1 Kôrintô 14

1Tơte jăt cĕ jơno kơñ-kơloh, mơya păl ngăc-ngăr bơh lơ̆gay jơno e gời đah hwîng, mơya lai ngăn la lơi oh mi rôh lŏ digơlăn tơs hwơr. 2Bơh cro tơs dẵư crêh gừn ơ̆ tơs jơno î cro nde, mơya la tơs î Yang Tơm Trồ, bơh, ơ̆ cro găy wơng, bulah tîgư̆n, cro tơs lơ̆gay jơno ndăp-ndơ nơ̆m hwîng-nùs. 3Mơya cro găy tơs hwơr gừn tơs jơno bơ̆t bơtao, gư̆m bơtău tơngkah băl î jơno mơ̆ndơm-mơ̆nieng ăn lơi ma ƀòn mơ̆n. 4Cro găy tơs jơno crêh gừn bơ̆t bơtao să tơm gô, hôm cro găy tơs hwơr gừn bơ̆t bơtao Hîh Jư̆m Goh. 5Pơnah nde, ăñ kơp kơñ lơ̆gay oh mi rôh lŏ kŭng tơs băl jơno crêh, mà hôm rlo tîrơ̆ te, rơ̆ la oh mi rôh lŏ digơlăn tơs hwơr. Mơya cro tơs hwơr dơng mang rlo cro tơs dẵư crêh, (rlo la cro găy digơlăn rgê tơs tơlôh, bulah lơi Hîh Jư̆m Goh lăñ dî jơno bơ̆t bơtao). 6Mơya, ơ oh mi rôh lŏ, gôlơh gư̆ptî jơ dô ăñ trôh tơs lơ̆gay jơno tơs crêh î oh mi rôh lŏ, gừn ăñ rơp tơmdŏng jơno găy e ma oh mi rôh lŏ, dilah ăñ ơ̆ tơs î oh mi rôh lŏ nơ̆m jơno e tơnggư̆t hala tơngoh jăk, jăk-sai, hala î jơno tơs hwơr, hala jơno ƀăn bơtău teh? 7Tien gơs lơ̆gay jơno ơ̆ dî tơngoh kơ̆ntàs tơlôh dẵư ndrăm, bulah la gư̆ptî kŏ kơmbòt ôh hala kơñi pĕ, dilah kơp jơno ơ̆ lơh tơlôh lơ̆gay kơ̆ntàs dẵư dêh gô, rơp dî đăl gư̆t kơ̆ntàs dî cro ôh nơ̆m kŏ kơmbòt hala dẵư kơñi pĕ dî wơng gư̆t î dubă tîgay? 8Bơh dilah kơmbòt ôh tơlôh kơ̆ntàs ơ̆ loh-lang gừn mơ̆t cro găy rơp rcăng lơs e ma anẵu tơmlơh teh? 9Oh mi rôh lŏ kŭng gôlơh gư̆ptî gư̆n ya, dilah oh mi rôh lŏ e tơnggư̆t bơh dẵư lơm-piet mơ̆n sŏng e sơđah jơno tơs ơ̆ loh-lang ƀòn kơnău, gừn amơh lơh hă digơlăn wơng dî tơs dî lơ̆gay jơno teh? Bơh oh mi rôh lŏ nư̆ng la ndăng tơs jơno î cal ayua gời. 10Tom bulah ngăn la nơ̆m lơgơ dunya dô tom khăi jơno tơs phadêh, gừn ơ̆ tom dẵư tơs găy la ơ̆ dî gơtha. 11Mơya dilah ăñ ơ̆ gư̆t jơno gơtha nơ̆m du-lăm jơno tơs găy, gừn ăñ rơp la cro dà lơgơ nde jăt î cro ndăng tơs, gừn cro ndăng tơs rơ̆ rơp la cro lơgơ nde jăt î ăñ. 12Oh mi rôh lŏ kŭng gôlơh gư̆ptî rơ̆ ya, bơh oh mi rôh lŏ la lơ̆gay cro ngăc-ngăr nơ̆m lơ̆gay jơno sơmah-sơmai đah hwîng, gư̆n-jîng păl jôi jăt tom oh mi rôh lŏ dubă tơngkah-tơngkăñ kơlôi trôh bră bơ̆t bơtao Hîh Jư̆m Goh. 13Tài bơh tîgư̆n, cro tơs jơno crêh, hôi-dăn cĕ lơi mơ̆n digơlăn sơndrẵu dẵư tơs wăl. 14Dilah ăñ hôi-dăn î jơno tơs crêh, gừn hwîng-nùs ăñ jê hôi-dăn, mơya nùs tua ăñ gừn ơ̆ dî công nha găy ờ. 15Rơ̆ gừn amơh lơh dô? Ăñ rơp hôi-dăn î hwîng-nùs, mơya kŭng rơp hôi-dăn î nùs-kơlôi. Ăñ rơp đas-sờ î hwîng-nùs, mơya kŭng rơp đas-sờ î nùs-kơlôi. 16Bulah ơ̆, dilah oh mi rôh lŏ jong-rơ Yang Tơm Trồ bơh hwîng-nùs, gừn amơh lơh cro ñă nơ̆m ơdô̆ bơjư̆m cro dê ờs dơm rơp tơs “Amen” jăt î jơno ưnngai oh mi rôh lŏ dê, bơh ƀòn gô ơ̆ gư̆t oh mi rôh lŏ ndăng tơs jơno găy teh? 17Bơh bulah lah oh mi rôh lŏ ăn jơno ưnngai dubă lơbăn-niem, mơya cro nde ơ̆ dî bơ̆t bơtao. 18Ăñ ưnngai Yang Tơm Trồ lah bơh ăñ tơs khăi jơno tơs crêh khăi rlo lơ̆gay oh mi rôh lŏ, 19mơya nơ̆m Hîh Jư̆m Goh, ăñ niem rlo tơs prăm jơno tơs î nùs-kơlôi mơ̆n lơi ăñ kŭng digơlăn bơtău tơngkah lơ̆gay cro nde, rlo la lơ̆ du-rbô lăm jơno î jơno tơs crêh.

20Ơ oh mi rôh lŏ, bư̆ng lơh gôjîng gư̆ptî cro kơmom nơ̆m jơno kơlôi-sơnư̆ng mơ̆n dê. Tơblơ̆ wăl, păl lơh gư̆ptî kơmom êt jăt î jơno bờk-mơsăk, mơya lơh gôjîng cĕ gư̆ptî cro sŏng dơng nơ̆m jơno kơlôi-sơnư̆ng. 21Nơ̆m jơno-bơlăm tom jơno cêh lah: Yang tơs:

“Ăñ rơp tơs î lang bol dô

bơh lơ̆gay cro tơs khăi jơno tơs phadêh gư̆m î kơ̆mbung yôi nơ̆m lơ̆gay cro crêh măt;

mơya tien gơs gư̆ptî gư̆n, ƀòn gô kŭng rơp ơ̆ kơnău Ăñ.”

22Tài bơh tîrơ̆, lơ̆gay jơno tơs crêh lơi lơh du-lăm têl sơđah, ơ̆-iyŏ e ma cro don Yang, mơya la e ma cro hôm dahrăư don Yang, hôm cro tơs hwơr gừn ơ̆-iyŏ e ma cro dahrăư don Yang, mơya la e ma cro don Yang. 23Tîrơ̆ gừn, gôlơh gư̆ptî lơ̆ Hîh Jư̆m Goh bơjư̆m anẵu băl du noh î lơ̆gay cro tơs jơno tơs crêh, mơya cro ơ̆ dî jơno sơmah e gời hala cro hôm dahrăư don Yang mơ̆t bơjư̆m, ơ̆-iyŏ ƀòn gô rơp tơs lah oh mi rôh lŏ la cro mòs sơnrăng ờ? 24Mơya dilah lơ̆gay oh mi rôh lŏ kŭng tơs hwơr, mà du pơnah cro hôm dahrăư don Yang hala cro ờs dơm trôh mơ̆t bơjư̆m, gừn cro rơ̆ rơp dî lơ̆gay cro ƀoah-đas gư̆m dî kŏng lơ̆gay cro swì cahrña ya, 25lơ̆gay jơno pôn-ndăp nhòng nùs cro rơ̆ rơp dî jîng loh-lang, gừn bơh tîrơ̆, tơm tô̆ sŏng cun măt nteàh ù, cro rơ̆ rơp duh-khoai Yang Tơm Trồ, tơs tơnggư̆t lah Yang Tơm Trồ iyŏ ngăn ăm nhòng oh mi rôh lŏ.

26Gừn, ơ oh mi rôh lŏ, tơnggom wăl la jơno găy teh? Tơm tô̆ oh mi rôh lŏ bơjư̆m du noh wăl, kơp cro tom tơs-crih, dî jơno bơtău tơngkah, dî jơno e tơnggư̆t lai, dî dẵư tơs crêh, hala tom jơno sơndrẵu dẵư tơs wăl. Lơi cĕ lơ̆gay jơno mađàp trôh dô bră bơ̆t bơtao Hîh Jư̆m Goh. 27Tom iyŏ cro găy rơ̆ tơs dẵư crêh, gừn kơp dơ̆ nư̆ng bea hala khăi ngăn la păy hê cro, î du hôi cro păl tơs pơnjăt dơnău jơno tơs. 28Hôm dilah ơ̆ tom cro găy gư̆t tơs jơno sơndrẵu dẵư, gừn cro rơ̆ păl ăm-ƀơt nơ̆m Hîh Jư̆m Goh. Ala nơ̆m gư̆n, tơs cĕ î să tơm mơ̆n gư̆m î Yang Tơm Trồ. 29Mơya păl lơi bea hê hala păy hê cro ñă tơs lơ̆gay cro dî sơmah tơs hwơr, î lơ̆gay cro nde păl swì nê̆ jơno tơs. 30Mơya dilah e du hôi cro găy rơ̆ nde ndăng ăm nggui bơjư̆m, tom jơno găy dî e sơđah tơnggư̆t, gừn cro dơ̆ sơm păl ăm-ƀơt ƀơt. 31Bơh lơ̆gay kŭng digơlăn tơs hwơr pơnjăt kơp du hôi cro, lơi lơ̆gay cro digơlăn bơtê gư̆t î lơ̆gay cro kŭng dî bơtău tơngkah. 32Hwîng-nùs cro gơnoăr-hwơr dê păl don-duh lơ̆gay cro gơnoăr-hwơr. 33Bơh Yang Tơm Trồ ơ̆-iyŏ la jơno lơh sơlô̆ng-sơlăng dê, mơya la jơno lơngăp-lơnge dê.

Gư̆ptî nơ̆m lơ̆gay kơp Hîh Jư̆m Goh cro sang-goh dê, 34cro-ua păl ăm-ƀơt ƀơt nơ̆m Hîh Jư̆m Goh. Bơh ƀòn gô ơ̆ dî gơnoăr tơs, mơya păl don-duh, kŭng gư̆ptî jơno bơlăm bơtău. 35Mơya dilah ƀòn gô kơñ bơtê gư̆t jơno găy, gừn ƀòn gô păl lùp bo-klo mơ̆n dê ăm nơ̆m hîh, bơh jăt î cro-ua pẵư dẵư tơs nhòng Hîh Jư̆m Goh la păl ƀasmăt ngăn. 36Hala jơno tơs Yang Tơm Trồ dê tơlôh jîng bơh oh mi rôh lŏ ya? Hala jơno tơs Kơnràñ nư̆ng trôh î oh mi rôh lŏ gời ơ?

37Dilah tom cro găy kơlôi lah mơ̆n la cro gơnoăr-hwơr hala cro đah hwîng, gừn cro rơ̆ păl đăl gư̆t lah lơ̆gay jơno ăñ cêh ma oh mi rôh lŏ la gơnoăr pơđơ Yang dê. 38Mơya dilah cro găy ơ̆ đăl gư̆t tîrơ̆, gừn kư̆ lơi cro rơ̆ ơ̆ dî đăl gư̆t.

39Tài bơh tîgư̆n, ơ oh mi rôh lŏ, kơp kơñ tơs hwơr cĕ gừn bư̆ng bơkô̆ tơs jơno tơs crêh. 40Mơya lơh nên cĕ lơ̆gay bră dubă iyŏ ngăn gư̆m nơ̆m jơno dî rơndăp tăp sên.