Philip 1

1Pol î Timôthe, dê̆-gơna Yang Dŏng-Klàs Jesu, pơyoa ma lơ̆gay cro sang-goh ngglăm Yang Dŏng-Klàs Jesu la lơ̆gay don Yang ăm nơ̆m ƀòn dơng Philip, băl î lơ̆gay cro gơnoăr bơtău gư̆m cro dŏng bră. 2Dăn jơno sơmah î jơno lơngăp-lơnge bơh Yang Tơm Trồ, la Bàp î Yang ƀòn mơ̆n, la Yang Dŏng-Klàs Jesu ăm băl î oh mi rôh lŏ.

3Ăñ ưnngai Yang Tơm Trồ ăñ jê nơ̆m lơ̆gay jơno sơdơ sơ ieng trôh oh mi rôh lŏ, 4nơ̆m lơ̆gay jơno hôi-dăn mơ̆n dê e ma jơh lơ̆gay oh mi rôh lŏ, ăñ ăn jơno hôi-dăn miek băl î nùs hơn-sờ 5tài bơh jơno dî pơnah băl oh mi rôh lŏ dê nơ̆m Jơno Niem bơh nge sơm trôh dî jơ dô; 6bơh don nên ngăn bơh jơno dô, lah Bơtao sŏng sơntơm lơh bră niem nơ̆m oh mi rôh lŏ rơp lơh wêl-tăl te trôh dî nge Yang Dŏng-klàs Jesu dê; 7gôtrê ma ăñ, ngăn la jơno dî păl lơi kơlôi gư̆p tîgư̆n bơh jơh lơ̆gay oh mi rôh lŏ, bơh ăñ jư oh mi rôh lŏ nơ̆m nùs ăñ, jơh lơ̆gay oh mi rôh lŏ kŭng la cro lơh bră băl î ăñ nơ̆m jơno e gời, bulah nơ̆m săy-srê̆ ăñ dê, băl nơ̆m jơno tơmpẵu gư̆m jơno cư̆ng-tang ma Jơno Niem. 8Bơh Yang Tơm Trồ la Bơtao lơh cư̆ng ăñ dê, amơh tîgay ăñ kơp kơñ ngăn tơmtom jơh lơ̆gay oh mi rôh lŏ î nùs-nhơ̆m kơñ-kơloh Yang Dŏng-klàs Jesu dê. 9Gừn jơno ăñ hôi-dăn rơ̆ la jơno kơñ-kơloh oh mi rôh lŏ bîng-jut tơngkah-tơngkăñ, kư̆ sơlơ nge sơlơ bơtăl rlo te nơ̆m jơno gư̆t jăk băl î lơ̆gay jơno wơng gư̆t, 10lơi oh mi rôh lŏ digơlăn đăl gư̆t jơno găy la niem ngăn, lơi ma oh mi rôh lŏ dî lơhiê gư̆m ơ̆ anẵu găy ƀoah-đas dî trôh dî nge Yang Dŏng-Klàs dê, 11dî bîng-jut ple-bơkao jơno tơpăt-durư̆ng kơnơm bơh Yang Dŏng-Klàs Jesu, blăc lêh ma jơno gơklŏ î jơno jong-rơ Yang Tơm Trồ.

12Ơ oh mi rôh lŏ, ăñ kơñ oh mi rôh lŏ gư̆t lah, jơh lơ̆gay jơno tơmtom trôh î ăñ ngăn la sŏng tom tơlôh bơh jơno tơnggôh Jơno Niem dê. 13Tien gơs săy-srê̆ ăñ jê nơ̆m Yang Dŏng-Klàs sŏng gôjîng nê̆-năn nhòng jơh lơ̆gay tơmpôl lĭñ ăm cơkhă gơlăng bơtao băl î lơ̆gay cro nde, 14gừn gôtrê pơnah khăi oh mi rôh lŏ, kơnơm bơh săy-srê̆ ăñ jê, sŏng don kơđư̆ng nơ̆m anẵu Yang, jơh nùs lơi tơs bơtău jơno niem Yang dubă ơ̆ kơ̆mbrit. 15Bulah tien gơs du êt cro tơs bơtău Yang Dŏng-Klàs bơh jơno tơmngañ î jơno tơmdră, mơya kŭng tom cro tơs bơtău î jơno niem-nùs, 16la tơmpôl cro bơh jơno kơñ-kơloh, gư̆t lah ăñ dî pồ tă khà lơi tơmpẵu Jơno Niem, 17mơya tơmpôl cro bơh ham-hà, ƀòn gô tơs bơtău bơh Yang Dŏng-Klàs dubă ơ̆ tơpăt-ngăn, tôn bơtăl rlo te jơno sơòs-sơngeh nơ̆m săy-srê̆ ăñ jê. 18Tîgư̆n amơh? Bulah la bơh î bră tîgay, hala lơh bleh hala tơpăt-ngăn, gừn Yang Dŏng-Klàs dî tơs bơtău, gừn ăñ sơhờp-sờhơn bơh jơno gư̆n. Pơnah nde, ăñ kŭng rơp dî lơh gôjîng sơhờp-sờhơn, 19bơh ăñ gư̆t lah jơno dô rơp iyà trôh jơno dŏng-tă ma ăñ, kơnơm bơh jơno hôi-dăn oh mi rôh lŏ dê î jơno dŏng-kơl bơh Yang Hwîng Yang Dŏng-Klàs Jesu dê. 20Jăt gư̆ptî jơno sơhờp-sờhơn ăm cang î jơno cang-kơnơm ăñ jê, rơ̆ la ăñ rơp ơ̆ kŏng lơh gôjîng ƀasmôh ƀasmăt nơ̆m kơp bră găy ơ̆h, mơya khơ̆n-sa nơ̆m lơ̆gay jơno, lơi jơ dô kŭng gư̆ptî kơp jơ găy, Yang dŏng-klàs rơp dî jong-rơ nơ̆m anẵu să-jăn ăñ, dilah sơ̆t hala jîng 21Bơh gôtrê î ăñ, jîng la Yang Dŏng-Klàs, gừn sơ̆t la jơno dî kwơ. 22Hôm dilah kư̆ jîng nơ̆m poăc-să, gừn gôtrê î ăñ rơ̆ la bră dî công nha ma gơnoăr bră, gư̆n-jîng ăñ ơ̆ gư̆t mơ̆n rơp păl săc-rwơh mađah găy. 23Ăñ kŏng kađòng nhòng bea đah, tơm tô̆ kŭng kơp kơñ lơi tơlôh swà gư̆m ăm băl î Yang Dŏng-Klàs, bơh gư̆n la jơno niem rlo ngăn, 24mơya kư̆ ăm wăl nơ̆m poăc-să la jơno dî păl rlo ma oh mi rôh lŏ. 25Tơm tô̆ sŏng don nên-nôn ngăn jơno gư̆n, ăñ gư̆t lah ăñ rơp ăm wăl î hôm ăm băl miek î lơ̆gay oh mi rôh lŏ, bơh jơno teh dơng î jơno hơn-sờ nơ̆m jơno don oh mi rôh lŏ dê, 26lơi jơno niem nùs oh mi rôh lŏ dê nơ̆m Yang Dŏng-Klàs Jesu gôtrê bơh ăñ lơh ăñ kơñ trôh tơmtom oh mi duh dơ̆ te. 27Nư̆ng sî jơno oh mi rôh lŏ păl jîng dubă dî păl î jơno niem Yang Dŏng-Klàs dê, lơi bulah tơm tô̆ ăñ trôh gừn lăng swì oh mi rôh lŏ hala tơm jơ ơ̆ tom măt, gừn ăñ digơlăn kơnău bơh oh mi rôh lŏ lah oh mi rôh lŏ ñă kơđư̆ng nơ̆m du nùs băl, î du tơngoh-kơlôi băl î jơno tơmlơh bơh jơno don Jơno Niem dê, 28gừn ơ̆ kŏng tơmpôl cro tơmdră lơh sơlôh gôjîng kơ̆mbrit nơ̆m lơ̆gay kơp jơno găy. Dô la têl gôtrê bơh jơno roh-rùi ăn lơi ma ƀòn gô, mơya la têl gôtrê bơh jơno dŏng-klàs oh mi rôh lŏ dê, gừn jơno dô trôh bơh Yang Tơm Trồ. 29Kơnơm bơh Yang Dŏng-Klàs, jơno sơmah sŏng dî dờp e ma oh mi rôh lŏ ơ̆ dî nư̆ng don anẵu Kơnràñ gời ơ̆h, mơya kŭng păl kŏng jê-sồt bơh Kơnràñ te; 30tơm tô̆ dî băl jơno tơmlơh mà oh mi rôh lŏ sŏng tơmpơl anẵu ăñ, gừn jai dô ndăng iet kơnău anẵu ăñ.