Tơs Sơđah Jơno Ndăp 21

1Pơnjăt bơh gư̆n, ăñ tơmpơl trồ mhăy gư̆m ù mhăy, bơh trồ dơ̆ sơm gư̆m ù dơ̆ sơm sŏng roh lờt, mà dàlîng gừn kŭng ơ̆ hôm te. 2Sŏng gư̆n ăñ tơmpơl ƀòn dơng sang-goh, rơ̆ Jerusalem mhăy, jư bơh anẵu Yang Tơm Trồ cŭngsî trồ, dî mhơ̆ să gư̆ptî du hôi bo-ua bơka să lơi ma bo-klo mơ̆n. 3Ăñ kơnău du jơno tơs dơng bơh anẵu sơban, lah: “Lăng tò! Kơjang bơdơh Yang Tơm Trồ dê ăm băl î kon-mơnùs, gừn Kơnràñ rơp jîng î ƀòn gô, gừn ƀòn gô rơp la lang bol Kơnràñ, gư̆m să tơm Yang Tơm Trồ rơp ăm băl î ƀòn gô. 4Kơnràñ rơp jut lơ̆ dà măt bơh sơ măt ƀòn gô, gư̆m jơno sơ̆t rơp ơ̆ hôm te, kŭng ơ̆ hôm moat-jrum, hala ñim alô̆ng, hala jê-kơkua. Ƀòn gô rơp ơ̆ hôm te; bơh lơ̆gay bră bơh lai sŏng roh lơ̆ lờt.” 5Sŏng gư̆n Bơtao nggui cŭngsî sơban tơs: “Lăng dô! Ăñ lơh mhăy lơ̆gay jơno.” Kơnràñ kŭng tơs î ăñ: “Păl cêh wăl, bơh lơ̆gay jơno dô la păl don nên-nôn gư̆m tơpăt-ngăn.” 6Kơnràñ kŭng tơs î ăñ: “Lơ̆gay bră gư̆n sŏng lờt! Ăñ la Alpha î Ômega, la bơhsơm î dơ̆t-lŭi. Cro găy tơhiê, Ăñ rơp e ñô gời bơh sơdieng dà jơno jîng. 7Cro găy pha-lĭn rơp dưñ-lăñ lơ̆gay jơno dô, gừn Ăñ rơp la Yang Tơm Trồ gô dê, hôm gô rơp la kon ăñ jê. 8Mơya gôtrê ma pơnah tơmpôl cro ơ̆ khơ̆n-sa, cro ơ̆ don, cro sơmơ̆ kơkiê, cro tơngsơ̆t cro, cro sơlăp-sơbêl, cro lơh gru bơjô, cro duh-khoai rồp-ràk, băl î lơ̆gay cro tơs blăc, anẵu ăm ƀòn gô dê la nơ̆m brŏng jrô dî su oềs sa bơh î oềs gư̆m sieu, mà gư̆n la jơno sơ̆t dơ̆ bea.”

9Sŏng gư̆n du hôi nhòng poh hê cro gơndrơh trôh, la bơh lơ̆gay cro gơndrơh dî poh jrồ ăn bîng poh jơno rŭng-rai lŭi-dơ̆t, gừn cro gơndrơh gư̆n tơs î ăñ, lah: “Trôh cĕ madô, ăñ rơp e ma mê tơmpơl ƀan, bo-ua Belàt Kon dê.” 10Pơnjăt bơh gư̆n, gô lơboh ăñ swà nơ̆m Yang Hwîng trôh du-lăm nơ̆m yồ dơng gư̆m yơng, sŏng gư̆n sơđah ma ăñ ƀòn dơng sang-goh Jerusalem jư nteàh bơh cŭngsî trồ anẵu Yang Tơm Trồ, 11tom jơno gơklŏ Yang Tơm Trồ dê, ang tơ crà ƀòn dơng dê durư̆ng băl gư̆ptî lô̆ mang ngăn, gư̆ptî lô̆ sơna tơcrà sang-ngơt sơntu gư̆ptî krơh, 12ăt-bồ piê cơkhă dơng gư̆m yơng, dî jư̆t-bea lăm mpông băl î jư̆t-bea hê cro gơndrơh jư anẵu lơ̆gay mpông, gư̆m lơ̆gay sơnăn dî cêh cŭngsî mpông, mà gư̆n la sơnăn jư̆t-bea nŏk-noi lơ̆gay kon so Israel dê. 13Păy-lăm mpông ăm mađah măttơnge tơlôh, păy-lăm mpông ăm mađah mađư̆ng, păy-lăm mpông ăm mađah mađăm, gư̆m păy-lăm mpông ăm đah măttơnge ñăp. 14Piê ƀòn dơng dî jư̆t-bea lăm mơnang, cŭngsî gư̆n la jư̆t-bea sơnăn jư̆t-bea hê cro gơnoăr mơntău dơng Belàt Kon dê. 15Cro gơndrơh ndăng tơs î ăñ dî du ƀĕ mư̆ng thươk tău lơh bơh màh lơi gô digơlăn tău ƀòn dơng, lơ̆gay mpông ƀòn dơng gư̆m piê ƀòn dơng. 16Ƀòn dơng dî tău dơnău puôn đah durư̆ng băl, đah lơmŏng ƀòn dơng dê durư̆ng î đah dơng tang ƀòn dơng dê. Cro gơndrơh gư̆n tău ƀòn dơng î mư̆ng thươk, dî jư̆t-bea rbô ettađơ: đah lơmŏng, đah dơng tang î đah yơng ƀòn dơng dê la durư̆ng băl. 17Gô kŭng tău piê ƀòn dơng, kơ̆mbăl du-rhieng puôn-jư̆t puôn tăl jăt jơno wêh jăt dơnău tău kon-mơnùs dê (mơya kŭng la cro gơndrơh dê). 18Jơno băt-tơngñă piê ƀòn dơng dê la lô̆ kẵu sơna mang, hôm ƀòn dơng gừn lơh bơh màh ngăn, gư̆ptî krơh sang-ngơt. 19Lơ̆gay mơnang piê ƀòn dơng dî bơka niem bơh î wêl-tăl lô̆ mang. Mơnang dơ̆ sơm la lô̆ sơna mang, dơ̆ bea la lô̆ mang tơliê trồ, dơ̆ păy la lô̆ kĕ mang, dơ̆ puôn la lô̆ mang tơliê khơ̆, 20dơ̆ prăm la lô̆ kĕ brông, dơ̆ pro la lô̆ mang brông, dơ̆ poh la lô̆ mang lơngềt, dơ̆ pham la lô̆ mang tơliê dà, dơ̆ sơ̆n la lô̆ mang kĕ pơ̆t-dư̆m, dơ̆ jư̆t la lô̆ mang crà tơliê, dơ̆ jư̆t-dul la lô̆ mang pơ̆t-dư̆m tơliê, dơ̆ jư̆t-bea la lô̆ mang pơ̆t-dư̆m. 21Jư̆t-bea mpông la jư̆t-bea ne-lô̆ acŏng mang; gôtrê î kơp lăm mpông gừn dî lơh bơh du ne-lô̆ acŏng mang ne dơng, hôm nơ̆m gung ƀòn dơng lơh bơh màh ngăn, gư̆ptî krơh sang-ngơt. 22Ăñ ơ̆ tơmpơl tom hîh duh-khoai găy nơ̆m ƀòn dơng, bơh Yang la Yang Tơm Trồ, Bơtao Gơnoăr Dơng Rlo Lơ̆gay băl î Belàt Kon la hîh duh-khoai ƀòn dơng dê. 23Ƀòn dơng-ơ̆ kă tom măttơnge hala mătkhe lơi bơang-ang ma ƀòn dơng, bơh jơno gơklŏ Yang Tơm Trồ dê bơang-ang ƀòn dơng, hôm jơno ang ƀòn dơng dê la Belàt Kon. 24Lơ̆gay lang bol rơp swà eo ma kơnơm bơh jơno ang ƀòn dơng gư̆n dê, gư̆m lơ̆gay bơtao cŭngsî ple-ù iyà jơno gơklŏ mơ̆n nơ̆m gư̆n. 25Kơp nge, kơp mpông dơng-ơ̆ tom dơ̆ găy kơl ờ, bơh ơ̆ tom brê tơmăng anẵu gư̆n. 26Kơp cro rơp iyà jơno gơklŏ gư̆m jơno ryŭ-ryơ̆m lơ̆gay lang bol dê nơ̆m gư̆n, 27mà jơno găy sơmơ̆-sơmĭñ hala cro lơh bră sơmơ̆ kơkiê gư̆m blăc pơlum rơp ơ̆ tom dơ̆ găy mơ̆t nơ̆m ƀòn dơng, nư̆ng sî tơmpôl cro găy dî cêh nhòng sră jơno jîng Belàt Kon dê.