1 Kôrintô 10:13

1Bơh ơ oh mi rôh lŏ, ăñ ơ̆ kơñ oh mi rôh lŏ ơ̆ gư̆t lah ông-pang ƀòn mơ̆n lơ̆gay sŏng ăm nơ̆m phôm tơnăng tô̆, lơ̆gay sŏng swà găn dàlîng. 2Lơ̆gay swà jăt Môise sŏng dî kŏng lơh ƀaptem, nơ̆m tơnăng tô̆ gư̆m nteàh dàlîng, 3lơ̆gay sŏng sa băl du jơno sa đah hwîng, 4gừn lơ̆gay sŏng ñô băl î du jơno ñô đah hwîng, bơh ƀòn gô ñô bơh du ne-lô̆ đah hwîng jăt mơ̆n, mà lô̆ gư̆n la Yang Dŏng-Klàs. 5Mơya Yang Tơm Trồ sŏng ơ̆ niem-nùs î khăi pơnah cro nơ̆m tơmpôl ƀòn gư̆n, gư̆n-jîng ƀòn gô sŏng kŏng bông krap madô manăy nơ̆m ƀlang-càs. 6Pơnah nde lơ̆gay jơno dô sŏng gôjîng lơ̆gay jơno sơntu ma ƀòn mơ̆n, lơi ơ̆ lơh ƀòn mơ̆n la lơ̆gay cro ham-kơñ, lơ̆gay jơno bờk-mơsăk kŭng gư̆ptî ƀòn gô sŏng ham-kơñ. 7Kŭng bư̆ng lơh gôjîng tơmpôl cro duh-khoai rồp-ràk gư̆ptî nhẵư hê cro năy nhòng pơnah ƀòn gô; tien gơs gư̆ptî tom jơno cêh lah: “Lang bol nggui nteàh lơi sa î ñô, sŏng gư̆n ñă atẵy tơm mơgă maên.” 8Ƀòn mơ̆n kŭng bư̆ng tìs-glài sơlăp-sơbêl gư̆ptî khăi cro nơ̆m khà ƀòn gô sŏng lơh tìs, tien gơs nư̆ng nhòng du-nge, tom bea-jư̆t păy rbô hê cro sŏng blă sơ̆t. 9Kŭng bư̆ng lòng nùs Yang gư̆ptî khăi cro nơ̆m khà ƀòn gô sŏng lòng Kơnràñ sŏng gư̆n kŏng tơngsơ̆t bơh beh. 10Kŭng bư̆ng rƀu gư̆ptî khăi cro nơ̆m khà ƀòn gô sŏng rƀu gừn kŏng cro tơngroh tơngsơ̆t sơ̆t. 11Mơya, lơ̆gay bră rơ̆ sŏng tơlôh ma ƀòn gô gư̆ptî lơ̆gay sơđah sơntu, mà ƀòn gô sŏng dî cêh wăl ăn lơi e ma bră tơngkah ƀòn mơ̆n, la nơ̆m tơmpôl cro mà lơ̆gay jơno lŭi-dơ̆t lơ̆gay kơp rai dê sŏng trôh lờt. 12Gư̆n-jîng, cro găy kơlôi mơ̆n ñă, ơ̆ kơhea cĕ hă blă. 13Ơ̆ tom jơno pơlum găy sŏng trôh băl î oh mi rôh lŏ nư̆ng sî jơno gôtrê ma kon-mơnùs; pơnah nde, Yang Tơm Trồ tơpăt-ngăn, la Bơtao rơp ơ̆ lơi oh mi rôh lŏ kŏng pơlum rlo ma pran oh mi rôh lŏ digơlăn kŏng, mơya î jơno pơlum gư̆n, Kơnràñ kŭng rơp pẵư jîng gung tơlôh klàs, lơi oh mi rôh lŏ digơlăn kŏng-ăt dî.

14Gư̆n-jîng, ơ oh mi rôh lŏ kơloh ngăn ăñ jê, pleh wĭc cĕ bơh sơ jơno duh-khoai rồp-ràk. 15Gôlơh gư̆ptî ăñ ndăng tơs pơđơ î tơmpôl cro jăk-sai ngăn. Oh mi rôh lŏ swì lăng dêh cĕ jơno ăñ tơs. 16Woan lơnge mà ƀòn mơ̆n ưnngai, ơ̆-iyŏ gư̆n la jơno sa dubă băl nơ̆m mham Yang Dŏng-Klàs ya? Ƀăñ mà ƀòn mơ̆n pêh, ơ̆-iyŏ gư̆n la jơno sa dubă băl nơ̆m să-jăn Yang Dŏng-Klàs ya? 17Bơh tom nư̆ng du blieng ƀăñ, gư̆n-jîng ƀòn mơ̆n, bulah khăi, nư̆ng la du să-jăn, bơh lơ̆gay ƀòn mơ̆n ngui băl nơ̆m du blieng ƀăñ. 18Ngơ lăng cĕ lang bol Israel jăt pơnah să-jăn. Ơ̆-iyŏ lơ̆gay cro găy sa jơno ăn duh-khoai la tơmpôl cro dî pơnah băl anẵu kaƀang duh-khoai ya? 19Tîgư̆n, ăñ ndăng tơs jơno găy? Jơno ăn duh-khoai rồp-ràk la jơno găy? Hala rồp-ràk la jơno găy? 20Bulah tîgư̆n, lơ̆gay jơno mà kơp lang bol bơdih ăn duh-khoai la ăn duh-khoai ma cà-ràk, ơ̆-iyŏ ma Yang Tơm Trồ. Mà ăñ ơ̆ kơñ oh mi rôh lŏ gôjîng lơ̆gay cro dî pơnah băl î lơ̆gay cà-ràk! 21Oh mi rôh lŏ ơ̆ ñô dî woan Yang gư̆m woan cà-ràk dî. Oh mi rôh lŏ ơ̆ dî ngui băl jơno nơ̆m kaƀang duh-khoai Yang dê, gư̆m nggui nơ̆m anẵu duh-khoai cà-ràk dê. 22Hala ƀòn mơ̆n mơgă maên lơi lơh Yang tơcao ya? Jơno ƀòn mơ̆n gừn pran-kơdăng rlo Kơnràñ?

23“Lơ̆gay jơno gừn dî gơnoăr,” mơya ơ̆-iyŏ lơ̆gay bră dî iyà trôh kwơ mang ờ. “Lơ̆gay jơno gừn dî gơnoăr,” mơya ơ̆-iyŏ lơ̆gay jơno iyà trôh jơno bơ̆t bơtao ma cro nde. 24Bư̆ng cro găy jôi lăng jơno kwơ mang dêh ma mơ̆n, mơya la păl jôi lăng jơno kwơ mang ma cro nde te. 25Sa cĕ lơ̆gay jơno dî kă-brău makin drà, bư̆ng kă lùp jơno găy tài bơh nùs tua. 26Bơh “ù-teàh băl î lơ̆gay jơno nơ̆m gư̆n gôtrê ma Yang.” 27Dilah kơp cro hôm dahrăư don Yang găy hôi jà oh mi rôh lŏ gừn oh mi rôh lŏ kơñ swà, gừn sa cĕ lơ̆gay jơno dî pồ lơboh sơđàp măt mơ̆n, ơ̆ lùp giga jơno găy tài bơh nùs tua. 28Mơya dilah cro găy tơs î oh mi rôh lŏ lah: “Dô la jơno ăn duh-khoai rồp-ràk,” gừn bư̆ng sa, tài bơh cro gư̆n, la cro sŏng e ma oh mi rôh lŏ gư̆t, gừn bơh nùs tua. 29Mơya ăñ tơs bơh nùs tua, ơ̆-iyŏ bơh să-jăn oh mi rôh lŏ dê, mơya la nùs tua cro gư̆n dê. Rơ̆ la no-gwơh jơno khăt-gơboh ăñ jê kŏng nùs tua cro nde cahrña dê teh? 30Dilah ăñ nggui sa băl î nùs gư̆t ưnngai, gừn amơh ăñ păl kŏng cro tơs tìs bơh jơno sa mà ăñ sŏng ưnngai teh? 31Gư̆n-jîng, bulah oh mi rôh lŏ sa hala ñô, hala lơh du-lăm bră găy gư̆n, păl lơh lơ̆gay ma jơno gơklŏ Yang Tơm Trồ dê. 32Bư̆ng lơh sơmăm tìs ma lơ̆gay cro Juđa gư̆m cro Grek î Hîh Jư̆m Goh Yang Tơm Trồ dê, 33gư̆ptî ăñ kŭng rcăng nùs dŏng bră lơ̆gay cro nơ̆m kơp bră, ơ̆ jôi jơno kwơ mang dêh mơ̆n jê, mơya la jơno kwơ mang ma khăi cro, lơi ƀòn gô digơlăn dî dŏng-klàs.