Konda Porja Bible
ଉପଦେସକ 1
ଜିବନ୍ ଆରେଦିକା
ଦାଉଦଦି ମାରିନ୍, ଜିରୁସାଲାମଦି ରାଜା, ଅଜାକିନି ଲୋକୁଦି ମାଟା ।
ଅଜାକିନିକାନ୍ ୱେର୍ସିନାନ୍, “ୱାର୍ହିକା ନେ ୱାର୍ହିକା, ୱାର୍ହିକା ନେ ୱାର୍ହିକା, ୱିଜୁ ନେ ୱାର୍ହିକା ।”
ଏମେ ଲୋକ୍ ୱେଡ଼ା ଆଡ୍ଗି ଏମେ ଏମେ ପାଣି କିଜି ୱାନ୍ଦ୍ଜିନାନ୍, ତାନିମାଡ଼ାନ୍ ଇନିକା ଲାବ୍ ଆଜିନାତ୍ ?
ଉଣ୍ତ୍ରି ପିଡ଼ି ସନାତ୍ ମାରି ଉଣ୍ତ୍ରି ପିଡ଼ି ୱାନାତ୍; ମାତର୍ ଦୁନିଆ ୱିଜୁଦିନ୍ ତେବାନାତ୍ ।
ମାରି ୱେଡ଼ା ସନାତ୍ ମାରି ୱେଡ଼ା ଆର୍ନାତ୍, ମାରି ନିଜେଦି ସତି ବାଡିଦୁ ଡ଼େସି ସନି ଦାନ୍ଦା ଆନାତ୍ ।
ଗାଲି ଉଣେରି ତରିଙ୍ଗ୍ ସନାତ୍ ମାରି ଡେବିରି ତରନ୍ ୱାନାତ୍; ନିଜେଦି ସାରିଦୁ ୱିଜୁଦିନ୍ ତିର୍ବ୍ଜି ଗାଲି ମାରିଡ଼େସି ୱାନାତ୍ ।
ୱିଜୁ ଗାଡେଙ୍ଗ୍ ସାମ୍ଦୁର୍ତୁ ସୋଲ୍ସି ମିସାଜିନେ, ମାରିବା ସାମ୍ଦୁର୍ ବର୍ତି ଆଏତ୍; ୱିଜୁ ଗାଡେଙ୍ଗ୍ ନିଜେ ନିଜେଦି ୱାତି ସାରିଦୁ ମାରିଡ଼େସି ସନେ ।
ୱିଜୁ ପାଣି ଦାନ୍ଦାଦିକା; ଲୋକ୍ ଆକା ୱେର୍ତେଙ୍ଗ୍ ଆଟ୍ଏନ୍; କାଣାଗା ସୁଡ଼ୁନି ମାଡ଼ାନ୍ ତିର୍ ଆଏତ୍, ଇରିଙ୍ଗ୍ ଗିତଣି ୱେନି ମାଡ଼ାନ୍ ପୁରା ଆଏତ୍ ।
ଆମାକା ଇନିକା ଆତାମାନାତ୍, ଆକା ନେ ଆନାତ୍ ମାରି ଏମେକା କିଆଇ ଆତାମାନାତ୍, ଆକା ନେ କିଆଇଆନାତ୍; ମାରି, ୱେଡ଼ା ଆଡ୍ଗି ଇନି ପୁନି ବିସୟ୍ ସିଲେତ୍ ।
ସୁଡ଼ୁଦୁ, ଏମେ ମାଟା ଲକୁ ଇଜିନାର୍, ଆକା ପୁନିକା, ଇୟାୱାଜା ଇନି ବିସୟ୍ ମାନାତ୍ ? ଆକାତ୍ ପୁର୍ବେକାଡ଼ାଦୁ ପୁରା ଆଗ୍ଡ଼ିରାନ୍ ମାର୍ହାତ୍ ।
ପୁର୍ବେକାଡ଼ାଦି ଲୋକା ବିସୟ୍ତାନ୍ ଇନିକା ଏତ୍ ମାନ୍ଏତ୍; ସିଲ୍ତିଙ୍ଗ୍ ୱାଜିନିଦିନ୍ତୁ ଏମେକାର୍ ଜନମ୍ ଆନାର୍, ୱାରି ଏତ୍ କିନିକା ନେ ୱାଜିନିଦିନ୍ତି ଲୋକା ମାନୁ ବା ତେବାଏତ୍ ।
ବୁଦି ବେକାର୍ଦିକା
ନାନୁ ଅଜାକିନିକାନ୍, ଜିରୁସାଲାମତୁ ଇସ୍ରାଏଲ ମୁସ୍କୁ ରାଜା ମାର୍ହା । ମାରି, ନାନୁ ବାଦଡ଼ ଆଡ୍ଗି କିତି ୱିଜୁ ବିସୟ୍ ବୁଦିଦାନ୍ ଏତ୍ କିଜି ମାରି ପୋଇନି ଉଣ୍ତିଙ୍ଗ୍ ମନ୍ଦିୟାନ୍ କିତା; ଇୟାମାଣାନ୍ ମାପୁରୁ ଜେ ଲୋକାଙ୍ଗ୍ ଦାନ୍ଦା ଆଦେଙ୍ଗ୍ ସିତାମାନାନ୍, ଇକା ବେସି କାସ୍ଟୁଦିକା । ୱେଡ଼ା ଆଡ୍ଗି କିତି ୱିଜୁ ପାଣି ନାନୁ ସୁଡ଼ୁତାମାନା; ମାରି ସୁଡ଼ୁଦୁ, ୱିଜୁ ବେକାର୍, ଗାଲିଦି ୱେନ୍କା ଉରୁକ୍ନିକା ୱାଜା । ଆମାକା ୱେକଣି, ଆକା ସାଡ଼ୁକୁ ଆଦେଙ୍ଗ୍ ଆଟ୍ଏତ୍, ମାରି ଆମାକା ସିଲେତ୍, ଆକା ଲେକିସ୍ କିଦେଙ୍ଗ୍ ଆଟ୍ଇକା ।
ନାନୁ ନିଜେଦି ମନ୍ତୁ ଅଡ଼୍ବିଜି ଇର୍ହା, “ସୁଡ଼ୁଦୁ, ଜିରୁସାଲାମଦୁ ନା ଆଗ୍ଡ଼ି ମାର୍ଇ ୱିଜୁ ଲୋକା ମାଣୁକୁ ନାନୁ ବେସି ଜ୍ଞାନ୍ ନେସ୍ତାମାନା; ମାରିବା, ନାଙ୍ଗିଁ ନାଣ୍ତ ବୁଦି ମାରି ବିଦ୍ୟାଦୁ ଅଜାତାମାନା ।” ଆବେଟ୍ ନାନୁ ବୁଦିଦି ବିସୟ୍, ମାରି ବାୟା ମାରି ବୁଦିନେସ୍ଇ ବିସୟ୍ ନେସ୍ନି ଉଣ୍ତିଙ୍ଗ୍ ବଦା କିତା; ଇକା ନେ ଗାଲିଦି ୱେନେକା ଉରୁକ୍ନିକା ଇଜି ନେସ୍ତା । ଇରିଙ୍ଗ୍ ନାଣ୍ତ ବୁଦିଦୁ ବେସି କାସ୍ଟୁ ମାନାତ୍; ମାରି, ଏନ୍ ବିଦ୍ୟା ନାଣ୍ତ ଅଜାନାନ୍, ୱାନ୍ ଦୁଃକ୍ ନାଣ୍ତ ପଇନାନ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.