1 Timôthe 1

1Pol, cro gơnoăr bơtău dơng Yang Dŏng-Klàs Jesu dê jăt jơno gơnoăr pơđơ Yang Tơm Trồ dê, Yang Dŏng-Klàs ƀòn mơ̆n, la Yang Dŏng-Klàs Jesu, jơno cang-kơnơm ƀòn mơ̆n, 2pơyoa ma Timôthe, kon ngăn ăñ dê nơ̆m jơno don: Dăn kon dî jơno sơmah, jơno kơloh-kơlài, jơno lơngăp-lơnge bơh Yang Tơm Trồ, la Bàp î Yang Dŏng-Klàs Jesu, Yang ƀòn mơ̆n.

3Jăt gư̆ptî jơno ăñ sŏng bơtău tơngkah kon lơh tơm tô̆ ăñ swà gung trôh Maseđoan, kon ăm wăl cĕ nơ̆m Ephesô lơi pơđơ ma lơ̆gay cro năy ơ̆ dî bơtău jơno pơđơ nde, 4kŭng bư̆ng kơlôi-sơnư̆ng trôh lơ̆gay jơno gơlîng-gơlang gư̆m lơ̆gay sră cêh sơnăn nŏk-noi ơ̆ lơ̆, la lơ̆gay jơno lơh gôjîng tơmbơkai ơ̆ lơh kwơ găy ma bră ăt-bồ hîh Yang Tơm Trồ, la bră lơh bơh jơno don. 5Mơya tơnggumăy jơno gơnoăr pơđơ dô la jơno kơñ-kơloh tơlôh bơh nùs sang-goh î nùs-nhơ̆m niem băl î jơno tơpăt-ngăn, 6mà du pơnah cro, bơh sơloah tơnggumăy, sŏng lơi căư lơ̆gay jơno dô lơi kơlôi trôh bră bơyê jơno wì-lơngôh, 7kơñ lơh jîng cro bơtău jơno-bơlăm, tơm tô̆ ơ̆ wơng lơ̆gay jơno sătan mơ̆n tơs hala jơno sătan gô lơh nên.

8Mơya, ƀòn mơ̆n gư̆t lah jơno-bơlăm la niem dilah cro găy ngui gô dubă niem tơpăt, 9bơh gư̆t jơno dô, gư̆n la jơno bơlăm ơ̆ dî ăn ma cro tơpăt-durư̆ng, mà e ma cro ơ̆ jăt jơno-bơlăm î cro tơmdră, cro ơ̆ don jơno î tồi-glài, cro ơ̆ don Yang î cro tìs-glài î Yang, cro tơngsơ̆t bàp î tơngsơ̆t mơi, cro tơngsơ̆t cro, 10cro rês-àr bơnan, cro-klo adoă cro-klo cro-ua adoă cro-ua, cro kơ̆p kơntô̆ng brău cro, cro tơs blăc, cro lơh cư̆ng-tang blăc, î lơ̆gay jơno nde găy tơmdră î jơno ƀăn mơntău tơpăt-ngăn, 11jăt bơh Jơno Niem gơklŏ Yang Tơm Trồ dê păl jong-rơ, la jơno mà ăñ sŏng dî jao.

12Ăñ ưnngai Bơtao e gơnoăr pran ma ăñ, rơ̆ la Yang Dŏng-Klàs Jesu, Yang ƀòn mơ̆n, bơh Kơnràñ sŏng swì nên ăñ la don-tơpăt, tơm tô̆ ăn lơi ăñ lơh nơ̆m gơnoăr bră, 13bulah bơh lai ăñ la cro tìs-glài î Yang Tơm Trồ, kơ̆p rôn-bơklơ̆n î bờk-mơsăk, mơya ăñ sŏng dî kơloh-kơlài bơh tơm tô̆ ndăng ơ̆ wơng gư̆t, ăñ sŏng lơh nơ̆m jơno ơ̆ don. 14Mơya, jơno sơmah Yang ƀòn mơ̆n la dubă tơngkah-tơngkăñ khăi ngăn băl î jơno don gư̆m jơno kơñ-kơloh nơ̆m Yang Dŏng-Klàs Jesu.

15Jơno Bơtău dô la don nên ngăn gư̆m păl dî dưñ-lăñ wêl-tăl, rơ̆ la: “Yang Dŏng-Klàs Jesu sŏng trôh nơ̆m dunya lơi dŏng-klàs cro glài” — mà nơ̆m gư̆n ăñ la cro bơlăm-găl. 16Mơya, tài bơh jơno dô ăñ sŏng dî kơloh-kơlài, rơ̆ la lơi Yang Dŏng-Klàs Jesu digơlăn sơđah tơlôh lơ̆gay nùs kŏng-ăt nơ̆m ăñ, cro glài bờk-mơsăk bơlăm-găl, gư̆ptî du rồp sơntu ma tơmpôl cro rơp don anẵu Kơnràñ lơi dî jơno jîng miek miek. 17Dăn jơno jong-rơ î jơno gơklŏ gôtrê ma Bơtao lơ̆gay kơp rai, la Yang Tơm Trồ nư̆ng dul hôm miek miek ơ̆ sơ̆t, ơ̆ tơmpơl dî trôh dî miek miek ơ̆ lôi. Amen.

18Timôthe, kon ăñ, ăñ jao jơno gơnoăr pơđơ dô ma kon, jăt lơ̆gay jơno cro gơnoăr-hwơr bơh lai sŏng tơs bơh kon, lơi kơnơm bơh gư̆n, kon digơlăn mơ̆t tơmlơh nơ̆m jơno tơmlơh dơng-ryŭ, 19tơm tô̆ prăp jư jơno don î nùs-nhơ̆m niem, mà du êt cro, bơh lơi căư, sŏng lơh jơno don sătan kŏng krăm ha-ău, 20nơ̆m khà gư̆n la Himene î Aleksandrơ, la tơmpôl cro mà ăñ sŏng phi jao ma Satan lơi ƀòn gô digơlăn bơtê gư̆t lơi ơ̆ tìs-glài î Yang Tơm Trồ.