତ ନେଗି ବୁଦି ଅଡ଼୍ବିତା । ଆବେଟ୍ ନାନୁ ୱିଜୁ ପାଣି ମାରି ୱିଜୁ ପୁରା ପାଣି ସୁଡ଼ୁତା, ଆୟାଉଣ୍ତିଙ୍ଗ୍ ଲୋକୁ ନିଜେଦି ପାଡ଼ାକାଦି ଲୋକା ଆକାର୍ ଆନାନ୍ । ଇକା ନେ ବେକାର୍ ମାରି ଇକା ଗାଲିଦିଙ୍ଗ୍ ଆସ୍ନିକା ୱାଜା । ମୁର୍କୁ ଲୋକ୍ ନିଜେଦି କିୟୁ ଉଣ୍ତ୍ରି ମୁଟି କିଜି ନିଜେଦି କାଣ୍ତା ତିନାନ୍ ।1 ନାଣ୍ତପାଣି ମାରି ଗାଲିଦି ୱେନ୍କା ଉରୁକ୍ସି ସନି ୱାଲେ ରୁଣ୍ତି ମୁଟି ବାଦ୍ଲୁ ସାନ୍ତିଦି ୱାଲେ ଉଡ୍ରେ ମୁଟି ନେଗେତ୍ । ଆର୍ତିଙ୍ଗ୍ ନାନୁ ଡ଼େସିୱାଜି ୱେଡ଼ା ଆଡ୍ଗି ବେକାର୍ତିକା ସୁଡ଼ୁତା । ଏମେ ଲୋକ୍ ଅରେନ୍ନେ ତେବାନାନ୍ ମାରି ୱାନି ୱାଲେ ଏନ୍ ସିଲେନ୍; ମାରିବା ୱାନି ମାରିନ୍ କି ତଡ଼ାନ୍ ସିଲେର୍; ଆର୍ତିଙ୍ଗ୍ ୱାନି ୱିଜୁ ପାଣିଦି ସାନ୍ଦି ସିଲେତ୍, ମାରିବା ଦନ୍ଦୁ ୱାନି କାଣାଗା ପୁରା ସିଲେତ୍ । ୱାନ୍ ଇନାନ୍, ଆର୍ତିଙ୍ଗ୍ ନାନୁ ଏ ଉଣ୍ତିଙ୍ଗ୍ ପାଣି କିଜିନା ମାରି ନିଜେଦି ଜିବନ୍ତିଙ୍ଗ୍ ସୁକ୍ଦାନ୍ ଜିପିସ୍ କିଜିନା ? ଇକା ନେ ବେକାର୍ ମାରି ବେସି କାସ୍ଟୁଦିକା ।
ଅରେନ୍ ମାଡ଼ାନ୍ ରିଏର୍ ନେଗିକାର୍, ଇରିଙ୍ଗ୍ ୱାର୍ ନିଜେ ନିଜେଦି ପାଣିଦାନ୍ ନେଗି ପଲ୍ ପୋଇନାର୍ । ଜଦି ୱାର୍ ମେଡ଼୍ତିଙ୍ଗ୍, ଅରେନ୍ ନିଜେ ତୋଡ଼ୁଦିଙ୍ଗ୍ ନିକ୍ନାନ୍; ମାତର୍ ଏନ୍ ମେଡ଼୍ନି ୱାଲେ ଅରେନ୍ନେ ତେବାନାନ୍ ମାରି ୱାନିଙ୍ଗ୍ ନିକ୍ନି ଉଣ୍ତିଙ୍ଗ୍ ଆଇକାନ୍ ଏନ୍ ସିଲେନ୍, ୱାନ୍ ଦୁଃକ୍ ପଇନି ଲୋକ୍ । ମାରିବା, ରିଏର୍ ଅର୍ସେ ଡରିତିଙ୍ଗ୍ ଉସୁମ୍ ଆନାର୍; ମାତର୍ ଅରେନ୍ନେ ଏଣ୍ତେସ୍ ଉସୁମ୍ ଆଦେଙ୍ଗ୍ ଆଟ୍ନାନ୍ ? ଏନ୍ ଅରେନ୍ନେ ମାନି ଲୋକ୍ତିଙ୍ଗ୍ ଆରା କିନାନ୍, ଆର୍ତିଙ୍ଗ୍ ରିଏର୍ ୱାନି ବିରୁଦ୍ କିନାର୍; ମାରି ତିନିଗୁଣ୍ ନାସୁ ବେଗି ତେଉଦେଙ୍ଗ୍ ଆଟ୍ଏତ୍ ।
ଏମେ ଡକରା ମାରି ବୁଦିସିଲି ରାଜା ମାରି ଇନି ମାଟା ମାନାଦେଙ୍ଗ୍ ନେସ୍ଏନ୍, ଆୟା ବାଦ୍ଲୁ କାକୁର୍ତି ମାରି ବୁଦିମାନି ମୁର୍ ଲୋକ୍ ନେଗିକା । ଇରିଙ୍ଗ୍ ୱାନ୍ ରାଜା ଆନି ଉଣ୍ତିଙ୍ଗ୍ ଜଇଲ୍ଦାନ୍ ସୋତା ୱାତାନ୍; ମାରିବା, ୱାନ୍ ୱାନି ଦେସ୍ତୁ କାକୁର୍ତି ଆଜି ଜନମ୍ ଆତାମାର୍ହାନ୍ । ନାନୁ ୱେଡ଼ା ଆଡ୍ଗି ବୁଲାଜିନି ୱିଜୁ ଜିବଜାତୁଙ୍ଗାଁ ସୁଡ଼ୁତା ଜେ, ୱାର୍ ଆୟା ମୁରୁଲିୱି, ଏମେ ମାରିଅରେନ୍ ଲୋକୁ ଇୟା ବାଡିଦୁ ନିଙ୍ଗିଁତାନ୍, ୱାନି ତୋଡ଼ୁ ମାର୍ହାନ୍ । ୱାନ୍ ଏମେୱାରି ମୁସ୍କୁ ପେରିକାନ୍ ଆତାନ୍, ଆୟା ଲୋକୁ ନାଣ୍ତ ଆତାର୍; ଆର୍ତିଙ୍ଗ୍ ୱାଜିନିଦିନ୍ତି ଲୋକୁ ୱାନି ମାନୁ ୱେଡ଼ିକା କିଏର୍ । ସତେନେ ଇକା ନେ ବେକାର୍ ମାରି ଗାଲିଦିଙ୍ଗ୍ ଆସ୍ନିକା ଲକା ୱାଜା ।
Source notes (1)
- Footnote ନିଜେଦି କାଣ୍ତା ତିନାନ୍ ଅର୍ତାତ୍ ନିଜେଦିଙ୍ଗ୍ ସାପିସ୍ କିନାନ୍
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.