Jăng 16:33

1“Ăñ sŏng tơs lơ̆gay jơno gư̆n ma oh mi, lơi oh mi klàs sơ̆ndăc-duh. 2Ƀòn gô rơp lơh ma oh mi kŏng tơmprơh bơh hîh jơnư̆m. Gư̆n rơ̆ mà tŭ jơ mơñ trôh la rcăng lơi ma kơp cro tơngsơ̆t oh mi tôn lah mơ̆n ndăng ăn jơno pơn-dư̆ng ăn duh-khoai ma Yang Tơm Trồ. 3Ƀòn gô rơp lơh lơ̆gay bră gư̆n tài bơh ƀòn gô ơ̆ gư̆t Bàp, kŭng ơ̆ gư̆t ăñ. 4Bulah tîgư̆n, ăñ sŏng tơs lơ̆gay jơno dô ma oh mi lơi tô̆ jơ ƀòn gô dê trôh, oh mi sơdơ wăl lơ̆gay jơno mà ăñ sŏng tơs ma oh mi. Pơnah nde, ăñ ơ̆ tơs lơ̆gay jơno dô ma oh mi bơh dơ̆ sơm bơh ăñ ờs ndăng ăm î oh mi. 5Hôm jơ dô ăñ swà trôh Bơtao pơđơ ăñ, gừn ơ̆ cro găy nơ̆m oh mi lùp ăñ: ‘Cro Bơtău ndăng swà sơgăy?’ 6Tơblơ̆ wăl, jơno moat-jrum sŏng bơbua bîng nùs oh mi dê tài bơh ăñ sŏng tơs î oh mi lơ̆gay jơno dô. 7Mơya, ăñ tơs ngăn î oh mi, ăñ tơlôh swà gư̆n la iyà jơno kwơ mang ma oh mi. Bơh dilah ăñ ơ̆ tơlôh swà, gừn Bơtao Mơ̆ndơm-Mơ̆nieng rơp ơ̆ trôh î oh mi. Gư̆n dilah ăñ swà, gừn ăñ rơp pơđơ Bơtao gư̆n trôh ma oh mi. 8Tơm tô̆ trôh sŏng, Bơtao gư̆n rơp bơtău tơnggư̆t ma dunya bơh tồi-glài, bơh jơno tơpăt-durư̆ng, gư̆m bơh jơno cahrña — 9bơh tồi-glài, la tài bơh ƀòn gô ơ̆ don anẵu ăñ; 10bơh jơno tơpăt-durư̆ng, la tài bơh ăñ trôh ma Bàp, gư̆n-jîng oh mi rơp ơ̆ hôm tơmpơl ăñ te; 11hôm bơh jơno cahrña, la tài bơh cro ăt-bồ dunya dô sŏng kŏng cahrña. 12Ăñ tom khăi jơno rlo lơi tơs î oh mi, mơya jơ dô oh mi ơ̆ dahrăư gư̆t wơng dî. 13Mơya tơm tô̆ Bơtao gư̆n, la Yang Hwîng Jơno-Tơpăt trôh, Kơnràñ rơp bơlăm oh mi mơ̆t nơ̆m kơp jơno-tơpăt, bơh Kơnràñ rơp ơ̆ tơs tơlôh dêh mơ̆n, mà Kơnràñ rơp tơs lơ̆gay jơno găy Kơnràñ kơnău, gư̆m Kơnràñ rơp tơs wăl ma oh mi lơ̆gay bră ndăng tơmtom trôh. 14Bơtao gư̆n rơp jong-rơ ăñ, bơh Kơnràñ rơp dưñ lơ̆gay jơno bơh anẵu ăñ sŏng rơp tơs lai ma oh mi. 15Jơh kơp jơno, lơ̆gay jơno găy Bàp dî, la gôtrê ma ăñ. Bơh tîgư̆n, ăñ tơs lah, Bơtao rơ̆ rơp dưñ lơ̆gay jơno ăñ jê gừn tơs wăl ma oh mi. 16Nơ̆m dư̆ng-iè jŏ te, oh mi ơ̆ hôm tơmpơl ăñ, gư̆n wăl ma-ngkơi dư̆ng-iè jŏ, oh mi rơp tơmpơl ăñ.” 17Ma-ngkơi gư̆n, bea păy hê cro nơ̆m khà cro bơtê Kơnràñ tơs î găp: “Bră dô la mơmơh tơm tô̆ ăñ tơs î ƀòn mơ̆n lah: ‘Nơ̆m dư̆ng-iè jŏ te, oh mi ơ̆ tơmpơl ăñ, sŏng gư̆n ma-ngkơi dư̆ng-iè jŏ, oh mi rơp tơmpơl ăñ’ gư̆m: ‘Bơh ăñ trê trôh ma Bàp’?” 18Bơh gư̆n, ƀòn gô tơs: “‘Dư̆ng-iè jŏ’ gơtha la amơh? Ƀòn mơ̆n ơ̆ gư̆t cro bơtău ndăng tơs jơno găy.” 19Yang Jesu gư̆t lah ƀòn gô kơñ lùp Kơnràñ, gư̆n-jîng Kơnràñ tơs î ƀòn gô: “Tom iyŏ oh mi ndăng jôi jăt dêh mơ̆n bơh jơno mà ăñ sŏng tơs: ‘Nơ̆m dư̆ng-iè jŏ te, oh mi ơ̆ tơmpơl ăñ, sŏng gư̆n ma-ngkơi dư̆ng-iè jŏ, oh mi rơp tơmpơl ăñ’? 20Iyŏ ngăn, iyŏ ngăn, ăñ tơs î oh mi lah oh mi rơp ñim-rèa, nhèng kơkrẵy, hôm dunya rơp hơn-sờ. Oh mi rơp moat-jrum, mơya jơno moat-jrum oh mi rơp sơlôh jîng jơno sơhờp-sờhơn. 21Nơ̆m dơ̆ cro-ua jê bơda gừn tom jơno jê-kơkua bơh jơ mơ̆n sŏng trôh, mơya tơm tô̆ sŏng bơda dî kon êt, amî-ua ơ̆ sơdơ trôh jơno sơòs-gleh mơ̆n dê te tài bơh jơno sơhờp-sờhơn bơh du hôi cro sŏng dî bơda makin nơ̆m dunya. 22Kŭng gư̆p tîgư̆n, jai dô oh mi tom jơno moat-jrum, mơya ăñ rơp tơmtom wăl oh mi, sŏng gư̆n nùs-nhơ̆m oh mi rơp dî sơhờp-sờhơn, gừn ơ̆ cro găy dưñ dî jơno sơhờp-sờhơn oh mi bơh oh mi. 23Nơ̆m nge gư̆n oh mi rơp ơ̆ lùp ăñ jơno găy. Iyŏ ngăn, iyŏ ngăn, ăñ tơs î oh mi, kơp jơno găy oh mi hôi-dăn Bàp e sơnăn ăñ, Kơnràñ rơp dờp e ma oh mi. 24Trôh dî jơ dô, oh mi hôm dahrăư hôi-dăn jơno găy e sơnăn ăñ. Păl hôi-dăn cĕ, gừn oh mi rơp dưñ dî, lơi jơno sơhờp-sờhơn oh mi dê dî bîng-tăl.

25Ăñ sŏng tơs lơ̆gay jơno dô î oh mi bơh î lơ̆gay jơno pơ̆niyô; tơm tô̆ tô̆ jơ trôh, ăñ rơp ơ̆ tom tơs î oh mi bơh î lơ̆gay jơno pơ̆niyô te, ala sơgư̆n, ăñ rơp rang sơđah ma oh mi dubă nê̆-năn bơh Bàp. 26Nơ̆m nge gư̆n, oh mi rơp hôi-dăn e sơnăn ăñ, gừn ăñ ơ̆ tơs î oh mi lah ăñ rơp hôi-dăn î Bàp ala ma oh mi, 27bơh sătan Bàp kơñ-kơloh oh mi, tài bơh oh mi kơñ-kơloh ăñ î don lah ăñ trôh bơh Bàp. 28Ăñ sŏng trôh bơh anẵu Bàp gừn sŏng trôh nơ̆m dunya. Sŏng gư̆n ăñ lơi dunya gừn trê wăl ma Bàp.” 29Lơ̆gay cro bơtê Kơnràñ dê tơs lah: “Lăng tò, jơ dô ăñ ndăng tơs dubă loh-lang, mà ơ̆ tơs bơh jơno pơ̆niyô. 30Jơ dô, ƀòn hî gư̆t lah cro bơtău gư̆t kơp jơno, gừn ơ̆ kă păl tom cro găy lùp cro bơtău. Bơh gư̆n, ƀòn hî don lah cro bơtău sŏng trôh bơh Yang Tơm Trồ.” 31Yang Jesu kla dẵư ƀòn gô lah: “Jơ dô oh mi tom don ơ̆? 32Lăng cĕ, jơ ndăng trôh — gư̆m sŏng trôh — gừn oh mi kŏng kơ̆mprah-kơ̆mprĭng, kơp du hê cro lơh-jăt gung dêh mơ̆n, hôm ăñ gừn oh mi lơi căư du hôi. Bulah tîgư̆n, ăñ ơ̆ tom ăm du hôi, bơh Bàp ăm băl î ăñ. 33Ăñ sŏng tơs lơ̆gay jơno dô ma oh mi lơi ma oh mi tom dî jơno lơngăp-lơnge nơ̆m ăñ. Oh mi tơmtom jơno rŭng-rai nơ̆m dunya, mơya bơkhê cĕ nùs, ăñ sŏng pha-lĭn dunya lờt.”