ମାପୁରୁଦି ସତ୍ ବାକ୍ୟ
୨ କରିନ୍ତିୟ 9
ଆଇ ମଣ୍ତଲିଦୁ ବିସ୍ବାସିରି ଉଣ୍ତିଙ୍ଗ୍ ସାହାଜ୍ୟ
ଜିହୁଦାଦୁ ମାନି ମାପୁରୁଦି ଲୋକାଦି ଲାକୁତୁ ସାହାଜ୍ୟ ପୋକନି ଉଣ୍ତିଙ୍ଗ୍ ମିଙ୍ଗିଁ ରାସ୍ନିକା ଇନିକା ଦରକାରସିଲେତ୍ । ନାନୁ ନେସେନା, ମିର୍ ୱିଜୁଦିନ୍ ସାହାଜ୍ୟ କିଦେଙ୍ଗ୍ ତିଆର୍ ମାରି ମାସିଦୋନିଆଦି ଲୋକାଦି ଲାକୁତୁ ମି ବିସୟତାନ୍ ନାନୁ ଗର୍ବ କିତାମାନା । ନାନୁ ଇର୍ହାମାର୍ହାନ୍, “ଆକାୟାଦି ତୋଡ଼ାନକୁ ସାହାଜ୍ୟକିନି ଉଣ୍ତିଙ୍ଗ୍ ଦରଟାନ୍ ତିଆରଆତାମାନାର୍ ।” ମି ୱେଡ଼ିକା ୱାରି ମାଡ଼ାନ୍କୁ ବା ଏସ ଲୋକାଙ୍ଗ୍ ଜାଗାର୍ତା କିତାମାନାତ୍ । ଇଲେଇ ନାନୁ ଇୟା ତଡ଼ାନ୍କାଙ୍ଗ୍ ମି ଲାକୁତୁ ପୋକସିନା । ସୁଡ଼ୁଦୁ, ଇୟା ୱେଡ଼ାଦୁ ଏଣ୍ତେସ୍ ମି ବିସୟତାନ୍ ମା ଗର୍ବ ଆର୍ଏ ଆଏତ୍ । ନାନୁ, ୱେର୍ନି ଇସାବ୍ତାନ୍ ମିର୍ ଦାନତି ୱାଲେ ତିଆରଆଜମାନ୍ଡ୍ରୁ । ମାସିଦୋନିଆଦି ଲୋକୁ ନା ୱାଲେ ସଲିସି ଜଦି ମିଙ୍ଗିଁ ତିଆରଆଇମାନିକା ସୁଣାର୍; ଆର୍ତିଙ୍ଗ୍ ମି ମୁସୁକୁ ଆଟୁୱା ବିସ୍ବାସ୍ ମାନିଙ୍ଗ୍ ମାପୁ ସେମାର୍ଆନାପ୍ ସତ୍ତାନ ୱେର୍ତେଙ୍ଗ୍ ସରିଙ୍ଗ୍, ଆକା ମି ଇସାବ୍ତାନ୍ ବା ସେମାର୍ତିକା ଆନାତ୍ । ମିର୍ ମାଟା ସିତିମାନି ଦାନ ଉଣ୍ତାକିନି ଉଣ୍ତିଙ୍ଗ୍ ଇୟା ତଡ଼ାନ୍କାଙ୍ଗ୍ ନା ସନି ଆଗ୍ଡ଼ି ମି ଲାକୁତୁ ପୋକତେଙ୍ଗ୍ ଅନୁରଦ୍ କିତା । ଆରିଙ୍ଗ୍, ନାନୁ ମି ଲାକୁତୁ ଇନିୱାଲେ ଇୟା ଦାନ୍ ଉଣ୍ତା କିଜି ଇଡ୍ଜମାନ୍ଡ୍ରୁ । ଇୟାମାଡ଼ାନ୍କୁ ମିର୍ ଜାସେପେଲାଦାନ୍ ସିଏନ୍ଣ୍ତା ନିଜେଦିବଦାଦାନ୍ ସିଜିନିଦେର୍ ଇଜି ୱେଙ୍ଗିଁନିଦେର୍ ।
ମୋନ୍ତୁ ଇଡ୍ଦୁ, ଆମାଲୋକ୍ ଉଣା ୱିତୁ ୱିତ୍ନାନ୍, ୱାନ୍ ଉଣା ପାସି ଉଣ୍ତାକିନାନ୍, ଯେ ନାଣ୍ତ ୱିତୁ ୱିତିନାନ୍, ୱାନ୍ ନାଣ୍ତ ପାସି ଉଣ୍ତାକିନାନ୍ । ମାରି, ଯେ ଏଣ୍ତେସ୍ ଅଡ଼ବିତାମାନାନ୍, ୱାନ୍ ଆୟାୱାଜା ଦାନ କିପିନି ମାରି ଆୟା ଦାନ ଦୁକ୍ତି ମୋନ୍ତାନ୍ ଆଏଜି ମାରି କେବଲ ସିନି ନେଗେତ୍ ମାନାତ୍ ଇଜି ସିଲେ । ଇରିଙ୍ଗ୍ ୱେଡ଼ିକାଦାନ୍ ସିନି ଲୋକାଙ୍ଗ୍ ମାପୁରୁ ଲାଡ୍ କିନାନ୍ । ୱିଜୁ ରକମ୍ତି ଦାନତୁ ମିଙ୍ଗିଁ ପିରିସ୍କିଦେଙ୍ଗ୍ ମାପୁରୁ ଆଟ୍ନାନ୍; ଆବେଣାନ୍ ମିର୍ ୱିଜୁଦିନ୍ ନାଣ୍ତଦାନ୍ ବାସାଦେଙ୍ଗ୍ ଆଟିନିଦେର୍ ମାରି ୱିଜୁ ରକମ୍ତି ନେଗି ପାଣି ଉଣ୍ତିଙ୍ଗ୍ ନାଣ୍ତଦାନ୍ ସିଦେଙ୍ଗ୍ ଆଟିନିଦେର୍ । ଦର୍ମସାସ୍ତ୍ରଦୁ ରାସାତାମାନାତ୍,
ସିଲିସାତି ଲୋକାଙ୍ଗ୍ ୱାନ୍ ନିଜେଦିଇଚ୍ଛାଦାନ୍ ଦାନ୍ କିନାନ୍;
ୱାନି ଜିବନ୍ନୋନିକା ୱିଜୁଦିନ୍ ମାନାତ୍ ।
ଏମେ ୱିତୁ ୱିତୁୱିତିନିଲୋକାଙ୍ଗ୍ ମାପୁରୁ ୱିତ୍ନି ଉଣ୍ତିଙ୍ଗ୍ ୱିତୁ ମାରି ଉଣ୍ତେଙ୍ଗ୍ ଇଜି କାଦି ସିନାନ୍, ୱାନ୍ ମି ଦରକାର୍ ଇସାବ୍ତାନ୍ ୱିତୁ ଜଗେକିନାନ୍ ମାରି ମି ନିଜେଦି ବଦାଦି ପଲ୍ତିୱାଜା ମିର୍ ବା ନାଣ୍ତ ପାସି ଉଣ୍ତାକିନିଦେର୍ । ମିର୍ ୱିଜୁଦିନ୍ ଏଣ୍ତେସ୍ ନିଜେଦିବଦାଦାନ୍ ଦାନକିଦେଙ୍ଗ୍ ଆଟିନିଦେର୍, ଇୟାଉଣ୍ତିଙ୍ଗ୍ ମାପୁରୁ ମିଙ୍ଗିଁ ୱିଜୁ ବିସୟତାନ୍ ମାଜନ୍କିନାନ୍ ମାରି ମା ମାଡ଼ାନ୍କୁ ମିର୍ ପୋକିତିମାନି ଦାନ ଉଣ୍ତିଙ୍ଗ୍ ନାଣ୍ତଲୋକ୍ ମାପୁରୁଦିମାନୁ ମାଡ଼ିସି କିଜି ଦନ୍ୟବାଦ୍ ସିନାର୍ । ମି ଦାନସିନି ସେବାଦି ମାଡ଼ାନ୍ କେବଲ ଯେ ମାପୁରୁଦି ଲୋକାଦି ଅବାବ ଉଣା ଆନାତ୍, ଆକା ସିଲେ, ମାତର ଇୟାମାଡ଼ାନ୍ ମାପୁରୁଦି ଉଣ୍ତିଙ୍ଗ୍ ନାଣ୍ତଲୋକା ଜିବନ୍ତି ୱେଡ଼ିକା ନିଙ୍ଗିଁଜି ୱାନାତ୍ । ଇୟା ସେବାପାଣିଦାନ୍ କ୍ରିସ୍ତଦି ସୁସମାଚାର୍ତି ଉଣ୍ତିଙ୍ଗ୍ ମି ବିସ୍ବାସ୍ ଉଣ୍ତିଙ୍ଗ୍ ମାରି ୱିଜେରି ୱାଲେ ମିସାଜି ମିର୍ ଏମେ ନାଣ୍ତସିନିକା ତର୍ତିମାନିଦେର୍, ଆୟାଇଣ୍ତିଙ୍ଗ୍ ୱାର୍ ମାପୁରୁଦି ଦନ୍ୟବାଦ କିନାର୍ । ମି ଉଣ୍ତିଙ୍ଗ୍ ମାପୁରୁଦି ନାଣ୍ତ ଦୟା ଉଣ୍ତିଙ୍ଗ୍ ୱାର୍ ନାଣ୍ତ ୱେଡ଼ିକାଦାନ୍ ପାର୍ତନାଦୁ ମିଙ୍ଗିଁ ଏତ୍କିନାର୍ । ରାଦୁ, ମାପୁରୁଦି ଆର୍ଏସିତିମାନି ଦାନ୍ ଉଣ୍ତିଙ୍ଗ୍ ୱାନିଙ୍ଗ୍ ଦନ୍ୟବାଦ୍ କିନାଟ୍ !
ମାପୁରୁଦି ସତ୍ ବାକ୍ୟ. Copyright © 2020 The Word for the World International and Konda Porja Translation Samithi, Dasamanthpur, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.