Konda Porja Bible
ଦାନିୟେଲ 8
ଦାନିୟେଲତି ବର୍ ମେଣ୍ଡା ମାରି ଗରିଆ
ବେଲ୍ଶତ୍ସର ରାଜାଦି ସାସନ୍କିନି ମୁଣ୍ଡ୍ରି ବାର୍ସେକ୍ତୁ ନାନ୍ ଦାନିୟେଲ ପାର୍ତୁମ୍ ଦର୍ସନ ୱେନ୍କା ମାରି ଉନ୍ଡ୍ରି ଦର୍ସନ ପୋଇତା । ମାରି, ନାନ୍ ବର୍ତାନ୍ ସୁଡ଼ୁତା; ନା ସୁଡ଼ୁବୁ ସୁଡ଼ୁବୁ ସୁଡ଼ୁତା ଜେ, ନାନ୍ ଏଲମ୍ ରାଜିଦି ଶୁଶନ୍ ରାଜାଦି ଇଣ୍ଡ୍ରୋ ମାନା; ମାରି, ଆୟା, ବର୍ତୁ ନାନ୍ ସୁଡ଼ୁତା ଜେ, ନାନ୍ ଉଲୟ ଗାଡା ଲାକ୍ତୁ ମାନା । ଆବେନୁ ନାନ୍ କାଣୁକୁ ରେସି ସୁଡ଼ୁତା ଜେ, ସୁଡ଼ୁଦୁ, ଗାଡାଦି ଆଗ୍ଡ଼ି ଉନ୍ଡ୍ରି ମେଣ୍ଡା ନିଲ୍ତା ମାନାତ୍, ତାନି ରୁଣ୍ଡି କୋମ୍କୁ ମାରି ଆୟା ରୁଣ୍ଡି କୋମୁ ନିରିକେଙ୍ଗ୍; ମାତର ଉନ୍ଡ୍ରି କୋମୁ ଆଇଦାନି ମାଣାନ୍ ନିରିକା ମାରି ଆମାକା ନିରିକା, ତାନି ୱେନ୍କା ଜନମ୍ ଆତାତ୍ । ନାନ୍ ଆୟା ମେଣ୍ଡାଦିଙ୍ଗ୍ ୱେନ୍କା, ଡେବିରି ମାରି ଉଣେରି ତୋରିଙ୍ଗ୍ ପେଲେକିଜି ମାନିକା ସୁଡ଼ୁତା; ମାରି, ଏମେବା ଜାତୁ ଦାନି ଆଗ୍ଡ଼ି ନିଲ୍ଦେଙ୍ଗ୍ ଆଟ୍ଉ, ଇର୍ରିଙ୍ଗ୍ ତାନି କିୟୁଦାନ୍ ରକିୟା କିଦେଙ୍ଗ୍ ଏନ୍ ସିଲେତାର୍; ମାତର ୱାନ୍ ନିଜେଦି ବଦାଦି ପାଣି କିଜି ନିଜେଦି ଆକାର୍ ମାଟା ପିରିସ୍ କିଜି ଇର୍ହାତ୍ ।
ମାରି, ନାନ୍ ଇୟା ବିସୟ୍ ଇନ୍ବୁ ଇନ୍ବୁ ସୁଡ଼ୁତା ଜେ, ସୁଡ଼ୁଦୁ, ଉନ୍ଡ୍ରି ଗରିଆ ୱେନ୍କା ତରଟାନ୍ ୱିଜୁ ଦେସ୍ ନାଜି ୱାତାତ୍ ମାରି ୱାଦ୍ ବୁମି ମୁସୁକୁ ପାଦାମ୍ ମାଟ୍ଏତାତ୍; ମାରି, ଆୟା ଗରିଆଦି ରୁଣ୍ଡି କାଣେକେଙ୍ଗା ନାଡ଼୍ମି ଉନ୍ଡ୍ରି ପେରି କୋମୁ ମାର୍ହାତ୍ । ମାରି, ନାନ୍ ଆମା ରୁଣ୍ଡି କୋମ୍କାଣି ମେଣ୍ଡା ଗାଡାଦି ଆଗ୍ଡ଼ି ନିଲ୍ତି ମାରିକା ସୁଡ଼ୁତା, ତାନି ତରିନ୍ ୱାଦ୍ ୱାଜି ନିଜେଦି ସାକ୍ତିଦାନ୍ ଦାନି ମୁସ୍କୁ ଉରୁକ୍ତାତ୍ । ମାରି, ନାନ୍ ସୁଡ଼ୁତା ଜେ, ଆୟା ମେଣ୍ଡା ଲାକ୍ତୁ ୱାତାତ୍ ମାରି ଦାନି ମୁସୁକୁ ନାଣ୍ଡ ରିସାଦାନ୍ ଡାଟ୍ସି ଆୟା ମେଣ୍ଡାଦିଙ୍ଗ୍ ଡୁକାତାତ୍ ମାରି ଦାନି ରୁଣ୍ଡି କୋମ୍କୁ ରୁକୁତା ପକ୍ତାତ୍ ମାରି ଦାନି ଆଗ୍ଡ଼ି ନିଲ୍ନି ଉଣ୍ତିଙ୍ଗ୍ ଆୟା ମେଣ୍ଡାଦି ମାରି ସାକ୍ତି ସିଲେତାତ୍; ମାତର୍ ଆୟା ଗରିଆ ଦାନିଙ୍ଗ୍ ବୁମିଦୁ ଆର୍ପ୍ସି କାଲ୍କାଣାନ୍ ମାଟ୍ତାତ୍, ମାରି ଦାନି କିୟୁଦାନ୍ ଆୟା ମେଣ୍ଡାଦିଙ୍ଗ୍ ରକିୟା କିନିଉଣ୍ଡିଙ୍ଗ୍ ଏନ୍ବା ସିଲେତାନ୍ ।
ଇୟାୱେନ୍କା ଆୟା ଗରିଆ ନିଜେଦି ନାଣ୍ଡ ଗାର୍ବୁ ତର୍ତାତ୍ ମାରି ୱାଦ୍ ସାକ୍ତି ମାର୍ରିୱାଲେ ଦାନି ପେରି କୋମୁ ରୁଙ୍ଗିତାତ୍; ମାରି, ତାନିୱେନ୍କା ବାଦଡ଼୍ତି ସାରିବେଡ଼୍ତି ତରଟାନ୍ ନାଲ୍ଗି କାବାନି କୋମୁ ଜନମ୍ ଆତାତ୍ । ମାରି, ଆୟା କୋମ୍କାଣାନ୍ ଉନ୍ଡ୍ରି ମାଣାନ୍ ଉନ୍ଡ୍ରି ଇସ୍ରି କୋମୁ ସୋସି ଉଣେର୍ ତରନ୍ ମାରି ଆଗ୍ଡ଼ି ରମ୍ୟ ତୋରିଙ୍ଗ୍ ଇର୍ରିଙ୍ଗ୍ ଇସ୍ରାଏଲ ଦେସ୍ ତରିନ୍ ନାଣ୍ଡ ପିରିତାତ୍ । ମାରି, ଆକା ବାଦଡ଼୍ତି ସନ୍ୟ ଦଲ୍ ସାନ୍ଦି ପିରିତାତ୍ ମାରି ଆୟା ନାଣ୍ଡ ମାରି ସୁକେଙ୍ଗା ଏସୋ ୱାନିକାଙ୍ଗ୍ ବୁମିଦି ଆର୍ପ୍ସି ୱାନିକାଙ୍ଗ୍ ପାଦାମ୍ତାନ୍ ମାଟ୍ତାତ୍ । ହୁଁ, ଆୟା ସନ୍ୟରି ଦଲ୍ତି ନେତା ବିରୁଦ୍ତାନ୍ ନିଜେଦିଙ୍ଗ୍ ଗାର୍ବୁ କିଜି ୱାନିକା ମାଣାନ୍ ୱିଜୁଦିନ୍ତି ହୋମାର୍ଥକ ବଲି ଡଙ୍ଗାଁ କିତାତ୍ ମାରି ୱାନିକା ମନ୍ଦିର୍କୁ ନାଷ୍ଟୁ ଆତାତ୍ । ମାରି, ଲୋକା ପାପ୍ ଉଣ୍ତିଙ୍ଗ୍ ୱିଜୁଦିନ୍ତି ହୋମବଲି ୱାଲେ ନାଣ୍ଡ ଦଲ୍ ତାନି କିଉଦୁ ସର୍ପେଆତାତ୍ ମାରି ଆୟା କମୁ ସତ୍ତିଙ୍ଗ୍ ବୁମିଦୁ ନାସ୍ଟୁ କିତାତ୍, ମାରି ନିଜେଦି ବଦାଦି ପାଣି କିଜି ଜିଣାତାତ୍ ।
ଇୟାୱେନ୍କା ନାନ୍ ଅରେନ୍ ଦୁତ୍ ୱାର୍ଗିନି ମାଟା ୱେର୍ହା; ମାରି, ୱାନ୍ ଇର୍ହାନ୍, “ୱାନିଙ୍ଗ୍ ଆଇ ଉନ୍ଡ୍ରି ଦୁତ୍ ୱେନ୍ବାତାନ୍, ସତ୍ଦି ପୁଜା ମାରି ନାସ୍ଟୁ କିନି ମାଟା ମାନାଏଣ୍ଡା ମାରି ନାସ୍ଟୁ ଆନି ଉଣ୍ତିଙ୍ଗ୍ ମନ୍ଦିର୍ ମାରି ସନ୍ୟରି ଦଲ୍ ସର୍ପେ ଆନି ଆମା ବର୍, ଆକା ଏସୋ କାଡ଼ା ସାନ୍ଦି ଆନାତ୍ ?”
ଆବେନୁ ୱାନ୍ ନାଙ୍ଗି ଇର୍ହାନ୍, ଦୁଇ ଆଜାର୍ ତିନିସ ମିଲିମିଲିକା ମାରି ସାଲ୍ଦି ସାନ୍ଦି; ଆୟା ୱେନ୍କା ମନ୍ଦିର୍ ମାରିଡ଼େସି ସପା ଆନାତ୍ ।
ଗାବ୍ରିଏଲ ଦୁତ୍ ବର୍ଦି ଅର୍ତ ୱେର୍ନିକା
ଇୟାୱେନ୍କା ନାନ୍ ଦାନିୟେଲ ଇୟା ବର୍ ସୁଡ଼ୁତି ୱେନ୍କା ଆକା ବୁଜାଦେଙ୍ଗ୍ ସେସ୍ଟା କିତା; ମାରି ସୁଡ଼ୁଦୁ, ଲୋକାଦି ୱାଜା ଅରେନ୍ ଲୋକୁ ନା ଆଗ୍ଡ଼ି ନିଲ୍ତାନ୍ । ମାରି, ଉଲୟ ଗାଡାଦାନ୍ ନାନ୍ ଲୋକା ମାଟା ୱେର୍ହା, ୱାନ୍ କୁକ୍ସି ଇର୍ହାନ୍, “ଏ ଗାବ୍ରିଏଲ, ଇୟା ଲୋକୁଦିଙ୍ଗ୍ ଦର୍ସନଦି ଅର୍ତ ବୁଜାକିଜି ଇନ୍ଆ ।” ଆବେନୁ ନାନ୍ ଆମା ବାଡିଦୁ ନିଲ୍ତା ମାର୍ହା, ଆୟା ବାଡିଦି ଲାକ୍ତୁ ୱାନ୍ ୱାତାନ୍; ମାରି, ୱାଦ୍ ୱାତିଙ୍ଗ୍, ନାନ୍ ତିଲାତା ମାରି ମୋକମ୍ ପାଡ଼୍କ୍ସି ଆର୍ତା; ମାତର ୱାଦ୍ ନାଙ୍ଗି ଇର୍ହାନ୍, “ଏ ଲୋକା ମାରିନ୍,” ବୁଜାଆ; ଇର୍ରିଙ୍ଗ୍ ଇୟା ଦର୍ଶନ ୱିଜ୍ନି କାଡ଼ାଦି ବିସୟ୍ । ୱାନ୍ ନାଙ୍ଗି ମାଟା ଇନ୍ବୁ ଇନ୍ବୁ ନାନ୍ ବୁମି ତରିନ୍ ମୋକମ୍ କିଜି ନାଣ୍ଡ ସୁଜିତା; ମାତର ୱାନ୍ ମୁଟ୍ସି ନାଙ୍ଗିଁ ନିଲ୍ପ୍ତାନ୍ । ମାରି, ୱାନ୍ ନାଙ୍ଗି ଇର୍ହାନ୍, “ସୁଡ଼ୁଆ, ରିସାଦି ସମୟତୁ ଆମାକା ଗୋଟାନାତ୍, ଆକା ମାପ୍ ନିଙ୍ଗିଁ ୱେର୍ନାପ୍; ଇରିଙ୍ଗ୍ ଇକା ତିଆର୍ କିତି ୱିଜ୍ନି ବେଡ଼ାଦି ମାଟା ।”
ନିନ୍ ଏମେ ମେଣ୍ଡା ସୁଡ଼ୁତି, ଦାନି ରୁଣ୍ଡି କୋମ୍କୁ ମାଦିୟ ମାରି ପାରସ୍ୟ ରାଜା । ମାରି, ବୁର୍ବୁସେଙ୍ଗ୍ ମାନି ଗରିଆ ଗ୍ରିସ୍ ଦେସ୍ତି ରାଜା ମାରି ୱାନି ରୁଣ୍ଡି କାଣେକେଙ୍ଗ୍ ନାଣିମି ମାର୍ହି ପେରି କୋମୁ ପାର୍ତୁମ୍ ରାଜା । ମାରି, ଏମେ କୋମୁ ରୁଙ୍ଗୁଜି ଆବେନୁ ଆମା ନାଲ୍ଗି କୋମ୍କୁ ଜନମ୍ ଆତେ, ଇବେନୁ ଆୟା ଦେସ୍ତି ଲୋଇ ନାଲ୍ଗି ରାଜିଙ୍ଗ୍ ଆନିକା ନେସ୍ନିଦେର୍, ମାତର ସାକ୍ତିଦାନ୍ ୱାନି ୱାଜା ଆଇଦେରେ ।
ମାରି, ୱାରି ରାଜିଦି ଦଣ୍ତ୍ଦି ବେଡ଼ାଦୁ ଏସ୍ତିୱାଲେ ମାଟା ମାନାଇ ଲୋକାଦି ମାଟା ମାନାଇକା ୱିଜ୍ନାତ୍, ନାସ୍ତିୱାଲେ ବେସି ବୁଦି ମାରି ନେଗି ମାଟେଙ୍ଗ୍ ୱାର୍ଗିନି ରାଜା ଜନମ୍ ଆନାନ୍ । ୱାନ୍ ବପୁଦାନ୍ ବେସି ସାକ୍ତି ଆନାତ୍, ମାତର ୱାନି ନିଜେଦି ସାକ୍ତିଦାନ୍ ସିଲେ; ମାରି, ୱାନ୍ କାବାଆନି ୱାଜା ନାସ୍ଟୁ କିନାନ୍ ମାରି ପେରିକା ଆଜି ୱାନି ବଦାଦାନ୍ ପାଣି କିନାନ୍; ମାରି, ୱାନ୍ ୱିଜେରିଙ୍ଗ୍ ମାରି ମାପୁରୁଦି ଲୋକାଙ୍ଗ୍ ନାସ୍ଟୁ କିନାନ୍ । ମାରି, ନିଜେଦି ସାଲାକିଦାନ୍ ୱାନି କିଉଦୁ ସାଲାକି ଜିଣାନାତ୍ ମାରି ୱାନ୍ ନିଜେଦି ଜିବନ୍ତାନ୍ ନିଜେଦିଙ୍ଗ୍ ଗାର୍ବୁ କିନାନ୍ ମାରି ୱାରି ନେଗି କାଡ଼ାଦୁ ନାଣ୍ଡ ଲୋକାଙ୍ଗ୍ ନାସ୍ଟୁ କିନାନ୍; ମାରି, ୱାନ୍ ନେତାରି ନେତାଦି ବିରୁଦ୍ତାନ୍ ନିଙ୍ଗ୍ନାନ୍; ମାତର ୱାନ୍ ୱାରି ଲୋକା ସାକ୍ତିଦାନ୍ ନାସ୍ଟୁ ଆନାନ୍ । ମାରି, ମିଲିମିଲିକା ମାରି ସାଲ୍ଦିରି ବିସୟ୍ତାନ୍ ସୁଡ଼ୁତି ବର୍ ସତ୍; ମାତର ନିନ୍ ଇୟା ବର୍ ଆଡ଼କ୍ସୋ ଇଡ୍ଆ; ଇର୍ରିଙ୍ଗ୍ ଆକା ଆଗ୍ଡ଼ିରି ନାଣ୍ଡ ଦିନ୍ତି ମାଟା । ଇୟାୱେନ୍କା ନାନ୍ ଦାନିୟେଲ ୱାନ୍ଦିତା ମାରି ନାଣ୍ଡ ଦିନ୍ ସାନ୍ଦି ନୋବୁ ଆତା; ଆୟା ୱେନ୍କା ନାନ୍ ନିଙ୍ଗ୍ଜି ରାଜାଦି ପାଣି କିତା; ମାରି, ନାନ୍ ଆୟା ବର୍ତୁ କାବା ଆତା, ମାତର ଏନ୍ ଆୟା ବର୍ ବୁଜାଏତାର୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.