Konda Porja Bible
ଦାନିୟେଲ 6
ନରେସ୍ ଗୁଟାଦୁ ଦାନିୟେଲ
ଦାରିୟାବସ ୱିଜୁ ରାଜିଦୁ ଶହେ କୋଡ଼େ ଲୋକୁ ନାଇରିଙ୍ଗ୍ ରାଜି ମୁସୁକୁ ପାଣି କିଦେଙ୍ଗ୍ ମାରି ଆୟା ନାଇର୍ ଏଣ୍ଡେସ୍ ଇସାବ୍ସିନାର୍ ମାରି ରାଜାଦି ଇନିକାବା ନାଷ୍ଟୁ ଆଏତ୍, ଇୟାଉଣ୍ଡିଙ୍ଗ୍ ୱାରି ମୁସୁକୁ ମୁଏର୍ ନେତାରିଙ୍ଗ୍ ବାସେ କିଦେଙ୍ଗ୍ ଟିକ୍ ବୁଜାତାନ୍; ଇୟା ମୁଏରି ମାଣାନ୍ ଦାନିୟେଲ ଅରେନ୍ ମାର୍ହାନ୍ । ଇୟା ଦାନିୟେଲତି ଜିବନ୍ତୁ ନେଗି ଆତ୍ମା ମାର୍ରିଙ୍ଗ୍ ୱାନ୍ ନେତାରି ମାଣାନ୍ ମାରି ନାଇର୍ ମାଣାନ୍ ପେରିକାନ୍ ଆତା ମାର୍ହାନ୍; ମାରି, ରାଜା ୱାନିଙ୍ଗ୍ ୱିଜୁ ରାଜିଦି ମୁସୁକୁ ପଦ୍ ସିଦେଙ୍ଗ୍ ବଦା କିତାନ୍ । ଆବେଟ୍ ନେତାର୍ ମାରି ନାଇର୍ ରାଜାଦି ପାଣି ବିସୟ୍ତାନ୍ ଦାନିୟେଲଦି ଦୋସ୍ ରେବାତାର୍; ମାତର ୱାର୍ ଏମେବା ଦୋସ୍ ବା ସେଇ ପାଣି ପୋଇଦେଙ୍ଗ୍ ଆଟ୍ଏତାର୍, ଇର୍ରିଙ୍ଗ୍ ୱାନ୍ ନେଗିକାନ୍ ମାର୍ହାନ୍ ମାରି ୱାନି ଏମେବା ବୁଲ୍ ମାରି ଦୋସ୍ ପାଣି କିନିକା ତର୍ଏତାତ୍ । ଆଦେଙ୍ଗ୍ ଆୟା ଲୋକୁ ଇର୍ହାର୍, ମାଡ୍ ଦାନିୟେଲଦି ମାପୁରୁଦି ବ୍ୟବସ୍ଥା ବିସୟ୍ଦାନ୍, ୱାନି ଦସ୍ ଆସ୍ଏତିଙ୍ଗା ମାରି ଇନି ବିସୟ୍ତାନ୍ ଦସ୍ ପୋଇଦେଙ୍ଗ୍ ଆଟ୍ଇକା ।
ଇବେନୁ ନେତାରିଙ୍ଗ୍ ମାରି ନାଇର୍ ରାଜା ଲାକ୍ତୁ ଉଣ୍ତାଜି ୱାନିଙ୍ଗ୍ ଇୟାୱାଜା ଇର୍ହାର୍, “ଏ ରାଜା ଦାରିୟାବସ, ନାଣ୍ଡ ଦିନାମ୍ ଜିଆ । ରାଜିଦି ନେତାର୍, ରାଜାଦି ପାଣିକିନିକାର୍ ମାରି ଗବର୍ନର୍କୁ, ମନ୍ତ୍ରୀ ମାରି ଦେସ୍ତି ଅଦିକାରି ଲୋକୁ ୱିଜେରେ ଅର୍ସେ ଆଜି ୱାର୍ଗିଜିସାଜି ଇୟାୱାଜା ଉନ୍ଡ୍ରି ରାଜାଦି ଆଦେସ୍ ନି ଆଟ୍ୱା ମାନାଇ ନିୟମ୍ ତିଆର୍ କିଦେଙ୍ଗ୍ ବିସାର୍ କିତାମାନାର୍ ଜେ, ଜଦି ଏନ୍ ତିରିସ୍ ଦିନ୍ ସାନ୍ଦି ପେରିରାଜାଦିଙ୍ଗ୍ ଡ଼ିସ୍ସି ଏମେବା ଦିୟାମ୍କାଙ୍ଗ୍ କି ଲୋକା ଲାକ୍ତୁ ପାର୍ତନା କିନାର୍, ୱାନ୍ ନରେସ୍ ମାନି ଗୁଟାଦୁ ପକାଇଆନାନ୍ । ଇଲେଇ ଏ ରାଜା, ମାଦିୟ ମାରି ପାରସିକରି ଆଟ୍ୱା ବ୍ୟବସ୍ଥା ଇସାବ୍ଦାନ୍ ଇୟା ମାନାଇ ନିୟମ୍ ଏଣ୍ତେସ୍ ବାଦ୍ଲେ ଆଏତ୍, ଇୟାଉଣ୍ଡିଙ୍ଗ୍ ଆକା ବଦାକିଆ ମାରି ଇୟା ରାସ୍ତିଦାନିଙ୍ଗ୍ ସନ୍ତକ୍ କିଆ ।” ଆଦେଙ୍ଗ୍ ରାଜା ଦାରିୟାବସ ଆୟା ରାସ୍ତିଦାନିଙ୍ଗ୍ ମାରି ମାନାଇ ନିୟମ୍ତୁ ସନ୍ତକ୍ କିତାନ୍ । ଇୟାୱେନ୍କା ଇୟା ରାସ୍ତିକା ସନ୍ତକ ଆତାମାନାତ୍ ଇଜି ନେସ୍ତି ୱେନ୍କା ଦାନିୟେଲ ନିଜେଦି ଇଣ୍ଡ୍ରୋ ସର୍ହାନ୍; ୱାନି ଇଡ୍ରଣି କିଟିକି ଜିରୁସାଲମ ତରିନ୍ ରେଆତିକା ମାର୍ହାତ୍; ମାରି, ୱାନ୍ ଆଗ୍ଡ଼ି ଏଣ୍ଡେସ୍ କିଜିମାର୍ହାନ୍, ଆୟା ଇସାବ୍ଦାନ୍ ଉନ୍ଡ୍ରି ଦିନ୍ତୁ ମୁଣ୍ଡ୍ରି ଜାରିଙ୍ଗ୍ ମେଣ୍ଡେଙ୍ଗ୍ ଗୋଟ୍ କିଜି ପାର୍ତନା କିତାନ୍ ମାରି ନିଜେଦି ମାପୁରୁଦି ଆଗ୍ଡ଼ି ଦନ୍ୟବାଦ୍ କିତାନ୍ । ଇବେନୁ ଆୟା ଲୋକୁ ଉନ୍ଡ୍ରେ ଆଜି ଦାନିୟେଲତିଙ୍ଗ୍ ୱାନି ମାପୁରୁଦି ଲାକ୍ତୁ ପାର୍ତନା ମାରି ବାତିଙ୍ଗ୍ମାଲ୍ନିକା ସୁଡ଼ୁତାର୍ । ନାସ୍ତିୱାଲେ ୱାର୍ ରାଜାଦି ଲାକ୍ତୁ ସୋଲ୍ସି ରାଜାଦି ସାଲାଇ ବିଦି ବିସୟ୍ଦାନ୍ ୱାନି ଆଗ୍ଡ଼ି ଇର୍ହାର୍, “ଏ ପେରିରାଜା, ଏମେବା ଲୋକୁ ତିରିସ୍ ଦିନ୍ ସାନ୍ଦି ନିଙ୍ଗିଁ ଡ଼ିସ୍ସି ଏମେ ଦିୟାମ୍ କି ଲୋକା ଲାକ୍ତୁ ପାର୍ତନା କିନାନ୍, ୱାନ୍ ନରେସ୍ ଗୁଟାଦୁ ପୋକାଇ ଆନାନ୍, ଇୟାୱାଜା ଉନ୍ଡ୍ରି ମାନାକିତି ସିଟିଦୁ ନିନ୍ ସନ୍ତକ୍ କିଇ ନୋ ?”
ରାଜା ଡ଼େସି ଇର୍ହାନ୍, “ମାଦିୟ ମାରି ପାରସିକରି ଆଟ୍ୱା ବ୍ୟବସ୍ଥା ଇସାବ୍ଦାନ୍ ଆକା ତିର୍ ଆତାମାନାତ୍ ।”
ଆବେନୁ ୱାର୍ ରାଜାଦି ଆଗ୍ଡ଼ି ଡ଼େସି ଇର୍ହାର୍, “ଏ ପେରିରାଜା, ୱାତିମାନି ଜିହୁଦି ଲୋକା ମାଣାନ୍ ଅରେନ୍ ଜେ ଦାନିୟେଲ, ୱାନ୍ ନିଙ୍ଗିଁ ମାରି ନି ଦସ୍କିତି ସିଟିଦିଙ୍ଗ୍ ମାନାଏନ୍, ମାତର ଉନ୍ଡ୍ରେ ଦିନ୍ତୁ ମୁଣ୍ଡ୍ରି ଜାରିଙ୍ଗ୍ ପାର୍ତନା କିନାନ୍ ।”
ଆଦେଙ୍ଗ୍ ରାଜା ଇୟା ମାଟା ୱେନ୍ଜି ନାଣ୍ଡ ଦୁଃକ୍ ଆତାନ୍, ମାରି ଦାନିୟେଲଦିଙ୍ଗ୍ ରକିୟା କିନି ଉଣ୍ତିଙ୍ଗ୍ ୱାନି ବିସୟ୍ତାନ୍ ମୋନ୍ ସିତାନ୍; ମାରି, ୱାନିଙ୍ଗ୍ ରକିଆ କିନି ଉଣ୍ତିଙ୍ଗ୍ ୱେଡ଼ା ଆର୍ନି ସାନ୍ଦି ସେସ୍ଟା କିତାନ୍ । ଇବେନୁ ଆୟା ଲୋକୁ ରାଜାଦି ଲାକ୍ତୁ ଉନ୍ଡ୍ରେ ଆଜି ରାଜେଙ୍ଗ୍ ଇର୍ହାର୍, ଏ ରାଜା, ନିନ୍ ନେସ୍ଆ, ରାଜା ଏମେବା ବିଦି ତିଆର୍ କିନାନ୍, ଆକା ଜେ ବାଦ୍ଲେ ଆଦେଙ୍ଗ୍ ଆଟ୍ଏତ୍, ମାଦିୟ ମାରି ପାରସିକରି ଇୟାୱାଜା ଉନ୍ଡ୍ରି ବ୍ୟବସ୍ଥା ମାନାତ୍ ।
ଆଦେଙ୍ଗ୍ ରାଜା ଆଦେସ୍ ସିତିଙ୍ଗ୍, ୱାର୍ ଦାନିୟେଲତିଙ୍ଗ୍ ତାସି ନରେସ୍ ଗୁଟାଦୁ ପୋକ୍ତାର୍ । ମାରି, ରାଜା ଦାନିୟେଲଦିଙ୍ଗ୍ ଇର୍ହାନ୍, “ନିନ୍ ସତ୍ ସତ୍ ଆମା ମାପୁରୁଦି ସେବା କିଜିନି, ୱାନ୍ ନିଙ୍ଗିଁ ରକିୟା କିନାନ୍ ।” ମାରି, ଉନ୍ଡ୍ରି କାଲୁ ତାସି ଗୁଟାଦି ମୋକମ୍ଦୁ ଇଟ୍ତାର୍; ମାରି, ଦାନିୟେଲଦି ବିସୟ୍ତାନ୍ ଏଣ୍ଡେସ୍ଗି ବାଦ୍ଲେ ଆଏତ୍, ଇୟାଉଣ୍ଡିଙ୍ଗ୍ ରାଜା ନିଜେଦି ଡାବୁଦୁ ମାରି ନିଜେଦି ପେରି ଲୋକାଦି ଡାବୁଦୁ ଆକା ଟାପ୍ କିତାର୍ । ଇୟାୱେନ୍କା ରାଜା ନିଜେଦି ମେଡ଼୍ତୁ ସୋଲ୍ସି ଉପାସ୍ଦାନ୍ ନାଡ଼ା ୱିକ୍ତାନ୍ ମାରି ବାଜାମରି ୱାନି ଲାକ୍ତୁ ତେଏତାର୍; ମାରି, ୱାନିଙ୍ଗ୍ ସୁସ୍କାଣୁକୁ ରେଉତେ ।
ଇୟାୱେନ୍କା ରାଜା ସାଲ୍ଦିନେ ନିଙ୍ଗ୍ଜି ଦାପ୍ରେ ନରେସ୍ ସାରାଦି ଲାକ୍ତୁ ସର୍ହାନ୍ । ମାରି, ୱାନ୍ ଗୁଟାଦି ଲାକ୍ତୁ ଦାନିୟେଲଦି ଲାକ୍ତୁ ସୋଲ୍ସି ଆଡ଼୍ବାନି ବଲୁତାନ୍ କୁକ୍ତାନ୍; ରାଜା ଦାନିୟେଲଦିଙ୍ଗ୍ ଇର୍ହାନ୍, ଏ ଜିବନ୍ତି ମାପୁରୁଦି ସେବାକିନିକି ଦାନିୟେଲ, ନିନ୍ ସତ୍ ସତ୍ ଆମାୱାନିଙ୍ଗ୍ ସେବାକିଜିନି, ନି ଆୟା ମାପୁରୁ ପାର୍ଟା ନରେସ୍କା ମାଣାନ୍ ନିଙ୍ଗିଁ ରକିୟା କିଦେଙ୍ଗ୍ ଆଟ୍ଏତାନ୍ ନୋ ? ଆବେନୁ ଦାନିୟେଲ ରାଜେଙ୍ଗ୍ ଇର୍ହାନ୍, “ନାଣ୍ଡ ଦିନ୍ ଜିଆ । ନା ମାପୁରୁ ୱାନି ଦୁତ୍କାଙ୍ଗ୍ ପୋକସି ନରେସ୍କା ୱେୟୁ ମୁକ୍ତାମାନାନ୍ ମାରି ୱାକୁ ନାଙ୍ଗି ଇନିକାବା କେତି କିୟୁ; ଇର୍ରିଙ୍ଗା ୱାନିକା ଆଗ୍ଡ଼ି ନା ଇନି ଦସ୍ ତର୍ଏତାତ୍; ମାରି, ଏ ରାଜା, ନାନ୍ ନି ଆଗ୍ଡ଼ି ଏମେବା କେତି କିଏ ।”
ଆବେନୁ ରାଜା ନାଣ୍ଡ ୱେଡ଼ିକା ଆଜି ଦାନିୟେଲଦିଙ୍ଗ୍ ଗୁଟାଦାନ୍ ତାନି ଉଣ୍ତିଙ୍ଗ୍ ଆଦେସ୍ ସିତାନ୍ । ଆବେଟ୍ ଦାନିୟେଲତିଙ୍ଗ୍ ଗୁଟାଦାନ୍ ତାତାର୍ ମାରି ୱାନି ମେନ୍ଦଲତୁ ଏମେବା ଗାଉ ତର୍ଏତାତ୍, ଇର୍ରିଙ୍ଗ୍ ୱାନ୍ ନିଜେଦି ମାପୁରୁଦିଙ୍ଗ୍ ବିସ୍ବାସ୍ କିତାମାର୍ହାନ୍ । ଇୟାୱେନ୍କା ରାଜା ଆଦେସ୍ କିତାନ୍, ଲୋକୁ ଦାନିୟେଲଦି ବିରୁଦ୍କିତି ଲୋକାଙ୍ଗ୍ ତାସି, ୱାରିଙ୍ଗ୍, ୱାରି କଡ଼ରିଙ୍ଗ୍ ମାରି ୱାରି ଆଡ଼ିକାଙ୍ଗ୍ ନରେସ୍କା ଗୁଟାଦୁ ପୋକ୍ତାର୍; ମାରି, ୱାର୍ ଗୁଟାଦୁ ଆଡ୍ଗି ଆର୍ଏଣ୍ଡା ନରେସ୍କୁ ୱାରିଙ୍ଗ୍ କାଟ୍ସି ୱାରି ପେଡ଼େକୁ ଡର୍ ଗୁଣ୍ଡା କିତେ ।
ନାସ୍ତିୱାଲେ ଦାରିୟାବସ ୱିଜୁ ଦେସ୍ତି ଲୋକାଙ୍ଗ୍, ୱିଜୁ କୁଟୁମ୍ଙ୍ଗା, ଦେସ୍ତି ଲୋକାଙ୍ଗ୍ ମାରି ଆଇ ଆଇ ବାସାଦି ଲୋକା ଲାକ୍ତୁ ସିଟି ରାସ୍ତାନ୍; “ମି ଉଣ୍ତିଙ୍ଗ୍ ନାଣ୍ତ ସାନ୍ତି ଆପିତ୍ ।” ନାନ୍ ଇକା ଇଜିନା ଜେ, ନା ରାଜିଦି ୱିଜୁ ଦେସ୍ତି ଲୋକୁ ଦାନିୟେଲଦି ମାପୁରୁଦି ଲାକ୍ତୁ ତିର୍ଗିଜି ମାରି ତିଲାପିର୍;
“ଇର୍ରିଙ୍ଗ୍ ୱାନ୍ ଜିବନ୍ତି ମାପୁରୁ
ମାରି ୱିଜୁଦିନ୍ତିକାନ୍
ମାରି ୱାନି ରାଜି ବିନାସ୍ ଆଏତ୍;
ମାରି ୱାନି ସାସନ୍ ୱିଜ୍ନି ସାନ୍ଦି ମାନ୍ଜିନାତ୍ ।
ୱାନ୍ ଉଦାର୍ କିନାନ୍ ମାରି ରକିୟା କିନାନ୍,
ମାରି ୱାନ୍ ମୁସ୍କୁପୁର୍ତୁ ନି ଦୁନିଆଦୁ ସିନା ମାରି କାବାଆନି ପାଣି କିନାନ୍;
ୱାନ୍ ଦାନିୟେଲଦିଙ୍ଗ୍ ପାର୍ଟା ନରେସ୍କା ମାଣାନ୍ ରକିୟା କିତାମାନାନ୍ ।”
ଇୟାୱାଜା ଦାନିୟେଲ ଦାରିୟାବସତି ସାସନ୍ ବେଡ଼ାଦୁ ମାରି ପାରସିକ କୋରସ୍ଦି ସାସନ୍ ବେଡ଼ାଦୁ ପେରି ପଦ୍ ପୋଇତାନ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.