Tơs Sơđah Jơno Ndăp 22

1Pơnjăt bơh gư̆n, cro gơndrơh gư̆n sơđah ma ăñ rbong dà jơno jîng, ang gơcrà gư̆ptî krơh ang, hua tơlôh bơh sơban Yang Tơm Trồ dê gư̆m Belàt Kon dê 2ăm tĕdơ nhòng gung dơng ƀòn dơng. Đah madô gư̆m đah manăy rbong dê la sî jơno jîng e tơlôh jư̆t-bea măt ple, tơlôh ple sî jăt kơp kơnnhe, hôm nha sî lơi ngui ma bră sămƀeah lơ̆gay lơgơ dê. 3Rơp ơ̆ hôm jơno sràt-rma găy te, gừn sơban Yang Tơm Trồ dê gư̆m Belàt Kon dê rơp ăm nơ̆m ƀòn dơng, hôm lơ̆gay dê̆-gơna Kơnràñ rơp duh bră Kơnràñ. 4Ƀòn gô rơp tơmpơl măt Kơnràñ, gừn sơnăn Kơnràñ ăm cŭng klieng ƀòn gô. 5Rơp ơ̆ hôm brê tơmăng te, kơp cro ơ̆ tom kă ngui bơh ang oềs đeng hala ang măttơnge, bơh Yang la Yang Tơm Trồ rơp bơang-ang ma ƀòn gô, gư̆m ƀòn gô rơp ăt-bồ trôh dî miek miek, ơ̆lơ̆ ơ̆lŭi.

6Sŏng gư̆n cro gơndrơh gư̆n tơs î ăñ: “Lơ̆gay jơno dô la păl don nên-nôn gư̆m tơpăt-ngăn. Yang, la Yang Tơm Trồ lơ̆gay hwîng-nùs lơ̆gay cro gơnoăr hwơ, sŏng pơđơ cro gơndrơh Kơnràñ sơđah ma lơ̆gay dê̆-gơna Kơnràñ lơ̆gay bră păl tơlôh trôh dubă khơñ ngăn.” 7“Lăng tò! Ăñ ndăng trôh dubă khơñ ngăn! Lơnge ma cro prăp jư lơ̆gay jơno gơnoăr-hwơr sră dô.”

8Ăñ, la Jăng, kŭng la cro tơmpơl gư̆m kơnău lơ̆gay bră dô. Tơm tô̆ ăñ sŏng kơnău gư̆m tơmpơl, ăñ tơmbĭc să nteàh lơi duh-khoai ƀăt sî jư̆ng cro gơndrơh dê, la cro gơndrơh sŏng sơđah ma ăñ lơ̆gay bră gư̆n. 9Hôm cro gơndrơh gư̆n tơs î ăñ: “Bư̆ng lơh tîgư̆n! Ăñ la cro lơh duh bră băl î mê, gư̆m î lơ̆gay oh mi mê dê, la kơp cro gơnoăr-hwơr băl î lơ̆gay cro prăp jư lơ̆gay jơno nhòng sră dô. Duh-khoai cĕ Yang Tơm Trồ!”

10Sŏng gư̆n gô tơs î ăñ: “Bư̆ng kơl lơ̆gay jơno gơnoăr-hwơr nơ̆m sră dô, bơh tô̆ tơnge ndăng ăm en lờt. 11Cro lơh bờk, kư̆ lơi lơh bờk. Cro sơmơ̆-sơmĭñ, kư̆ lơi sơmơ̆-sơmĭñ. Cro tơpăt-durư̆ng, kư̆ lơi lơh jơno tơpăt-durư̆ng. Cro găy sang-goh, kư̆ lơi dî sang-goh.” 12“Lăng tò! Ăñ ndăng trôh dubă khơñ ngăn, gư̆m iyà phăn-ƀan Ăñ jê jăt băl î Ăñ, lơi kla ma kơp cro jăt gư̆ptî lơ̆gay bră lơh cro gư̆n dê la amơh. 13Ăñ la Alpha î Ômega, la bơhsơm î lŭi-dơ̆t, la sơntơm î trôh dî ma-ngkơi. 14Lơnge ma tơmpôl cro pîh ao yơ mơ̆n lơi ƀòn gô rơp dî gơnoăr trôh nơ̆m sî jơno jîng gư̆m swà găn lơ̆gay mpông mơ̆t nhòng ƀòn dơng. 15Đah makin la tơmpôl său, tơmpôl gru bơjô, cro rês-àr bơnan, cro tơngsơ̆t cro, cro duh-khoai rồp-ràk, băl î lơ̆gay cro ham-kơñ gư̆m lơh jơno blăc-pơlum.

16Ăñ, la Jesu, sŏng pơđơ cro gơndrơh Ăñ jê lơi lơh cư̆ng ma mê lơ̆gay bră gư̆n băl lơ̆gay hîh jư̆m goh. Ăñ la tơm-rieh gư̆m kon so Dabit dê, la sơmăñ ang gơcrà.”

17Yang Hwîng gư̆m Bo-ua mhăy tơs lah: “Trôh cĕ!” Cro găy kơnău, kŭng tơs cĕ: “Trôh cĕ!” Cro găy tơhiê, trôh cĕ. Cro găy kơñ, dưñ-lăñ cĕ dà jơno jîng dubă dờp gời.

18Ăñ lơh cư̆ng ma kơp cro kơnău lơ̆gay jơno gơnoăr-hwơr nơ̆m sră dô, lah: Dilah cro găy bơtăl jơno găy nhòng sră dô, gừn Yang Tơm Trồ rơp bơtăl ma cro rơ̆ kơp jơno rŭng-rai dî cêh nơ̆m sră dô. 19Dilah cro găy koh lơi căư bơh kơp jơno nơ̆m sră cro gơnoăr-hwơr dô gừn Yang Tơm Trồ rơp tă pơnah cro rơ̆ dê bơh anẵu sî jơno jîng gư̆m bơh nhòng ƀòn dơng sang-goh dî cêh nơ̆m sră dô.

20Bơtao lơh cư̆ng lơ̆gay bră dô tơs: “Ngăn! Ăñ ndăng trôh dubă khơñ ngăn.” Amen! Khoai Yang Jesu, dăn trôh khơñ cĕ!

21Dăn jơno sơmah Yang Jesu dê ăm băl î lơ̆gay cro sang-goh. Amen.