1 Kôrintô 15:58

1Ơ oh mi rôh lŏ, ăñ e tơnggư̆t nê̆ ma oh mi rôh lŏ gư̆t bơh Jơno Niem mà ăñ sŏng tơs tơnggư̆t nê̆ ma oh mi rôh lŏ, la jơno mà oh mi rôh lŏ kŭng sŏng dưñ-lăñ, gừn ñă bơkhê nơ̆m gư̆n, 2kŭng tài bơh Jơno niem rơ̆ mà oh mi rôh lŏ dî dŏng-klàs, dilah oh mi rôh lŏ kadăm prăp bơkhê jơno Yang mà ăñ sŏng tơs bơtău ma oh mi rôh lŏ, dilah ơ̆ tom iyŏ tîgư̆n, gừn oh mi rôh lŏ sŏng don dubă ơ̆ kwơ ờ. 3Bơh nơ̆m khà rơ̆ ăñ sŏng tơs wăl ma oh mi rôh lŏ lơ̆gay jơno lai ngăn, la jơno mà ăñ kŭng sŏng dưñ-lăñ, gư̆n la Yang Dŏng-Klàs sŏng sơ̆t bơh tồi-glài ƀòn mơ̆n dê jăt jơno Sră-Goh, 4Kơnràñ sŏng kŏng tăp, gừn trôh dî nge dơ̆ păy, Kơnràñ sŏng dî lơh jîng wăl jăt jơno Sră-Goh, 5mơya Kơnràñ sŏng sơđah-să ma Sepha, sŏng e ma jư̆t-bea hê cro gơnoăr bơtău dơng. 6Pơnjăt te, Kơnràñ sŏng sơđah-să e du dơ̆ te cro lăng tơmpơl rlo prăm-rhieng hê oh mi, bulah lơ̆ khăi cro nơ̆m khà ƀòn gô jơ dô kŭng hôm jîng, mơya du pơnah cro sŏng bĭc lờt. 7Ma-ngkơi gư̆n, Kơnràñ sŏng sơđah-să ma Jakơ, sŏng gư̆n e ma lơ̆gay cro gơnoăr bơtău dơng. 8Sŏng gư̆n, trôh dî lŭi-dơ̆t lơ̆gay cro dê, Kơnràñ kŭng sŏng sơđah-să e ma ăñ lăng tơmpơl, gôlơh gư̆ptî e ma du hôi kon êt bơda ơ̆ tăl kơnnhe. 9Bơh ăñ la cro ahên ngăn nơ̆m lơ̆gay cro gơnoăr bơtău dơng, la cro ơ̆ tom dî păl jơno găy lơi dî sơnăn la cro gơnoăr bơtău dơng, bơh ăñ sŏng kơ̆p-cơkhă Hîh Jư̆m Goh Yang Tơm Trồ dê. 10Mơya tài bơh jơno sơmah-sơmai Yang Tơm Trồ dê mà ăñ la să tơm mơ̆n jơ dô, î jơno sơmah-sơmai Kơnràñ dê nơ̆m ăñ ơ̆-iyŏ la ơ̆ kwơ ờ. Ala nơ̆m gư̆n, ăñ sŏng kŏng gleh-glăr lơh bră khăi rlo te lơ̆gay tơmpôl gư̆n, mơya ơ̆-iyŏ ăñ, la jơno sơmah-sơmai Yang Tơm Trồ dê ăm î ăñ. 11Mơya e bulah la ăñ hala la lơ̆gay tơmpôl rơ̆, gừn ƀòn hî sŏng bơtău tơs gư̆ptî rơ̆ gừn oh mi rôh lŏ sŏng don gư̆ptî gư̆n ya.

12Mơya, dilah Yang Dŏng-Klàs dî bơtău tơs lah Kơnràñ sŏng dî lơh jîng wăl bơh anẵu sơ̆t, gừn amơh lơh du pơnah cro nơ̆m oh mi rôh lŏ tơs lah ơ̆ tom jơno jîng wăl cro sơ̆t dê? 13Mơya dilah ơ̆ tom jơno jîng wăl cro sơ̆t dê, gừn ƀăt să tơm Yang Dŏng-Klàs sŏng kŭng ơ̆ tom dî lơh jîng wăl ya; 14mà dilah Yang Dŏng-Klàs sŏng ơ̆ dî lơh jîng wăl, gừn jơno bơtău tơngkah ƀòn hî dê la ơ̆ kwơ ờ, î jơno don oh mi rôh lŏ dê kŭng ơ̆ kwơ mang ya. 15Hôm ƀòn hî tien gơs kŏng lăng la nhẵư hê cro lơh cư̆ng-blăc bơh Yang Tơm Trồ dê, bơh ƀòn hî sŏng lơh cư̆ng Yang Tơm Trồ lah Kơnràñ sŏng lơh Yang Dŏng-Klàs jîng wăl, gư̆n-jîng dilah cro sơ̆t ơ̆ dî lơh jîng wăl, gừn Kơnràñ sŏng ơ̆ lơh Bơtao rơ̆ jîng wăl. 16Bơh dilah cro sơ̆t ơ̆ dî lơh jîng wăl, gừn ƀăt să tơm Yang Dŏng-Klàs sŏng kŭng ơ̆ dî lơh jîng wăl ờ, 17mà dilah Yang Dŏng-Klàs sŏng ơ̆ dî lơh jîng wăl, gừn jơno don oh mi rôh lŏ dê la ơ̆ kwơ; oh mi rôh lŏ kŭng hôm ăm nơ̆m tồi-glài mơ̆n. 18Gư̆n-jîng lơ̆gay cro sŏng bĭc nơ̆m Yang Dŏng-Klàs kŭng kŏng roh-rùi ya. 19Dilah anẵu Yang Dŏng-Klàs ƀòn mơ̆n dî nư̆ng jơno cang-kơnơm nơ̆m rai-jîng dô, gừn nơ̆m lơ̆gay kon-mơnùs, ƀòn mơ̆n la lơ̆gay cro dî păl kơloh-kơlài rlo lơ̆gay cro.

20Mơya jơ dô, Yang Dŏng-Klàs sŏng dî lơh jîng wăl bơh anẵu sơ̆t, la ple găl năm nơ̆m lơ̆gay cro sŏng bĭc. 21Tài bơh nơ̆m du hôi cro mà tom jơno sơ̆t, gừn kŭng bơh du hôi cro mà tom jơno jîng wăl cro sơ̆t dê. 22Bơh gư̆ptî nơ̆m Ađam, lơ̆gay cro kŭng sơ̆t, gừn kŭng tîrơ̆, nơ̆m Yang Dŏng-Klàs, lơ̆gay cro rơp dî lơh jîng wăl. 23Mơya kơp cro jăt jơno rơndăp dêh mơ̆n dê: Yang Dŏng-Klàs la ple găl năm; pơnjăt te la lơ̆gay cro gôtrê ma Yang Dŏng-Klàs nơ̆m dơ̆ trôh wăl Kơnràñ dê. 24Ma-ngkơi gư̆n rơp la jơno lŭi-dơ̆t, dơ̆ Kơnràñ jao lơgơ wăl ma Yang Tơm Trồ la Bàp, tơm tô̆ Kơnràñ sŏng tơngroh lơ̆gay gơnoăr ăt-bồ, băl î lơ̆gay gơnăp-gơnoăr gư̆m gơnoăr-pran. 25Bơh Bơtao rơ̆ păl ăt-bồ trôh dî jơ Kơnràñ sŏng ăn lơ̆gay cro tơmdră nteàh jư̆ng mơ̆n. 26Cro tơmdră lŭi-dơ̆t rơp kŏng tơngroh la jơno sơ̆t. 27Bơh “Kơnràñ sŏng ăn tăl jini-jơno jîng nteàh jư̆ng mơ̆n.” Mơya tơm tô̆ Sră-Goh tơs lah “Kơnràñ sŏng ăn tăl jini-jơno jîng,” gừn loh-lang la ơ̆ kă gư̆m Bơtao lơh lơ̆gay jini-jơno don-duh Kơnràñ. 28Jơ gư̆n, tơm tô̆ lơ̆gay jini-jơno jîng sŏng kŏng kơ̆p păl don-duh Kơnràñ, gừn tơm jơ rơ̆, să tơm Kon kŭng rơp kŏng don-duh Bơtao sŏng kơ̆p lơ̆gay jini-jơno jîng don-duh mơ̆n, lơi Yang Tơm Trồ digơlăn la lơ̆gay nơ̆m kơp jơno.

29Dilah ơ̆-iyŏ tîrơ̆, gừn tơmpôl cro kŏng lơh ƀaptem ala ma cro sơ̆t rơp lơh amơh teh? Dilah cro sơ̆t ơ̆ dî lơh jîng wăl, gừn no-gwơh, nhẵư hê cro rơ̆ kŏng lơh ƀaptem măư ma lơ̆gay cro năy? 30Sŏng gư̆n no-gwơh ƀòn hî păl kŏng gleh-glăr kơp tô̆ kơp jơ teh? 31Ăñ sơ̆t kơp nge! Ơ oh mi rôh lŏ, tài bơh jơno tơngyeh să bơh oh mi rôh lŏ, la jơno ăñ dî nơ̆m Yang Dŏng-Klàs Jesu, Yang ƀòn mơ̆n dê. 32Dilah jăt jơno nùs-kơlôi kon-mơnùs dê, ăñ sŏng tơmlơh î lơ̆gay jơno puôn jư̆ng mơsăk nơ̆m Ephesô, gừn jơno dî kwơ găy ăn lơi ma ăñ? Dilah cro sơ̆t ơ̆ dî lơh jîng wăl, gừn “Sa î ñô cĕ, bơh nge nhîng ƀòn mơ̆n sơ̆t.” 33Bư̆ng lơi kŏng cro pơlum mơ̆ndơm: “Lơ̆gay cro găp bơyô bờk hă lơh tơngroh lơ̆gay nùs tua lơbăn-niem.” 34Păl ngăc-ngăr sơdơ wăl gư̆ptî dî păl tom! Gừn bư̆ng kơñ lơh te tìs-glài. Bơh du pơnah khà cro ơ̆ gư̆t wơng jơno găy dî bơh Yang Tơm Trồ. Ăñ tơs jơno dô lơi sơđah bơh jơno ƀasmăt oh mi rôh lŏ dê.

35Mơya, du hôi cro năy rơp tơs lah: “Cro sơ̆t î dubă găy dî lơh jîng wăl teh, mà ƀòn gô trôh î pơnah să-jăn găy teh?” 36Ơ cro wì-lơngôh năy! Jơno mà oh mi iyà sêh ơ̆ dî lơh jîng wăl dilah gô ơ̆ sơ̆t. 37Î jơno oh mi iyà sêh, gừn oh mi iyà sêh tăm gừn ơ̆-iyŏ rồp đom sî, gô rơp gôjîng hon dơng, tơblơ̆ wăl nư̆ng la du-ne gơ — gôlơh gư̆ptî gô digơlăn la gơ kôi-mi hala gơ găy nde te. 38Mơya Yang Tơm Trồ hă dờp e ma gô du-lăm rồp-să lơi jăt nùs Kơnràñ kơñ, î e ma kơp du-ne gơ tăm du-lăm rồp-să dêh. 39Kŭng ơ̆-iyŏ lơ̆gay poăc-să la durư̆ng băl î găp. Tơblơ̆ wăl la poăc-să phadêh kon-mơnùs dê, poăc-să phadêh lơ̆gay jơno puôn jư̆ng dê, poăc-să phadêh lơ̆gay sêm dê, î poăc-să phadêh lơ̆gay ka dê. 40Kŭng tom lơ̆gay rồp-să cŭngsî trồ î lơ̆gay rồp-să nteàh ù. Mơya, jơno ang tơcrà gôtrê bơh trồ la tîdô, hôm jơno ang tơcrà rồp-să gôtrê nteàh ù la tî năy. 41Jơno ang tơcrà măt tơnge dê la phadêh tîdô, jơno ang tơcrà măt khe dê la phadêh tî năy, î jơno ang tơcrà lơ̆gay sơmăñ dê gừn phadêh te. Bơh sơmăñ dô dî jơno ang tơcrà phadêh bơh î sơmăñ năy ya. 42Jơno jîng wăl bơh cro sơ̆t dê kŭng gư̆ptî rơ̆ ya. Să-jăn dî sêh tăm nteàh nơ̆m jơno ờs ôm-lề, î să-jăn dî jîng wăl nơ̆m să-jăn ơ̆ ôm-lề. 43Dî sêh nteàh lăng ơ̆săp-ơ̆său, dî jîng wăl lăng ang tơcrà, dî sêh nteàh lăng la lơbăn-lơñô, dî jîng wăl lăng la pran-kơdăng. 44Dî sêh nteàh la să-jăn ờs dơm, dî jîng wăl la să-jăn đah hwîng. Dilah tom să-jăn ờs dơm, gừn kŭng tom să-jăn đah hwîng ya. 45Gư̆n-jîng kŭng tom jơno cêh lah: “Cro dơ̆ sơm la Ađam sŏng gôjîng hwîng-soan jîng.” Ađam lŭi-dơ̆t la hwîng-nùs dờp e jơno jîng. 46Mơya ơ̆-iyŏ să-jăn đah hwîng tom lai, mơya la să-jăn ờs dơm, ma-ngkơi gư̆n trôh să-jăn đah hwîng. 47Cro dơ̆ sơm dî bơjîng bơh kơ̆mbui ù, la cro gôtrê ma ù. Cro dơ̆ bea trôh bơh trồ. 48Cro tơlôh bơh ù rơ̆ tîgay, gừn lơ̆gay cro gôtrê bơh ù kŭng tîrơ̆ ya; î Bơtao trôh bơh trồ tîgay, gừn lơ̆gay cro gôtrê bơh trồ kŭng tîrơ̆ ya. 49Gư̆ptî ƀòn mơ̆n sŏng añ rồp-să cro gôtrê bơh ù dê, gừn ƀòn mơ̆n kŭng păl cang añ rồp-să Bơtao trôh bơh trồ dê.

50Pơnah nde, ơ oh mi rôh lŏ, ăñ dăn tơs jơno dô, lah rlău î mham ơ̆ dưñ-lăñ dî lơgơ Yang Tơm Trồ dê. Jơno ôm-lề kŭng ơ̆ dưñ-lăñ dî jơno ơ̆ ôm-lề. 51Lăng dô, ăñ e oh mi rôh lŏ gư̆t du-lăm jơno ndăp-ndơ: Ơ̆-iyŏ lơ̆gay ƀòn mơ̆n rơp bĭc lơ̆, mơya lơ̆gay ƀòn mơ̆n rơp dî sơlơ̆ jîng să mhăy, 52ƀăt jơ gư̆n, nơ̆m du klềp măt, tơmơ̆t dẵư kơmbòt ôh lŭi-dơ̆t. Bơh kơmbòt rơp ndrăm dơng, î lơ̆gay cro sơ̆t rơp dî lơh jîng wăl nơ̆m să-jăn ơ̆ ôm-lề, gừn ƀòn mơ̆n rơp dî sơlơ̆ jîng să mhăy. 53Bơh să-jăn ôm-lề dô ờs păl dưñ cù să-jăn ơ̆ ôm-lề, î să-jăn păl sơ̆t dô păl dưñ cù să-jăn ơ̆ tom sơ̆t. 54Sŏng gư̆n tơm tô̆ să-jăn păl ôm-lề dô sŏng dưñ cù să-jăn ơ̆ ôm-lề, î să-jăn păl sơ̆t dô sŏng dưñ cù să-jăn ơ̆ tom sơ̆t, gừn tơm jơ rơ̆, jơno sŏng dî cêh rơp tơlôh, lah:

“Jơno sơ̆t sŏng kŏng lon sa nơ̆m jơno pha-lĭn.”

55“Ơ jơno sơ̆t, jơno pha-lĭn mê dê ăm anẵu găy teh?

Ơ jơno sơ̆t, kăm mă mê dê ăm anẵu găy teh?”

56Mơya kăm mă jơno sơ̆t dê la tồi-glài, hôm gơnoăr-pran tồi-glài dê la jơno-bơlăm. 57Mơya ăn lêh ma Yang Tơm Trồ jơno ưnngai, Bơtao dờp e ma ƀòn mơ̆n jơno pha-lĭn bơh Yang ƀòn mơ̆n dê, la Yang Dŏng-Klàs Jesu! 58Bơh tîgư̆n, ơ oh mi rôh lŏ kơloh ngăn ăñ jê, păl gôjîng kơđư̆ng-bơkhê, bư̆ng lơh tăm bơgăl, tơm tô̆ miek miek nơ̆m jơno lơh bră Yang, dubă tơngkah-tơngkăñ, bơh gư̆t lah jơno bră lơh kơjơ̆-kơjùt oh mi rôh lŏ dê nơ̆m Yang ơ̆-iyŏ la ơ̆ kwơ ờ.