Galati 6:2

1Ơ oh mi rôh lŏ, dilah du hôi cro kŏng hăl tơmpơl nơ̆m jơno tìs-glài găy, gừn oh mi rôh lŏ la cro đah hwîng păl tơmdŏng wăl cro gư̆n î nùs tua niem-lơhơn. Tơm tô̆ lăng kơhea dêh sătan mơ̆n, kơ̆mbrit sătan mơ̆n kŭng kŏng pơlum mơ̆ndơm. 2Păl añ ơnong kơjơ̆ băl î găp, gừn bơh tîgư̆n oh mi rôh lŏ rơp lơh wêl-tăl jơno-bơlăm Yang Dŏng-Klàs dê. 3Bơh dilah cro găy kơlôi mơ̆n la du kơnă găy gư̆n, tơm jơ la ơ̆ nino găy ơ̆h, gừn cro rơ̆ blăc pơlum dêh sătan mơ̆n. 4Mơya kơp cro păl swì lăng bră lơh mơ̆n, sŏng bơh gư̆n cro rơ̆ rơp dî jơno lơi tơngyeh makin dêh gôtrê bơh sătan mơ̆n, mà ơ̆-iyŏ sơntu î du hôi cro nde găy. 5Bơh kơp cro rơp añ jơno kơjơ̆ sătan mơ̆n dê.

6Pơnah nde, cro dî bơtê gung duh-khoai păl tơmpà nơ̆m lơ̆gay jơno niem î cro ƀăn mơntău mơ̆n. 7Bư̆ng lơi kŏng blăc pơlum. Yang Tơm Trồ ơ̆ kơñ kŏng tơngyŏ-tơnghiel ơ̆h, bơh dilah cro sêh jơno găy gừn rơp koh jơno rơ̆. 8Cro sêh jăt poăc-să mơ̆n rơp bơh poăc-să koh dưñ jơno tơngroh. Hôm cro găy sêh jăt Yang Hwîng rơp bơh Yang Hwîng koh dî jơno jîng miek miek. 9Ƀòn mơ̆n bư̆ng sơòs-sơngeh tơm tô̆ lơh bră niem, bơh trôh ñăm tô̆ tơnge, ƀòn mơ̆n rơp koh dî công nha dilah ơ̆ tơblơ̆ nùs. 10Gư̆n-jîng, nơ̆m dơ̆ ƀòn mơ̆n hôm dî tô̆ lơwah, gừn ƀòn mơ̆n păl lơh bră niem ma kơp cro, mà lai ngăn la lơ̆gay cro nơ̆m hîh nhă nhòng jơno don.

11Păl lăng cĕ lơ̆gay jơno cêh dơng gư̆t nhẵư mà ăñ sŏng cêh ma oh mi rôh lŏ bơh î kơ̆mpang tê ăñ! 12Gư̆t nhẵư hê cro kơñ lơh tien pơndrơ niem nơ̆m să-jăn, ƀòn gô pơjô̆ oh mi rôh lŏ kŏng koh kato, nư̆ng lơi ƀòn gô păl klàs bơh jơno kơ̆p-cơkhă gôtrê bơh sî pư̆ng Yang Dŏng-Klàs Jesu dê. 13Bơh tien gơs sătan tơmpôl cro kŏng koh kato gư̆n kŭng ơ̆ prăp jư jơno-bơlăm, mơya ƀòn gô kơñ oh mi rôh lŏ kŏng koh kato lơi ƀòn gô digơlăn tơngyeh nơ̆m să-jăn oh mi rôh lŏ dê. 14Hôm î ăñ, dăn ơ̆ jơno găy gôjîng la jơno lơi tơngyeh să sî nư̆ng sî pư̆ng Yang Dŏng-Klàs Jesu, Yang ƀòn mơ̆n dê, tài bơh sî pư̆ng gư̆n, dunya gôtrê î ăñ sŏng kŏng pư̆ng điñ, gừn ăñ gôtrê î dunya kŭng tîrơ̆. 15Bơh ơ̆-iyŏ bră koh kato la jơno gôjîng bră găy ơ̆h, kŭng ơ̆-iyŏ bră ơ̆ koh kato, mơya jơno gôjîng bră la du jơno mon bơjîng jơno mhăy. 16Gừn dilah kơp cro găy rơp lơbà swà jăt jơno iyŏ ngăn dô, gừn dăn jơno lơngăp-lơnge î jơno kơñ-kơloh ăm nơ̆m ƀòn gô, î nơ̆m lang bol Israel Yang Tơm Trồ dê.

17Bơh dô trôh ma-ngkơi, dăn bư̆ng cro găy lơh gleh-glăr ma ăñ, bơh ăñ ndăng añ nơ̆m să-jăn mơ̆n lơ̆gay têl sồt-rmañ Yang Jesu dê.

18Ơ oh mi rôh lŏ, dăn jơno sơmah Yang ƀòn mơ̆n dê, la Yang Dŏng-Klàs Jesu ăm băl î hwîng-nùs oh mi rôh lŏ. Amen.