ମାପୁରୁଦି ସତ୍ ବାକ୍ୟ
ପ୍ରେରିତ 11
ଜିରୁସାଲାମ୍ ମଣ୍ତଲିଦୁ ପିତରଦି ୱେର୍ନିକା
ଅଣଜିହୁଦିର୍ ବା ମାପୁରୁଦି ବାକ୍ୟ ୱେର୍ଆମାନାର୍ ଇଜି ପ୍ରେରିତ ସିସୁର୍ ମାରି ଜିହୁଦା ରାଜିଦି ଆଇ ବିସ୍ବାସି ତଡ଼ାନ୍କୁ ୱେର୍ଆର୍ । ପିତର ଏସ୍ତିୱାଲେ ଜିରୁସାଲାମ୍ତୁ ସର୍ହାନ୍, ଅଣଜିହୁଦିରିଙ୍ଗ୍ ସୁନ୍ନତ କିନି ତରିନ୍ ମାନି ଲୋକୁ ୱାନି ବିରୁଦ୍ତାନ୍ ଇର୍ହାର୍, “ନିନ୍ ଅସୁନ୍ନତ ଅଣଜିହୁଦିରି ଇଲ୍କାଙ୍ଗ୍ କୁଡ଼ାଏନ୍ ଆତିଙ୍ଗ୍, ଇୟାୱାଜାକି ୱାରିୱାଲେ ଉଟି ।” ମାତର୍ ଆଗ୍ଡ଼ିରାନ୍ ଆମାକା ଆମାକା ଗଟାତାମାର୍ହାତ୍, ପିତର ୱାରିଙ୍ଗ୍ ୱାନି ପୁରା ମାଟା ସିଦେଙ୍ଗ୍ ସଲ୍ସି ଇର୍ହାନ୍ :
“ନାନ୍ ଜପା ଗାଡ଼୍ତୁ ପାର୍ତନା କିଜିମାନିୱାଲେ ଉଣ୍ତ୍ରି ଦର୍ସନ୍ ପୟ୍ତା । ଉଣ୍ତ୍ରି ପେରି ସାଦର୍ତି ନାଲ୍ଗି କନାଦାନ୍ ଦୁଙ୍ଗ୍ଁଜି ବାଦଡ଼୍ତାନ୍ ଆଡ୍ଗି ଆର୍ଜିମାନିକା ନାନ୍ ସୁଡ଼ୁତା, ଆକା ନା ଲାକ୍ତୁ ତେବାତାସର୍ହାତ୍ । ନାନ୍ ନେଗେନ୍କିଜି ଲୋଇ ସୁଡ଼୍ଜି ଆୟା ଲୋଇ ଇଲ୍ତୁ ପସାକିନି ଜାତୁଙ୍ଗ୍ଁ, ଦୁନିଆଦି ବନ୍ ଜାତୁଙ୍ଗ୍ଁ, ଉଜ୍ନିକେଙ୍ଗ୍1 ମାରି ବାଦଡ଼୍ତି ବନ୍ ପଟିଙ୍ଗ୍ଁ ସୁଡ଼ୁତା । ତାନିୱେନ୍କା ନାନ୍ ଇୟା ବଲ୍ ୱେର୍ଆ, ପିତର ! ନିଙ୍ଗ୍ଁଆ, କୟ୍ଜି ତିନ୍ଆ । ମାତର୍ ନାନ୍ ଇର୍ଆ, ସିଲେ, ପ୍ରବୁ ! ନାନ୍ ଆଟ୍ଏ । ଇୟାସାନ୍ଦି ଇନି ଅପବିତ୍ର କାଦି ନା ୱେୟୁଦୁ ଅଏ । ମୁସ୍କୁପୁର୍ତାନ୍ ମାରିଡ଼େସି ଇୟା ବଲ୍ ୱାତାତ୍, ମାପୁରୁ ଆମାକା ପବିତ୍ର କିତାମାନାନ୍, ନିନ୍ ତାନିଙ୍ଗ୍ଁ ଅପବିତ୍ର ଅଡ଼୍ବିମା ।” ମୁଜା ଇୟାୱାଜା ଆତାତ୍, ସାରାସାରି ଆୟାୱିଜୁ ମୁସ୍କୁପୁର୍ତୁ ପେର୍ଜି ଅଆୟ୍ଆତେ । ଟିକ୍ ଆୟା ସମୟ୍ତୁ, ସିସେରିଆଦାନ୍ ନା ଲାକ୍ତୁ ପକାୟାଆତିମାର୍ରି ମୁଏର୍ ଲୋକୁ ନାନ୍ ଏମେ ଇଲୁଦୁ ତେବାଜିମାର୍ହା, ଆବେ ଇଗାୱାତାର୍ । ୱେନ୍କା ଅଡ଼୍ବିଏଣ୍ଗା ୱାରି ୱାଲେ ସନ୍ଣ୍ତ୍ରେଙ୍ଗ୍ଁ ଇଜି ପବିତ୍ର ଆତ୍ମା ନାଙ୍ଗିଁ ଆଦେସ୍ ସିତାତ୍ । ଜପାଦି ଇୟା ସଅ ଲୋକୁ ବିସ୍ବାସି ତଡ଼ାନ୍କୁ ନା ୱାଲେ ସିସେରିଆଦୁ ସର୍ହାର୍ ମାରି ମାପ୍ ୱିଜେରେ କର୍ଣ୍ଣିଲିୟଦି ଇଲ୍ତୁ ଇତାପ୍ । ୱାନି ଇଲ୍ତୁ ୱାନ୍ ଏଣ୍ତେସ୍ ମୁସ୍କୁପୁର୍ତି ଦୁତ୍ତି ଦର୍ସନ୍ ପୟ୍ତାମାର୍ହାନ୍, ଆୟା ବିସୟ୍ତାନ୍ ମାଙ୍ଗିଁ ୱେର୍ତାନ୍ । ମୁସ୍କୁପୁର୍ତି ଦୁତ୍ ୱାନିଙ୍ଗ୍ ଇର୍ହାମାର୍ହାତ୍, “ଜପାଦୁ ମାନି ସିମୋନ ପିତର ଦର୍ତି ଅରେନ୍ ଲୋକ୍ତିଙ୍ଗ୍ ତାତେଙ୍ଗ୍ ଇଜି ଲୋକାଙ୍ଗ୍ ପକ୍ତୁ । ୱାନ୍ ୱାଜି ମିଙ୍ଗିଁ ସିକିୟା ସିନାନ୍ ମାରି ଆବେଣ୍କୁ ନିନ୍ ମାରି ନି ଇଲୁତି ୱିଜେରେ ରକିୟା ପୟ୍ନାର୍ । ମାରି ନାନ୍ ଏସ୍ତିୱାଲେ ସିକିୟା ସିଦେଙ୍ଗ୍ ଆରାମ୍ କିତା, ଆଗ୍ଡ଼ି ପବିତ୍ର ଆତ୍ମା ଏଣ୍ତେସ୍ ମା ମୁସ୍କୁ ରେତାତା ମାର୍ହାତ୍, ଆୟାୱାଜା ୱାରି ମୁସ୍କୁ ରେତାତାତ୍ । 2ତାନିୱେନ୍କା ନାନ୍ ପ୍ରବୁଦି ଇୟା ବାକ୍ୟ ଏତ୍ କିତା : ଜୋହନ ଏର୍ତୁ ଡୁବନ୍ ସିତାନ୍, ମାତର୍ ମିର୍ ପବିତ୍ର ଆତ୍ମାଦାନ୍ ଡୁବନ୍ ଆନିଦେର୍ । ଇକା ପୁରାସତ୍ ଜେ ମାପ୍ ପ୍ରବୁ ଜିସୁ କ୍ରିସ୍ତଦିମାନୁ ବିସ୍ବାସ୍ କିତି ଉଣ୍ତିଙ୍ଗ୍ ମାପୁରୁ ମାଙ୍ଗିଁ ଏମେ ଦାନ୍ ସିତା ମାର୍ହାନ୍, ଅଣଜିହୁଦିରିଙ୍ଗ୍ ବା ଆୟା ଦାନ୍ ସିତାମାନାନ୍; ନାନ୍ ଏନ୍ ଜେ ମାପୁରୁଦି ଇୟା ପାଣିଦିଙ୍ଗ୍ଁ ବିରୁଦ୍ କିନା !”
ୱାର୍ ଇକା ୱେର୍ଇ ୱେନ୍କା ମାରି ଜାଟି କିଏନ୍ଣ୍ତା ମାପୁରୁଦି ଦନ୍ୟବାଦ୍ କିଜି ଇର୍ହାର୍, “ଆରିଙ୍ଗ୍ ମାପୁରୁ ଅଣଜିହୁଦିରିଙ୍ଗ୍ ବା ଏତ୍କିଦେଙ୍ଗ୍ଁ ମାରି ଜିଦେଙ୍ଗ୍ଁ ସୁଜୋଗ ସିତାମାନାନ୍ ।”
ଆଣ୍ଟିକିୟାଦି ମଣ୍ତଲି
ସ୍ତିପାନ୍ତି ସାତି ୱେନ୍କା ବିସ୍ବାସିର୍ ତାଡ଼ନା ପୟ୍ଜି ଇନିଙ୍ଗାଁ ଆନିଙ୍ଗାଁ ଆନିୱାଲେ ୱାରି ଲୋଇ ଏସଲୋକ୍ କେବଲ୍ ଜିହୁଦିର୍ ଲାକ୍ତୁ ବାକ୍ୟ ପ୍ରଚାର୍ କିଜି, ପିନିସିଆ, ସାଇପ୍ରସ୍ ମାରି ଆଣ୍ଟିୟକ ସାନ୍ଦି ସର୍ହାର୍ । ମାତର୍ ସାଇପ୍ରସ୍ ମାରି କୁରିଣିଦି ଆଇ ଏସ ବିସ୍ବାସିର୍ ଆଣ୍ଟିୟକଦୁ ସଲ୍ସି ଅଣଜିହୁଦିରି ଲାକ୍ତୁ ପ୍ରବୁ ଜିସୁଦି ନେଗି କାବୁର୍ ପ୍ରଚାର୍ କିତାର୍ । ମାପୁରୁଦି ସାକ୍ତି ୱାରି ୱାଲେ ମାର୍ହାତ୍ ମାରି ନାଣ୍ତ ଲୋକୁ ବିସ୍ବାସ୍ କିଜି ପ୍ରବୁଦି ତରିନ୍ ମନ୍ ଡ଼େପ୍ତାର୍ ।
ଏସ୍ତିୱାଲେ ଇୟା କାବୁର୍ ଜିରୁସାଲାମ୍ତି ମଣ୍ତଲିଦୁ ଇତାତ୍, ୱାର୍ ବର୍ଣ୍ଣବାସ୍ତିଙ୍ଗ୍ ଆଣ୍ଟିୟକଦୁ ପକ୍ତାର୍ । ୱାନ୍ ଆବେ ଇଜି ମାପୁରୁ ଆୟା ଲୋକାଙ୍ଗ୍ ଏଣ୍ତେସ୍ ଆସିର୍ବାଦ୍ କିତାମାନାନ୍, ଆକା ସୁଡ଼୍ଜି ୱେଡ଼ିକା ଆତାନ୍ ମାରି ଜିବନ୍ତୁ ପ୍ରବୁଦି ଉଣ୍ତିଙ୍ଗ୍ ବିସ୍ବାସ୍ ତେବାଜି ନେଗେନ୍ ଜିଦେଙ୍ଗ୍ଁ ୱାରିଙ୍ଗ୍ଁ ୱେର୍ତାନ୍ । ବର୍ଣ୍ଣବାସ୍ ପବିତ୍ର ଆତ୍ମା ନି ବିସ୍ବାସ୍ତୁ ପୁରାଆତି ଅରେନ୍ ନେଗି ଲୋକୁ ମାର୍ହାନ୍ । ୱାନି ପ୍ରଚାର୍ତାନ୍ ନାଣ୍ତ ଲୋକୁ ପ୍ରବୁଦି ଲାକ୍ତୁ ୱାତାର୍ ।
ତାନିୱେନ୍କା ବର୍ଣ୍ଣବାସ୍ ସାଉଲତିଙ୍ଗ୍ ପୟ୍ଦେଙ୍ଗ୍ ଇଜି ତାର୍ସସ୍ତୁ ସର୍ହାନ୍ । ଆବେ ୱାନିଙ୍ଗ୍ଁ ପୟ୍ଜି ଆଣ୍ଟିୟକଦୁ ତାତାନ୍ । ମାରି ପୁରା ଉନ୍ଣ୍ତ୍ରି ବାର୍ସେକ୍ ସାନ୍ଦି ଇୟା ରିଏର୍ ଆୟାବାଣି ମଣ୍ତଲିଦି ବିସ୍ବାସିରି ୱାଲେ ମିସାଜି ନାଣ୍ତ ଲୋକାଙ୍ଗ୍ ସିକିୟା ସିତାର୍ । ଇୟା ଆଣ୍ଟିୟକଦି ବିସ୍ବାସିରିଙ୍ଗ୍ଁ ଲୋକୁ ଆଗ୍ଡ଼ି କ୍ରିସ୍ଟିୟାନ୍ ଇଜି ଇର୍ହାମାର୍ହାର୍ ।
ଆୟା ବେଡ଼ାଦୁ ଜିରୁସାଲାମ୍ତାନ୍ ଏସ ବାବବାଦିର୍ ଆଣ୍ଟିୟକଦୁ ୱାତାର୍ । 4ୱାରି ଲୋଇ ଆଗାବ ଦର୍ତି ଅରେନ୍ ଲୋକୁ ଆତ୍ମାଦି ସାକ୍ତିଦାନ୍ ପୁରାଆଜି ୱିଜୁ ଦୁନିଆଦୁ ଉନ୍ଣ୍ତ୍ରି ପେରି କାକୁର୍ତି ଆନାତ୍ ଇଜି ବବିସତ୍ ମାଟା ୱେର୍ତାନ୍ । ସମ୍ରାଟ କ୍ଳାଡିୟସ୍ତି ସମୟ୍ତୁ ଇକା ଗଟାତାମାର୍ହାତ୍ । ସିସୁର୍ ଜିହୁଦାଦୁ ବାସାଜିମାନି ବିସ୍ବାସି ତଡ଼ାନ୍କା ଲାକ୍ତୁ ୱାରି ସିଦେଙ୍ଗ୍ ଆଟ୍ନି ସାନ୍ଦି ସାହାଜ୍ୟ ପକ୍ନାର୍ ଇଜି ତିର୍ କିତାର୍ । ୱାର୍ ଡାବୁଙ୍ଗୁଁ ଉଣ୍ତା କିଜି ବର୍ଣ୍ଣବାସ୍ ନି ସାଉଲତି କିଦୁ ମଣ୍ତଲିଦି ପେରି ନେତାର୍ରି ଲାକ୍ତୁ ଆକା ପୋକ୍ତାର୍ ।
Source notes (4)
- Footnote ଉଜ୍ନିକେଙ୍ଗ୍ ଆଜିନାତ୍ ତାନି ଅର୍ତ ଆମା ୱିଜୁ ବୁମିଦୁ ଉଜ୍ନି ୱାନିକାଙ୍ଗ୍ ବୁଜାଜିନାତ୍ । ସାରାସ୍, ପିଡ଼ୁକୁ, ସିୱାଡି, କାପୋକି, ଡକି ଇନିକା ଇନିକା ୱିଜୁଦିଙ୍ଗ୍ ବୁଜାନାତ୍ ।
- Cross-reference ପ୍ରେରିତ ୧:୫.
- Cross-reference ପ୍ରେରିତ ୮:୧-୪.
- Cross-reference ପ୍ରେରିତ ୨୧:୧୦.
ମାପୁରୁଦି ସତ୍ ବାକ୍ୟ. Copyright © 2020 The Word for the World International and Konda Porja Translation Samithi, Dasamanthpur, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.