Ephesô 6:10

1Hôm cro lơh kon, don dẵư cĕ jơno mơi bàp ƀòn kon nơ̆m Yang, bơh gư̆n la jơno iyŏ ngăn. 2“Don kingam cĕ mơi bàp kon dê” (rơ̆ la jơno-bơlăm sơm ñư̆k iyà tơmjăt băl jơno hăư pơngon), 3“lơi jơno lơnge-lơngồ trôh î kon gừn kon digơlăn jîng jŏ nơ̆m ù-teàh.” 4Hôm cro lơh bàp, bư̆ng mơgă kon so mơ̆n tơcao nùs. Ala bơh gư̆n, rong-siem cĕ ƀòn gô nơ̆m jơno lơh-glài tơmal gư̆m jơno bơtău tơngkah Yang dê.

5Hôm cro lơh dê̆, don-duh cĕ cro pơnhơm jăt đah să-jăn bơh jơno kingam gư̆m ntơ-kơ̆mbrit î nùs tơpăt-ngăn mơ̆n dê, gư̆ptî gôtrê î Yang Dŏng-Klàs, 6ơ̆-iyŏ lơh bră gư̆ptî tơm jơ tom măt pơnhơm gư̆ptî tơmpôl cro kơñ lơh niem-nùs, mơya gư̆ptî cro dê̆-gơna Yang Dŏng-Klàs, lơh-jăt nùs-kơñ Yang Tơm Trồ dê î jơh nùs, 7don-duh bơh î nùs ngăc-ngăr, gư̆ptî duh bră ma Yang mà ơ̆-iyŏ ma cro nde găy ơ̆h, 8bơh gư̆t lah kơp du hôi cro, bulah cro dê̆ hala cro khăt-gơboh, dilah lơh bră niem găy, gừn cro rơ̆ rơp lăñ jơno pơnjăt gư̆p tîgư̆n bơh anẵu Yang.

9Gừn cro pơnhơm, păl lơh niem dubă tîgư̆n î lơ̆gay cro ăm lơh dê̆, tơm tô̆ bơdê bră tơng-î̀, bơh gư̆t lah Cro pơnhơm ƀòn gô kŭng la pơnhơm oh mi ndăng ăm cŭngsî trồ, gừn ơ̆ tom jơno tơmpẵu nơ̆m anẵu Kơnràñ.

10Dơ̆t-lŭi ma-ngkơi, oh mi păl pran-kơdăng cĕ nơ̆m Yang, kơnơm bơh nơ̆m gơnăp-gơnoăr pran-kơdăng Kơnràñ dê. 11Cù cĕ jơh lơ̆gay ao lòs Yang Tơm Trồ dê, lơi lơh ma oh mi rôh lŏ digơlăn ñă kơđư̆ng, tơmdră wăl lơ̆gay jơno kai-kơnĕ cà-ràk dê. 12Bơh jơno tơmlơh tơmdră ƀòn mơ̆n dê ơ̆-iyŏ la tơmdră î mham gư̆m să-jăn, mơya la tơmdră wăl lơ̆gay gơnoăr pran-kơdăng, tơmdră wăl lơ̆gay gơnoăr cahrña, tơmdră wăl lơ̆gay kơnă ăt-bồ dunya ñô̆ng kơnăm dô, tơmdră wăl lơ̆gay hwîng cà nơ̆m lơ̆gay anẵu cŭngsî trồ. 13Tài bơh jơno gư̆n, cù cĕ jơh lơ̆gay ao lòs Yang Tơm Trồ dê, lơi oh mi rôh lŏ digơlăn tơmdră nơ̆m nge rŭng-rai, î ñă kơđư̆ng-bơkhê ma-ngkơi jơ lơh sŏng lơ̆gay jơno. 14Gư̆n-jîng, ñă kơđư̆ng cĕ, păl kăt săy bơ̆t oh mi rôh lŏ bơh î jơno tơpăt-ngăn, dưñ cù cĕ ao lòs jơno tơpăt-durư̆ng dê, 15crăp sî jư̆ng jơno sơmơn lơs nơ̆m Jơno Niem lơngăp-lơnge, 16yŏk yơng khel jơno don dê nơ̆m lơ̆gay jơno, tài bơh gư̆n mà oh mi rôh lŏ rơp digơlăn pên tơngsơ̆t lơ̆gay kăm oềs cro bờk-mơsăk. 17Ngui cĕ mu lòs jơno dŏng-klàs î pàs-đao Yang Hwîng, mà gư̆n la jơno tơs Yang Tơm Trồ dê, 18tơm tô̆ hôi-dăn nơ̆m kơp dơ̆ nơ̆m Yang Hwîng kơnơm bơh lơ̆gay jơno hôi-dăn î răc-dăn, î blăc trôh lêh jơno ple-đău nơ̆m jơ kah-rngăl bơh î lơ̆gay jơno ăt-ăl gư̆m jơno hôi-dăn ala ma jơh lơ̆gay cro sang-goh, 19î ăn lơi ma ăñ, lơi jơno Yang digơlăn dờp ma ăñ, nơ̆m bră pẵư dẵư ăñ dê bơh î jơno khơ̆n-sa lơi tơs bơtău jơno ndăp-ndơ Jơno Niem dê 20(bơh Jơno Niem gư̆n mà ăñ gôjîng cro gơnoăr bơtău nhòng săy-srê̆) lơi nơ̆m jơno gleh-glăr gư̆n, ăñ digơlăn khơ̆n-sa tơs bơtău jăt gư̆ptî jơno pơnah ăñ păl tơs.

21Mơya lơi oh mi rôh lŏ kŭng digơlăn gư̆t lơ̆gay bră tơngtrôh ma ăñ, ăñ ndăng lơh jơno găy, gừn Ticikơ, cro oh mi kơñ-kơloh gư̆m cro dê̆-gơna don-tơpăt nơ̆m Yang, rơp e ma oh mi rôh lŏ gư̆t lơ̆gay bră, 22amî gư̆n la cro mà ăñ sŏng pơđơ trôh î oh mi rôh lŏ tài bơh bră dô, lơi oh mi rôh lŏ digơlăn gư̆t bơh lơ̆gay bră gôtrê bơh ƀòn hî gừn nùs oh mi rôh lŏ dî mơ̆ndơm-mơ̆nieng.

23Dăn jơno lơngăp-lơnge e ma oh mi rôh lŏ, băl î jơno kơñ-kơloh gư̆m jơno don bơh Yang Tơm Trồ, la Bàp î Yang, la Yang Dŏng-Klàs Jesu. 24Dăn jơno sơmah ăm băl î lơ̆gay tơmpôl cro kơñ-kơloh Yang Dŏng-Klàs Jesu, Yang ƀòn mơ̆n, bơh î jơno kơñ-kơloh ơ̆lơ̆ ơ̆lŭi.