Galati 5:22

1Yang Dŏng-Klàs sŏng dŏng-tă ƀòn mơ̆n lơi dî khăt-gơboh. Gư̆n-jîng, păl ñă kơđư̆ng gư̆m bư̆ng kŏng dưñ añ yô cro ăm lơh dê̆ te.

2Dăn iet kơnău cĕ, ăñ, Pol, tơs î oh mi rôh lŏ lah dilah oh mi rôh lŏ păl kŏng koh kato, gừn Yang Dŏng-Klàs rơp ơ̆ iyà jơno ơ̆ kwơ găy ma oh mi rôh lŏ ờ. 3Ăñ tơs nên ngăn du dơ̆ te î kơp cro kŏng koh kato lah cro gư̆n păl prăp jư jơh lơ̆gay jơno-bơlăm. 4Oh mi rôh lŏ găy kơñ dî sơnăn la tơpăt-durư̆ng kơnơm bơh jơno-bơlăm, gừn sŏng kŏng tơmcơlah bơh Yang Dŏng-Klàs; sŏng tơlôh klàs bơh jơno sơmah. 5Gôtrê ma pơnah ƀòn mơ̆n, kơnơm bơh Yang Hwîng, ñăư jơno don, ƀòn mơ̆n sơhờp-sờhơn ăm cang jơno cang-kơnơm bơh jơno tơpăt-durư̆ng. 6Bơh nơ̆m Yang Dŏng-Klàs Jesu, jơno dơng mang ơ̆-iyŏ la koh kato hala ơ̆ koh kato, mà la jơno don dî lơh jăt kơnơm bơh jơno kơñ-kơloh. 7Oh mi rôh lŏ ờs ndăng cơplŏk niem. Cro găy sŏng cơkhă wăl oh mi rôh lŏ lơi ơ̆ dî lơh jăt jơno tơpăt-ngăn? 8Jơno pơđơ pơjô̆ gư̆n ơ̆ trôh bơh Bơtao hôi-săc oh mi rôh lŏ ơ̆h! 9Dư̆ng-iè dong lơh rô̆ lơ̆ du kơnăc kơ̆mpong. 10Nơ̆m Yang, ăñ dî nùs don nên-nôn ngăn bơh oh mi rôh lŏ, lah oh mi rôh lŏ rơp ơ̆ kơlôi-sơnư̆ng nde dêh găy. Pơnah nde, cro găy lơh cơloă tơngoh oh mi rôh lŏ rơp kŏng lơh-glài, bulah cro gư̆n la cro găy. 11Mơya, ơ oh mi rôh lŏ, dilah ăñ ndăng tơs bơtău gơnoăr koh kato gừn no-gwơh ăñ hôm kŏng kơ̆p rôn-bơklơ̆n? Dilah tîgư̆n gừn jơno lơh sơmăm tìs tài bơh sî pư̆ng sŏng dî tă lơi căư lờt. 12Ăñ tien gơs kơp kơñ tơmpôl cro lơh sơlô̆ng-sơlăng oh mi rôh lŏ rơp koh dêh să mơ̆n cĕ.

13Ơ oh mi rôh lŏ, Yang Tơm Trồ sŏng hôi-săc oh mi rôh lŏ trôh ma jơno khăt-gơboh, nư̆ng la jơno khăt-gơboh ơ̆-iyŏ lơi iyà wăl tô̆ lơwah ma nùs-nhơ̆m dê, ala bơh gư̆n, duh bră cĕ băl ma găp bơh jơno kơñ kơloh. 14Bơh jơh lơ̆gay jơno-bơlăm dî lơh wêl-tăl nơ̆m du jơno pơđơ bơlăm lah: “Kon păl kơñ-kơloh cro tĕdơ kon gư̆ptî sătan mơ̆n.” 15Hôm dilah oh mi rôh lŏ tơmkăp î lon sa mbrih găp, gừn păl kơhea cĕ, kơ̆mbrit oh mi rôh lŏ tơm tơngsơ̆t găp.

16Gôtơblơ̆ wăl, ăñ tơs tơnggư̆t lah, lơbà swà jăt cĕ Yang Hwîng, gừn oh mi rôh lŏ nên-nôn ngăn ơ̆ lơh săp nùs kơp jơno ham-kơñ să-jăn dê. 17Bơh jơno ham-kơñ să-jăn tơmdră wăl î Yang Hwîng, hôm Yang Hwîng tơmdră î să-jăn. Tài bơh bea đah tơmdră î găp gư̆n-jîng ơ̆ tom bră dilah oh mi rôh lŏ kơñ lơ̆gay jơno dô, gừn kư̆ lơh. 18Mơya dilah oh mi rôh lŏ dî Yang Hwîng tề lăm gừn oh mi rôh lŏ ơ̆ ăm nteàh gơnoăr jơno-bơlăm. 19Lơ̆gay bră lơh poăc-să dê la nê̆-năn, gô la, rês-àr bơnan, ơ̆ sang-goh, tơs-brê ƀăyƀà, 20duh-khoai rồp-ràk, hôi gru bơjô, tơmdră, tơmpìt, tơmngañ, tơcao nùs, gơjrăñ-măñ, ơ̆ tơmrơm băl, cơlah tơmpôl, 21ƀoah tơcao, mañơ̆l-lơmbẵy, jròk ñô sa băl î lơ̆gay jơno găy gư̆ptî lơ̆gay jơno gư̆n ya, mà bơh lơ̆gay bră gư̆n, ăñ tơs tơnggư̆t lai ma oh mi rôh lŏ, gư̆ptî ăñ sŏng tơs tơnggư̆t lai ƀua, lah tơmpôl găy lơh lơ̆gay bră tîgư̆n rơp ơ̆ dưñ-lăñ dî dà lơgơ Yang Tơm Trồ. 22Mơya ple Yang Hwîng dê la nùs kơñ-kơloh, sơhờp-sờhơn, lơngăp-lơnge, kŏng-ăt, kơđư̆ng sơndư̆ng, lơbăn-niem, nùs don-tơpăt, 23niem-lơhơn, gư̆t kơhea; ơ̆ tom jơno-bơlăm găy tơmdră î lơ̆gay jơno gư̆p tîgư̆n. 24Pơnah nde, tơmpôl cro gôtrê ma Yang Dŏng-Klàs Jesu sŏng pư̆ng điñ nùs-nhơ̆m poăc-să băl î lơ̆gay jơno ham-hà î jơno ham-kơñ cŭng sî pư̆ng.

25Dilah ƀòn mơ̆n jîng kơnơm bơh Yang Hwîng, gừn ƀòn mơ̆n kŭng păl lơbà swà jăt Yang Hwîng. 26Bư̆ng lơh gôjîng cro pơnhừ-să tơm tô̆ tơm mơñŏ lơh tơcao nùs găp, tơmngañ găp.