Philip 2

1Gư̆n-jîng dilah nơ̆m Yang Dŏng-Klàs dî jơno mơ̆ndơm-mơ̆nieng găy, dilah dî jơno bơtrôt mơ̆ndơm-mơ̆nieng găy nơ̆m jơno kơñ-kơloh, dilah dî jơno tơmklăc-băl găy nơ̆m Yang Hwîng, dilah dî nùs kơloh î jơno kơñ-kơloh găy, 2gừn lơh wêl-tăl cĕ nơ̆m jơno hơn-sờ ăñ jê, gư̆n la oh mi rôh lŏ tom du nùs-kơlôi, tơm tô̆ tom du jơno kơñ-kơloh, dubă băl nơ̆m nùs-kơlôi, kơlôi-sơnư̆ng băl bơh du jơno. 3Bư̆ng lơh jơno găy bơh nùs cơlah dêh hala bơh jơno gơklŏ ơ̆ kwơ, mơya, bơh nùs tơng-êt să, lăng cro nde la dơng mang rlo î mơ̆n, 4kơp cro ơ̆ nư̆ng kơlôi-rcăng trôh công nha dêh mơ̆n dê, mà hôm păl kơlôi-rcăng công nha lơ̆gay cro nde dê te. 5Păl tom nùs-kơlôi gư̆p tîgư̆n nhòng oh mi rôh lŏ, kŭng la nùs-kơlôi nơ̆m Yang Dŏng-klàs Jesu,

6la Bơtao tơmtoh nơ̆m rồp-să Yang Tơm Trồ,

sŏng ơ̆ lăng jơno păl kadăm prăp jư băl la jơno durư̆ng băl î Yang Tơm Trồ.

7Gôtơblơ̆ wăl, Kơnràñ sŏng lơh dêh ma mơ̆n sơlôh hwơng gời tơm tô̆ dưñ cù rồp-să gư̆ptî cro dê̆,

dî bơda nơ̆m rồp-să gư̆p kon-mơnùs, gư̆m dî lăng tơmpơl nơ̆m rồp-să gư̆p du hôi cro.

8Kơnràñ sŏng tơng-êt dêh să mơ̆n nteàh tơm tô̆ kŏng

don dẵư trôh dî sơ̆t, tien gơs sơ̆t cŭng sî pư̆ng.

9Tài bơh Yang Tơm Trồ kŭng sŏng pồ tơngyơng Kơnràñ lêh cŭngsî yơng ngăn

gư̆m sŏng e ma Kơnràñ sơnăn cŭngsî kơp sơnăn;

10lơi kơnău trôh sơnăn Yang Jesu

jơh lơ̆gay krô̆ng cŭngsî trồ, nơ̆m teàh ù, mateah ù te, păl cun nteàh,

11gừn kơp lơm-piet rơp tơs sơđah lah Yang Dŏng-klàs Jesu la Yang

lơh jơno gơklŏ gôtrê ma Yang Tơm Trồ, la Bàp.

12Gư̆n-jîng, ơ lơ̆gay cro kơñ-kơloh ăñ jê, jăt gư̆p jơno oh mi rôh lŏ sŏng lơh-jăt jơno, tơm tô̆ ơ̆ nư̆ng ăm nơ̆m jơno tơmtom ăñ jê, mơya jơ dô sơlơ khăi rlo nơ̆m jơno ha-ău măt ăñ jê, oh mi rôh lŏ păl kư̆ lơh-jăt jơno sơmah dŏng-klàs mơ̆n dê î jơno duh kơ̆mbrit gư̆m ntơ-să. 13Bơh Yang Tơm Trồ la Bơtao ndăng lơh bră nơ̆m oh mi rôh lŏ, lơi ñăm nùs-kơñ ñăm lơh jăt Jơno Niem-nùs Kơnràñ dê. 14Lơh cĕ kơp bră mà ơ̆ ƀoah-yoam hala tơm bơgat băl, 15lơi oh mi rôh lŏ dî sơlôh jîng lơ̆gay kon so ơ̆ anẵu găy ƀoah đas î tơpăt-ngăn Yang Tơm Trồ dê, ơ̆ sồt-rmañ ăm tĕdơ nŏk-noi rkwêt-rkwe î jăk tơmdră, mà anẵu gư̆n oh mi rôh lŏ bơang ang gư̆ptî lơngkòt oềs đeng nơ̆m dunya, 16tơm tô̆ jư kơđư̆ng dẵư jơno jîng, bơh jơno tơngyơng să ăñ jê nơ̆m nge Yang Dŏng-klàs dê gư̆n la ăñ sŏng ơ̆ cơplŏk nhòng ơ̆ kwơ, kŭng ơ̆ sơòs-sơngeh dubă pơle roh-gơi. 17Mơya bulah tien gơs ăñ kŏng tôh mham lơi bŏng cŭngsî jơno pơn-dư̆ng ăn gư̆m jơno ăn jơno don oh mi rôh lŏ dê, gừn ăñ kŭng sơhờp gư̆m hơn-sờ băl î jơh lơ̆gay oh mi rôh lŏ. 18Oh mi rôh lŏ kŭng gư̆p tîgư̆n, sơhờp-sờhơn cĕ gư̆m hơn-sờ băl î ăñ.

19Nơ̆m Yang la Yang Jesu, ăñ kơp kơñ pơyoa khơñ Timôthe trôh còp oh mi rôh lŏ, lơi ăñ kŭng dî mơ̆ndơm-mơ̆nieng ngglăm nùs tơm tô̆ kơnău khăi jơno bơh oh mi rôh lŏ. 20Bơh ăñ ơ̆ tom dî cro nde găy du nùs băl gư̆ptî gô, la cro dî nùs tơpăt-ngăn kơlôi-rcăng lơ̆gay jơno dî kwơ gôtrê bơh oh mi rôh lŏ, 21bơh lơ̆gay tơmpôl nde jôi jăt lêh lơ̆gay jơno dî kwơ dêh ma mơ̆n, ơ̆-iyŏ lơ̆gay jơno gôtrê ma Yang Dŏng-Klàs Jesu. 22Mơya oh mi rôh lŏ kŭng gư̆t nùs-nhơ̆m gô dê, bơh gư̆ptî bàp î kon, gô sŏng duh bră ma Jơno Niem băl î ăñ. 23Gư̆n-jîng ăñ kơp kơñ pơđơ gô tơm jơ ăñ gư̆t jơno bră mơ̆n dê rơp mơmơh tîgay; 24Mơya ăñ don nên-nôn ngăn anẵu Yang lah să tơm ăñ kŭng rơp trôh khơñ swà còp oh mi rôh lŏ. 25Pơnah nde, ăñ kơlôi păl pơyoa Eppaphôđik trê wăl ma oh mi rôh lŏ, gô la cro oh mi î bơyô lơh bră băl kŭng la cro bơyô ăñ jê, la cro pơdơ bơh oh mi rôh lŏ î la cro dŏng bră ma jơno ăñ dê, 26bơh đăl gư̆t lah gô jơh nùs kơp kơñ dî ăm băl î lơ̆gay oh mi rôh lŏ, gư̆m tơmpơl moat-jrum bơh oh mi rôh lŏ sŏng kơnău lah gô kòp jê. 27Bơh ngăn la gô kŏng kòp mơñ sơ̆t, mơya Yang Tơm Trồ sŏng kơñ-kơloh gô, mà ơ̆ dî nư̆ng du hôi gô gời ơ̆h, mơya hôm băl î ăñ te, lơi ăñ ơ̆ kŏng jơno moat-jrum sơlơ bơtăl jơno moat-jrum te. 28Gư̆n-jîng, ăñ kơp kơñ pơđơ khơñ gô swà, lơi tơm jơ tơmtom wăl gô, oh mi rôh lŏ digơlăn sơhờp-sờhơn, gừn ăñ kŭng rai dî jơno moat-jrum. 29Gư̆n-jîng, păl wă-rẵu gô nơ̆m Yang bơh î lơ̆gay jơno hơn-sờ, mơya păl dî nùs kingam lơ̆gay cro găy gư̆ptî gư̆n, 30tài bơh bră Yang Dŏng-Klàs dê mà gô tien gơs mơñ thô sơ̆t, tơm tô̆ phi jơno jîng mơ̆n lơi digơlăn lơh wêl-tăl pơnah ơ̆ gơhuc nơ̆m jơno duh bră oh mi rôh lŏ dê ăn ma ăñ.