ମାପୁରୁଦି ସତ୍ ବାକ୍ୟ
ଏପିସିୟ 2:10
Verse 10 is marked below, with the whole chapter around it. Read from the start
ସାନିମାଣୁକୁ ଜିବନ୍ ପୋଇନିକା
ମି ମାନାଇକା ମାରି ପାପ୍ ଉଣ୍ତିଙ୍ଗ୍ ସର୍ଇଦିନ୍ତୁ ନେସ୍ନିୱାଜା ସାତି ମାର୍ଇଦେର୍ । ଆୟା ବେଡ଼ାଦୁ ମିର୍ ଦୁନିଆଦି ସତ୍ସିଲି ସାରିଦୁ ବୁଲାଜି, ବାଦଡ଼ତି ରାଜିଦି ଅଦିପତିଦି ଆଡ୍ଗି ମାର୍ଇଦେର୍ । ଆୟା ଅଦିପତି ଇଲେଇ ମାପୁରୁଦି ମାଟା ଆସ୍ଇୱାରି ଲୋକା ମୁସ୍କୁ ସାସନ୍ କିଜିନାନ୍ । ସତ୍ତାନ୍ ମାଡୁ ୱିଜୁଲୋକୁ ୱାରି ୱାଜା ମାର୍ଇକା ମାରି ମେନ୍ଦଲ ନି ମନ୍ତି ଆସାଆନି ଇସାବ୍ତାନ୍ ଜିଜି ମାର୍ଆଟ୍ । ମାରି ଆଇୱାରି ୱାଜା ମାଡୁ ବା ମାପୁରୁଦି ରିସାଦି ବାଦ୍ଲୁ କାସ୍ଟୁ ପୟ୍ଦେଙ୍ଗ୍ ସୋଲ୍ସିମାର୍ହାପ୍ ।
ମାତର୍ ମାପୁରୁଦି ଦୟା ନିସା ନାଣ୍ତ ମାରି ମା ଉଣ୍ତିଙ୍ଗ୍ ୱାନି ଜିବନ୍ନୋନିକା ନିସା ପେରିକା ଜେ, ମା ମାନାଇ ଉଣ୍ତିଙ୍ଗ୍ ମାଡୁ ନେସ୍ନିୱାଜା ସାତି ମାର୍ଇ ବେଡ଼ାଦୁ ୱାନ୍ କ୍ରିସ୍ତଦି ୱାଲେ ମାଙ୍ଗିଁ ଜିବନ୍ କିତାନ୍ । ମାପୁରୁଦି ଦୟାଦାନ୍ ନେ ମିର୍ ରକିୟା ପୟ୍ତିମାନିଦେର୍ । କ୍ରିସ୍ତ ଜିସୁଦି ୱାଲେ ଅର୍ସେଆତି ମାଣ୍କୁ ୱାନି ୱାଲେ ମୁସ୍କୁପୁର୍ତୁ ସାସନ୍ କିନି ଉଣ୍ତିଙ୍ଗ୍ ୱାନ୍ ମାଙ୍ଗିଁ ବା ନିକ୍ତାମାନାନ୍ । ଜିସୁ କ୍ରିସ୍ତଦିମାନୁ ତର୍ତିମାନି ଜିବନ୍ନୋନିମାନୁ ୱାନି ଜୁଗ୍ତୁ ନିଜେଦି ଦୟାଦାନ୍ ସାମାନ୍ତି ପେରି ନାଣ୍ତ୍ ଧନ ତର୍ନି ଉଣ୍ତିଙ୍ଗ୍ ମାପୁରୁ ଇକା କିତାନ୍ । ଇରିଙ୍ଗ୍ ମାପୁରୁଦି ଦୟା ଉଣ୍ତିଙ୍ଗ୍ ବିସ୍ବାସ୍ତାନ୍ ମିର୍ ରକିୟା ପୟ୍ତିମାନିଦେର୍; ଇକା ମି ନିଜେଦିମାଣୁକୁ ଆଏତ୍, ମାତର୍ ମାପୁରୁଦି ଦାନ୍ ଇକା । ଆଦେଙ୍ଗ୍ ଇୟା ବିସୟ୍ତାନ୍ ଏନ୍ ଗର୍ବ କିଦେଙ୍ଗ୍ ଆଟ୍ଏନ୍ । ମାଡୁ ଆମାକା ଆଦେଙ୍ଗ୍ ଆଟ୍ତିମାନିକା, କେବଲ ମାପୁରୁନେ ଆକା କିତାମାନାନ୍; ଆମାୱିଜୁ ସତ୍ ପାଣି ମାପ୍ କିନାପ୍ ଇଜି ମାପୁରୁ ଆଗ୍ଡ଼ିନେ ତିଆର୍ କିତାମାର୍ହାନ୍, ମାପୁ କ୍ରିସ୍ତ ଜିସୁଦି ୱାଲେ ମିସାନି ମାଣ୍କୁ ଆକା ପୁରା ଆତାମାନାତ୍ ।
କ୍ରିସ୍ତଦିମାନୁ ଉଣ୍ତାନିକା
ନିଜେଦି ସର୍ଇଦିନ୍ତି ଅବସ୍ତା ଏତ୍ କିଦୁ, ମିର୍ ଅଣଜିହୁଦି ମାର୍ଇଦେର୍, ନିଜେଦିଙ୍ଗ୍ “ସୁନ୍ନତ” ଇଜି ୱେର୍ସିମାନି ଜିହୁଦିର୍ ମିଙ୍ଗିଁ “ଅସୁନ୍ନତ” ଇଜି ଇଜିମାରାର୍ । ଇକା କେବଲ ଉନ୍ଡ୍ରେ ମେନ୍ଦଲ୍ତି ଅବସ୍ତାଦିଙ୍ଗ୍ ବୁଜାନାତ୍ । ଆଗ୍ଡ଼ି ମିର୍ କ୍ରିସ୍ତଦିମାଣୁକୁ ଆକ ମାର୍ଇଦେର୍, ମିର୍ ଆଇଦେସ୍ତି ଲୋକ୍ ମାର୍ଇଦେର୍ ମାରି ମାପୁରୁଦି ଆସ୍କିତିମାନି ଲୋକାମାନୁ ମିସାଏତି ମାର୍ଇଦେର୍ । ମାପୁରୁ ତାମି ଇସ୍ରାଏଲ ଲୋକା ଉଣ୍ତିଙ୍ଗ୍ କିତିମାନି ପାର୍ମାଣ୍ ମୁସ୍କୁ ତିଆର୍ତି ନିୟମ୍ତୁ ମି ଇନିକା ମିସାଏତ୍ ମାର୍ର୍ହାତ୍ । ମାରି ଆସାସିଲିକା ମାରି ମାପୁରୁଦିମାଣୁକୁ ୱେର୍ଏ ଆଜି ମିର୍ ଜଗତ୍ତୁ ବାସାତି ମାର୍ଇଦେର୍ । ପୁର୍ବେ ମିର୍ ଆକ ମାର୍ଇଦେର୍, ମାତର୍ ଇଲେଇ କ୍ରିସ୍ତ ଜିସୁଦିମାନୁ ୱାନି ନେତେର୍ତାନ୍ ଲାକ୍ତୁ ଆତିମାନିଦେର୍ । ଇରିଙ୍ଗ୍ ଜିହୁଦି ମାରି ଅଣଜିହୁଦିରିଙ୍ଗ୍ ଅର୍ସେ କିଜି, କ୍ରିସ୍ତ ନିଜେ ମାମାନୁ ସାନ୍ତି ତିଆର୍ କିତାମାନାନ୍ । ୱାରିଙ୍ଗ୍ ୱେର୍ଏ କିଜି ନିଜେନିଜେଦିମାନୁ ସାତ୍ରୁ ୱାଜା ଇଡ୍ନିମାନି ଗଡାଦିଙ୍ଗ୍ ୱାନ୍ ୱାନି ନିଜେଦି ମେନ୍ଦଲ୍ଦାନ୍ ରୁକ୍ତାମାନାନ୍ । 2ୱାନ୍ ଜିହୁଦିରି ୱିଜୁ ବିଧିବିଧାନ୍ ମାଟାଦି ନିୟମ୍ତିଙ୍ଗ୍ ନିଜେଦି ମେନ୍ଦଲତାନ୍ ଗୁସା କିତାମାନାନ୍, ଏଣ୍ତେସ୍ ୱାନ୍ ସାନ୍ତି ତିଆର୍ କିଜି ରୁଣ୍ତିୱାନିକାଙ୍ଗ୍ବା ନିଜେଦିମାନୁ ଅରେନ୍ ପୁନି ଲୋକ୍ ୱାଜା ତିଆର୍ କିନାନ୍, 3କ୍ରୁସକାଟ୍ତୁ ୱାନି ସାତିମାଣୁକୁ କ୍ରିସ୍ତ ଆୟା ଲୋକାମାନୁ ମାନି ସତ୍ରୁଦିଙ୍ଗ୍ ନାସ୍ଟୁ କିତାମାନାନ୍; କ୍ରୁସକାଟ୍ଦାନ୍ ୱାନ୍ ରୁଣ୍ତି ଜାତିଆଙ୍ଗାଁ ମିସା କିଜି ଉନ୍ଡ୍ରେ ମେନ୍ଦଲ୍ ୱାଜା କିତାମାନାନ୍ ମାରି ମାପୁରୁଦି ଲାକ୍ତୁ ଡ଼େସି ତାତାମାନାନ୍ । ଆୟାଉଣ୍ତିଙ୍ଗ୍ କ୍ରିସ୍ତ ୱାତାମାର୍ହାନ୍ ମାରି ମାପୁରୁଦିମାଣୁକୁ ଆକ ସୋର୍ଇମାନି ଅଣଜିହୁଦି ମାରି ୱାନି ଲାକ୍ତୁମାନି ଜିହୁଦିରିମାନୁ ସାନ୍ତିଦି ସୁସମାଚାର୍ ପ୍ରଚାର୍ କିତାମାର୍ହାନ୍ । କ୍ରିସ୍ତଦି ମାଣ୍କୁ ନେ ଜିହୁଦି ମାରି ଅଣଜିହୁଦି ୱିଜେରେ ଉନ୍ଡ୍ରେ ଆତ୍ମାଦୁ ବୁବାଦି ଆଗ୍ଡ଼ି ୱାଦେଙ୍ଗ୍ ଆଟ୍ତା ମାନାପ୍ ।
ମାରି, ମିର୍ ମାରି ଆଇଦେସ୍ତୁ ନି ଆଇମାନୁବାସାକିନିଲୋକୁ ଆଇଦେର୍, ମାତର୍ ଇଲେଇ ମାପୁରୁଦି ଲୋକା ୱାଲେ ମିର୍ ବା ୱାନି ରାଜିଦି ଲୋକୁ ମାରି ୱାନି ଇଲୁପରିବାର୍ତି ଲୋକୁ ଆତିମାନିଦେର୍ । ମିର୍ ବା ପ୍ରେରିତ ସିସୁ ମାରି ବାବବାଦିରି ତିଆର୍କିତି ମୁଲ୍କାଲୁ ମୁସ୍କୁ ତିଆର୍ଆତି ଇଲୁୱାଜା । ଆୟା ଇଲୁଦି କୁନାଦି ମୁଲ୍କାଲୁ ନିଜେ କ୍ରିସ୍ତ ଜିସୁ । ୱାନ୍ନେ କେବଲ ଇୟା ଇଲୁଦିଙ୍ଗ୍ ଜଡ଼େଇ କିଜି ଇଡ୍ନାନ୍ ମାରି ପ୍ରବୁଦି ଉଣ୍ତିଙ୍ଗ୍ ଉନ୍ଡ୍ରି ପବିତ୍ର ମନ୍ଦିର୍ ୱାଜା ପିରିସ୍ କିନାନ୍ । ୱାନି ସାହାଜ୍ୟଦାନ୍ ମିର୍ ବା ଆଇ ୱିଜେରି ୱାଲେ ଆତ୍ମାୱାଜା ମାପୁରୁଦି ତେବାନି ଉଣ୍ତିଙ୍ଗ୍ ଉନ୍ଡ୍ରି ତେବାନି ଇଲୁୱାଜା ତିଆର୍ ଆଜିନିଦେର୍ ।
Source notes (3)
- Cross-reference କଲସିୟ ୨:୧୩.
- Cross-reference କଲସିୟ ୨:୧୪.
- Cross-reference କଲସିୟ ୧:୨୦.
ମାପୁରୁଦି ସତ୍ ବାକ୍ୟ. Copyright © 2020 The Word for the World International and Konda Porja Translation Samithi, Dasamanthpur, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.