1 Tesalônika 4

1Tîrơ̆ gư̆n, lŭi-dơ̆t, ơ oh mi rôh lŏ, ƀòn hî răc-dăn î tơngkah oh mi rôh lŏ nơ̆m Yang, la Yang Jesu, jăt gư̆ptî oh mi rôh lŏ sŏng dưñ-lăñ bơh ƀòn hî tîgay la jơno păl cang ma oh mi rôh lŏ lơi ăm jîng î lơh niem-nùs Yang Tơm Trồ, kŭng gư̆ptî jơno oh mi rôh lŏ ndăng jîng, lơi oh mi rôh lŏ digơlăn kư̆ lơh sơlơ nge sơlơ rlo te. 2Bơh oh mi rôh lŏ gư̆t lơ̆gay jơno bơtău tơs găy ƀòn hî sŏng bơtău ma oh mi rôh lŏ bơh Yang Jesu. 3Bơh dô la nùs-kơñ Yang Tơm Trồ dê, rơ̆ la jơno sang-goh oh mi rôh lŏ dê; păl jư mơ̆n pleh wĭc bơh jơno rês-àr bơnan; 4kơp cro nơ̆m oh mi rôh lŏ păl gư̆t jư să-jăn mơ̆n nơ̆m jơno sang-goh î kingam, 5Ơ̆ jăt nùs ham-kơñ să-jăn (gư̆ptî lang bol bơdih la cro ơ̆ gư̆t Yang Tơm Trồ); 6lơi ơ̆ cro găy lơh tìs î pơlum oh mi rôh lŏ mơ̆n nơ̆m jơno bră dô, tài bơh Yang la Bơtao lơh kla wăl bơh lơ̆gay jơno gư̆n, gư̆ptî ƀòn hî kŭng tơs lai sŏng î tơpăt dẵư tơs tơnggư̆t ma oh mi rôh lŏ. 7Bơh Yang Tơm Trồ ơ̆ hôi ƀòn mơ̆n trôh nơ̆m jơno sơmơ̆-sơmĭñ, mơya trôh nơ̆m jơno sang-goh. 8Gư̆n-jîng, cro găy khan lơi căư jơno bơtău pơđơ dô ơ̆-iyŏ khan lơi căư cro dê, mà la khan lơi căư Yang Tơm Trồ, Bơtao dờp e Yang Hwîng Goh Kơnràñ ma oh mi rôh lŏ.

9Hôm bơh jơno kơñ-kơloh kađie-kađieh, oh mi rôh lŏ ơ̆ kă ƀòn hî cêh ma oh mi rôh lŏ, bơh sătan oh mi rôh lŏ dî Yang Tơm Trồ bơtău păl kơñ-kơloh găp. 10Bơh ngăn, oh mi rôh lŏ tom lơh gư̆p tîgư̆n gôtrê ma lơ̆gay oh mi rôh lŏ nơ̆m lơ̆gay lơgơ Maseđoan. Mơya ơ oh mi rôh lŏ, ƀòn hî tơngkah-mơ̆ndơm oh mi rôh lŏ kư̆ lơh cĕ tîgư̆n rlo te, 11gừn păl grat ăm lơngăp-lơnge, jơdeh-jơdai lơh lơ̆gay bră mơ̆n dê, e tê tan mơ̆n lơh bră, gư̆ptî ƀòn hî sŏng bơtău oh mi rôh lŏ, 12lơi oh mi rôh lŏ digơlăn ăm jîng dî păl sơđàp măt cro bơdih î ơ̆ tom prŏi jơno găy.

13Ơ oh mi rôh lŏ, ƀòn hî ơ̆ kơñ oh mi rôh lŏ ơ̆ gư̆t jơno găy bơh tơmpôl cro ndăng bĭc, lơi oh mi rôh lŏ ơ̆ moat-jrum gư̆ptî tơmpôl cro nde la tơmpôl cro ơ̆ dî jơno cang-kơnơm. 14Bơh dilah ƀòn mơ̆n don lah Yang Jesu sơ̆t lờt gư̆m jîng wăl, gừn Yang Tơm Trồ kŭng rơp iyà tơmpôl cro bĭc lờt trôh î Kơnràñ kơnơm bơh Yang Jesu. 15Kơnơm jăt jơno Yang dê, ƀòn hî tơs jơno dô ma oh mi rôh lŏ, lah ƀòn mơ̆n, tơmpôl cro jai dô ndăng jîng, tơmpôl cro hôm ăm wăl trôh dî jơ Yang trôh wăl, nên-nôn ngăn ơ̆ swà lai tơmpôl cro bĭc lờt. 16Bơh să tơm Yang rơp bơh cŭngsî trồ jư nteàh î jơno dreo pơđơ, gư̆m jơno tơs cro gơndrơh dơng, băl î jơno kơ̆ntàs kơmbòt Yang Tơm Trồ, sŏng gư̆n tơmpôl cro sơ̆t nhòng Yang Dŏng-Klàs rơp jîng wăl lai ñư̆k. 17Tơmjăt bơh gư̆n, ƀòn mơ̆n, la tơmpôl cro nge dô ndăng jîng, tơmpôl cro hôm ăm wăl, rơp dî iyà swà băl î ƀòn gô nơ̆m khô̆k tô̆ lơi tơmtom Yang cŭngsî lơwah, gừn bơh gư̆n, ƀòn mơ̆n rơp ăm î Yang miek miek. 18Gư̆n-jîng, mơ̆ndơm-mơ̆nieng cĕ găp bơh î lơ̆gay jơno dô.