ମାପୁରୁଦି ସତ୍ ବାକ୍ୟ
ପ୍ରେରିତ 12
ନାଣ୍ତ କାସ୍ଟୁ ପୟ୍ନିକା
ଇୟା ସମୟତୁ ରାଜା ହେରୋଦ ମଣ୍ତଲିଦି ଏସ ଲୋକାଙ୍ଗ୍ କାସ୍ଟୁସିନିକା ଆରାମ୍ କିତାନ୍ । ୱାନ୍ ଜୋହନତି ତଡ଼ାନ୍ ଜାକୁବଙ୍ଗ୍ କାଣ୍ତାଦାନ୍ କାତିସ୍ତାନ୍ । ଜିହୁଦିର୍ ଇବେ ୱେଡ଼ିକା ସୁଡ଼୍ଜି ୱାନ୍ ପିତର୍ତିଙ୍ଗ୍ଁ ବା ତର୍ସିସ୍ କିତାନ୍ । ଇୟା ଗଟନା କମିରିମିସାକିଏନ୍ଣ୍ତା ରୁଟି ପଣ୍ତୟ୍ତି ସମୟ୍ତୁ ଗଟାତାମାର୍ହାତ୍ । ପିତର ତରାୟ୍ଆଜି ଜଇଲ୍ତୁ ଇଡାୟ୍ ଆତାନ୍ ମାରି ନାଲ୍ଏର୍ ନାଲ୍ଏର୍ ଲୋକୁ ସନ୍ୟରିଙ୍ଗ୍ ଅସି କିଆୟ୍ଆତି ନାଲ୍ଗି ଦଲ୍ ସନ୍ୟର୍ ୱାନିଙ୍ଗ୍ କାପ୍କିଜି ତେବାତାର୍ । ନିସ୍ତାର୍ ପଣ୍ତୟ୍ ୱେନ୍କା ୱିଜେରେ ଲୋଇ ୱାନି ବିସାର୍ କିନିକା ହେରୋଦ୍ତି ବଦା ମାର୍ହାତ୍ । ପିତର ଜଇଲ୍ତୁ ମାନିୱାଲେ ମଣ୍ତଲିଦି ଲୋକୁ ଉଣ୍ତ୍ରି ମନ୍ତାନ୍ ୱାନି ଉଣ୍ତିଙ୍ଗ୍ ମାପୁରୁଦି ଲାକ୍ତୁ ପାର୍ତାନା କିଜିମାର୍ହାର୍ ।
ଜଇଲ୍ତାନ୍ ପିତର୍ତି ମୁକୁଡ଼ାନିକା
ଆମା ନାଣ୍ଡିଙ୍ଗ୍ ହେରୋଦ ପିତର୍ତିଙ୍ଗ୍ ଲୋକା ଆଗ୍ଡ଼ି ତାନି ଉଣ୍ତିଙ୍ଗ୍ ଅଡ଼୍ବିତା ମାର୍ହାନ୍, ତାନି ଆଗ୍ଡ଼ିରି ନାଡ଼ା ପିତର ରିଏର୍ କାପ୍କିନିୱାରି ନାଡ଼୍ମି ଡରିତାମାର୍ହାନ୍ । ରୁଣ୍ତି ସିକ୍ଣି ଦାନ୍ ୱାନିଙ୍ଗ୍ ତର୍ତାମାର୍ହାର୍ ମାରି ଜଇଲ୍ତି ସେର୍ଲା ଲାକ୍ତୁ କାପ୍ନିକାର୍ କାପ୍କିତା ମାର୍ହାର୍ । ଆୟାଦାପ୍ରେନେ ପ୍ରବୁଦି ଅରେନ୍ ଦୁତ୍ ୱାଜି ନିର୍ଆତ୍ ମାରି ବାକ୍ରା ଜାୟ୍ ଆତାସର୍ହାତ୍ । ଦୁତ୍ ପିତର୍ତି ଗୁଜାମ୍ତିଙ୍ଗ୍ଁ ଦୁକ୍ଜି ୱାନିଙ୍ଗ୍ଁ ସୁସ୍କାଣ୍କାଣ୍କୁ ନିକ୍ସି ଇର୍ହାତ୍, “ବେଗି ନିଙ୍ଗ୍ଁଆ !” ବେଗି ବେଗି ପିତରତି କିୟୁଦୁ ତର୍ଆତିମାର୍ହି ସିକ୍ଣିଙ୍ଗ୍ ଆର୍ତେ ସର୍ଏ । ତାନିୱେନ୍କା ଦୁତ୍ ଇର୍ହାତ୍, “ଜୁକିଦି ଗାଟି ତର୍ଆ, ଜୁତେଙ୍ଗ୍ ଆରାଆ ।” ପିତର ଆକା କିତିୱେନ୍କା ଦୁତ୍ ଇର୍ହାତ୍, “ମେନ୍ଦଲ୍ତୁ ସାଦର୍ ପକ୍ସି ନା ୱେନ୍କା ରାଆ ।” ଦୁତ୍ ଆମାକା କିଜିମାର୍ହାତ୍, ଆକା ଉଣ୍ତ୍ରି ସତ୍ ଗଟନା ନୋ ସିଲେ, ପିତର ନେସ୍ତେଙ୍ଗ୍ ଆଟ୍ଏତାନ୍ । ୱାନ୍ ଲବ୍ ସୁଡ଼୍ଜିନାନ୍ ଇଜି ଅଡ଼୍ବିତାନ୍ । ଆରିଙ୍ଗ୍ବା ପିତର ଜଇଲ୍ତାନ୍ ସହସି ଦୁତ୍ତି ୱାଲେ ସର୍ହାନ୍ । ୱାର୍ କାପ୍କିନିୱାରି ପାର୍ତୁମ୍ ନି ମାରି ଉନ୍ଣ୍ତ୍ରି ବାଡି ଜିଣାଜି ସାରାସାରି ଗାଡ଼୍ତୁ ଡ଼ୁଗୁନି ସାରିଦୁ ମାନି ଲୁୱା ସେର୍ଲା ଲାକ୍ତୁ ୱାତାର୍ । ୱାରି ଉଣ୍ତିଙ୍ଗ୍ ସେର୍ଲା ତାନି ମନ୍ତିଙ୍ଗ୍ ରେଏତାତ୍ ମାରି ୱାର୍ ସହସି ବୁଲାଜି ୱାତାର୍ । ୱାର୍ ପେରିଜାରିଦୁ ସଲ୍ପୁ ସଲ୍ପୁ ଆୟାଦାପ୍ରେନେ ମୁସ୍କୁପୁର୍ତି ଦୁତ୍ ପିତରତିଙ୍ଗ୍ ଡ଼ିସ୍ସି ସର୍ହାତ୍ ।
ତାନିୱେନ୍କା, ଆମାକା ଗଟାତାମାର୍ହାତ୍, ପିତର ଆକା ନେସ୍ତେଙ୍ଗ୍ ଆଟ୍ସି ଇର୍ହାନ୍, “ଇକା ସତେନେ ସତ୍ ଇଜି ନାନ୍ ନେସ୍ତେଙ୍ଗ୍ଁ ଆଟ୍ସିନା । ହେରୋଦତି ସାକ୍ତିଦାନ୍ ମାରି ଜିହୁଦି ଲୋକୁ ଆମାକା ଗଟାନାତ୍ ଇଜି ଆସା କିତାମାର୍ହାର୍, ଆବେଟ୍କୁ ନାଙ୍ଗିଁ ରକିୟା କିଦେଙ୍ଗ୍ ଇଜି ପ୍ରବୁ ମୁସ୍କୁପୁର୍ତି ଦୁତ୍ତିଙ୍ଗ୍ ପକ୍ତାମାର୍ହାନ୍ ।”
ନିଜେଦି ଅବସ୍ଥାଦି ବିସୟ୍ତାନ୍ ଜାଗାର୍ତା ଆଜି ୱାନ୍ ଜୋହନତି ନି ମାର୍କରି ଆଇସି ମରିୟମତି ଇଲୁଦୁ ସର୍ହାନ୍ । ଆବେ ନାଣ୍ତ ଲୋକୁ ଉଣ୍ତାଜି ପାର୍ତନା କିଜିମାର୍ହାର୍ । ପିତର ଆତ୍ରେ ସେର୍ଲାଦୁ କତ୍ତାନ୍, ରୋଦା ଦର୍ତି ଅରେତ୍ ଦାସି ସେର୍ଲା ରେତେଙ୍ଗ୍ଁ ୱାତାତ୍ । ପିତରତି ବଲ୍ ନେସ୍ତେଙ୍ଗ୍ଁ ଆଟ୍ସି ୱାଦ୍ ନିସା ୱେଡ଼ିକା ଆତାତ୍ଜେ ସେର୍ଲା ରେଏନ୍ଣ୍ତା ପିତର ଆତ୍ରେ ନିର୍ଆ ମାନାନ୍ ଇଜି ୱେର୍ତାତ୍ । ୱାର୍ ତାନିଙ୍ଗ୍ ଇର୍ହାର୍, “ନିନ୍ ବାୟା ଆତିମାନି ।” ମାତର୍ “ଇକା ସତ୍” ଇଜି ୱାଦ୍ ଆଟ୍ୱାଦାନ୍ ଇର୍ହାତ୍ଆକା, ୱାର୍ ଅଡ଼୍ବିତାର୍, “ଆରିଙ୍ଗ୍ ଆନାମାନାତ୍, ଇକା ୱାନି ଦୁତ୍ ।”
ପିତର ଜାରିଦିଙ୍ଗ୍ ଜାରି ସେର୍ଲାଦୁ କତ୍ସି ମାର୍ହାନ୍ । ସାରାସାରି ୱାର୍ ସେର୍ଲା ରେସି ୱାନିଙ୍ଗ୍ ସୁଡ଼୍ଜି କାବାତାର୍ । ୱାନ୍ କିୟୁଦାନ୍ ଜୁଟ୍ସି ଆଲ୍ଜ ମାନ୍ଡ୍ରେଙ୍ଗ୍ଁ ଇର୍ହାନ୍, ମାରି ପ୍ରବୁ ୱାନିଙ୍ଗ୍ ଏଣ୍ତେସ୍ ଜଇଲ୍ତାନ୍ ସପ୍ସି ତାତାନ୍, ଆୟା ବିସୟ୍ ୱାରି ଆଗ୍ଡ଼ି ୱେର୍ତାନ୍ । ତାନିୱେନ୍କା ଇୟାୱିଜୁ ମାଟା ଜାକୁବ ନି ଆଇ ୱିଜେରେ ବିସ୍ବାସିରି ତଡ଼ାନ୍କାଙ୍ଗ୍ ୱେର୍ତେଙ୍ଗ୍ଁ ଇଜି ଆଦେସ୍ ସିଜି ୱାନ୍ ଆବେଟ୍କୁ ଆଇତରିନ୍ ସର୍ହାନ୍ ।
ସାଲ୍ଦି ଆତି ୱେନ୍କା ପିତର ଏମେ ସର୍ହାନ୍ ଇଜି କାପ୍କିନିୱାରି ଲୋଇ ଗାବ୍ରା ଆତାସର୍ହାର୍ । ହେରୋଦ ୱାନିଙ୍ଗ୍ ପୟ୍ଦେଙ୍ଗ୍ ଆଦେସ୍ ସିତାନ୍, ମାତର୍ ୱାର୍ ୱାନିଙ୍ଗ୍ ପୟ୍ଏତାର୍ । ସାରାସାରି କାପ୍କିନିୱାରିଙ୍ଗ୍ ୱେନ୍ବାଜି ୱାରିଙ୍ଗ୍ ସାନିଦଣ୍ତ୍ ସିନି ଉଣ୍ତିଙ୍ଗ୍ ଆଦେସ୍ ସିତାନ୍ ।
ତାନିୱେନ୍କା ହେରୋଦ ଜିହୁଦା ଦେସ୍ତାନ୍ ସଲ୍ସି କାଇସରିଆଦୁ ତେବାତାନ୍ ।
ହେରୋଦତି ସାନିକା
ଆୟା ସମୟ୍ତୁ ହେରୋଦ ସୋର ନି ସିଦୋନତି ଲୋକା ମୁସ୍କୁ ନାଣ୍ତ ରିସା ଆତାମାର୍ହାନ୍ । ଆଦେଙ୍ଗ୍ଁ ୱାରି ଲୋଇ ଉଣ୍ତ୍ରି ଦଲ୍ ୱାନିଙ୍ଗ୍ ତର୍ଆୟ୍ ଆଦେଙ୍ଗ୍ ଇଜି ସର୍ହାର୍ । ପାର୍ତୁମ୍ ୱାର୍ ରାଜା ମେଡ଼୍ତି ଦାୟିତୁ ମାନି ବ୍ଳାସ୍ତଙ୍ଗ୍ ବୁଜାକିଜି ୱାନି ସାହାଜ୍ୟ ପୟ୍ତାର୍ । ତାନିୱେନ୍କା ୱାର୍ ହେରୋଦତି ଲାକ୍ତୁ ସଲ୍ସି ସାନ୍ତି ଲସ୍ତାର୍, ଇରିଙ୍ଗ୍ ହେରୋଦତି ଦେସ୍ଦାନ୍ ୱାରି ଦେସ୍ତୁ କାଦି ୱିଜୁ ପକ୍ସି ମାର୍ହାର୍ ।
ବାସେ ଆତି ଦିନ୍ତୁ ହେରୋଦ ୱାନି ରାଜାଦି ଆଙ୍ଗିଁ ଆରାତାନ୍ ମାରି ବିଚାର୍ କିନି ରାଜାଗାଦିଦୁ ବାସ୍ସି ଲୋକାଙ୍ଗ୍ ଉନ୍ଣ୍ତ୍ରି ମାଟା ୱେର୍ତାନ୍ । ୱାର୍ ଆଉଲି ଆତାର୍, “ଇକା ଇନି ଲୋକାଦି ଆଏତ୍, ମାତର୍ ଅରେନ୍ ମାପୁରୁଦି ବଲ୍ !” ଆୟାଦାପ୍ରେ ପ୍ରବୁଦି ଦୁତ୍ ହେରୋଦତିଙ୍ଗ୍ ଡାକ୍ତାନ୍, ଇରିଙ୍ଗ୍ ମାପୁରୁଙ୍ଗ୍ଁ ଏମେ ଗୌରବ୍ ସିନି ମାଟା, ୱାନ୍ ଆକା ୱାନିଙ୍ଗ୍ ସିଏନ୍ ମାର୍ହାନ୍ । ପିଡ଼୍କୁ ଆଜି ୱାନ୍ ସାତାନ୍ ।
ଇୟା ସମୟ୍ ଲୋଇ ମାପୁରୁଦି ବାକ୍ୟ ପିର୍ଜି ୱେଙ୍ଗିଁଦେଙ୍ଗ୍ ଆସ୍ତାତ୍ ।
ବର୍ଣ୍ଣବା ମାରି ସାଉଲ ଜିରୁସାଲାମ୍ତୁ ସେବା ପାଣି ୱିସ୍ସି ଜୋହନ ମାର୍କଙ୍ଗ୍ଁ ଅର୍ସେ ଅସି ଜିରୁସାଲାମ୍ତାନ୍ ଡ଼େସିସର୍ହାର୍ ।
ମାପୁରୁଦି ସତ୍ ବାକ୍ୟ. Copyright © 2020 The Word for the World International and Konda Porja Translation Samithi, Dasamanthpur, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.